Header Ads

ແຂວງເຊກອງ ສະເຫຼີມສະຫຼອງບຸນປີໃໝ່ລາວຢ່າງຄຶກຄື້ນມ່ວນຊື່ນ



ເຊກອງ,ວັນທີ 18/04/2017: ນັບແຕ່ວັນທີ 14-16 ເມສາ 2017 ເປັນໄລຍະສະເຫຼີມສະຫຼອງສົ່ງທ້າຍປີເກົ່າ ພສ 2559 ແລະ ຕ້ອນຮັບປີໃໝ່ ພສ 2560 ຖືໄດ້ວ່າເປັນບຸນປະເພນີປະຈຳຊາດຂອງລາວ ທົ່ວປະເທດຕ່າງກໍສະເຫຼີມສະຫຼອງດ້ວຍຄວາມເບີກບານມ່ວນຊື່ນ ແລະ ເຕັມໄປດ້ວຍຄວາມຮັກແພງສາມັກ ຄີ, ຮັກສາໄດ້ມູນເຊື້ອວັດທະນະທຳ ແລະ ຮີດຄອງປະເພນີອັນດີງາມຂອງຊາດ.

ໃນວັນທີ 14 ເມສາ 2017 ກົງກັບມື້ແຮມ 3 ຄ່ຳເດືອນ 5 ພສ 2560 ເປັນມື້ສັງຂານລ່ວງ ແລະ ເປັນມື້ທີ່ປວງຊົນລາວທັງຊາດ ໄດ້ເລີ່ມຕົ້ນສະເຫຼີມສະຫຼອງບຸນປີໃໝ່ລາວຢ່າງຄຶກຄື້ນມ່ວນຊື່ນ ໂດຍນັບແຕ່ເວລາ 13:00 ໂມງ ຊາວພຸດ ແລະ ປະຊາຊົນລາວຢູ່ແຂວງເຊກອງ ກໍຄືຢູ່ບັນດາແຂວງຕ່າງໆໃນຂອບເຂດທົ່ວປະເທດຕ່າງ ກໍໄດ້ຈັດກິດຈະກຳສຳຄັນຕ່າງໆທາງພຸດທະສາສະໜາເປັນຕົ້ນຢູ່ຕາມວັດວາອາຮາມແຕ່ລະແຫ່ງໄດ້ນຳເອົາພະພຸດທະຮູບລົງປະດິດສະຖານໄວ້ທີ່ຫໍສົງ ເພື່ອເປີດໂອກາດໃຫ້ຊາວພຸດທະບໍລິສັດທັງຫຼາຍ ແລະ ປະຊາຊົນລາວບັນດາເຜົ່າໄດ້ຫົດສົງຕາມຮີດຄອງປະເພນີອັນດີງາມທີ່ມີມາແຕ່ດຶກດຳບັນ.

Image may contain: 8 people, crowd and outdoor

ສຳລັບການສະເຫຼີມສະຫຼອງວັນບຸນປະເພນີສຳຄັນຂອງຊາດ ສະເພາະຢູ່ແຂວງເຊກອງ ຊຶ່ງໃນຕອນບ່າຍຂອງມື້ສັງຂານລ່ວງ, ແຂວງເຊກອງໄດ້ຈັດກິດຈະກຳສຳຄັນທາງປະເພນີ ແລະ ເປັນຄັ້ງປະຫວັດສາດຂອງແຂວງເປັນຕົ້ນແມ່ນຂະບວນແຫ່ພະພຸດທະຮູບ ແລະ ນາງສັງຂານປະຈຳປີ 2560 ຕາມເສັ້ນທາງເລີ່ມຈາກສວນຫຼັກເມືອງແຫ່ໄປຕາມຖະໜົນ 16A ລ້ຽວເຂົ້າສູ່ເສັ້ນທາງໜ້າຕະຫຼາດສົດແລ້ວເຂົ້າສູ່ວັດຫຼວງ.

Image may contain: 1 person, guitar and outdoor

ໃນຂະບວນແຫ່ປະກອບມີຂະບວນພະພຸດທະຮູບ, ຂະບວນພະສົງ, ຂະບວນການນຳຂອງແຂວງ ແລະ ເຖົ້າແກ່ແນວໂຮມ ເຊິ່ງນຳໂດຍ ທ່ານ ຖາວອນ ພົມມະໄລລຸນ ຮອງເຈົ້າແຂວງເຊກອງ, ຜູ້ປະຈຳການເຈົ້າແຂວງ; ທ່ານ ແພງສີ ສີລາວີ ເຈົ້າເມືອງໆລະມາມ, ຊາວພຸດສາສະນິກະຊົນ ແລະ ມວນຊົນຊາວແຂວງເຊກອງ.

ຂະບວນແຫ່ຫົວພະຍາກະບິນລະພົມ, ນາງສາວເຊກອງເປັນຕົວແທນໃຫ້ນາງສັງຂານ (ນາງທັງ 7 ເຊິ່ງເປັນລູກສາວຂອງພະຍາກະບິນລະພົມ), ມີຂະບວນດົນຕີມະໂຫລີພື້ນເມືອງລາວ, ຂະບວນບຸບຜາສາດອ່າງນ້ຳຫົດສົງ ແລະ ຂະບວນມວນຊົນຊາວແຂວງເຊກອງເຂົ້າຮ່ວມຢ່າງຫຼວງຫຼາຍ ແລະ ທີ່ເຕັມໄປດ້ວຍຄວາມເບີກບານມ່ວນຊື່ນ.


Image may contain: 2 people, people standing and outdoor

ຂ່າວ : ສັນຍາ ແກ້ວໄຊຍະວົງ
------------------------------------------
ໂທລະໂຄ່ງ ໃຫ້ຫຼາຍກວ່າຄຳວ່າໂຄສະນາ
LINE ID: @tholakhong | Twitter ID: @tholakhong
tholakhong@gmail.com | www.tholakhong.com



No comments

Powered by Blogger.