Header Ads

ຈະໜີຈາກປະຊາຊົນໄດ້ຢ່າງໃດ ໃນເມື່ອເມືອງທ່າແຂກ ຍັງມີນັກຮົບກູ້ຊາດ ຕໍ່ສູ້ກັບສັດຕູຢູ່ ວິລະກຳ 21 ມີນາ



ວິລະກຳ 21 ມີນາ ຍັງຢູ່ໃນຄວາມຊົງຈຳ ຂອງປວງປະຊາ ຢ່າງບໍ່ມີວັນຫຼົງລືມໄດ້.

ເນື່ອງໃນ ລະນຶກ ເຫດການ ປະຫວັດສາດ ວັນຄຽດແຄ້ນຂອງປະຊາຊົນລາວ ຊາວເມືອງທ່າແຂກ 21 ມີນາ 1946 – 21 ມີນາ 2017 ຄົບຮອບ 71 ປີ.

ຂໍນຳສະເໜີ ບາງຜົນງານ ການຕໍ່ສູ້ ຕີຕ້ານຄືນ ກັບ ລັດທິລ່າເມືອງຂຶ້ນ (ຝຣັ່ງ), ດ້ວຍຄວາມພິລະອາດຫານ, ກ້າແກ່ນ,  ເດັດດ່ຽວໜຽວແໜ້ນ, ບໍ່ຍອມຈຳນົນ ຂອງນັກຮົບປະຕິວັດ.

ນັບແຕ່ວັນລຸກຮື້ຂຶ້ນ ຍຶດອຳນາດ ຈາກຟາຊິດຍີ່ປຸນ ແລະ ລັດທິລ່າເມືອງຂຶ້ນຝຣັ່ງ ໃນວັນທີ 23 ສິງຫາ 1945 ກໍຄື ວັນປະກາດເອກະລາດ 12 ຕຸລາ 1945 ເປັນຕົ້ນມາ.

ພາຍຫຼັງ ພວກຟາຊິດຍີ່ປຸ່ນ ແລະ ລັດທິລ່າເມືອງຂຶ້ນຝຣັ່ງ ປະລາໄຊ ແລະ ລາວເຮົາ ໄດ້ປະກາດເອກະລາດບໍ່ຂຶ້ນກັບ ຍີ່ປຸ່ນ ແລະ ຝຣັ່ງ ໃນວັນທີ 12 ຕຸລາ 1945 ແທນທີ່ປະຊາຊົນລາວພວກເຮົາ. ຈະໄດ້ເປັນເຈົ້າຂອງປະເທດຊາດ ແລະ ໄດ້ມີໂອກາດສ້າງສາພັດທະນາບ້ານເກີດເມືອງນອນຂອງຕົນເອງ ໃນເມື່ອ ປະເທດຊາດ ໄດ້ຫລຸດພົ້ນອອກຈາກແອກຄອບຄອງຂອງຕ່າງຊາດແລ້ວ, ແຕ່ສະພາບການພັດບໍ່ເປັນໄປຄືແນວນັ້ນ! ປະເທດລາວ ໄດ້ມີສັນຕິພາບໃນໄລຍະເວລາພຽງ 5 ເດືອນກວ່າເທົ່ານັ້ນ, ພວກລ່າເມືອງຂຶ້ນຝຣັ່ງ ໄດ້ກັບເຂົ້າມາຮຸກ ຮານລາວ ອີກເປັນຄັ້ງທີສອງ.  ພ້ອມທັງໄດ້ລະດົມພົນ ກອງກໍຳລັງທະຫານ ທັງໜ້າດິນ ແລະ ທາງອາກາດ ເປີດການບຸກໂຈມຕີ ບຽດຍຶດ ເຂົ້້າທົ່ວແຜ່ນດິນລາວ ກໍຄື ຕົວເມືອງທ່າແຂກ ແຂວງຄຳມ່ວນ ຢ່າງດື້ດ້ານ ໃນວັນທີ 21 ມີນາ 1946.

- ອັນໄດ້ເຮັດໃຫ້ປະຊາຊົນລາວ ຊາວເມືອງທ່າແຂກ ຖືກເຈັບແສບ ລົ້ມຕາຍ ຢ່າງ ໜັກໜ່ວງ ເປັນການກະທຳ ທີ່ໂຫດຮ້າຍປ່າເຖື່ອນ ໄຮ້ມະນຸດສະທຳ ແລະ ຜະເດັດການ ທີ່ສຸດ ເໜືອຈະພັນລະນາ.



