Header Ads

ເຈົ້າໜ້າທີ່ໜ່ວຍສະເພາະກິດປະຈໍາດ່ານນໍ້າເກິ່ງ ເມືອງຕົ້ນເຜິ້ງ ແຂວງບໍ່ແກ້ວ ກວດຄົ້ນລົດໂດຍສານ ປະຈໍາທາງ ເມືອງຕົ້ນເຜິ້ງ-ຫ້ວຍຊາຍ ພົບເຫັນຢາບ້າ 23 ມັດ




ໃນເວລາປະມານ 10:00 ໂມງເຊົ້າ ຂອງວັນທີ 20 ມິຖຸນາ 2017 ນີ້ ເຈົ້າໜ້າທີ່ໜ່ວຍສະເພາະກິດປະຈໍາດ່ານນໍ້າເກິ່ງ ເມືອງຫ້ວຍ ຊາຍ ແຂວງບໍ່ແກ້ວ ໄດ້ກວດຄົ້ນລົດໂດຍສານປະຈໍາທາງ ເມືອງຕົ້ນເຜິ້ງ-ຫ້ວຍຊາຍ ພົບເຫັນຢາບ້າ ຈໍານວນ 23 ມັດ ໃນກະເປົາເດີນທາງຂອງທ້າວ ຊໍລີ ຢູ່ເຂດບ້ານດອຍແດງ ເມືອງຕົ້ນເຜິ້ງ ແຂວງບໍ່ແກ້ວ.



ດັ່ງນັ້ນ, ເຈົ້າໜ້າທີ່ພະແນກສືບສວນ-ສອບສວນ ຮ່ວມກັບເຈົ້າໜ້າທີ່ຕ້ານ ແລະ ສະກັດກັນຢາເສບຕິດ ປກສ ແຂວງບໍ່ແກ້ວ ຈຶ່ງໄດ້ນໍາຕົວ ທ້າວຊໍລີ ມາດຳເນີນການສືບສວນ-ສອບສວນຂະຫຍາຍຜົນ.



ຜ່ານການສືບສວນ-ສອບສວນໃນເບື້ອງຕົ້ນ ທ້າວຊໍລີ ໃຫ້ການຕໍ່ເຈົ້າໜ້າທີ່ວ່າ ຕົນໄດ້ອາໃສ່ຢູ່ບ້ານ ດອນທາດ ເມືອງຕົ້ນເຜິ້ງ ແຂວງບໍ່ແກ້ວ ພ້ອມກັບອ້າຍ ຊື່ທ້າວລີ ອາໃສຢູ່ເມືອງຊໍາເໜືອ ແຂວງຫົວພັນ ໄດ້ໄປຊື້ຢາບ້າຈໍານວນ 23 ມັດ ເທົ່າກັບ 46.000 ເມັດ ໃນລາຄາ ມັດລະ 28.000 ບາດ ຢູ່ເຂດບ້ານພຽງງາມ ເມືອງ ຕົ້ນເຜິ້ງ ແຂວງບໍ່ແກ້ວ ເພື່ອຈະເອົາໄປສົ່ງໃຫ້ນາຍໜ້າຄົນໜຶ່ງທີ່ລໍຖ້າຢູ່ເຂດເມືອງຫ້ວຍຊາຍ ແຂວງບໍ່ແກ້ວ ໃນລາຄາມັດລະ 30.000 ບາດ ແຕ່ຖືກເຈົ້າໜ້າທີ່ຂອງພວກເຮົາກັກຕົວໄດ້ເສຍກ່ອນ ສ່ວນທ້າວລີ ແມ່ນໄດ້ເອົາຕົວລົບໜີ.



ດັ່ງນັ້ນ, ເຈົ້າໜ້າທີ່ ປກສ ແຂວງບໍ່ແກ້ວຈຶ່ງໄດ້ກັກຕົວຜູ້ກ່ຽວໄວ້ ພ້ອມດ້ວຍຂອງກາງຢາເສບຕິດ ປະພເດຢາບ້າ ຈໍານວນ 23 ມັດ ພ້ອມດ້ວຍ ໂທລະສັບມືຖື 2 ເຄື່ອງ, ເງິນກີບລາວ ຈໍານວນ 1.950.000 ກີບ, ເງິນບາດໄທ 600 ບາດ ແລະ ສາຍຄໍຄໍາ ນໍ້າໜັກ 2 ບາດ 1 ເສັ້ນ ໄວ້ເພື່ອເປັນລັກຖານ ເພື່ອດໍາເນີນການສືບສວນ-ສອບສວນ ຂະຫຍາຍຜົນຫາກຸ່ມແກ້ງຄ້າຂາຍຢາເສບຕິດລາຍນີ້ມາດໍາເນີນຄະດີຕາມລະບຽບກົດໝາຍຕໍ່ໄປ.


ຂ່າວ: ຮຕ ນາຊູ

------------------------------------------
ໂທລະໂຄ່ງ ໃຫ້ຫຼາຍກວ່າຄຳວ່າໂຄສະນາ
LINE ID: @tholakhong | Twitter ID: @tholakhong
tholakhong@gmail.com | www.tholakhong.com





No comments

Powered by Blogger.