Header Ads

ຜົນສຳເລັດກອງປະຊຸມລັດຖະບານສະໄໝສາມັນ ປະຈໍາເດືອນ ມິຖຸນາ 2017


ກອງ​ປະຊຸມລັດຖະບານ​ສະ​ໄໝສາມັນ ປະ​ຈໍາ​ເດືອນ ມິຖຸນາ 2017 ​ໄດ້​ໄຂ​ຂຶ້ນ​ ໃນ​ວັນ​ທີ 22 ​ແລະ ປິດ​ລົງ​ດ້ວຍ​ຜົນສຳ​ເລັດ​ອັນ​ຈົບງາມ ໃນ​ວັນ​ທີ 23 ​ມິຖຸນາ 2017, ​ໂດຍ​ພາຍ​ໃຕ້​ການ​ເປັນ​ປະທານ​ຂອງ​ ທ່ານ ທອງ​ລຸນ ສີ​ສຸ​ລິດ ນາຍົກລັດຖະມົນຕີ, ມີບັນດາຮອງນາຍົກລັດຖະມົນຕີ, ພ້ອມ​ດ້ວຍສະມາຊິກລັດຖະບານ ເຂົ້າຮ່ວມ.

 ​ໂອກາດ​ດັ່ງກ່າວ, ທ່ານ ຈະ​ເລີນ ​ເຢຍປາວ​ເຮີ ລັດຖະມົນຕີ​ ປະຈຳ​ສຳນັກງານ​ນາຍົກ​ລັດຖະມົນຕີ ​ໄດ້​ຖະ​ແຫລ​ງຂ່າວ ກ່ຽວ​ກັບ​ຜົນສຳ​ເລັດ ​ຂອງ​ກອງ​ປະຊຸມດັ່ງກ່າວ, ​ໂດຍ​ທ່ານ​ໄດ້​ລາຍ​ງານ​ໃຫ້​ຮູ້​ວ່າ: ໃນເດືອນຜ່ານມາ ລັດຖະບານ ​ໄດ້ສືບຕໍ່ດຳເນີນການແກ້ໄຂບັນຫາຢາເສບຕິດ, ດຳເນີນມາດຕະການ ສ້າງຄວາມເປັນລະບຽບໃນສັງຄົມ, ສືບຕໍ່ແກ້ໄຂ ບັນດາປະກົດການຫຍໍ້ທໍ້ຂອງສັງຄົມ, ເອົາໃຈໃສ່ນຳພາ ການເຄື່ອນໄຫວ ເສດຖະກິດສັງຄົມ ການດຳລົງຊີວິດຂອງປະຊາຊົນ ໃຫ້ເຂົ້າສູ່ຄວາມມີລະບຽບຮຽບຮ້ອຍ ໃນທົ່ວປະເທດ; ສະມາຊິກລັດຖະບານ ກໍຄື ການນໍາຫລັກແຫລ່ງ ຂອງບັນດາກະຊວງ-ອົງການທຽບເທົ່າ ແລະ ອົງການປົກຄອງທ້ອງຖິ່ນ ໄດ້ນໍາພາການດໍາເນີນ ຊີວິດການເມືອງປັບປຸງປົວແປງພັກ ໃນກົງຈັກລັດຖະບານ ຢ່າງເປັນຂະບວນຟົດຟື້ນ ແລະ ມີຄວາມຮັບຜິດຊອບສູງ; ໄດ້​ຈັດ​ກິດຈະ​ກໍາ​ ສະ​ເຫລີມສະຫລອງ ວັນເດັກນ້ອຍສາກົນ ແລະ ວັນປູກຕົ້ນໄມ້ແຫ່ງຊາດ ຢ່າງເປັນຂະບວນຟົດຟຶ້ນ ແລະ ແຂງແຮງ, ​ເຊິ່ງເປັນການສ້າງຈິດສໍານຶກ ໃຫ້ລູກຫລານຂອງພວກເຮົາ​ໃຫ້​ເຕີບ​ໃຫຍ່​ດ້ວຍ​ຈິດ​ໃຈ​ຮັກຫອມ​ທໍາ​ມະ​ຊາດ ​ແລະ ສິ່ງ​ແວດ​ລ້ອມ. ພ້ອມ​ດຽວກັນ​ນັ້ນ, ​ໃນກອງປະຊຸມນາຍົກ, ຮອງນາຍົກລັດຖະມົນຕີ ຮ່ວມກັບຂະແໜງການ ແລະ ທ້ອງຖິ່ນທີ່ກ່ຽວຂ້ອງ ​ໄດ້ປຶກສາຫາລື ແລະ ພິຈາລະນາ ບັນຫາທີ່ສໍາຄັນຮີບດ່ວນຈໍານວນໜຶ່ງ ຢ່າງ​ເປັນ​ປົກກະຕິ ເປັນຕົ້ນ ແມ່ນການແກ້ໄຂບັນຫາການຍົກຍ້າຍ, ຈັດສັນປະຊາຊົນ ທີ່ຖືກຜົນກະທົບຈາກໂຄງການກໍ່ສ້າງເຂື່ອນໄຟຟ້ານ້ຳງຽບ 1 ແລະ ໂຄງການເຂື່ອນໄຟຟ້ານໍ້າຕົກ ເຊຊູ 4 ແຂວງອັດຕະປື; ການຜັນຂະຫຍາຍມະຕິ ຂອງສະພາແຫ່ງຊາດ ວ່າດ້ວຍການພັດທະນາໂຄງການສາຍສົ່ງ, ການພັດທະນາເຂດເສດຖະກິດພິເສດ ຄອນພະເພັງ ແລະ ດອນໂຂງ ແລະ ອະນຸມັດບັນດາໂຄງການລົງທຶນ ສຳຄັນຈຳນວນໜຶ່ງອີກ; ​ໄດ້ສຸມໃສ່ວຽກງານເກັບລາຍຮັບ, ຄຸ້ມຄອງລາຍຈ່າຍ ໃຫ້ໄປຕາມແຜນການທີ່ວາງໄວ້,  ສໍາລັບການເບີກຈ່າຍເງິນເດືອນ ໃຫ້ພະນັກງານທົ່ວປະເທດ ກໍສາມາດປະຕິບັດ ໄດ້ເດືອນຕໍ່ເດືອນຢ່າງເປັນປົກກະຕິ ແລະ ຍັງສືບຕໍ່ແກ້ໄຂ ການເບີກຈ່າຍທີ່ຍັງຊັກຊ້າ ຢູ່​ບາງ​ເມືອງ ​​ໃນ​ບາງ​ແຂວງ ຫ່າງໄກສອກຫລີກໃຫ້ໄວຂຶ້ນ; ທ່ານນາຍົກລັດຖະມົນຕີ ​ໄດ້ສຳເລັດການຢ້ຽມຢາມຍີ່ປຸ່ນ ຢ່າງເປັນທາງການ ແລະ ໄດ້ເຂົ້າຮ່ວມກອງປະຊຸມສາກົນ ກ່ຽວກັບ ອະນາຄົດຂອງອາຊີ ຄັ້ງທີ 23 ທີ່ໂຕກຽວ ເຊິ່ງຕີລາຄາວ່າ ໄດ້ຮັບໝາກຜົນເປັນຢ່າງດີ.

