Header Ads

ທ່ານນາຍົກເນັ້ນ ວຽກງານ ຍທຂ ການລົງທຶນກໍ່ສ້າງຕ້ອງມີຈຸດສຸມ ຢ່າງມີປະສິດທິພາບແທ້ໆ!



ຕອນບ່າຍວັນທີ 22 ກຸມພາ 2017 ທີ່ຫໍປະຊຸມແຫ່ງຊາດ, ທ່ານ ທອງລຸນ ສີສຸລິດ ນາຍົກລັດຖະມົນຕີ ໄດ້ໃຫ້ກຽດເຂົ້າຮ່ວມ ແລະ ໂອ້ລົມ ຕໍ່ກອງປະຊຸມໂຍທາທິການ ແລະ ຂົນສົ່ງ (ຍທຂ) ທົ່ວປະເທດ ປະຈຳປີ 2016 ໂດຍມີບັນດາລັດຖະມົນຕີ, ຮອງລັດຖະມົນຕີ, ຮອງເຈົ້າແຂວງ, ຮອງເຈົ້າຄອງນະຄອນຫຼວງວຽງຈັນ, ຫົວໜ້າກົມ, ຮອງກົມ ຈາກຂະແໜງການທີ່ກ່ຽວຂ້ອງ,  ພະນັກງານ ຫຼັກແຫຼ່ງທົ່ວຂະແໜງການໂຍທາທິການ ແລະ ຂົນສົ່ງ ພ້ອມດ້ວຍ ຜູ້ຕາງໜ້າວິສາຫະກິດ ແລະ ຜູ້ປະກອບການ ວຽກງານໂຍທາທິການ ແລະ ຂົນສົ່ງ ເຂົ້າຮ່ວມ.


   

ກ່ອນອື່ນ, ທ່ານນາຍົກລັດຖະມົນຕີ ໄດ້ຮັບການລາຍງານຫຍໍ້ ການຈັດຕັ້ງປະຕິບັດວຽກວຽກງານ ຂອງຂະແໜງໂຍທາທິການ ແລະ ຂົນສົ່ງ ໃນໄລຍະຜ່ານມາ ກໍ່ຄື ເນື້ອໃນຂອງການ ດຳເນີນກອງປະຊຸມຄັ້ງນີ້ ຈາກທ່ານ ບຸນຈັນ ສິນທະວົງ ລັດຖະມົນຕີກະຊວງໂຍທາທິການ ແລະ ຂົນສົ່ງ ເຊິ່ງເຫັນວ່າ: ກອງປະຊຸມດຳເນີນພາຍໃຕ້ຫົວຂໍ້ “ບຸກທະລຸການແກ້ໄຂບັນຫາ ຫຍໍ້ທໍ້ຂອງຂະແໜງ ຍທຂ ຢ່າງເປັນລະບົບ” ໂດຍໄດ້ປະເມີນການຈັດຕັ້ງປະຕິບັດວຽກງານ ໃນປີ 2016 ທີ່ຜ່ານມາ ແລະ ຄົ້ນຄວ້າແຜນພັດທະ ນາພື້ນຖານໂຄງລ່າງ ປະຈຳປີ 2017; ສະຫຼຸບສັງລວມການຈັດຕັ້ງປະຕິບັດ 18 ບັນຫາພົ້ນເດັ່ນ ຂອງຂະແໜງ ຍທຂ ພ້ອມທັງຄົ້ນຄວ້າ, ປຶກສາຫາລື ແລະ ປະກອບຄຳເຫັນໃສ່ ບັນດາເອກະສານທີ່ສຳຄັນ ຈຳນວນໜຶ່ງ ເປັນຕົ້ນ ວິໄສທັດ ຮອດປີ 2030, ຍຸດທະສາດ ການພັດທະນາຂະແໜງ ຍທຂ ຮອດປີ 2025, ແຜນພັດທະນາຂະແໜງ ຍທຂ ປີ 2016-2020, ຮ່າງຄຳສັ່ງ ວ່າດ້ວຍການຄຸ້ມຄອງຄຸນນະພາບ ແລະ ລາຄາການກໍ່ສ້າງ-ສ້ອມແປງ ດ້ານ ຍທຂ ລວມທັງ ບັນຫາອື່ນໆ ທີ່ສາມາດຈັດຕັ້ງປະຕິບັດມີຜົນສຳເລັດ.


