Header Ads

ອະໄພຍະໂທດ ແກ່ນັກໂທດ 25​ ຄົນ ທີ່ປະພຶດຕົນດີ ແລະ ສຳນຶກຜິດ!

ປກສ: ອີງຕາມແຫລ່ງຂໍ້ມູນຂອງ ປກສ ວ່າ ໃນວັນທີ 20 ມີນາ 2017 ນີ້ ສານປະຊາຊົນຂັ້ນຕົ້ນ ນະຄອນຫລວງວຽງຈັນ ໄດ້ມີການຕັດສິນປ່ອຍຕົວນັກໂທດ ກ່ອນກຳນົດ ຈຳນວນ 25 ຄົນ ໃນນີ້ມີນັກໂທດຄະດີ ຢາເສບຕິດ 20 ຄົນ, ລັກຊັບ 2 ຄົນ, ຂົ່ມຂືນທຳຊຳເລົາ 1 ຄົນ, ຊື້-ຂາຍ ອາວຸດເສິກ 1 ຄົນ ແລະ ສໍ້ໂກງຊັບ 1 ຄົນ.

ບັນດານັກໂທດ ທີ່ໄດ້ຮັບການຕັດສິນໃຫ້ຖືກປ່ອຍຕົວ ກ່ອນກຳນົດໃນຊຸດນີ້ ແມ່ນນັກໂທດທີ່ຖືກສານຕັດສິນລົງໂທດ ຕາມລະບຽບກົດໝາຍ ແລະ ຖືກປະຕິບັດໂທດຢູ່ ຄ້າຍຄຸມຂັງ-ດັດສ້າງ ກອງບັນຊາການ ປກສ ນະຄອນຫລວງວຽງຈັນ ພ້ອມທັງໄດ້ຮັບການຕິດຕາມ, ສຶກສາອົບຮົມ ຢ່າງໃກ້ຊິດຕິດແທດ ຈາກເຈົ້າໜ້າທີ່ ວິຊາສະເພາະ ທີ່ປະຈຳການຢູ່ ຄ້າຍຄຸມຂັງ-ດັດສ້າງ, ຜ່ານການຕິດຕາມກວດກາ ເຫັນວ່າແຕ່ລະຄົນລ້ວນແຕ່ ມີຄວາມຕື່ນຕົວ, ມີຄວາມກ້າວໜ້າໃນການ ຝຶກຝົນຫລໍ່ຫລອມຕົນເອງ, ມີຄວາມຮູ້ສຶກກິນແໜງແຄງໃຈ ທີ່ເຄີຍໄດ້ກະທຳຜິດມາກ່ອນ, ມີຄວາມຫ້າວຫັນ ໃນການອອກແຮງງານ ແລະ ປະຕິບັດກົດລະບຽບຂອງ ຄ້າຍຄຸມຂັງ-ດັດສ້າງ ໄດ້ເປັນຢ່າງດີ; ສິ່ງທີ່ສຳຄັນກໍ່ຄື ທຸກຄົນລ້ວນແຕ່ ມີຄວາມຮັບຮູ້ເຂົ້າໃຈ ຕໍ່ແນວທາງນະໂຍບາຍຂອງພັກ ແລະ ກົດໝາຍຂອງລັດ ຢ່າງເລິກເຊິ່ງ.
ດັ່ງນັ້ນ, ສານປະຊາຊົນຂັ້ນຕົ້ນ ນະຄອນຫລວງວຽງຈັນ ຈຶ່ງໄດ້ມີການຄົ້ນຄວ້າ ພິຈາລະນາ ແລະ ຕັດສິນປ່ອຍຕົວ ກ່ອນກຳນົດ ນັກໂທດຈຳນວນດັ່ງກ່າວ ເພື່ອໃຫ້ແຕ່ລະຄົນໄດ້ກັບ ຄືນສູ່ຄອບຄົວ ແລະ ປະກອບສ່ວນ ໃນການສ້າງສາ ພັດທະນາບ້ານເມືອງ, ກໍ່ຄືປະກອບສ່ວນເຂົ້າໃນການຮັກສາ ແລະ ຄວາມເປັນລະບຽບຮຽບຮ້ອຍ ໃນສັງຄົມ.


ພາບແລະຂ່າວ: ປກສ


------------------------------------------
ໂທລະໂຄ່ງ ໃຫ້ຫຼາຍກວ່າຄຳວ່າໂຄສະນາ
LINE ID: @tholakhong | Twitter ID: @tholakhong
tholakhong@gmail.com | www.tholakhong.com


No comments

Powered by Blogger.