 ນອກນີ້, ບັນດາທ່ານ​ຮອງ​ນາຍົກລັດຖະມົນຕີ ​ແລະ ບັນດາ​ສະມາຊິກ​ລັດຖະບານ​ຫລາຍ​ທ່ານ ກໍໄດ້ເຄື່ອນໄຫວວຽກງານ ທັງພາຍໃນ ແລະ ຕ່າງປະເທດ ຢ່າງຕັ້ງໜ້າ ເພື່ອຊີ້ນຳວຽກງານຂະແໜງການຕົນ ໃຫ້ບັນລຸຕາມແຜນການ ທີ່ໄດ້ວາງ​ໄວ້.
​​
ສໍາລັບ​ ກອງ​ປະຊຸມ​ລັດຖະບານ​ສະ​ໄໝສາມັນ ປະ​ຈໍາ​ເດືອນ​ມິຖຸນາ 2017  ນີ້, ບັນດາ​ສະມາຊິກ​ລັດຖະບານ​ ໄດ້​ພ້ອ​ມກັນ​ສຸມ​ໃສ່​ປະກອບ​ຄໍາ​ຄິດ​ຄໍາ​ເຫັນ​ ຢ່າງ​ກົງ​ໄປ​ກົງ​ມາ ​ແລະ ມີ​ຄວາມ​ຮັບຜິດຊອບ​ສູງ ຕໍ່ກັບບັນດາເອກະສານ​ສໍາຄັນດັ່ງ​ນີ້: ໄດ້ຮັບຟັງການລາຍງານກ່ຽວກັບ ສະພາບພົ້ນເດັ່ນຂອງພາກພື້ນ ແລະ ສາກົນ, ວຽກງານ ປກຊ-ປກສ ແລະ ສະພາບການແກ້ໄຂບັນຫາຫຍໍ້ທໍ້ໃນສັງຄົມ. ຮັບຟັງການລາຍງານ ແລະ ປະກອບຄຳເຫັນຕໍ່ບັນຫາທີ່ພົ້ນເດັ່ນ ທາງດ້ານເສດຖະກິດ-ສັງຄົມ ຄື ການຈັດຕັ້ງປະຕິບັດແຜນຈັດເກັບ ລາຍຮັບ-ລາຍຈ່າຍ ປະຈຳງວດ 2 ຂອງປີ 2017; ຜົນການລົງກວດກາ ການນຳເຂົ້າພາຫະນະທີ່ບໍ່ຖືກຕ້ອງ ແລະ ປັບປຸງບັນດາດໍາລັດວິສາຫະກິດ ແລະ ສະພາບການຄຸ້ມຄອງ ອັດຕາແລກປ່ຽນ; ການກະກຽມ ໃຫ້ແກ່ການຊຸກຍູ້ການຜະລິດລະດູຝົນ ແລະ ມາດຕະການຄຸ້ມຄອງ ການລັກລອບນຳສັດຈາກຕ່າງປະເທດ ແລະ ສົ່ງເສີມການຜະລິດພາຍໃນ ໃຫ້ແຂງແຮງ; ຟັງລາຍງານກ່ຽວກັບການຈັດຕັ້ງປະຕິບັດຄຳສັ່ງເລກທີ 15/ນຍ ກ່ຽວກັບການແກ້ໄຂບັນຫາໄມ້ ໃນໄລຍະຜ່ານມາ ແລະ ບາງນະໂຍບາຍ, ມາດຕະການຈັດຕັ້ງປະຕິບັດໃຫ້ມີປະສິດທິຜົນໃນຕໍ່ໜ້າ; ປະກອບຄຳເຫັນເຂົ້າໃສ່ເອກະສານ ກ່ຽວກັບ ການເພີ່ມທະວີວຽກງານການຄຸ້ມຄອງ ແລະ ພັດທະນາທີ່ດິນ ໃນໄລຍະໃໝ່ ເພື່ອສະເໜີ ໃຫ້ຄະນະບໍລິຫານງານ ສູນກາງພັກ ພິຈາລະນາອອກເປັນມະຕິ.

