Header Ads

ກອງປະຊຸມ ແນວໂຮມ ສາມປະເທດ ກຳປູເຈຍ-ລາວ-ຫວຽດນາມ ຄັ້ງທີ່ 3


ໃນວັນທີ 25 ມິຖຸນາ 2017, ທີ່ນະຄອນຫລວງ ຮ່າໂນ້ຍ ສສ ຫວຽດນາມ ໄດ້ຈັດກອງປະຊຸມແນວໂຮມສາມປະເທດ ກຳປູເຈຍ-ລາວ-ຫວຽດນາມ ຄັ້ງທີ່ 3 ໂດຍການເປັນປະທານຮ່ວມ ຂອງ ທ່ານ ເຈິ່ນແທງເມິ໊ນ, ສະມາຊິກ ຂອງ ຄະນະກໍາມະການສູນກາງພັກ, ປະທານຄະນະກໍາມະການສູນກາງ ແນວໂຮມປະເທດຊາດຫວຽດນາມ; ທ່ານ ປອ. ໄຊສົມພອນ ພົມວິຫານ ກຳມະການກົມ ການເມືອງສູນກາງພັກ, ປະທານຄະກຳມະການສູນກາງແນວລາວສ້າງຊາດ ແຫ່ງ ສປປ ລາວ ແລະ ສົມ​ເດັດ ອັກຄະມະຫາ​ ໂປ​ເຢຍ ຈັກກຣີ ​ເຮັງຊໍາຣິນ ປະທານ​ສະພາ​ແຫ່ງຊາດ ​ແຫ່ງ ຣາຊະ​ອານາຈັກ​ ກໍາປູ​ເຈຍ ຮ່ວມເປັນປະທານກອງປະຊຸມ.

ກ່າວປາໃສເປີດກອງປະຊຸມ, ທ່ານ ເຈິ່ນແທງເມິ໊ນ, ປະທານຄະນະກໍາມະສູນກາງແນວໂຮມ ປະເທດຊາດຫວຽດນາມ ກ່າວວ່າ ກອງປະຊຸມ ຈັດຂຶ້ນໃນທ່າມກາງບັນຍາກາດ ຂອງ ປີ 2017 ຊຶ່ງເປັນປີ ທີ່ປະຊາຊົນສາມປະເທດ ພ້ອມກັນຈັດຕັ້ງ ປີມິດຕະພາບຫວຽດນາມ-ລາວ ເນື່ອງໃນໂອກາດສະຫລອງ ວັນສ້າງຕັ້ງສາຍພົວພັນການທູດ ຄົບຮອບ 55 ປີ ແລະ 40 ປີ ວັນເຊັນສົນທິສັນຍາມິດຕະພາບ ແລະ ການຮ່ວມມື. ປີມິດຕະພາບຫວຽດນາມ-ກຳປູເຈຍ ເນື່ອງໃນໂອກາດສະຫລອງ ວັນສ້າງຕັ້ງສາຍພົວພັນການທູດ ຄົບຮອບ 50 ປີ. ກອງປະຊຸມຄັ້ງນີ້ ມີຄວາມໝາຍ ສຳຄັນ ໃນການຮັດແໜ້ນ, ປະກອບສ່ວນຕົວຈິງ, ມີຄວາມໝາຍເລິກເຊິ່ງ ປະກອບສ່ວນເຂົ້າ ໃນຜົນສຳເລັດຂອງ ປີມິດຕະພາບຫວຽດນາມ-ລາວ,ປີມິດຕະພາບ ຫວຽດນາມ-ກຳປູເຈຍ. ກອງປະຊຸມຄັ້ງນີ້ ຍັງເປັນໂອກາດໃຫ້ແນວໂຮມສາມປະເທດ ພ້ອມກັນແບ່ງປັນປະສົບການ ໃນການເຄື່ອນໄຫວ, ພ້ອມກັນສ້າງ ບັນດາຫລັກການ, ເນື້ອໃນ ເພື່ອເປັນທິດໃຫ້ແກ່ຄວາມສຳພັນ ລະຫວ່າງ ສາມປະເທດ ໃນໄລຍະແຕ່ນີ້ ຫາ ປີ 2020.

