Header Ads

ແຕ່ນີ້ຮອດປີ 2020 ລັດຖະບານ ຕັ້ງເປົ້າຈະເກັບລາຍຮັບ ໃຫ້ໄດ້ເພີ່ມຂຶ້ນ 50%



ແຕ່​ນີ້​ຮອດ​ປີ 2020 ລັດ­ຖະ­ບານ​​ ໄດ້​ຢືນ­ຢັນ​ທີ່​ຈະ​ສືບ­ຕໍ່​ ແກ້​ໄຂບາງ​ບັນ­ຫາ​ຄົງ​ຄ້າງ ​ໃນ​ໄລ ຍະຜ່ານ​ມາ ເພື່ອ​ເຮັດໃຫ້ສະພາບການເງິນ ມີ​ຄວາມ​ຄ່ອງຕົວ​​ເປັນກ້າວໆ ທັງ​ນີ້,​ ເພື່ອ​ຮັບ­ປະ­ກັນ​ ໃຫ້​ຂະແໜງ ການ​ເງິນ​ຂອງ​ປະ­ເທດ​ ມີການ​ປ່ຽນ­ແປງ​ໃໝ່​ ຢ່າງ­ຮອບ­ດ້ານ, ໂດຍ​ສ້າງ​ໃຫ້ມີ ຄວາມ​ໂປ່ງ​ໃສ, ແກ້​ໄຂປະກົດການຫຍໍ້­ທໍ້​ ໃນທຸກ​ດ້ານ ແລະ​ ຫັນ​ໄປ​ສູ່​ຄວາມ​ທັນ​ສະໄໝ ໄປ​ພ້ອມກັບ​ການ​ຂະ­ຫຍາຍ​ ຖານ​ລາຍ​ຮັບ​ໃໝ່ ​ທີ່ຄວບ​ຄູ່​ການ​ຂຸດ​ຄົ້ນ​ ແຫລ່ງ​ລາຍ​ຮັບ​ທີ່​ບົ່ມຊ້ອນ​ ໃຫ້​ມີການເພີ່ມ​ຂຶ້ນ​ຢ່າງ​ຕໍ່​ເນື່ອງ ແລະ​ ໝັ້ນຄົງ ສາມາດຕອບສະໜອງ ຄວາມຮຽກຮ້ອງຕ້ອງການ ຂອງການພັດທະນາ ເສດຖະກິດ-ສັງຄົມແຫ່ງຊາດ, ສ້າງເງື່ອນໄຂໃຫ້ແກ່ການ ນຳເອົາປະເທດຊາດ ຫລຸດພົ້ນອອກຈາກສະຖານະພາບ ດ້ອຍພັດທະນາ ໃນປີ 2020 ໂດຍ​ຕັ້ງ​ເປົ້າ​ຈະ​ເກັບ​ລາຍຮັບ ​ໃຫ້​ໄດ້​ເພີ່ມ​ຂຶ້ນ​ ຈາກ 5 ປີ ຜ່ານມາ​ເຖິງ 50%.