ທິດທາງ ແລະ ມາດຕະການ ໃນການຈັດຕັ້ງປະຕິບັດກົດໝາຍ ແລະ ນິຕິກໍາ ທີ່ກ່ຽວຂ້ອງ ເພື່ອຄຸ້ມຄອງ ຮ້ານກິນດື່ມ ແລະ ຮ້ານບັນເທິງ ຢູ່ໃກ້ສະຖານທີ່ການສຶກສາ ແລະ ໂຮງໝໍ ໃນທົ່ວປະເທດ. ພ້ອມ​ນັ້ນ, ໄດ້ປຶກສາຫາລື ກ່ຽວກັບແຜນການສ້າງ ແລະ ປັບປຸງກົດ ໝາຍ ທີ່ຈະນຳເຂົ້າພິຈາລະນາ ໃນກອງປະຊຸມສະພາແຫ່ງຊາດ ເທື່ອທີ 4 ຂອງສະພາແຫ່ງຊາດ ຊຸດທີ VIII. ຕໍ່ກັບບົດ​ລາຍ​ງານ​ ກ່ຽວກັບສະພາບ​ການຈັດ​ຕັ້ງ​ປະຕິບັດ ​ແຜນ​ງົບປະມານ​ແຫ່ງ​ລັດ 6 ​ເດືອນ​ ຕົ້ນ​ສົກ​ປີ, ຄາດ​ຄະ​ເນ 6 ​ເດືອນ​ທ້າຍ​ປີ ​ແລະ ໝົດປີ 2017, ກອງ​ປະຊຸມ​ໄດ້​ມີ​ຄໍາ​ເຫັນ​ຊີ້​ນໍາ ​ໃຫ້​ພາກສ່ວນ​ກ່ຽວຂ້ອງ ສືບຕໍ່ປັບປຸງ​ຕາມ​ການ​ປະກອບ​ຄໍາ​ຄິດ​ຄໍາ​ເຫັນ ​ຂອງ​ສະມາຊິກ​ລັດຖະບານ ເປັນຕົ້ນ ເອົາໃຈໃສ່ສູ້ຊົນບຸກບືນຜ່ານຜ່າ ເພື່ອເຮັດໃຫ້ເສດຖະກິດມີຄວາມເຂັ້ມແຂງ ແລະ ກັບຄືນສູ່ສະພາບປົກກະຕິໂດຍໄວ, ສືບຕໍ່ຈັດເກັບລາຍຮັບ ເຂົ້າງົບປະມານ ໃຫ້ໄດ້ຄົບຖ້ວນຕາມກໍານົດເວລາ, ມີຄວາມໂປ່ງໃສ ເພື່ອຫລຸດຜ່ອນຊ່ອງຫວ່າງ ການຮົ່ວໄຫລຂອງງົບປະມານ, ກໍານົດມາດຕະການ ໃນການສຶກສາອົບຮົມ ໄປຄຽງຄູ່ກັບ ການຊຸກຍູ້ສົ່ງເສີມຫົວໜ່ວຍທຸລະກິດ ໃນການລົງທຶນ, ໃນນັ້ນ ຕ້ອງໄດ້ມີການຕິດຕາມກວດກາ ຄຸນນະພາບ ແລະ ປະສິດທິຜົນ ໃນການລົງທຶນຂອງໂຄງການຕ່າງໆ ຢ່າງຄັກແນ່, ສໍາຄັນແຕ່ນີ້ຈົນຮອດທ້າຍປີ 2017 ນີ້ ການຈັດເກັບລາຍຮັບເຂົ້າງົບປະມານ ຕ້ອງເກັບໃຫ້ໄດ້ຕາມແຜນ ຫລື ລື່ນແຜນການ ທີ່ວາງໄວ້. ກ່ຽວກັບ​ວຽກງານ​ທະນາຄານ ​ໃຫ້ເອົາ​ໃຈ​ໃສ່​ແກ້​ໄຂ​ສະພາບ​ຄ່ອງ​ ຂອງ​ທະ​ນາຄາ​ນໃຫ້​ໄດ້​ໂດຍ​ໄວ. ພ້ອມ​ດຽວກັນ​ນັ້ນ, ​ໃຫ້​ເອົາ​ໃຈ​ໃສ່​ດຶງ​ດູດ​ ​ແລະ ລະດົມເງິນຕາ​ຕ່າງປະ​ເທດ​ຈາກ​ປະຊາຊົນ ​​ໃຫ້​ມາ​ເຂົ້າ​ສູ່​ລະບົບ​ທະນາຄານ​ໃຫ້ຫລາຍຂຶ້ນ ​ເປັນ​ຕົ້ນ ​ການ​ລະດົມເງິນ​ຝາກ.

ສໍາລັບ​ການ​ນໍາ​ເຂົ້າ​ລົດ​ທີ່​ບໍ່ຖືກຕ້ອງ ​ແລະ ປອມ​ແປງ​ເອກະສານ​ນັ້ນ ​ແມ່ນ​ໃຫ້​ສືບຕໍ່ຈັດ​ຕັ້ງ​ປະຕິບັດ​ຕາມ​ແຈ້ງ​ການ​ ຂອງ​ຫ້ອງ​ວ່າການ​ສໍານັກງານ​ນາຍົກລັດຖະມົນຕີ ສະບັບ​ເລກທີ 142/ຫສນຍ.ກລຂ, ລົງ​ວັນ​ທີ 25 ມັງກອນ 2017 ກ່ຽວກັບ​ການ​ແກ້​ໄຂ​ລົດ​ນໍາ​ເຂົ້າ​ທີ່​ບໍ່ຖືກຕ້ອງ ​ໃນ​ຂອບ​ເຂດ​ທົ່ວ​ປະ​ເທດ. ກ່ຽວກັບ​ການ​ປັບປຸງ​ບັນດາ​ລັດວິ​ສາ​ຫະກິດນັ້ນ ​ແມ່ນ​ໃຫ້ມີ​ການ​ຈັດ​ລຽງບູລິດ​ມະ​ສິດ​ຄັກ​ແນ່, ພ້ອມ​ດຽວກັນນັ້ນ ​​ແມ່ນໃຫ້​ຈັດ​ກອງ​ປະຊຸມ​ປຶ​ກສາ​ຫາລື​ກັນ​ຕື່ມ. ຕໍ່ກັບບົດ​ລາຍ​ງານ ກ່ຽວກັບ​ການ​ກະກຽມ​ໃຫ້​ແກ່​ການ​ຊຸກຍູ້ສົ່ງ​ເສີມ​ການ​ຜະລິດ​ລະດູຝົນ ​ແລະ ມາດ​ຕະການ​ຄຸ້ມ​ຄອງການ​ລັກລອບ​ນໍາ​ເຂົ້າ​ຊີ້ນໝູຈາກ​ຕ່າງປະ​ເທດ.