- ໃນ ບັ້ນຮົບ ປ້ອງກັນຕົວເມືອງທ່າແຂກ ແຂວງຄຳມ່ວນ ອັນດຸເດືອດ ນີ້ ກໍໄດ້ມີ 3 ບຸລຸດເຫລັກ ປະກາດຢ່າງໝັ້້ນຄົງ ທະນົງແກ່ນ ເດັດດ່ຽວແໜ້ນໜຽວ ຈະຢືນຢູ່ຄຽງຂ້າງ ກັບປະຊາຊົນ ຕໍ່ສູ້ຕີຕ້ານຄືນ ກັບ ລັດທິລ່າເມືອງຂຶ້ນ ຜູ້ຮຸກຮານ ຈົນເຖິງ ກຳລັງແຮງສຸດທ້າຍ ກໍຄື ທ່ານ ປະທານສຸພານຸວົງ, ທ່ານ ນາຍພົນ ສິງກະໂປ ສີໂຄດຈຸນນະມາລີ ແລະ ທ່ານ ນາຍພົນ ຫງວຽນແຈ້ງ.

- ເຊິ່ງ ທ່ານ ປະທານ ສຸພານຸວົງ ໄດ້ເວົ້າຂຶ້ນວ່າ: "ຈະໜີຈາກປະຊາຊົນໄດ້ຢ່າງໃດ ໃນເມື່ອເມືອງທ່າແຂກ 
ຍັງມີນັກຮົບກູ້ຊາດ ຕໍ່ສູ້ກັບສັດຕູຢູ່".  ຄຳເວົ້ານີ້ ມັນໄດ້ ເປັນ ການປຸກລະດົມ ກຳລັງແຮງ ໃຫ້ປະຊາຊົນຕໍ່ສູ້ ຕີຕ້ານຄືນ ຕໍ່ ພວກລ່າເມືອງຂຶ້ນ ຜູ້ຮຸກຮານຮາວີ ດ້ວຍການສຸມທຸກ ເຫື່ອແຮງ ສະຕິປັນຍາ ກຳລັງວັງຊາ ຢ່າງພິລະອາດຫານ ກ້າແກ່ນ ເດັດດ່ຽວໜຽວແໜ້ນ ບໍ່ຍອມຈຳນົນ ອຸທິດຕົນ ດ້ວຍການເສຍສະຫຼະຊີວິດເລືອດເນື້ອ ເພື່ອ ປະເທດຊາດ ກໍຍອມມອບໃຫ້ ຈົນເຖິງກຳລັງແຮງ ສຸດທ້າຍ.

Image may contain: 3 people

ເຖິງວ່າ ບັ້ນຮົບ ການປ້ອງກັນຕົວເມືອງທ່າແຂກ ນີ້ ຈະບໍ່ໄດ້ຮັບ ໝາກຜົນແຫ່ງໄຊຊະນະ ກໍເນື່ອງຈາກ ກຳລັງປະກອບອາວຸດ ເວລານັ້ນ ແມ່ນ ຍັງມີໜ້ອຍ ກໍຄື ເຫຼັກຫຼາຍກວ່າຖ່ານ ນັ້ນ.  ແຕ່ມັນໄດ້ ຢັ້ງຢືນ ໃຫ້ເຫັນ ຢ່າງຊັດແຈ້ງ ວ່າ: ການປະຕິວັດຕໍ່ສູ້ກູ້ຊາດ ຍາດ ເອົາເອກະລາດ, ອິດສະຫຼະພາບ ແລະ ປົກປັກຮັກສາຜືນແຜ່ນດິນອັນຄົບຖ້ວນຂອງຊາດ ໄດ້ມີ ຜູ້ນຳພາທາງ ພ້ອມທີ່ຢືນຢູ່ຄຽງຂ້າງກັບປະຊາຊົນ ຈົນເຖິງກຳລັງແຮງສຸດທ້າຍ ກໍຄື ທ່ານ ປະທານ ສຸພານຸວົງ ຜູ້ນຳ ທີ່ໄດ້ຕັດສິນໃຈເຂົ້້າຮ່ວມການປະຕິວັດຕໍ່ສູ້ກູ້ຊາດ ອອກໜ້າກ່ອນໝູ່ ດ້ວຍຄວາມເສຍສະຫຼະອັນສູງສົ່ງ
ທີ່ຈະຫາສິ່ງໃດ ມາປຽບ ປານ ກໍບໍ່ໄດ້.

