Header Ads

ໄຂກອງປະຊຸມສະພາສະໄໝສາມັນຊຸດທີ 3 ຂອງສະພາແຫ່ງຊາດຊຸດທີ VIII ແລ້ວມື້ນີ້!



ກອງປະຊຸມສະໄໝສາມັນເທື່ອທີ 3 ຂອງສະພາແຫ່ງຊາດຊຸດທີ VIII ໄຂຂຶ້ນໃນຕອນເຊົ້າຂອງວັນທີ 25/04/2017 ທີ່ຫໍສະພາແຫ່ງຊາດນະຄອນຫລວງວຽງຈັນ ພາຍໃຕ້ການເປັນປະທານຂອງ ທ່ານ ນາງປານີ ຢາທໍຕູ ປະທານສະພາແຫ່ງຊາດ, ໂດຍເປັນກຽດເຂົ້າຮ່ວມ ຂອງທ່ານ ບຸນຍັງ ວໍລະຈິດ ບຸນຍັງ ວໍລະຈິດ ເລຂາທິການໃຫຍ່ ຄະນະບໍລິຫານງານ ສູນກາງພັກ ປະຊາຊົນ ປະຕິວັດລາວ, ປະທານປະເທດ ແຫ່ງ ສປປ ລາວ , ທ່ານ ທອງລຸນ ສີສຸລິດ ນາຍົກລັດຖະມົນຕີ ພ້ອມດ້ວຍການນຳພັກ-ລັດ ແຂກຮັບເຊີນ ແລະສະມາຊິກສະພາແຫ່ງຊາດຈາກເຂດເລືອກຕັ້ງຕ່າງໆເຂົ້າຮ່ວມ.



ກອງປະຊຸມ ສະໄໝສາມັນເທື່ອທີ 3 ຂອງສະພາແຫ່ງຊາດ ຊຸດທີ VIII  ເພື່ອພິຈາລະນາ ແລະ ຕົກລົງບັນຫາສຳຄັນຕ່າງໆຂອງຊາດ ເປັນຕົ້ນ ແມ່ນການຈັດຕັ້ງປະຕິບັດ ວຽກງານຈຸດສຸມໃນໄລຍະ 6 ເດືອນຜ່ານມາ ແລະ ທິດທາງແຜນການ ຈຸດສຸມ ໃນ 6 ເດືອນຕໍ່ໜ້າ ຂອງລັດຖະບານ; ການຈັດຕັ້ງປະຕິບັດ ແຜນພັດທະນາ ເສດຖະກິດ-ສັງຄົມ 2016 ແລະ ການຈັດຕັ້ງຜັນຂະຫຍາຍ ແຜນປີ 2017; ການຈັດຕັ້ງປະຕິບັດ ແຜນງົບປະມານແຫ່ງລັດ 3 ເດືອນ ຂ້າມຜ່ານທ້າຍປີ 2016, ການຈັດຕັ້ງປະຕິບັດ ແຜນງົບປະມານແຫ່ງລັດ ງວດ 1 ປີ 2017 ແລະ ຄາດຄະເນ ທິດທາງແຜນການ 6 ເດືອນຕົ້ນປີ 2017.



 ກອງປະຊຸມ ຍັງຈະໄດ້ຮັບຟັງ ສະພາບການຄຸ້ມຄອງ ລາຄາສິນຄ້າ, ອັດຕາເງິນເຟີ້, ອັດຕາແລກ ປ່ຽນ ທີ່ພວມກະທົບຕໍ່ການຜະລິດ, ການດຳລົງຊີວິດຂອງສັງຄົມ, ລວມທັງທິດທາງ ແລະ ມາດຕະການແກ້ໄຂໃນຕໍ່ໜ້າ; ພິຈາລະນາຮັບຮອງເອົາ ບົດລາຍງານ ການເຄື່ອນໄຫວວຽກງານ 5 ປີຜ່ານມາ ແລະ ທິດທາງວຽກງານ 5 ປີຕໍ່ໜ້າ ຂອງອົງການກວດສອບແຫ່ງລັດ ທັງພິຈະລະນາຮັບຮອງເອົາ ການເລືອກຕັ້ງປະທານ ອົງການກວດສອບແຫ່ງລັດ; ການປະຕິບັດສິດສັ່ງຟ້ອງ ຄະດີອາຍາຂຶ້ນສານ ແລະ ການເຂົ້າຮ່ວມ ການດຳເນີນຄະດີແພ່ງ ຢູ່ທີ່ປະຊຸມສານ ໃນໄລຍະຜ່ານມາ ແລະ ກຳນົດທິດທາງ ໃນການປັບປຸງຍົກສູງຄຸນນະພາບ ວຽກງານດັ່ງກ່າວ ຂອງອົງການໄອຍະການ ປະຊາຊົນສູງສຸດ; ການດຳເນີນຄະດີຢູ່ສານຂັ້ນຕົ້ນ ແລະ ສານຂັ້ນອຸທອນ ໄລຍະຜ່ານມາ, ລວມທັງທິດທາງປັບປຸງ ແລະ ຍົກສູງຄຸນນະພາບ ວຽກງານດັ່ງກ່າວ ໃນຕໍ່ໜ້າຂອງສານ ປະຊາຊົນສູງສຸດ. ນອກຈາກນັ້ນ, ກອງປະຊຸມ ຍັງຈະໄດ້ຮັບຮອງເອົາບົດລາຍງານ ການເຄື່ອນໄຫວວຽກງານ ໃນໄລຍະຜ່ານມາ ແລະ ແຜນການເຄື່ອນໄຫວວຽກງານ ໃນຕໍ່ໜ້າ ຂອງສະພາແຫ່ງຊາດ ຊຸດທີ VIII, ພິຈາລະນາຮັບຮອງ ເອົາການສະເໜີແຕ່ງຕັ້ງ ຮອງປະທານ ກຳມາທິການ ຂອງສະພາແຫ່ງຊາດ; ຮັບຟັງການຊີ້ແຈງ ຂອງພາກສ່ວນກ່ຽວຂ້ອງ ຕໍ່ຄຳສະເໜີຂອງສັງຄົມ ຜ່ານໂທລະສັບ ສາຍດ່ວນອີກດ້ວຍ.

ກອງປະຊຸມ ຍັງຈະພິຈາລະນາ ຮັບຮອງເອົາກົດໝາຍ ສ້າງໃໝ່ 5 ສະບັບ, ກົດໝາຍສະບັບປັບປຸງ 8 ສະບັບ ແລະ ປະກອບຄຳເຫັນໃສ່ ກົດໝາຍທາບທາມ ລວມທັງໝົດ 14 ສະບັບ.
------------------------------------------
ໂທລະໂຄ່ງ ໃຫ້ຫຼາຍກວ່າຄຳວ່າໂຄສະນາ
LINE ID: @tholakhong | Twitter ID: @tholakhong
tholakhong@gmail.com | www.tholakhong.com


No comments

Powered by Blogger.