ກອງ​ປະຊຸມ​ ໄດ້​ມີ​ຄໍາ​ເຫັນ​ຊີ້​ນໍາ​ໃຫ້​ພາກສ່ວນ​ກ່ຽວຂ້ອງ ສືບຕໍ່ປັບປຸງ​ຕາມ​ການ​ປະກອບ​ຄໍາ​ຄິດ​ຄໍາ​ເຫັນ ​ຂອງ​ສະມາຊິກ​ລັດຖະບານ ເປັນຕົ້ນ ຕ້ອງ​ຮັບປະກັນ​ໃຫ້​ປະຊາຊົນ​ມີ​ເຂົ້າ​ກິນ​ຢ່າງ​ພຽງພໍ ​ເມື່ອ​ຜະລິດ​ເຂົ້າ​ອອກ​ມາ​ແລ້ວ​ຕ້ອງ​ມີ​ຕະຫລາດຮອງ​ຮັບ​ທີ່ໝັ້ນຄົງ. ພ້ອມ​ດຽວກັນ​ນັ້ນ, ພາກສ່ວນ​ທີ່​ກ່ຽວຂ້ອງ​ຕ້ອງ​ໄດ້​ປຶກສາ​ຫາລື ​ແລະປະສານ​ສົມທົບ​ກັນ​ລະອຽດ ​​​ເພື່ອຊຸກຍູ້​ສົ່ງ​ເສີມ​​ ແລະ ​ແກ້​ໄຂ​ຂັ້ນ​ຂອດ​ທີ່​ເປັນ​ສິ່ງ​ອຸດ​ຕັນ ຕໍ່ການ​ຜະລິດ​ຂອງ​ປະ ຊາຊົນ ​ໂດຍ​ສະ​ເພາະ​ແມ່ນການສະໜອງ​ເງິນ​ກູ້, ການ​ປູກ​​, ການ​ລ້ຽງ, ການ​ປັບປຸງສົ່ງ​ເສີມ ​ແລະ ສະໜອງ​ແນວ​ພັນ​ພືດ ​ແລະ ສັດ ​ໃຫ້​ປະຊາຊົນ ​ເພື່ອ​ເຮັດ​ໃຫ້ການ​ຜະລິດ​ຂອງ​ປະຊາຊົນ ​​ໄດ້​ທັງ​ດ້ານ​ປະລິ​ມານ ​ແລະ ຄຸນ​ນະພາ​ບ ສາມາດ​ສົ່ງ​ອອກຂາຍ​ພາຍ​ໃນ​ ແລະ ຕ່າງປະ​ເທດ. ພ້ອມ​ນັ້ນ ຕ້ອງ​ມີ​ມາດ​ຕະການ​ຕ້ານ​ແລ້ງ​ຕ້ານ​ຖ້ວມ​ທີ່​ຊັດ​ເຈນ ​ເມື່ອ​ເກີດມີ​ບັນຫາ​​ສາມາດ​ຈັດ​ຕັ້ງ​ປະຕິບັດ​ໄດ້​ທັນທີ ​ເປັນ​ຕົ້ນການ​ແຜ່​ລະບາດ​ຂອງຕັກ​ກະ​ແຕນ, ໜູຂີ ​ແລະ ອື່ນໆ. ສ່ວນບົດ​ລາຍ​ງານ​ກ່ຽວກັບ​ການ​ແກ້​ໄຂ​ບັນຫາ​ໄມ້ (ການ​ປະມູນ, ການ​ຄຸ້ມ​ຄອງ, ການສົ່ງອອກ, ການ​ດັດສົມ​ໂຮງງານ ​ແລະ ອື່ນໆ). ກອງ​ປະຊຸມ​ເຫັນດີຮັບຮອງ​ ​ແລະ ​ຊີ້​ນໍາ​ໃຫ້​ພາກສ່ວນ​ທີ່​ກ່ຽວຂ້ອງ​ນໍາ​ເອົາ​ໄປ​ປັບປຸງ​ຕື່ມ ​ຕາມ​ການ​ປະກອບ​ຄໍາ​ຄິດ​ຄໍາ​ເຫັນ​ຂອງ​ສະມາຊິ​ກລັດຖະບານ ​ເປັນ​ຕົ້ນ ​ໃຫ້​ສືບຕໍ່ຕິດຕາມກວດກາ​ເບິ່​ງບັນດາ​ໂຮງ​ເລື່ອຍ​ໂຮງ​ຊອຍ ທີ່​ມີ​ຄໍາສັ່ງ​ໃຫ້​​ເຊົາ ຫລື ຍຸບ​​ໄປ​ແລ້ວນັ້ນ ຍັງ​ມີ​ການສືບຕໍ່​ລັກລອບ​ເຮັດອີກບໍ່? ​ເພື່ອ​ບໍ່​​ສ້າງ​ເງື່ອນ​ໄຂ​ໃນ​ການ​ລັກລອບ​ຕັດ​ໄມ້. ພ້ອມ​ດຽວກັນ​ນັ້ນ, ​ໃຫ້​ສືບຕໍ່ຍຸບ​ເລີກບັນດາ​ໂຮງງານ ​ທີ່​ຍັງ​ເຫລືອ​ໃຫ້​ສໍາ​ເລັດ​ໂດຍ​ໄວ ມອບ​ໃຫ້​ບັນດາ​ກະຊວງທີ່​ກ່ຽວຂ້ອງ ​ຈັດ​ຕັ້ງ​ປະຕິບັດ​ຕາມໜ້າທີ່​ ທີ່​ໄດ້​ຮັບ​ມອບໝາຍ, ສໍາລັບ​ການ​ເກັບ​ກູ້, ປະມູນ​ຂາຍ ​ແລະ ນໍາ​ໃຊ້​ໄມ້​ທີ່​ຕັດ​ແລ້ວ​ນັ້ນ ​ແມ່ນ​ໃຫ້​ສືບຕໍ່ກວດກາ​, ອອກ​ນະ​ໂຍບາຍ ​ແລະ ນິຕິ​ກໍາ​ຕື່ມ ​ເພື່ອ​ແກ້​ໄຂ​ບັນຫາ​ໃຫ້​ຖືກ​ຈຸດ​ໃນ​ການ​ປະມູນ, ​ເຮັດ​ໃຫ້​ຖືກ​ກັບ​ນະ​ໂຍບາຍ​ ​ແລະ ບໍ່​ໃຫ້​ມີ​ຊ່ອງ​ຫວ່າງ, ​ເອົາ​ໃຈ​ໃສ່​ອໍານວຍ​ຄວາມ​ສະດວກ ​ໃຫ້​ແກ່​ຜູ້​ປະມູນ, ຜູ້​ຊື້. ພ້ອມ​ດຽວກັນ​ນັ້ນ, ກໍ​ໃຫ້​ປາບ​ປາມ ຜູ້​ທີ່​ຍັງ​ມີ​ການ​ລັກລອບ​ຕັດ ​ແລະ ສົ່ງ​ອອກ​ໄມ້​ທີ່​ບໍ່ຖືກຕ້ອງ. ກ່ຽວກັບ​ການ​ສົ່ງ​ອອກ​ນັ້ນ ຕ້ອງ​ໄດ້​ອໍານວຍ​ຄວາມ​ສະດວກ​ ໃຫ້​ຜູ້​ປະກອບ​ການ​ທີ່​ດໍາ​ເນີນ​ການ​ຖືກຕ້ອງ​ຕາມ​ລະບຽບ. ສໍາລັບ​ເອກະສານຮ່າງ​ມະຕິ​ ຂອງ​ຄະນະ​ບໍລິຫານ​ງານ​ສູນ​ກາງ​ພັກ ວ່າ​ດ້ວຍ ​ການ​ເພີ່ມ​ທະວີ​ວຽກງານ​ຄຸ້ມ​ຄອງ ​ແລະ ພັດທະນາ​ທີ່​ດິນ ​ໃນ​ໄລຍະ​​ໃໝ່ ກອງ​ປະຊຸມ​ເຫັນດີຮັບຮອງດ້ານຫລັກການ ​ແລະ ​ຊີ້​ນໍາ​ໃຫ້​ພາກສ່ວນ​ທີ່​ກ່ຽວຂ້ອງ ​ນໍາ​ເອົາ​ໄປ​ປັບປຸງ​ຕື່ມ ​ຕາມ​ການ​ປະກອບ​ຄໍາ​ຄິດ​ຄໍາ​ເຫັນ​ຂອງ​ສະມາຊິ​ກລັດຖະບານ.