No automatic alt text available.

- ບັ້ນຮົບ ນີ້ ມັນໄດ້ກາຍເປັນ ບັ້ນເລີ່ມຕົ້ນ ປຸກລະດົມ ເພີ່ມທະວີ ໃຫ້ ທຸກຊັ້ນຄົນ ມີນໍ້າໃຈ ຮັກຊາດ, ຮັກບ້ານເກີດເມືອງນອນ ກໍຄືປະເທດຊາດທີ່ຫວງແຫນ ແລະ ແສນຮັກ ຂອງຕົນ ດ້ວຍການສາມັກຄີ ເປັນຈິດໜຶ່ງ ໃຈດຽວກັນ ຕີຕ້ານຕໍ່ກັບ ຄວາມອະຍຸຕິທຳ ຂອງສັດຕູ ກໍຄື ລັດທິລ່າເມືືອງຂຶ້ນ (ຝຣັ່ງ) ຜູ້ຮຸກຮານ ແລະ

ພ້ອມດຽວກັນນັ້ນ ບັ້ນຮົບນີ້ ມັນ ໄດ້ກາຍ ເປັນວິລະກຳ ອັນລໍ້າເລີດ ເປັນບົດຮຽນອັນປະເສີດ ໃຫ້ແກ່ ບັນດາ ກຳລັງປະກອບອາວຸດ ກໍຄືປະຊາຊົນລາວ ໃນທົ່ວປະເທດ ຕີຕ້ານ ຄືນຕໍ່ ສັດຕູ ຜູ້ຮຸກຮານ ດ້ວຍຄວາມພິລະອາດຫານ ກ້າແກ່ນ ເດັດດ່ຽວໜຽວແໜ້ນ ບໍ່ຍອມຈຳນົນ ໃນບັ້ນຮົບ ຕ່າງໆ ຈົນໄດ້ຮັບໄຊຊະນະເປັນກ້າວໆມາ.



ກໍຄື ພາຍໃຕ້ການນຳພາ ອັນປີຊາສາມາດ ສະຫຼາດສ່ອງໃສ ຂອງ ແນວລາວຮັກຊາດ ກໍຄືພັກປະຊາຊົນປະຕິວັດລາວ ໄດ້ນຳໃຊ້ທິດສະດີ ບົວບໍ່ໃຫ້ຊໍ້າ ນ້ຳບໍ່ໃຫ້ຂຸ່ນ 3 ບາດຄ້ອນຍຸດທະສາດ ຍຶດອຳນາດການປົກຄອງ ໃນທົ່ວປະເທດສໍາເລັດສົມບູນ ແລ້ວ ໄດ້ປົດປ່ອຍປະເທດຊາດ ພ້ອມທັງສະຖາປະນາ ປະເທດ ເປັນ ສາທາລະນະລັດ ປະຊາທິປະໄຕ ປະຊາຊົນລາວ ຂຶ້ນ ຢ່າງສະຫງ່າຜາເຜີຍ ໃນວັນທີ 2 ທັນວາ 1975 ອັນໄດ້ເຮັດໃຫ້ຊາດລາວ ວິລະຊົນ ຄົນລາວ ພິລະອາດຫານ ມີສັນຕິພາບ ເອກະລາດ ປະຊາທິປະໄຕ ເອກະພາບ ແລະ ວັດທະນາຖາວອນ.

ຂໍຈາລຶກຈົດຈຳ ຊື່ສຽງຮຽງນາມ, ຜົນງານ, ຄຸນງາມ ຄວາມດີ ທີ່ມີໃຫ້ປະເທດຊາດ ຢ່າງບໍ່ມີວັນຫຼົງລືມໄດ້.

ມີພວກເພິ່ນໃນວັນນັ້ນ ຈຶ່ງມີພວກເຮົາໃນວັນນີ້

ປະຫວັດສາດ ຮູ້ໄວ້ເປັນບົດຮຽນ
ການໃຫ້ອະໄພ ຄືສິ່ງປະເສີດຂອງມະນຸດ

ທີ່ມາ: ທ່ານ ມະຫາກຸ ສຸວັນນະເມທີ Souvannamethy Kou
------------------------------------------
ໂທລະໂຄ່ງ ໃຫ້ຫຼາຍກວ່າຄຳວ່າໂຄສະນາ
LINE ID: @tholakhong | Twitter ID: @tholakhong
tholakhong@gmail.com | www.tholakhong.com






No comments

Powered by Blogger.