ໃນໂອກາດດຽວກັນ, ທ່ານນາຍົກລັດຖະມົນຕີ ໄດ້ໃຫ້ກຽດມີຄຳເຫັນໂອ້ລົມຕໍ່ຜູ້ເຂົ້າຮ່ວມ ໂດຍໄດ້ຍົກໃຫ້ເຫັນພາລະບົດບາດ, ຄວາມໝາຍສຳຄັນ, ສະພາບການເຕີບໃຫຍ່ຂະຫຍາຍຕົວ ຂອງວຽກງານ ຍທຂ ໃນແຕ່ລະໄລຍະ ລວມທັງ ບົດຮຽນທີ່ຖອດຖອນໄດ້, ຄຳເຫັນຊີ້ນຳທີ່ຍັງຊົງຄຸນຄ່າຂອງຜູ້ນຳລຸ້ນກ່ອນ, ການກຳນົດນະໂຍບາຍພັດທະນາພື້ນຖານໂຄງລ່າງ, ຂໍ້ສະດວກ, ສິ່ງທ້າທາຍ ຂອງຂະແໜງ ຍທຂ ໃນປະຈຸບັນ ກໍ່ຄື ອະນາຄົດ. ພ້ອມດຽວກັນນັ້ນ, ທ່ານຍັງໄດ້ຕີລາຄາສູງ ຕໍ່ຜົນສຳເລັດທີ່ຂະແໜງ ຍທຂ ສາມາດຍາດມາໄດ້ ຕະຫຼອດໄລຍະ 41 ປີທີ່ຜ່ານມາ. ພິເສດ ທ່ານນາຍົກລັດຖະມົນຕີ ໄດ້ມີຄຳເຫັນເນັ້ນໜັກໃຫ້ພະນັກງານທົ່ວຂະແໜງ ຍທຂ ເອົາໃຈໃສ່ໃສ່ຕື່ມບາງດ້ານ ເປັນຕົ້ນ ພັດທະນາພື້ນຖານໂຄງລ່າງ ໃຫ້ມີຄວາມທັນສະໄໝ, ໄດ້ຄຸນນະພາບ, ມີຄວາມເປັນລະບຽບຮຽບຮ້ອຍ-ຈົບງາມ, ນຳໃຊ້ສະດວກສະບາຍ, ປອດໄພ ແລະ ສາມາດຮັບໃຊ້ການພັດທະນາຢ່າງແທ້ຈິງ ພ້ອມທັງ ສືບຕໍ່ແກ້ໄຂປະກົດການຫຍໍ້ທໍ້ຕ່າງໆ ເປັນຕົ້ນ ບັນຫາອຸປະຕິເຫດ, ການສັນຈອນແອອັດ, ການຈອດລົດ-ການວາງຂາຍສິນຄ້າ ທີ່ບໍ່ທັນມີຄວາມເປັນລະບຽບຮຽບຮ້ອຍ…; ການກໍ່ສ້າງອາຄານ ແມ່ນໃຫ້ຮັກສາລັກສະນະຊາດ ແລະ ວັດທະນະທຳ ທັງສອດຄ່ອງກັບ ຍຸກສະໄໝ ແລະ ມີຫົວຄິດປະດິດສ້າງ; ສຸມໃສ່ພັດທະນາການຄົມມະນາຄົມທາງບົກເປັນສຳຄັນ ໂດຍສະເພາະ ໃນເງື່ອນໄຂທຶນຮອນຂອງປະເທດເຮົາມີຈຳກັດ ການກໍ່ສ້າງເສັ້ນທາງຕ້ອງມີຈຸດສຸມແທ້ໆ (ສ້າງແລ້ວໄດ້ນຳໃຊ້ໂລດ, ຮັບໃຊ້ການພັດທະນາໄດ້ເລີຍ, ບໍ່ແກ່ຍາວເວລາ), ບໍ່ຄວນລົງທຶນກໍ່ສ້າງຊະຊາຍ ເພາະພາໃຫ້ສຳເລັດຊ້າ ແລະ ນານໄດ້ນຳໃຊ້; ນໍາໃຊ້ບັນດາສົນທິສັນຍາ ແລະ ກອບການຮ່ວມມື ທີ່ປະເທດເຮົາເປັນພາຄີ ໃຫ້ເກີດປະໂຫຍດສູງສຸດ (LLDC, CLMV, ACMECs).