ທ່ານ ສົມ​ດີ ດວງ​ດີ ຮອງ​ນາ­ຍົກ​ລັດຖະ​ມົນ­ຕີ ລັດ­ຖະ­ມົນ­ຕີ​ ກະ­ຊວງ​ການ​ເງິນ ໄດ້​ສະ­ເໜີ​​ທິດ​ທາງ​ ແຜນ​ງົບ­ປະ­ມານແຫ່ງ​ລັດ 5 ປີ ຄັ້ງ​ທີ VIII (2016-2020); ​ແຜນດັດ­ແກ້​​ງົບປະມານ​ແຫ່ງລັດ ສົກ​ປີ 2015-2016 ​ແລະ ​ແຜນ​ງົບປະມານ 3 ​ເດືອນ ​ໄລຍະ​ຂ້າມ​ຜ່ານ ຕໍ່​ກອງ​ປະ­ຊຸມ​ຄັ້ງ​ປະ­ຖົມ​ມະ​ລຶກ ຂອງ​ສະພາ​ແຫ່ງ​ຊາດ ​ຊຸດທີ VIII ວ່າ: ເພື່ອຮັບປະກັນ ໃຫ້ການຈັດຕັ້ງປະຕິບັດ ແຜນງົບປະມານແຫ່ງລັດ 5 ປີ ຄັ້ງທີ VIII (2016-2020) ບັນລຸ​ຜົນສຳ​ເລັດ ​ຕາມ​ຄາດໝາຍ​ທີ່​ວາງ​ໄວ້,  ພວກ​ເຮົາ​ຕ້ອງ​ເອົາ​ໃຈ​ໃສ່​ປະຕິບັດ ​ບັນດາ​ມາດ​ຕະການ ​ດ້ານ​ການ​ເງິນ​ທີ່​ສຳຄັນ ​ເປັນ​ຕົ້ນ ປັບປຸງ​ການ​ສ້າງ​ ແຜນ​ງົບປະມານ​ແຫ່ງ​ລັດ ຢ່າງ​ມີ​ວິທະຍາສາດ, ​ໂດຍ​ເລີ່​ມຈາກ​ການ​ຄົ້ນຄວ້າ​ ວິ​​ໄຈ​ຂໍ້​ມູນ​ຢ່າງ​ລະອຽດ​ຖີ່​ຖ້ວນ ​ແລະ ຊັດ​ເຈນ ​ເພື່ອ​ຄົ້ນຄວ້າ​ວິ​ໄຈ​ ແຫລ່ງລາຍ​ຮັບ​ງົບປະມານ ​ໃຫ້​ຖືກ​ຕ້ອງ; ການ​ສ້າງ​ແຜນ​ງົບປະມານ​ ຕ້ອງ​ສອດຄ່ອງ​ ກັບ​ແນວທາງ​ຂອງ​ພັກ, ນະ​ໂຍບາຍ​ຂອງ​ລັດ, ຖືກຕ້ອງ​ຕາມ​ກົດໝາຍ, ສອດຄ່ອງ​ກັບ​ ແຜນ​ພັດທະນາ​ ເສດຖະກິດ-ສັງຄົມ​ແຫ່ງ​ຊາດ, ທີ່​ສຳຄັນ ຕ້ອງຄຳນຶງ​ເຖິງ​ຄວາມ​ສ່ຽງ ​ແລະ ການ​ປ່ຽນ​ແປງ ​ທີ່​ອາດ​ເກີດ​ຂຶ້ນ​ໃນ​ອະນາຄົດ; ຍົກ​ສູງ​ຄວາມ​ຮັບຜິດຊອບ ຂອງ​ບັນດາ​ຂະ​ແໜງ​ການ ​ແລະ ທ້ອງ​ຖິ່ນ ​ໃນ​ການ​ສ້າງ ​ແລະ ປະຕິບັດ​ ແຜນ​ງົບປະມານບົນ​ຫລັກ ການ​ລວມສູນງົບປະມານ​ແຫ່ງ​ລັດ. ປັບປຸງ​ການ​ຄຸ້ມ​ຄອງ​ ຂະ​ແໜງ​ການ​ເງິນສູ່ທັນ​ສະ​ໄໝ ​ແລະ ມີ​ປະສິດທິ​ຜົນ, ໂດຍ​ສືບ​ຕໍ່​ພັດທະນາ​ ໃຫ້​ເປັນ​ລະບົບ​ຄົບ​ຊຸດ ​ແລະ ລວມສູນ ດ້ວຍ​ການ​ລົງ​ທຶນ ​ໃສ່​ການ​ພັດທະນາ​ພື້ນຖານ​ໂຄງ​ລ່າງ, ລະບົບ​ໂປຼ​ແກມ, ບຸກຄະ​ລະ​ກອ​ນ ທັງ​ປະລິມານ ​ແລະ ຄຸນ​ນະພາ​ບ ​ເຮັດ​ໃຫ້ການປະຕິບັດ​ ລາຍ​ຮັບ-ລາຍຈ່າຍ ມີຄວາມໂປ່ງໃສ, ສະດວກວ່ອງໄວ, ສາມາດກວດກາໄດ້ ແລະ ຕ້ານປະກົດການ ຫຍໍ້ທໍ້ຕ່າງໆ; ປະຕິບັດວິໄນການເງິນຢ່າງຮັດກຸມ ເພື່ອຄຸ້ມຄອງລາຍຈ່າຍ ໃຫ້ເປັນໄປຕາມກອບແຜນການ ທີ່ສະພາແຫ່ງຊາດຮັບຮອງ, ຍົກສູງປະສິດທິພາບ ການລົງທຶນຂອງລັດ ດ້ວຍການສ້າງກົນໄກຕິດຕາມ, ຄຸ້ມຄອງການຈັດຊື້-ຈັດຈ້າງ, ການກໍ່ສ້າງ ແລະ ສ້ອມແປງ ດ້ວຍທຶນຂອງລັດ ແລະ ແກ້ໄຂໜີ້ສິນຄຸມເຄືອ ໃຫ້ຫລຸດລົງເປັນກ້າວໆ. ພັດທະນາວຽກງານຄຸ້ມຄອງ ລວມສູນງົບປະມານ, ພັດທະນາ ຂະແໜງການເງິນທ້ອງຖິ່ນ ຕາມສາຍຕັ້ງ ແລະ ທິດສາມສ້າງ, ໂດຍສະເພາະແມ່ນ 3 ຂະແໜງການ (ພາສີ, ສ່ວຍສາອາກອນ ແລະ ຄັງເງິນແຫ່ງຊາດ) ເພື່ອເຮັດໃຫ້ການເກັບລາຍຮັບ ເຂົ້າງົບປະມານຄົບຖ້ວນ, ມີປະສິດທິຜົນ, ການບໍລິຫານແຫລ່ງເງິນຂອງລັດ ເຂົ້າລວມສູນ ຢູ່ຄັງເງິນແຫ່ງຊາດ; ປັບປຸງການແບ່ງ ຄວາມຮັບຜິດຊອບຄຸ້ມຄອງ ລາຍຮັບ-ລາຍຈ່າຍ ລະຫວ່າງສູນກາງ ແລະ ທ້ອງຖິ່ນ ໃຫ້ລະອຽດຈະແຈ້ງ, ຖືກຕ້ອງຕາມທິດ 3 ສ້າງ; ປັບປຸງກົນໄກການພົວພັນ ການເງິນ-ງົບປະມານ ລະຫວ່າງສູນກາງ ແລະ ທ້ອງຖິ່ນ ໃຫ້ເຊື່ອມຈອດກັນ ເພື່ອອັດຊ່ອງຫວ່າງການຮົ່ວໄຫລ ດ້ານລາຍຮັບ-ລາຍຈ່າຍ. ພັດທະນາ ແລະ ປັບປຸງນິຕິກຳດ້ານການເງິນ ໃຫ້ເປັນລະບົບຄົບຊຸດ; ສ້າງການປະສານສົມທົບ ລະຫວ່າງ ຂະແໜງການເສດຖະກິດ ໃນລະດັບມະຫາພາກ; ປັບປຸງການຕິດຕາມກວດກາ ໃນການປະຕິບັດ ແຜນງົບປະມານແຫ່ງລັດ ຂອງບັນດາຫົວໜ່ວຍ ງົບປະມານທຸກຂັ້ນໃຫ້ເປັນປົກກະຕິ ແລະ ທົ່ວເຖິງ ເພື່ອຫັນການຄຸ້ມຄອງງົບປະມານ ເຂົ້າສູ່ລະບຽບການ, ປະຢັດ, ສະສົມທຶນ ຕິດພັນກັບຄຸ້ມຄອງ ລາຍຈ່າຍລົງທຶນ ກໍ່ສ້າງພື້ນຖານໂຄງລ່າງ ຢ່າງເຂັ້ມງວດ.

