Header Ads

ລັດຖະມົນຕີ ກະຊວງການຕ່າງປະເທດລາວ ຢ້ຽມຢາມ ສາທາລະນະລັດ ອາແຊັກໄບຊານ ຢ່າງເປັນທາງການ








ໂດຍ​ຕອບ​ສະໜອງ​ຕາມ​ຄໍາ​ເຊີນ ​ຂອງ​ທ່ານ ເອນມາ ເມັມມາເດຍຣົບ Elmar Mamma dyarov ລັດຖະມົນຕີ ກະຊວງການຕ່າງປະເທດ ແຫ່ງ ສາທາລະນະລັດ ອາແຊັກໄບຊານ, ທ່ານ ສະ ເຫລີມໄຊ ກົມມະສິດ ລັດຖະມົນຕີ ກະຊວງການຕ່າງປະເທດ ແຫ່ງ ສປປ ລາວ ແລະ ຄະນະ ໄດ້ເດີນທາງໄປຢ້ຽມຢາມ ສາທາລະນະລັດ ອາແຊັກໄບຊານ ຢ່າງເປັນທາງການ ໃນວັນທີ 18-20 ມິຖຸ ນາ 2017, ເຊິ່ງເປັນການຢ້ຽມຢາມຄັ້ງທໍາອິດ ທີ່ເປັນຄັ້ງປະຫວັດສາດ ຂອງຄະນະຜູ້ແທນ ລະດັບສູງລະຫວ່າງສອງຝ່າຍ ນັບແຕ່ສ້າງຕັ້ງສາຍພົວພັນ ການທູດນຳກັນ ເປັນຕົ້ນມາ.

ໃນວັນທີ 19 ມິຖຸນາ ນີ້, ໄດ້ມີການພົບປະ ສອງຝ່າຍຢ່າງເປັນທາງການ ລະຫວ່າງ ທ່ານ ສະເຫລີມໄຊ ກົມມະສິດ ລັດຖະມົນຕີ ກະຊວງການຕ່າງປະເທດ ແຫ່ງ ສປປ ລາວ ກັບ ທ່ານ ເອນມາ ເມັມມາເດຍຣົບ ລັດຖະມົນຕີຕ່າງປະເທດ ແຫ່ງ ສ ອາແຊັກໄບຊານ, ໂດຍທີ່ທັງສອງຝ່າຍ ໄດ້ຕີລາຄາສູງ ຕໍ່ສາຍພົວພັນມິດຕະພາບ ແລະ ການຮ່ວມມື ທີ່ເປັນມູນເຊື້ອອັນດີງາມ ຂອງສອງປະເທດ ນັບຕັ້ງແຕ່ໄດ້ສ້າງຕັ້ງ ສາຍພົວພັນການທູດນຳກັນ ໃນວັນທີ 22 ພຶດສະພາ 1995 ຈົນເຖິງປັດຈຸບັນ, ພ້ອມທັງຕີລາຄາວ່າ ການຢ້ຽມຢາມຂອງ ຄະນະຜູ້ແທນຂັ້ນສູງຂອງ ສປປ ລາວ ຢູ່ ອາແຊັກໄບຊານ ຄັ້ງນີ້ ເປັນນິມິດໝາຍອັນດີ ໃນການຊຸກຍູ້ເພີ່ມທະວີ ການພົວພັນຮ່ວມມື ສອງຝ່າຍໃຫ້ຫລາຍຂຶ້ນ ບົນພື້ນຖານຄວາມເຊື່ອໝັ້ນ, ຄວາມເຂົ້າອົກເຂົ້າໃຈ, ຕ່າງຝ່າຍຕ່າງໄດ້ຮັບ ຜົນປະໂຫຍດຫລາຍຂຶ້ນ, ພ້ອມທັງ ໃຫ້ການສະໜັບສະໜູນ ຊ່ວຍເຫລືອຊຶ່ງກັນ ແລະ ກັນ ທັງໃນຂອບສອງຝ່າຍ ແລະ ຫລາຍຝ່າຍ ໃນເວທີພາກພື້ນ ແລະ ສາກົນ. ພ້ອມກັນນັ້ນ, ສອງຝ່າຍໄດ້ເຫັນດີຈະສືບຕໍ່ ຊຸກຍູ້ການແລກປ່ຽນ ການຢ້ຽມຢາມ ຊຶ່ງກັນ ແລະ ກັນ ໃນທຸກລະດັບ ເພື່ອປຶກສາຫາລື, ຖອດຖອນບົດຮຽນ ແລະ ຊຸກຍູ້ການຮ່ວມມືສອງຝ່າຍ ທີ່ມີມາແລ້ວນັ້ນ ໃຫ້ມີປະສິດທິຜົນສູງຂຶ້ນ, ໂດຍສະເພາະ ເພີ່ມທະວີການຮ່ວມມື ໃນຂົງເຂດເສດຖະກິດ, ການຄ້າ, ການລົງທຶນ, ພະລັງງານ, ບໍ່ແຮ່, ກະສິກຳ, ອຸດສາຫະກຳປຸງແຕ່ງ, ການສຶກສາ, ການທ່ອງທ່ຽວ ແລະ ດ້ານອື່ນໆ ທີ່ສອງຝ່າຍມີທ່າແຮງ ແລະ ມີຄວາມສົນໃຈຮ່ວມກັນ. ນອກຈາກນີ້, ສອງຝ່າຍ ຍັງໄດ້ແຈ້ງ ສະພາບການໂດຍຫຍໍ້ ທາງດ້ານເສດຖະກິດ-ສັງຄົມ, ສະພາບລວມຂອງຂໍ້ສະດວກ, ຂໍ້ຫຍຸ້ງຍາກຂອງແຕ່ລະປະເທດ ໃຫ້ກັນຊາບ. ພ້ອມທັງ ແລກປ່ຽນຄຳເຫັນ ກ່ຽວກັບບັນຫາພາກພື້ນ ແລະ ສາກົນ ທີ່ສອງຝ່າຍມີຄວາມສົນໃຈ, ໂດຍເຫັນດີສືບຕໍ່ ສະໜັບສະໜູນຊຶ່ງກັນ ແລະ ກັນ ໃນເວທີຕ່າງໆ.

