Header Ads

ເມືອງເງິນ ແຂວງ ໄຊຍະບູລີ ໄດ້ຈັດກອງປະຊຸມ ເຜີຍແຜ່ ແນະນຳ ການຈັດຕັ້ງປະຕິບັດ ແຜນພັດທະນາເສດຖະກິດ-ສັງຄົມ ປະຈຳປີ.

ເມືອງເງິນ: ຕອນເຊົ້າຂອງວັນທີ່ 15 ມີນາ 2017 ນີ້ ຢູ່ທີ່ສະໂມສອນ ເມືອງເງິນ ແຂວງ ໄຊຍະບູລີ ໄດ້ຈັດກອງປະຊຸມ ເຜີຍແຜ່ ແນະນຳ ການຈັດຕັ້ງປະຕິບັດ ແຜນພັດທະນາເສດຖະກິດ-ສັງຄົມ ປະຈຳປີ. ພາຍໃຕ້ການເປັນປະທານຂອງທ່ານ ທອງພັນ ສຸກສະຫວັດ ກຳມະການພັກເມືອງ, ຫົວໜ້າຫ້ອງການແຜນການ ແລະ ການລົງທືນເມືອງ, ເຂົ້າຮ່ວມເປັນກຽດມີທ່ານ ບຸນສົດ ອິນທະປັນຍາ ຄະນະປະຈຳພັກເມືອງ ຮອງເຈົ້າເມືອງ, ມີສະມາຊິກສະພາປະຊາຊົນຂັ້ນແຂວງ ເຂດເລືອກຕັ້ງເມືອງເງິນ, ຄະນະປະຈຳພັກເມືອງ, ກຳມະການພັກເມືອງ, ຫົວໜ້າຫ້ອງການ, ກົມກອງ, ຕາງໜ້າພະແນກແຜນການ ແລະ ການລົງທືນ, ພະນັກງານທີ່ເຮັດວຽກງານແຜນການຫ້ອງການ ເຂົ້າຮ່ວມ 40 ຄົນ, ຍິງ 9 ຄົນ.

ກອງປະຊຸມໄດ້ຮັບຟັງ ມະຕິກອງປະຊຸມ ສາມັນເທື່ອທີ່ 2 ຂອງສາພາປະຊາຊົນຂັ້ນແຂວງ ວ່າດ້ວຍການຮັບຮອງເອົາບົດລາຍງານ ກ່ຽວກັບການຈັດຕັ້ງປະຕິບັດແຜນພັດທະນາເສດຖະກິດ-ສັງຄົມຂອງແຂວງໄຊຍະບູລີ ສົກປີ 2015-2016 ແລະ ທິດທາງແຜນການປີ 2017. ໂດຍຕິດພັນ ວຽກງານແຜນການ-ການລົງທືນຂອງເມືອງ ສົກປີ 2015-2016  ເມືອງເງິນສາມາດປຸກລະດົມທືນເຂົ້າມາພັດທະນາພື້ນຖານໂຄງລ່າງ ດ້ານເສດຖະກິດ - ສັງຄົມ  ທັງໝົດ 34 ໂຄງການ, ມູນຄ່າ 226,95 ຕື້ກີບ ປະຕິບັດໄດ້ລື່ນ 139,42 ຕື້ກີບຂອງແຜນຄວາມຕ້ອງການທືນພັດທະນາ ( ເນື່ອງຈາກວ່າການລົງທືນຂອງເອກະຊົນ ໄດ້ມີການກໍ່ສ້າງສ່າງນ້ຳມັນ ທີ່ມີຂະໜາດບັນຈຸນ້ຳມັນເຖີງ 5 ລ້ານລິດ ມູນຄ່າ 200 ຕື້ກີບ)  ການລົງທືນໄດ້ແຍກອອກແຕ່ລະພາກສ່ວນດັ່ງນີ້:

                I.      ການລົງທືນຂອງລັດ ທີ່ອານຸມັດຈາກສະພາ ລວມມີ 16 ໂຄງການ ມູນຄ່າ 36,27 ຕື້ກີບ ໃນນີ້:
ມີທືນ ປົກກະຕິ ຂອງແຂວງ 8 ໂຄງການ ມູນຄ່າ 1,3 ຕື້ກີບ
ທືນພັດທະນາຊຸມຊົນຂັ້ນແຂວງ ຂອງໂຄງການໄຟ້າຫົງສາ ມີ 4 ໂຄງການ ມູນຄ່າ 4,34 ຕື້ກີບ.
ທືນກະຊວງ ປະຕິບັດຢູ່ເມືອງ 4 ໂຄງການ ມູນຄ່າ 4,36 ຕື້ກີບ
               II.      ທືນກູ້ຍືມຊ່ວຍເຫຼືອຈາກຕ່າງປະເທດ ລວມມີ 8 ໂຄງການ ມູນຄ່າ 1,73 ຕື້ກີບ.
             III.      ທືນຂອງເອກະຊົນພາຍໃນ ແລະ ຕ່າງປະເທດ ລວມມີ 8 ໂຄງການ ມູນຄ່າ 214,9ຕື້ກີບ.
             IV.      ທືນສົມທົບຂອງປະຊາຊົນ ມີມູນຄ່າ 309,32 ລ້ານກີບ.

ຄາດໝາຍສູ້ຊົນ ໃນແຜນພັດທະນາ ເສດຖະກິດ- ສັງຄົມ ໃນປີ 2017  ແມ່ນເຮັດໃຫ້ເສດຖະກິດຂອງເມືອງຂະຫຍາຍຕົວບໍ່ໃຫ້ຫຼຸດ 10% ລວມຍອດມູນຄ່າລາຍຮັບ ຈາກການຜະລິດໃຫ້ບັນລຸ 314,28 ຕື້ກີບ, ສະເລ່ຍໃສ່ຫົວຄົນໜຶ່ງ ໃຫ້ໄດ້ 17 ລ້ານກວ່າກີບ/ຄົນ/ປີ ຫຼື ເທົ່າກັບ 2.149 $ ສະຫະລັດ. ການຈັດຕັ້ງປະຕິບັດວຽກງານແຜນການ- ການລົງທືນ  ທຸກໆໂຄງການລົງທືນຂອງລັດ-ເອກະຊົນ ຕ້ອງລວມສູນ ໄປຕາມແຜນພັດທະນາເສດຖະກິດ-ສັງຄົມຂອງເມືອງວາງອອກ. ການປະຕິບັດໂຄງການລົງທືນຂອງລັດ ຕ້ອງໄປຕາມຂັ້ນຕອນຂອງກົດໝາຍວ່າດ້ວຍການລົງທືນຂອງລັດ, ດຳລັດ 01 ຂອງລັດຖະບານ ວ່າດ້ວຍການຕິດຕາມກວດກາໂຄງການລົງທືນ ໃຫ້ເຂັ້ມງວດ.

ໂດຍ: ອິນແປງ ແຫວນຄຳ







                

No comments

Powered by Blogger.