ທ່ານ ສົມ​ດີ ດວງ​ດີ ກ່າວ​ຕື່ມ​​ວ່າ: ສຳ­ລັບ​ທິດ​ທາງ​ຂອງ​ ແຜນ​ງົບ​ປະມານ​ແຫ່ງ​ລັດ 5 ປີ ຄັ້ງ​ທີ VIII ລາຍ​ຮັບລວມ​ ແມ່ນ​ຈະ​ສູ້​ຊົນ​ສຸດ​ຂີດ​ ໃຫ້​ໄດ້ທັງ​ໝົດ ​ປະ­ມານ 149,6 ພັນ​ຕື້​ກີບ ຢູ່​ໃນ​ລະຫວ່າງ 19-20% ຂອງ​ລວມ​ຍອດ​ ຜະ­ລິດ​ຕະ​ພັນ​ພາຍ​ໃນ (GDP), ທຽບ­ໃສ່​ 5 ປີ ຜ່ານ​ມາ​ເພີ່ມ​ຂຶ້ນ 50%; ລາຍ​ຮັບ​ພາຍ​ໃນ​ ແມ່ນ​ຈະ​ສູ້​ຊົນ​ປະ­ຕິ­ບັດ​ ໃຫ້​ໄດ້​ປະ­ມານ 131,8 ພັນ​ຕື້​ກີບ ເພີ່ມ​ຂຶ້ນ 72% ແລະ ລາຍ​ຈ່າຍ​ສູ້​ຊົນ​ປະ­ຕິ­ບັດ​ໃຫ້​ໄດ້ ​ປະ­ມານ 176,4 ພັນ​ຕື້​ກີບ, ທຽບ­ໃສ່​ປະ­ຕິ­ບັດ​ໃນ 5 ປີ ຜ່ານ​ມາ ເພີ່ມ​ຂຶ້ນ 48,7% ແລະ​ ໃນ 5 ປີ​ຂ້າງ​ໜ້າ ​ຈະ​ຄຸ້ມ​ຄອງ​ບໍ່​ໃຫ້​ເກີນ 25% ຂອງ​​ GDP, ສະເພາະ​ລາຍ​ຈ່າຍ​ເງິນ­ເດືອນ​ ຄາດ​ຄະເນ​ປະ­ມານ 60 ພັນ​ຕື້​ກວ່າ​ກີບ ກວມ 8% ຂອງ ​GDP, ທຽບ­ໃສ່ 5 ປີ­ຜ່ານ­ມາ ເພີ່ມຂຶ້ນ 85% ໂດຍ​ເລີ່ມ​ແຕ່​ສົກ​ປີ 2017 ເປັນ­ຕົ້ນ​ໄປ​ ຈະ​ປັບ­ປຸງ​ດັດ​​ສະ​ນີເງິນ­ເດືອນ ​ບໍ່​​ໃຫ້ຫລຸດ​ອັດ­ຕາ​ການ​ເຕີບໂຕ​ ຂອງ​ເສດ­ຖະ­ກິດ ໃນ​ແຕ່​ລະ​ປີ ຫລື ເພີ່ມດັດ​ສະ​ນີ​​ລະ 500 ກີບ ກວມເອົາ​ໂດຍ​ສະ­ເລ່ຍ 44,3% ຫລຸດ​ລົງ​ຈາກ 58% ຂອງ​ລາຍ​ຮັບ​ພາຍ​ໃນ ໃນ​ສົກ​ປີ 2012-2013 ແລະ​ ໃນ​ໄລ­ຍະ 5 ປີຂ້າງໜ້າ​ ຈະ​ຄຸ້ມ​ຄອງ​ບໍ່​ໃຫ້​ເກີນ 45% ຂອງລາຍ​ຮັບ​ພາຍ​ໃນ​ ທັງ​ຮັບ­ປະ­ກັນ​ການ​ຂາດດູນ ​ບໍ່​ໃຫ້​ເກີນ 5% ຂອງ GDP ປະ­ມານ 26,8 ພັນ​ຕື້​ກີບ​, ລື່ນ​ປະຕິ­ບັດ​ໃນ 5 ປີຜ່ານມາ 7,8 ພັນ​ຕື້​ກີບ ຫລື ເທົ່າ​ກັບ 41%.


ຂ່າວ: ​ວັນ/ຂປລ

------------------------------------------
ໂທລະໂຄ່ງ ໃຫ້ຫຼາຍກວ່າຄຳວ່າໂຄສະນາ
LINE ID: @tholakhong | Twitter ID: @tholakhong
tholakhong@gmail.com | www.tholakhong.com


No comments

Powered by Blogger.