Header Ads

ຊົມເຊີຍ ປກສ ບໍລິຄຳໄຊ ຈັບຜົວ-ເມຍລັກລອບຂົນຢາເຮໂຣອິນ ພ້ອມເງິນປອມ

ປກສ: ເຈົ້າໜ້າທີ່ຕໍາຫຼວດສະກັດກັ້ນ ແລະ ຕ້ານຢາເສບຕິດ ປກສ ແຂວງບໍລິຄໍາໄຊ ໄດ້ລັດກວດຄົ້ນລົດກະບະເດຮັນຂອງຜົວ-ເມຍຄູ່ໜຶ່ງ ຢູ່ເສັ້ນທາງເຂດບ້ານ ຜາໂປງ ເມືອງທ່າພະບາດ ພົບເຫັນຢາເຮໂຣອິນ 3 ແທ່ງ, ຢາບ້າ 2.000 ເມັດ, ປືນປະດິດ 1 ກະບອກ, ເງິນ 560.000 ກີບ, ເງິນໂດຣາປອມ 60.000 ໂດຣາ ທີ່ຊຸກເຊື່ອງໄວ້ໃນລົດ ພ້ອມທັງກັກຕົວມາດໍາເນີນຄະດີ.

ເຈົ້າໜ້າທີ່ ປກສ ເປີດເຜີຍວ່າ: ຜົວ-ເມຍຄູ່ນີ້ ຊື່ ທ້າວ ຜາຍ ອິນທະພອນ ອາຍຸ 49 ປີ ແລະ ນາງ ແສງ ອາຍຸ 50 ປີ ປະຊາຊົນ ບ້ານຈອມທອງ ເມືອງຄໍາ ແຂວງຊຽງຂວາງ. ພວກກ່ຽວໄດ້ລັກລອບ ຂົນສົ່ງຢາເສບຕິດ ແລະ ເງິນປອມ ເພື່ອໄປຈໍາໜ່າຍຢູ່ຂຽງຂວາງ.

ຜ່ານການສືບສວນ-ສອບສວນຂອງເຈົ້າ ໜ້າທີ່ ທ້າວ ຜາຍ ອິນທະ ພອນ ໃຫ້ການຮັບສາລະພາບວ່າ: ໃນວັນທີ 10 ມີນາ 2017, ໄດ້ຂີ້ລົດ ກະບະ ແດຫັນ (ສີຂາວ) ປ້າຍທະບຽນ ບຂ 5029 ກໍາແພງນະຄອນ ພ້ອມເມຍ ເດີນທາງໄປແຕ່ແຂວງຊຽງຂວາງ ເພື່ອຈະໄປຊື້ຢາເຮໂຣອິນ ແລະ ຢາບ້າ ນໍາຜູ້ຮ່ວມຂະບວນຢູ່ບ້ານທ່າກົກໄຮ ເມືອງປາກງື່ມ ນະຄອນຫຼວງວຽງຈັນ. ພໍໄປຮອດກໍໄດ້ໄປພັກຢູ່ເຮືອນຂອງ ອ້າຍເມຍ ຢູ່ບ້ານໜອງພະຍາ ເມືອງໄຊທານີ ນະຄອນຫຼວງວຽງຈັນ. ຮອດວັນທີ 14 ເດືອນ ມີນາ 2017, ຂັບຂີ່ລົດອອກໄປສົ່ງເມຍ ຢູ່ເຮືອນພີນ້ອງ ບ້ານນາແຄນ ເມືອງທ່າພະບາດ ແຂວງບໍລິຄໍາໄຊ ແລ້ວກໍຂັບຂີ່ລົດ ອອກໄປເບິ່ງຢາເຮໂຣອິນ ແລະ ຢາບ້າ ຢູ່ບ້ານທ່າກົກໄຮ ເມືອງປາກງື່ມ ພ້ອມຕົກລົງລາຄາຊື້ຂາຍ, ແລ້ວນັດສົ່ງຢາເສບຕິດກັນຢູ່ທາງເຂົ້າບ້ານ ຊຽງແລ ເມືອງປາກງື່ມ. ຮອດເວລາປະມານ 18:00 ໂມງວັນດຽວກັນ ຈຶ່ງໄດ້ໄປຮັບຢາເອົາຢາເຮໂຣອິນ ແລະ ຢາບ້າຈໍານວນດັ່ງກ່າວຂຶ້ນລົດ ແລ້ວໄປຮັບເອົາເມຍຢູ່ບ້ານນາແຄນ. ຈາກນັ້ນ, ຈຶ່ງໄດ້ຂັບລົດໄປທາງ ບ້ານຫົງທອງ ເພື່ອຫຼົບຫຼີກປ້ອມຕໍາຫຼວດຈາລະຈອນ, ພໍຮອດທາງເຂົ້າ ບ້ານຜາໂປງ ກໍຖືກເຈົ້າໜ້າທີ່ຕໍາຫຼວດກັກຕົວໄດ້.

ນາງ ແສງ ອິນທິພົນ (ຜູ້ເປັນເມຍ) ແມ່ນໃຫ້ການປະຕິເສດ ທຸກຂໍ້ ກ່າວຫາ ເຊິ່ງອ້າງວ່າຜູ້ເປັນຜົວ ພາໄປຊື່ເຄື່ອງໄປຂາຍຢູ່ບ້ານຂອງຕົນ ແລະ ຄັ້ງນີ້ເປັນຄັ້ງທໍາອິດ ທີ່ເດີນທາງໄປຕ່າງແຂວງກັບຜົວ, ເຊິ່ງຢາ ເສບຕິດຈໍານວນດັ່ງກ່າວ ບໍ່ຮູ້ເຫັນນຳຜູ້ເປັນຜົວມາກ່ອນ.

ພາບແລະຂ່າວ: ປກສ



------------------------------------------
ໂທລະໂຄ່ງ ໃຫ້ຫຼາຍກວ່າຄຳວ່າໂຄສະນາ
LINE ID: @tholakhong | Twitter ID: @tholakhong
tholakhong@gmail.com | www.tholakhong.com






No comments

Powered by Blogger.