ທ່ານ ປອ. ໄຊສົມພອນ ພົມວິຫານ ກຳມະການກົມການເມືອງສູນກາງພັກ, ປະທານຄະກຳມະການ ສູນກາງແນວລາວ ສ້າງຊາດ ແຫ່ງ ສປປ ລາວ ກ່າວຢ້ຳວ່າ ກອງປະຊຸມຄັ້ງນີ້ ຈະໄດ້ຕີລາຄາ ຜົນການຈັດຕັ້ງປະຕິບັດ ບັນດາເນື້ອໃນຄວາມຮ່ວມມື ລະຫວ່າງ ແນວໂຮມສາມປະເທດ, ພ້ອມກັນແກ້ໄຂ ຂໍ້ຄົງຄ້າງ ໃນການຮ່ວມມື, ເປັນຕົ້ນໃນທ້ອງຖິ່ນ ທີ່ເສັ້ນຊາຍແດນຮ່ວມກັນ ເພື່ອເພີ່ມທະວີການຮ່ວມມື, ແລກປ່ຽນ, ພົບປະ ແບ່ງ ປັນປະສົບການ, ຊ່ວຍເຫລືອ ຊຶ່ງກັນ ແລະ ກັນໃນການພັດທະນາເສດຖະກິດ-ສັງຄົມ, ປົວແປງ ຜົນກະທົບຈາກໄພທຳມະຊາດ ຕາມຄວາມສາມາດ, ພ້ອມນີ້ ກໍພ້ອມກັນສ້າງເຂດຊາຍແດນ ໃຫ້ເປັນຊາຍແດນແຫ່ງສັນຕິພາບ, ມິດຕະພາບ ແລະ ການຮ່ວມມື ເພື່ອຍົກ ລະດັບຊີວິດການເປັນຢູ່ ຂອງປະຊາຊົນ ໃຫ້ດີຂຶ້ນເທື່ອລະກ້າວ.
ກອງປະຊຸມ ຍັງໄດ້ຕີລາຄາຄືນ ຜົນການປະຕິບັດ ບົດບັນທຶກຊ່ວຍຈຳ ໃນໄລຍະ ແຕ່ປີ 2013-2016 ຜ່ານມາ ຊຶ່ງເຫັນວ່າ ໄດ້ຮັບການປະຕິບັດຢ່າງກວ້າງຂວາງ, ເລິກເຊິ່ງ ໃນທຸກລະດັບ, ເປັນຕົ້ນແມ່ນບັນດາແຂວງ ທີ່ມີຊາຍແດນຮ່ວມກັນ. ທຸກຝ່າຍໄດ້ປະຕິບັດເປັນຢ່າງດີວຽກງານໂຄສະນາ ປະຊາຊົນບັນດາເຜົ່າຮັບຮູ້ໄດ້ຢ່າງເລິກເຊິ່ງ ກ່ຽວກັບຄວາມໝາຍ ຄວາມສຳຄັນ ໃນການປົກປັກຮັກສາ, ເສີມຂະຫຍາຍ, ພັດທະນາຄວາມສຳພັນ ລະຫວ່າງ ສາມປະເທດ.

ໂອກາດນີ້, ທ່ານ ເຈິ່ນແທງເມິ໊ນ, ສະມາຊິກ ຂອງ ຄະນະກໍາມະການສູນກາງພັກ, ປະທານຄະນະກໍາມະສູນກາງ ແນວໂຮມປະເທດຊາດຫວຽດນາມ; ທ່ານ ປອ. ໄຊສົມພອນ ພົມວິຫານ ກຳມະການກົມການເມືອງສູນກາງພັກ, ປະທານຄະກຳມະການ ສູນກາງແນວລາວ ສ້າງຊາດ ແຫ່ງ ສປປ ລາວ ແລະ ສົມ​ເດັດ ອັກຄະມະຫາ​ ໂປ​ເຢຍ ຈັກກຣີ ​ເຮັງຊໍາຣິນ ປະທານ​ສະພາ​ແຫ່ງຊາດ ​ແຫ່ງ ຣາຊະ​ອານາຈັກ​ ກໍາປູ​ເຈຍ ໄດ້ລົງນາມ ການຮ່ວມມື ໄລຍະປີ 2017-2020.

ພາບ/ຂ່າວ: ຂປລ
 
------------------------------------------
ໂທລະໂຄ່ງ ໃຫ້ຫຼາຍກວ່າຄຳວ່າໂຄສະນາ
LINE ID: @tholakhong | Twitter ID: @tholakhong
tholakhong@gmail.com | www.tholakhong.com


No comments

Powered by Blogger.