ພ້ອມນັ້ນ, ທ່ານຍັງໄດ້ເນັ້ນໃຫ້ຂະແໜງ  ຍທຂ ເອົາໃຈໃສ່ ປັບປຸງ ແລະ ແກ້ໄຂການສັນຈອນແອອັດ, ລະບົບ ໄຟອຳນາດ, ຄຸ້ມຄອງການນຳເຂົ້າພາຫະນະ, ການອອກທະບຽນ; ການຂົນສົ່ງສິນຄ້າ-ການສ້າງສະຖານທີ່ຄ່ຽນສິນຄ້າ ຕ້ອງຄຸ້ມຄອງຕາມລະບຽບການ ແລະ ສາມາດສ້າງລາຍຮັບໄດ້; ຄຸ້ມຄອງ ແລະ ເຄັ່ງຄັດຕໍ່ວິໄນແຜນການ-ການເງິນ; ຄຸ້ມຄອງຄຸນນະພາບ ແລະ ລາຄາການກໍ່ສ້າງ ໃຫ້ສົມເຫດສົມຜົນ, ໂປ່ງໃສ, ສາມາດກວດສອບໄດ້; ເຄັ່ງຄັດປະຕິບັດຕາມລະບຽບຜັງເມືອງ ໃຫ້ເປັນຮູບປະທຳ ຕົວຈິງ; ຖອດຖອນບົດຮຽນ ຈາກບັນດາປະເທດ ທີ່ເຂົາເຈົ້າມີຄວາມກ້າວໜ້າ, ມີບົດຮຽນທີ່ດີ ສາມາດເປັນແບບຢ່າງທີ່ເໝາະສົມແກ່ການພັດທະນາ ສປປ ລາວ;  ເຊິ່ງບັນຫາທັງໝົດເຫຼົ່ານັ້ນ, ຈະສາມາດບັນລຸຜົນສຳເລັດໄດ້ ປັດໃຈຕັດສີນກວ່າໝູ່ແມ່ນ “ຄົນ” ເຊິ່ງຕ້ອງຮັບປະກັນທາງດ້ານຈຳນວນ, ມີຄວາມຮູ້ຄວາມສາມາດທາງດ້ານວິຊາສະເພາະ, ມີຄຸນສົມບັດ-ສິນທຳປະຕິວັດ, ມີນ້ຳໃຈຮັບ ໃຊ້ຊາດ ແລະ ປະຊາຊົນຢ່າງແທ້ຈິງ.
   

ແຫລ່ງ: ຫ້ອງວ່າການສຳນັກງານນາຍົກ
ຜູ້ຂຽນ: ວັນທອງ
ວັນພຸດ, 22 ກ.ພ 2017 19:00
------------------------------------------
ໂທລະໂຄ່ງ ໃຫ້ຫຼາຍກວ່າຄຳວ່າໂຄສະນາ
LINE ID: @tholakhong | Twitter ID: @tholakhong
tholakhong@gmail.com | www.tholakhong.com





loading...

No comments

Powered by Blogger.