Header Ads

ປະທານສະພາແຫ່ງຊາດ ສປປລາວ ຕ້ອນຮັບ ປະທານ​ກໍາມາ​ທິການ​ຮ່າງ​ລັດຖະທໍາ​ມະນູນ ​ແລະ ການ​ສ້າງ​ລັດ​ສະພາ​ສູງ​ແຫ່ງສະຫະພັນ​ລັດ​ເຊຍ

ລັດຖະບານ:​ ​ໃນເດືອນມີນາ 2017, ທ່ານ ນາງ​ ປານີ ຢາ​ທໍ່​ຕູ້ ປະທານ​ສະພາ​ແຫ່ງ​ຊາດ ​ໄດ້​ຕ້ອນຮັບການ​ເຂົ້າ​ຢ້ຽມ​ຂໍ່ານັບ​ຂອງທ່ານ ອັນ​ເດຣ ຄຣີຊາສ (Andrey KLISHAS) ປະທານ​ກໍາມາ​ທິການ​ຮ່າງ​ລັດຖະທໍາ​ມະນູນ ​ແລະ ການ​ສ້າງ​ລັດ​ສະພາ​ສູງ​ແຫ່ງສະຫະພັນ​ລັດ​ເຊຍ ພ້ອມ​ດ້ວຍ​ຄະນະ ​ໃນ​ໂອກາດ​ເດີນທາງ​ມາ​ຢ້ຽມຢາມ ​ແລະ ​ສືບ​ຕໍ່​ແລກປ່ຽນ​ບົດຮຽນ​ກ່ຽວກັບ​ວຽກ​ງານສ້າງ ​ແລະ ​ປັບປຸງ​ກົດໝາຍຂອງ​ສະ ພາ​ແຫ່ງ​ຊາດ.

ໃນ​ໂອກາດ​ນີ້, ທ່ານ ນາງ ປານີ ຢາ​ທໍ່​ຕູ້ ​ໄດ້​ສະ​ແດງ​ຄວາມ​ຍິນ​ດີ​ຕ້ອນ​ຮັບ, ຊົມ​ເຊີຍ ​ແລະ ຕີ​ລາ ຄາ​ສູງ​ຕໍ່​ການ​ເດີນທາງ​ມາ​ຢ້ຽມຢາມ ​ແລະ ​ເຮັດ​ວຽກ​ຢູ່ສປປ ລາວ ຂອງ​ທ່ານ ອັນ​ເດຣ ຄຣີຊາສ ພ້ອມ​ຄະນະ​ເຊິ່ງ​ເປັນ​ການ​ປະກອບສ່ວນ​ອັນ​ສໍາຄັນ​ ເຂົ້າ​ໃນ​ການ​ເສີມ​ຂະຫຍາຍ​ສາຍ​ພົວພັນ​ການຮ່ວມ​ມື​ ລະ ຫວ່າງ​ ສະພາ​ແຫ່ງ​ຊາດ ສປປ ລາວ ​ແລະ ສະພາ​ສູງ​ແຫ່ງສະຫະພັນ​ລັດ​ເຊຍ ​ເວົ້າ​ລວມ, ​ເວົ້າ​ວະ​ເພາະ ​ກໍ​ຄື​ການ​ຮ່ວມ​ມື​ຂອງສອງ​ກໍາມາ​ທິການ ​ໃຫ້​ນັບ​ມື້​ເຂົ້າ​ສູ່​ລວງ​ເລິກຍິ່ງໆ​ຂຶ້ນ.

ຈາກ​ນັ້ນ, ທ່ານ ອັນ​ເດຣ ຄຣີຊາສ ກໍ​ໄດ້​ສະ​ແດງ​ຄວາມ​ຂອບ​ໃຈ​ຕໍ່ທ່ານ ນາງ ປານີ​ ຢາ​ທໍ່​ຕູ້ ທີ່​ໄດ້​ສະຫລະ​ເວລາ​ອັນ​ມີຄ່າ​ໃນ​ການ​ຕ້ອນຮັບອັນ​ອົບ​ອຸ່ນ​ໃນ​ຄັ້ງ​ນີ້, ພ້ອມ​ທັງ​ແຈ້ງ​ໃຫ້​ຊາບ​ໃນ​ການ​ເດີ​ນທາງ​ມາ​​​ຮ່ວມ​​ເຮັດ​ວຽກ​ແລກປ່ຽນ​ບົດຮຽນ ກັບ​ກໍາມາ​ທິການ​ກົດໝາຍສະພາ​ແຫ່ງ​ຊາດລາວ ​ໃນ​ຄັ້ງ​ນີ້ ​ໃຫ້​ທ່ານ​ປະ ທານ​ສະພາ​ແຫ່ງ​ຊາດ​ໄດ້​ຮັບ​ຊາບ.

