Header Ads

ລາຍງານເພີ່ມ ກໍລະນີລະເບີດແຕກ ທີ່ຊຽງຂວາງ ຍ້ອນລະເບີດທີ່ຝັງດິນ! ເຈັບ 14 ຄົນ, ເສຍຊີວິດ 1 ຄົນ!



ຂປລ. ແຫລ່ງຂ່າວທ້ອງຖິ່ນຈາກແຂວງຊຽງຂວາງຢືນຢັນຕໍ່ສໍານັກຂ່າວສານປະເທດລາວຫລ້າສຸດເວລາ 12:27 ນາທີຂອງວັນທີ 22 ມີນາ 2017 ນີ້ກໍລະນີລະເບີດແຕກຢູ່ແຂວງຊຽງພົບວ່າ: ມີຜູ້ໄດ້ຮັບບາດເຈັບ ແລະ ເສຍຊີວິດລວມທັງໝົດ 15 ຄົນ ໃນນັ້ນເສຍຊີວິດ 1 ຄົນເປັນເດັກນ້ອຍ, ສາຫັດ 3 ຄົນ ແລະ ບາດເຈັບເລັກນ້ອຍ 11 ຄົນ. 

ອີງຕາມພະແນກຖະແຫລງຂ່າວ ວັດທະນະທໍາ ແລະ ທ່ອງທ່ຽວແຂວງຊຽງຂວາງໄດ້ເປີດເຜີຍວ່າ: ຕອນເວລາ 11:30 ນາທີຂອງວັນທີ 21 ມີນາ 2017 ໄດ້ເກີດເຫດເສົ້າສະຫລົດໃຈ ເມື່ອນັກຮຽນຊັ້ນປະຖົມຈໍານວນຫລາຍຢູ່ບ້ານໃຫຍ່ຍອດງື່ມ ເມືອງແປກ ແຂວງຊຽງຂວາງໄດ້ເລີກຮຽນ ແລະ ພາກັນໄປຊື້ຂະໜົມ ມານັ່ງກິນຢູ່ຕໍ່ໜ້າເຮືອນເຂົາເຈົ້າເອງ ທັນໃດນັ້ນລະເບີດໄດ້ແຕກຈາກພື້ນດິນ ສົ່ງຜົນເຮັດໃຫ້ເດັກນັກຮຽນເພດຊາຍເສຍຊີວິດຄາທີ່ 1 ຄົນ ແລະ ບາດເຈັບ 14 ຄົນ ປັດຈຸບັນນີ້ 3 ຄົນຍັງຮັກສາຕົວຢູ່ຫ້ອງສຸກເສີນ. 



ທ່ານ ຕຽງ ນັກຂ່າວທ້ອງຖິ່ນແຂວງຊຽງຂວາງໄດ້ລາຍງານຈາກພາກສະໜາມວ່າ: ຈຸດລະເບີດແຕກແມ່ນເກີດຂຶ້ນຈາກພື້ນດິນເລີກປະມານ 10 ຊັງຕີແມັດຢູ່ເຮືອນຂອງເດັກຮຽນນັ້ນເອງ ຜ່ານມາເຈົ້າໜ້າທີ່ເກັບກູ້ລະເບີດໄດ້ລົງມາກວດກາ ແລະ ເກັບກູ້ໄປແລ້ວຈໍານວນຫລາຍສົມຄວນອອກຈາກເນື້ອທີ່ການຜະລິດກະສິກໍາ, ເນື້ອທີ່ການພັດທະນາ ແລະ ສະຖານການສຶກສາຢູ່ບ້ານໃຫຍ່ຍອດງື່ມ ແຕ່ເຈົ້າໜ້າທີ່ຍັງບໍ່ທັນໄດ້ເຂົ້າໄປກວດກາ ແລະ ກູ້ລະເບີດໃນພື້ນທີ່ອາໃສຢູ່ຂອງປະຊາຊົນຈໍານວນໜຶ່ງ ເນື່ອງຈາກວ່າມີບາງຄອບຄົວກໍໄດ້ປຸກເຮືອນມາຕັ້ງແຕ່ດົນແລ້ວ. 
ແນວໃດກໍດີ ທ່ານ ຕຽງ ຍັງກ່າວຕື່ມອີກວ່າ: ເຫດການລະເບີດຝັງດິນແຕກຄັ້ງນີ້ພວມສະທ້ອນໃຫ້ເຫັນເຖິງວິທີຄິດໃນການຈັດຕັ້ງປະຕິບັດ ມາດຕະການຮັດກຸມຂຶ້ນກວ່າເກົ່າໃນການລົງມືກວດກາ ຊອກຄົ້ນໃຫ້ສາມາດເຂົ້າເຖິງຈຸດທີ່ຕັ້ງເຮືອນຂອງປະຊາຊົນ ພ້ອມນີ້ກໍບໍ່ຄວນເລັ່ງໃສ່ພຽງແຕ່ເປັນເຂດຜະລິດກະສິກໍາ ແລະ ການພັດທະນາອື່ນໆ. 

ຂ່າວ: ເກີດຂວັນໃຈ ຂປລ



ຊຽງຂວາງ: ລາຍງານຈາກ ປະຊາຊົນ ໃຫ້ຮູ້ວ່າ ເວລາປະມານ 12:00 ວັນທີ 21/3/2017 ເກີດເຫດ ສະຫຼົດໃຈ, ມີລະເບີດແຕກໂດຍບໍ່ມີໃຜຫຼິ້ນ,​ ລະເບີດແຕກເອງ ເຮັດໃຫ້ສະເກັດຖືກ 6 ຄົນ. ມີ ເດັກນ້ອຍ 5 ຄົນໃນນັ້ນ ເດັກນ້ອຍຍິງເສຍຊີວິດຄາທີ່ 1 ຄົນ,  4 ຄົນເຈັບໜັກ, ແລະ ແມ່ຕູ້ອາຍຸ 50 ປີ ບາດເຈັບໜັກອີກ 1 ຄົນ. ຈຸດເກີດເຫດແມ່ນ ບ້ານໜອງເປັດ, ເຂດສາມແຍກ, ເມືອງແປກ, ແຂວງ ຊຽງຂວາງ .

ບັນຫາລະເບີດບໍ່ທັນແຕກ ຖືເປັນໄພຄຸກຄາມຊີວິດຂອງປະຊາຊົນລາວ. ອັນເປັນສິ່ງທີ່ຕ້ອງໄດ້ເອົາໃຈໃສ່ ແລະແກ້ໄຂ. ສະແດງຄວາມເສຍໃຈກັບຄອບຄົວຜູ່ເຄາະຮ້າຍ. ຮຽກຮ້ອງໃຫ້ ປະເທດທີ່ເອົາລະເບີດມາຖີ້ມປາງສົງຄາມ ຊ່ວຍເກັບກູູ້ລະເບີດ ເຫຼົ່ານີ້ ຢ່າງຈິ່ງຈັງດ້ວຍ.

ພາບແລະຂ່າວ: ປະຊາຊົນ ບ້ານໜອງເປັດ














------------------------------------------
ໂທລະໂຄ່ງ ໃຫ້ຫຼາຍກວ່າຄຳວ່າໂຄສະນາ
LINE ID: @tholakhong | Twitter ID: @tholakhong
tholakhong@gmail.com | www.tholakhong.com








No comments

Powered by Blogger.