ສ່ວນທິດ​ທາງ ​ແລະ ມາດ​ຕະການ​ຈັດ​ຕັ້ງ​ປະຕິບັດ​ກົດໝາຍ ​ແລະ ນິຕິ​ກໍາທີ່​ກ່ຽວຂ້ອງ ​ເພື່ອ​ຄຸ້ມ​ຄອງ​ຮ້ານ​ກິນ​ດື່ມ ​ແລະ ຮ້ານ​ບັນ​ເທີ​ງ ຢູ່​ໃກ້​ກັບ​ສະຖານ​ທີ່​ການ​ສຶກສາ ​ແລະ ​ໂຮງໝໍ ​ໃນ​ທົ່ວ​ປະ​ເທດ ກອງ​ປະຊຸມ​ເຫັນດີ​​ໃຫ້​ຈັດ​ຕັ້ງ​ປະຕິບັ​ດຕາມ​ກົດໝາຍ ​ແລະ ນິຕິ​ກໍາ​ລຸ່ມ​ກົດໝາຍທີ່​ກ່ຽວຂ້ອງ​ຢ່າງ​ເຂັ້ມ​ງວດ, ບໍ່ຈໍາ​ເປັນອອກ​ຄໍາ​ສັ່ງ​ສະ​ເພາະ​ຕື່ມ​ອີກ.  ສຳລັບແຜນການ​ສ້າງ ​ແລະ ປັບປຸງ​ກົດໝາຍ ທີ່​ຈະ​ນໍາ​​ເຂົ້າ​ພິຈາລະນາ​ໃນ​ກອງ​ປະຊຸມ​ສະ​ໄໝສາມັນ ​ເທື່ອ​ທີ 4 ຂອງ​ສະພາ​ແຫ່ງ​ຊາດ​ ຊຸດທີ VIII ກອງ​ປະຊຸມ ​ເຫັນດີຮັບຮອງດ້ານຫລັກການ ​ແລະ ​ຊີ້​ນໍາ​ໃຫ້​ພາກ ສ່ວນ​ທີ່​ກ່ຽວຂ້ອງ​ນໍາ​ເອົາ​ໄປ​ປັບປຸງ​ຕື່ມ ​ຕາມ​ການ​ປະກອບ​ຄໍາ​ຄິດ​ຄໍາ​ເຫັນ​ຂອງ​ສະມາຊິ​ກລັດຖະບານ ​ເປັນ​ຕົ້ນ ທຸກ​ກະຊວງ​ຕ້ອງ​ຍົກ​ສູງ​ຄວາມ​ຮັບຜິດຊອບ​ຂອງ​ຕົນ ​ໃນ​ການ​ສ້າງ ​ແລະ ປັບປຸງ​ກົດໝາຍ ​ໃຫ້​ມີ​ປະສິດທິພາບ ​ແລະ ປະສິດທິ​ຜົນ.