​ໃນ​ວັນ​ດຽວ​ກັນ, ຄະນະ​ຜູ້​ແທນ​ດັ່ງກ່າວ, ​ກໍ​ໄດ້​ມີ​ການ​ພົບ​ປະ​​​ ເຊິ່ງຝ່າຍ​ລາວ ນໍາ​ໂດຍ​ທ່ານ ສາຍ​ທອງ ​ແກ້ວ​ດວງ​ດີ ກໍ​າມະ​ການ​ຄະນະ​ປະ​ຈໍາ ປະທານ​ກໍາມາ​ທິການ​ກົດໝາຍສະພາ​ແຫ່ງ​ຊາດ ແລະ ຝ່າຍ​ລັດ​ເຊຍ ​ນໍາ​ໂດຍ​ ທ່ານ ອັນ​ເດຣ ຄຣີຊາສ ປະທານ​ກໍາມາ​ທິການ​ຮ່າງ​ລັດຖະທໍາ​ມະນູນ ​ແລະ ການ​ສ້າງ​ລັດ​ສະພາ​ສູງ​ແຫ່ງ ສະຫະພັນ​ລັດ​ເຊຍ.

ການ​ພົບ​ປະ​ຄັ້ງ​ນີ້​, ສອງ​ຝ່າຍໄດ້ມີ​ການ ​ແລກປ່ຽນ​ຄໍາ​ເຫັນ ​ແລະ ປຶກສາ​ຫາລື​ຮ່ວມກັນ ​ດ້ວຍ​ບັນຍາກາດ​​ສະໜິດສະໜົມ ເຂົ້າອົກເຂົ້າໃຈ ແລະ ກົງໄປກົງມາ ກ່ຽວກັບການຮ່ວມມື​ ຂອງສອງປະເທດ, ​ພ້ອມ​ນີ້​ຝ່າຍລາວ ​ຍັງ​​ໄດ້​ສະ​ເໜີ ສືບ​ຕໍ່ການ​ຮ່ວມ​ມື​ໃນ​ຕໍ່ໜ້າ​ ແລກປ່ຽນ​ບົດຮຽນ​ກ່ຽວ​ກັບ​ ວຽກ​ງານ ​ແລະ ປັບປຸງ​ກົດໝາຍ ​ຂອງ​ສະພາ​ສູງ​ແຫ່ງ​ ສະຫະພັນ​ລັດ​ເຊຍ​ ໃນ​ຕົ້ນ​ປີ 2018, ຝຶກ​ອົບຮົມ​ຍົກ​ລະດັບ​ ຄວາມ​ຮູ້​ຄວາມ​ສາມາດ ​ໃຫ້​ແກ່​ສະມາຊິກ​ສະພາ​ແຫ່ງ​ຊາດ​ ກ່ຽວ​ກັບ​ການ​ຄົ້ນຄວ້າ, ວິ​ໄຈ​ປະກອບ​ຄໍາ​ເຫັນ​ ຕໍ່ການ​ສ້າງ ​ແລະ ປັບປຸງ​ກົດໝາຍຈັດ​ຂຶ້ນ​ ທີ່ ສປປ ລາວ ​ໃນທ້າຍ​ປີ 2017; ການ​ຮ່ວມ​ມື​ ໃນ​ຂົງ​ເຂດ​ວຽກ​ງານ​ອື່ນໆ ​ທີ່​ຕິດ​ພັນ​ກັບ​ກໍາມາ​ທິການ​ກົດໝາຍ ​ຂອງ​ສະພາ​ແຫ່ງ​ຊາດ​ ຕາມ​ການ​ມອບ​ໝາຍ​ຂອງ​ຂັ້ນ​ເທິງ.


------------------------------------------
ໂທລະໂຄ່ງ ໃຫ້ຫຼາຍກວ່າຄຳວ່າໂຄສະນາ
LINE ID: @tholakhong | Twitter ID: @tholakhong
tholakhong@gmail.com | www.tholakhong.com


No comments

Powered by Blogger.