Header Ads

ປກສ ຈຳປາສັກ ຈັບສອງສ່ຽວຮ່ວມກັນຄາດຕະກຳປຸ້ນຊັບ ຈູດສົບອຳພາງຄະດີ

ຈຳປາສັກ: ເຈົ້າໜ້າທີ່ ປກສ ແຂວງຈໍາປາສັກ ໄດ້ກັກຕົວຄາດຕະກອນໃຈໂຫດ 2 ຄົນ ຮ່ວມກັນຄາດຕະກໍາຍິງໄວ 47 ປີ ໂດຍຫຼອກລວງໄປຄາດຕະກຳ ເອົາຊັບ ແລ້ວຈູດທຳລາຍສົບ ເພື່ອອຳພາງຄະດີ. ພາຍຫຼັງກໍ່ເຫດໄດ້ 10 ກວ່າມື້; ເຈົ້າໜ້າທີ່ ປກສ ແຂວງຈຳປາສັກ ກໍສາມາດຕິດຕາມກັກຕົວ ຜູ້ຖືກຫາ ທັງສອງໄປດຳເນີນຄະດີ.

ເຈົ້າໜ້າທີ່ ປກສ ແຂວງຈໍາປາສັກ ໃຫ້ຮູ້ວ່າ: ໃນວັນທີ 1 ມີນາ 2017, ໄດ້ຮັບແຈ້ງຄວາມຈາກພີ່ນ້ອງຂອງນາງ ຈັນປະສົງອາຍຸ 47 ປີ ຢູ່ບ້ານຫຼັກ 19 ເມືອງບາຈຽງ ແຂວງຈໍາປະສັກ ( ຜູ້ເສຍຊີວິດ ) ວ່າ: ໃນວັນທີ 24 ກຸມພາ 2017 ນາງ ຈັນປະສົງ ໄປວັງເຕົ້າຊ່ອງເມັກ ກັບ ທ້າວ ບຸນລົມ ອາຍຸ 30 ປີ ຢູ່ບ້ານຈີກ ເມືອງໂພນທອງ ແຂວງຈໍາປະສັກ ໄດ້ຫຼາຍມື້ແຕ່ບໍ່ເຫັນຕິດ ຕໍ່ມາຫາ. ຫຼັງຈາກນັ້ນ, ເຈົ້າໜ້າທີ່ຈຶ່ງໄດ້ລົງ ຕິດຕາມທ້າວ ບຸນລົມ. ແລະ ສາມາດກັກຕົວທ້າວ ບຸນລົມ ໄດ້. ຜ່ານການສືບສວນຂອງເຈົ້າໜ້າທີ່, ທ້າວ ບຸນລົມ ຮັບສາລະພາບ ວ່າໄດ້ຮ່ວມກັບທ້າວ ຫໍານ້ອຍ ອາຍຸ 24 ປີ ຢູ່ບ້ານ ວັງຍາວ ເມືອງ ເລົ່າງາມ ແຂວງສາລະວັນ ຄາດຕະກໍານາງ ຈັນປະສົງ ເພື່ອເອົາຊັບ.