 ສຳລັບ ທິດທາງວຽກຈຸດສຸມ ປະຈຳເດືອນກໍລະກົດ 2017 ນີ້, ເພື່ອຮັບປະກັນ ໃຫ້ສາມາດບັນລຸຄາດໝາຍ ທີ່ວາງໄວ້ ລັດຖະບານ ມີຈຸດສຸມທີ່ຈະຕ້ອງໄດ້ເອົາໃຈໃສ່ ດັ່ງນີ້: ສືບຕໍ່ຮັກສາຄວາມສະຫງົບ, ຄວາມເປັນລະບຽບຮຽບຮ້ອຍ ແລະ ສະຖຽນລະພາບທາງດ້ານການເມືອງໃຫ້ໝັ້ນທ່ຽງ, ເອົາໃຈໃສ່ແກ້ໄຂປະກົດການຫຍໍ້ທໍ້ ທາງສັງຄົມ ເປັນຕົ້ນ ແມ່ນໜໍ່ແໜງ ຂອງອາສະຍາກຳ, ບັນຫາຢາເສບຕິດ, ການຂີ້ລັກງັດແງະ, ການມົ້ວສຸມຂີ່ລົດກວນເມືອງ, ອັກຄີໄພ ແລະ ອື່ນໆ ຕະຫລອດຮອດການເຄື່ອນໄຫວແບ່ງແຍກ ແລະ ຍຸແຍ່ໃຫ້ປະຊາຊົນໃຫ້ເຂົ້າໃຈຜິດ ຕໍ່ການຈັດຕັ້ງຂອງພວກເຮົາ ແລະ ມີການເຄື່ອນໄຫວ ທີ່ບໍ່ສອດຄອງກັບກົດໝາຍ ແລະ ລະບຽບການ; ສືບຕໍ່ຕິດຕາມຢ່າງໃກ້ຊິດ ສະພາບການພາກພື້ນ ແລະ ສາກົນ ໂດຍມີການວິເຄາະວິ​ໄຈຢ່າງລະອຽດ, ເລິກເຊິ່ງຕໍ່​ຄວາມ​ສ່ຽງ ​ແລະ ທ່າ​ອ່ຽງຜົນ​ກະທົບ ທາງດ້ານການເມືອງ, ​ເສດຖະກິດ ແລະ ສັງຄົມ ຕໍ່​ປະ​ເທດ​ເຮົາ. ພ້ອມນີ້, ກໍສືບຕໍ່ການເຄື່ອນໄຫວວຽກງານຕ່າງປະເທດ ຢ່າງຫ້າວຫັນ ທັງໃຫ້ປ້ອງກັນຜົນປະໂຫຍດ ທາງດ້ານການເມືອງ ແລະ ນຳເອົາຜົນປະໂຫຍດຕົວຈິງ ມາໃຫ້ແກ່ປະເທດຊາດ; ດຳເນີນມາດຕະການເກັບລາຍຮັບ ແລະ ຄຸ້ມຄອງລາຍຈ່າຍ ໂດຍມີ ການຖອດຖອນບົດຮຽນຈາກໄລຍະ 6 ເດືອນຜ່ານມາ ແນໃສ່ຮັບປະກັນ ການຈັດເກັບລາຍຮັບ ໃຫ້ບັນລຸຄາດໝາຍ ແລະ ຄຸ້ມຄອງລາຍຈ່າຍ ໃຫ້ມີປະສິດທິພາບ.

ດ້ານລາຍຮັບ, ໃຫ້ສຸມໃສ່ການຈັດເກັບຈາກຖານລາຍຮັບທີ່ມີຢ່າງເຂັ້ມງວດ ແລະ ແທດຕົວຈິງ, ປ້ອງກັນການລັກລອບ ແລະ ມີມາດຕະການເຄັ່ງຂັດ ຕໍ່ຜູ້ລະເມີດກົດໝາຍ ແລະ ລະບຽບການຕ່າງໆ. ດ້ານລາຍຈ່າຍ, ໃຫ້ຕິດຕາມ, ຊຸກຍູ້ ແລະ ກວດກາ ການຈັດຕັ້ງປະຕິບັດຄຳສັ່ງເລກທີ 09/ນຍ ວ່າດ້ວຍການປະຢັດລາຍຈ່າຍງົບປະມານລັດ ໃຫ້ມີປະສິດທິຜົນ, ເຂັ້ມງວດໃນການກວດກາ ການສະເໜີ ຂໍພິຈາລະນາ ລາຍຈ່າຍບໍລິຫານ, ລາຍຈ່າຍດັດສົມ, ລາຍຈ່າຍຊື້ໃໝ່ ແລະ ການເບິກຈ່າຍເງິນເດືອນ ໂດຍສືບຕໍ່ເອົາໃຈໃສ່ແກ້ໄຂການເບິກຈ່າຍເງິນເດືອນ ຢູ່ບາງເມືອງ ແລະ ເຂດຮ່າງໄກ ທີ່ຍັງຊັກຊ້າ ໃຫ້ຕົກໄປຢ່າງຂາດຕົວ; ສືບຕໍ່ປັບປຸງ​ບັນດາ​ກົດໝາຍ​ ແລະ ນິຕິກໍາ ທີ່ລັດຖະບານໄດ້ຊີ້ນໍາ ແລະ ເປັນເອກະພາບ ​ໃນ​ກອງ​ປະຊຸມ​ລັດຖະບານ; ບັນຫາໃດທີ່​ຈະ​ນໍາ​​ສະ​ເໜີ ​ຕໍ່ກອງປະຊຸມສະພາ​ແຫ່ງ​ຊາດ ໃນ​ເດືອນ​ຕຸລາ 2017 ທີ່ຈະມາເຖິງ, ເປັນຕົ້ນແມ່ນ ຮ່າງບົດສະຫລຸບ ແຜນພັດທະນາເສດຖະກິດ-ສັງຄົມ ແລະ ງົບປະມານ ປະຈຳປີ 2017 ແລະ ແຜນປີ 2018 ກໍໃຫ້ຮີບຮ້ອນປັບປຸງ ແລະ ສົ່ງໃຫ້​ສະພາ​ແຫ່ງ​ຊາດ​ ທັນຕາ​ມເວລາ​ທີ່​ກໍານົດ; ສືບຕໍ່ຄົ້ນຄວ້າ ແລະ ປັບປຸງກົດໝາຍອາກອນ ແລະ ອາກອນມູນຄ່າເພີ່ມ, ລັດຖະບັນຍັດ 003/ປປທ ວ່າດ້ວຍຄ່າທຳນຽມ ແລະ ບໍລິການ, ດໍາລັດວ່າດ້ວຍທຸລະກິດນ້ຳມັນເຊື້ອໄຟ, ດໍາລັດຄຸ້ມຄອງດ່ານສາກົນທາງບົກ ແລະ ນິຕິກໍາອື່ນໆ ທີ່ເລັ່ງດ່ວນໃຫ້ສໍາເລັດໂດຍໄວ ແລະ ທັນກັບສະພາບຄວາມຮຽກຮ້ອງຕ້ອງການ ຂອງວຽກງານ ໃນປະຈຸບັນ; ສືບຕໍ່ຄຸ້ມຄອງ ແລະ ຮັກສາສະຖຽນລະພາບທາງດ້ານເສດຖະ ກິດມະຫາພາກ, ຄຸ້ມຄອງອັດຕາເງິນເພີ້, ອັດຕາແລກປ່ຽນ ໃຫ້ຢູ່ໃນເກນປົກກະຕິ; ຕິດຕາມ ແລະ ຄຸ້ມຄອງການເຄື່ອນໄຫວຂອງ ທະນາຄານທຸລະກິດ ແລະ ບັນດາ ສະຖາບັນການເງິນ ໃຫ້ຖືກຕ້ອງຕາມກົດໝາຍ ແລະ ລະບຽບການ; ຕິດຕາມຢ່າງໃກ້ສິດ ແລະ ຄົ້ນຄວ້າ ທິດທາງແກ້ໄຂ ຢ່າງຮອບຄອບ ແລະ ທັນການຕໍ່ການເຄື່ອນໄຫວ ລະດົມທຶນ ທີ່ບໍ່ຖືກລະບຽບ; ເອົາໃຈໃສ່ຄົ້ນຄວ້າ ອັດຕາດອກເບ້ຍເງິນກູ້ ແລະ ກົນໄກການສະໜອງທຶນ ​ເພື່ອຊຸກຍູ້ສົ່ງ​ເສີມ​ການ​ຜະລິດພາຍໃນ ໂດຍສະເພາະ ໃນເງື່ອນໄຂ ທີ່ພາກທຸລະກິດພາຍໃນ, ສົ່ງເສີມການລົງທຶນ ຂອງຕ່າງປະເທດ ເພື່ອເປັນມາດຕະການໜຶ່ງ ໃນການກະຕຸ້ນ​ເສດຖະກິດ. ໃຫ້ທະນາຄານແຫ່ງ ສປປ ລາວ ສົມທົບກັບ ທະນາຄານທຸລະກິດ ຄົ້ນຄວ້າທິດທາງ ແລະ ວິທີການເພື່ອຊ່ວຍເຫລືອ ຜູ້ຜະລິດພາຍໃນ ແກ້ໄຂຄວາມຫຍຸ້ງຍາກຂອງປະຊາຊົນ ແລະ ຜູ້ຜະລິດລາຍຍ່ອຍ ໃຫ້ເປັນຮູບປະທໍາ; ສືບຕໍ່ຄົ້ນຄວ້າວິທີການທີ່ ເໝາະສົມ ແລະ ເປັນໄປໄດ້ ໃນການແກ້ໄຂໜີ້ສິນ ໂຄງການລົງທຶນຂອງລັດ ດ້ວຍຫລາຍຮູບການ ເຊັ່ນ: ການແກ້ໄຂ ດ້ວຍຮູບການແບບ ອວ່າຍໜີ້ 3 ແຈ, ການກວດກາຄືນ ແລະ ເຈລະຈາ ຫລຸດຜ່ອນມູນຄ່າໜີ້ ຂອງໂຄງການ ຫລື ວິທີການອື່ນໆ; ສືບຕໍ່ຕິດຕາມ, ອຳນວຍຄວາມສະດວກ, ຊຸກຍູ້ ແລະ ແກ້ໄຂບັນຫາ ທີ່ຕິດພັນກັບໂຄງການລົງທຶນ ແລະ ໂຄງການພັດທະນາຂະໜາດໃຫຍ່ຕ່າງໆ ເຊັ່ນ: ໂຄງການກໍ່ສ້າງທາງລົດໄຟ ລາວ-ຈີນ, ໂຄງການເຂື່ອນໄຟຟ້າຕ່າງໆ, ໂຄງການພັດທະນາ ລະບົບສາຍສົ່ງ, ໂຄງການສຳຫລວດ ແລະ ຂຸດຄົ້ນແຮ່ທາດ ແລະ ອື່ນໆ ໃຫ້ດຳເນີນໄປຕາມແຜນການ. ພ້ອມກັນນີ້, ກໍ່ໃຫ້ຮີບຮ້ອນປັບປຸງ ນະໂຍບາຍສົ່ງເສີມທຸລະກິດ ຂະໜາດນ້ອຍ ແລະ ຂະໜາດກາງ ໃຫ້ສາມາດຮັບຮອງໄດ້ໄວ, ພ້ອມທັງສືບຕໍ່ຄົ້ນຄວ້າ ແລະ ຜັນຂະຫຍາຍເປັນກົດໝາຍ, ນິຕິກຳລຸ່ມກົດໝາຍ ແລະ ລະບຽບການທີ່ກ່ຽວຂ້ອງ ເພື່ອໃຫ້ສາມາດນຳໄປຈັດຕັ້ງປະຕິ ບັດໄດ້ໄວ ແລະ ມີປະສິດທິຜົນ; ຊຸກຍູ້ຂະແໜງການ ແລະ ທ້ອງຖິ່ນ ໃນຂອບເຂດທົ່ວປະເທດ ເອົາໃຈໃສ່ວຽກງານ​​ກະກຽມຮອບ​ດ້ານ​ ໃຫ້ແກ່ການ​ຜະລິດ​ລະດູ​ຝົນທີ່ກຳລັງມາເຖິງ​; ສືບ​ຕໍ່​ກະກຽມ​​ການ​ຄວບຄຸມ​ຕັກກະ​ແຕນ​ຝູງ​ ທີ່ກໍາລັງແຜ່ລະບາດ ແລະ ມີໂອກາດຂະຫຍາຍກວ້າງ ຢູ່ຫລາຍແຂວງ; ສືບ​ຕໍ່​ຈັດ​ຕັ້ງການ​ເຝົ້າ​ລະວັງ ​ແລະ ປ້ອງ​ກັນ​ເຊື້ອ​ພະຍາດ​ໄຂ້ຫວັດ​ສັດ​ປີກ (H5N1, H7N9), ພະຍາດ​ໝູ ແລະ ພະ​ຍາດ​ສັດ​ອື່ນໆ ທີ່​ອາດ​ເກີດ​ຂຶ້ນ​ ໃນ​ໄລຍະລະດູ​ຮ້ອນ; ສືບຕໍ່ຈັດຕັ້ງປະຕິບັດ ຄຳສັ່ງເລກທີ 15/ນຍ ວ່າດ້ວຍ ການເພີ່ມທະວີຄວາມເຂັ້ມງວດ ໃນການຄຸ້ມຄອງ ແລະ ກວດກາໄມ້ ແລະ ເອົາໃຈໃສ່ຄົ້ນຄວ້າແກ້ໄຂ ບັນຫາໄມ້ ໃຫ້ມີປະສິດທິຜົນ ເປັນຕົ້ນ ແມ່ນການສືບຕໍ່ ປະຕິບັດຢ່າງເຂັ້ມງວດ ການຮື້ຖອນ ແລະ ຍຸບເລີກ ໂຮງງານອຸດສາຫະກຳໄມ້ ທີ່ບໍ່ສອດຄ່ອງກັບກົດໝາຍ ແລະ ລະບຽບການ, ການປະມູນຂາຍໄມ້ທີ່ຍືດໄດ້, ການຊຸກຍູ້ ແລະ ອຳນວຍຄວາມສະດວກ ໃຫ້ແກ່ການສົ່ງອອກຜະລິດຕະພັນໄມ້, ແກ້ໄຂກໍລະນີລັກລອບຕັດໄມ້ ແລະ ລັກສົ່ງໄມ້ອອກ ໃຫ້ເຂັ້ມງວດ ແລະ ເດັດຂາດ ແລະ ອື່ນໆ; ເອົາໃຈໃສ່ຜັນຂະຫຍາຍໝາກຜົນ ຂອງການເຄື່ອນໄຫວຢ້ຽມຢາມ ແລະ ເຮັດວຽກຢູ່ຕ່າງປະເທດ ຂອງຄະນະລັດຖະບານ ໂດຍເອົາໃຈໃສ່ຕິດຕາມ, ຊຸກຍູ້ ແລະ ກວດກາ ການຈັດຕັ້ງປະຕິບັດ ບັນດາໂຄງການຮ່ວມມື ໃນຂອບສອງຝ່າຍ ທີ່ໄດ້ມີການປຶກສາຫາລື ແລະ ຕົກລົງກັນໃນເດືອນຜ່ານມາ ເປັນຕົ້ນແມ່ນໂຄງການຮ່ວມມື ລາວ-ຫວຽດນາມ, ລາວ-ຈີນ, ລາວ-ຍີ່ປຸ່ນ, ລາວ-ໄທ ແລະ ຄູ່ຮ່ວມມືອື່ນໆ ໃຫ້ມີຄວາມຄືບໜ້າໂດຍໄວ ແລະ ມີປະສິດທິຜົນ; ສືບຕໍ່ເອົາໃຈໃສ່ ການຈັດຕັ້ງປະຕິບັດກົດໝາຍ ແລະ ລະບຽບການ ໂດຍສະເພາະໃນຂົງເຂດການລົງທຶນຂອງລັດ, ການຫັນຊັບສິນເປັນທຶນ ໃນໄລຍະຜ່ານມາ, ການລົງທຶນ ຂອງພາກທຸລະກິດ ແລະ ອື່ນໆ ເພື່ອໃຫ້ສືບຕໍ່ ດ້ານການຄຸ້ມຄອງລັດ ໃຫ້ເຂົ້າສູ່ກົດໝາຍ ແລະ ລະບຽບການຢ່າງເຂັ້ມງວດ. ພ້ອມກັນນີ້, ກໍເອົາໃຈໃສ່ກວດກາການແກ້ໄຂ ຄຳຮ້ອງທຸກ ແລະ ຄຳສະເໜີຂອງປະຊາຊົນ ຫລື ນິຕິບຸກຄົນທີ່ ກ່ຽວກັບຂໍ້ຂັດແຍ່ງ ຫລື ຄະດີຄວາມຕ່າງໆ ເພື່ອໃຫ້ຄວາມເປັນທຳ ແລະ ມີຄວາມຍຸຕິທໍາແກ່ທຸກຝ່າຍ; ຊີ້ນຳ ແລະ ຕິດຕາມການສ້າງກິດຈະກຳຕ່າງໆ ເປັນຕົ້ນແມ່ນ ຂະບວນ ການແຂ່ງຂັນຮັກຊາດ ແລະ ພັດທະນາ, ການຊ່ວຍເຫລືອສັງຄົມ, ການອະນຸລັກຮັກສາຮີດຄອງປະເພນີ ແລະ ວັດທະນະທຳອັນດີງາມ ຂອງຊາດ ແລະ ອື່ນໆ ໃຫ້ບັນດານ້ອງນັກຮຽນ-ນັກສຶກສາ ທີ່ກຳລັງພັກຮຽນ ໃນຊ່ວງລະດູຝົນນີ້ໃຫ້ມີເນື້ອໃນ ແລະ ເປັນປະໂຫຍດຕໍ່ສັງຄົມ ແລະ ຕໍ່ການພັດທະນາ ຂອງນ້ອງນັກຮຽນ ແລະ ນັກສຶກສາເອງ, ທັງເປັນການໃຊ້ເວລາວ່າງຂອງເຂົາເຈົ້າ ໃຫ້ມີຄຸນຄ່າ, ຫ່າງໄກຈາກຢາເສບຕິດ ແລະ ອະບາຍະມຸກຕ່າງໆ. ບັນດາສະມາຊິກລັດຖະບານ ສຶບຕໍ່ຊີ້ນຳ, ຕິດຕາມ, ຊຸກຍູ້ ແລະ ກວດກາ ການຈັດຕັ້ງປະຕິບັດວຽກງານຈຸດສຸມ ພາຍໃຕ້ ຄວາມຮັບຜິດຊອບຂອງຕົນ ໃຫ້ມີປະສິດທິຜົນ ພ້ອມທັງ ມີການສະຫລຸບລາຍງານ ມາຍັງຫ້ອງວ່າການ ສຳນັກງານນາຍົກລັດຖະມົນຕີ ກ່ອນກອງປະຊຸມລັດຖະບານ ໃນເດືອນກໍລະກົດ. ພ້ອມນີ້, ພວກເຮົາຈະໄດ້ທົບທວນ ແລະ ປະເມີນ ການຈັດຕັ້ງປະຕິບັດ ບັນດາມະຕິ, ຄຳສັ່ງ, ແຈ້ງການ ແລະ ທິດຊີ້ນຳທີ່ສຳຄັນຕ່າງໆ ຂອງລັດຖະບານຕໍ່ກອງປະຊຸມ ໃນເດືອນຕໍ່ໄປ.

------------------------------------------
ໂທລະໂຄ່ງ ໃຫ້ຫຼາຍກວ່າຄຳວ່າໂຄສະນາ
LINE ID: @tholakhong | Twitter ID: @tholakhong
tholakhong@gmail.com | www.tholakhong.com


No comments

Powered by Blogger.