ໃນວັນທີ 24 ກຸມພາ 2017, ເວລາປະມານ 9:00 ຜູ້ກ່ຽວກັບທ້າວ ຫໍານ້ອຍ ພາກັນຂີ່ລົດຮຸນໄດ ສີຂາວ ໝາຍເລກທະບຽນ ກກ 7152 ຈໍາປາສັກ ອອກຈາກເມືອງເລົ່າງາມ ແຂວງສາລະວັນ ເພື່ອໄປວຽກຢູ່ ເມືອງປາກຊ່ອງ ແຂວງຈໍາປາສັກ. ໃນເວລານັ້ນ, ນາງ ຈັນປະສົງ ( ຜູ້ ເສຍຊີວິດ ) ໂທລະສັບຫາຜູ້ກ່ຽວ “ໃນນາມຄົນຮັກຄົນແພງກັນ ” ໃຫ້ ໄປສົ່ງຢູ່ວັງເຕົ້າຊ່ອງເມັກ. ຫຼັງຈາກນັ້ນ, ຜູ້ກ່ຽວໄດ້ຊັກຊວນທ້າວ ຫໍາ ນ້ອຍ ຄາດຕະກໍາເອົາຊັບຂອງນາງ ຈັນປະສົງ. ເມື່ອຕົກລົງກັນແລ້ວ ກໍພາກັນຈອດລົດ ແລ້ວເອົາກ້ອນຫີນ 1 ກ້ອນ ໜັກປະມານ 2-3 ກິໂລ ຂຶ້ນໄວ້ເບາະດ້ານຫຼັງ ແລ້ວກໍຂີ່ລົດໄປຮັບເອົານາງ ຈັນປະສົງ ຢູ່ບ້ານຫຼັກ 19 ເມືອງບາຈຽງ. ຈາກນັ້ນ, ກໍອອກເດີນທາງມາ ເມືອງໂພນທອງ ແຂວງຈໍາປາສັກ ໂດຍແມ່ນນາງ ຈັນປະສົງ ນັ່ງເບາະທາງໜ້າຂ້າງກັບ ທ້າວ ບຸນລົມ; ສ່ວນທ້າວ ຫໍານ້ອຍ ແມ່ນນັ່ງຢູ່ເບາະຫຼັງ. ພາຍຫຼັງຂີ່ລົດ ໄປຮອດທາງເຂົ້າບ້ານຈີກ ເມືອງໂພນທອງ ໄດ້ປະມານ 2 ກິໂລແມັດ ທ້າວ ຫໍານ້ອຍ ເຫັນວ່າໄດ້ໂອກາດ ຈຶ່ງໄດ້ເອົາກ້ອນຫີນທີ່ກ່ຽມມາທຸບໃສ່ ຫົວນາງ ຈັນປະສົງ 1 ບາດ ເຮັດໃຫ້ນາງມີອາການດີ້ນໄປມາ ຍ້ອນເຈັບ ປວດ. ໃນເວລານັ້ນ, ທ້າວ ຫໍານ້ອຍ ຈຶ່ງໄດ້ຈັບແຂນນາງ ຈັນປະສົງ ລ໋ອກໄວ້ ແລ້ວທ້າວ ບຸນລົມ ໄດ້ເອົາກ້ອນຫີນຕີຊໍ້າອີກ 1-2 ບາດ ເຮັດ ໃຫ້ນາງ ຈັນປະສົງ ເສຍຊີວິດ ແລ້ວພວກກ່ຽວກໍໄດ້ປົດເອົາສາຍແຂນ ຄໍາ ນໍ້າໜັກ 1 ບາດ, ເງິນ 1.500 ບາດ ແລະ ເອົາໂທລະສັບ 1 ໜ່ວຍ. ຫຼັງຈາກນັ້ນ, ກໍພາກັບຂີ່ລົດໄປທົ່ງນາຂອງຜູ້ກ່ຽວ ແລ້ວເອົາສົບຂອງ ນາງ ຈັນປະສົງ ໄວ້ຢູ່ເທິງກອງເຟື່ອງ ແລ້ວຈູດກອງເຟື່ອງ ເຮັດໃຫ້ສົບ ຂອງນາງ ຈັນປະສົງ ໄໝ້ບາງສ່ວນ ແລະ ສ່ວນໃດບໍ່ໄໝ້ ພວກກ່ຽວຈຶ່ງ ໄດ້ຂຸດຄຸ່ມຝັງໄວ້ ແລ້ວກໍພາກັນຂີ່ລົດໜີໄປ.

ມາວັນທີ 26 ກຸມພາ 2017, ພວກກ່ຽວໄດ້ເອົາສານແຂນຄໍາໄປຂາຍ ຢູ່ຕະຫຼາດດອນລະລາດ ເມືອງຈໍາປາສັກ ໄດ້ເງິນ 4.200.000 ກີບ ມາ ແບ່ງປັນກັນຄົນລະເຄິ່ງ. ຈາກນັ້ນ, ກໍແຍກກັນກັບບ້ານ. ຕົກມາ ຮອດວັນທີ 3 ມີນາ 2017 ເຈົ້າໜ້າທີ່ໄດ້ເຂົ້າກັກຕົວຄາດຕຕະກອນ ທັງສອງມາດໍາເນີນຄະດີ.

ປັດຈຸບັນຄະດີດັ່ງກ່າວ, ເຈົ້າໜ້າທີ່ພວມເລັ່ງສືບສວນຂະຫຍາຍຜົນ ເພື່ອສະຫຼຸບສໍານວນຄະດີສົ່ງໃຫ້ໄອຍະການປະຊາຊົນ ດໍາເນີນຄະດີຂັ້ນ ຕໍ່ໄປ.

ພາບແລະຂ່າວ: ໜັງສືພິມຄວາມສະຫງົບ


------------------------------------------
ໂທລະໂຄ່ງ ໃຫ້ຫຼາຍກວ່າຄຳວ່າໂຄສະນາ
LINE ID: @tholakhong | Twitter ID: @tholakhong
tholakhong@gmail.com | www.tholakhong.com


loading...





No comments

Powered by Blogger.