ໃນໂອກາດດັ່ງກ່າວ, ທ່ານ ສະເຫລີມໄຊ ກົມມະສິດ ກໍໄດ້ຕາງໜ້າໃຫ້ ລັດຖະບານລາວ ສະແດງຄວາມຂອບໃຈ ຕໍ່ການຊ່ວຍເຫລືອ ໃຫ້ທຶນການສຶກສາ ແກ່ນັກສຶກສາລາວ ຈຳນວນຫລາຍຂອງລັດຖະບານ ອາແຊກໄບຊານ ໃນສະໄໝອະດີດ ສະຫະພາບໂຊວຽດ, ຊຶ່ງອະດີດນັກສຶກສາ ທີ່ຮຽນຈົບມາຈາກອາແຊັກໄບຊານ ໃນເມື່ອກ່ອນ ບາງທ່ານກໍໄດ້ກາຍເປັນການນຳ ແລະ ມີຕຳແໜ່ງສູງ ຢູ່ໃນກົງຈັກລັດຖະບານ ປັດຈຸບັນ. ພ້ອມກັນນັ້ນ, ທ່ານ ສະເຫລີມໄຊ ກົມມະສິດ ກໍໄດ້ສະເໜີໃຫ້ລັດຖະບານ ອາແຊັກໄບຊານ ສືບຕໍ່ໃຫ້ການຊ່ວຍເຫລືອ ໃນການສ້າງ ຊັບພະຍາກອນມະນຸດ ກໍຄື ໃຫ້ທຶນການສຶກສາ, ຝຶກອົບຮົມ ຫລື ການໄປທັດສະນະ ສຶກສາໄລຍະສັ້ນ ທີ່ອາແຊັກໄບຊານ ໃຫ້ແກ່ ສປປ ລາວ ແລະ ສະເໜີໃຫ້ທັງສອງຝ່າຍ ປຶກສາຫາລືກັນ ກ່ຽວກັບຄວາມເປັນໄປໄດ້ ໃນການກໍ່ສ້າງໂຮງກັ່ນນ້ຳມັນຢູ່ ສປປ ລາວ, ຊຶ່ງຈະເປັນການສ້າງຜົນປະໂຫຍດ ຢ່າງຫລວງຫລາຍ ໃຫ້ແກ່ສອງປະເທດລາວ-ອາແຊັກໄບຊານ ທັງເປັນການປະກອບສ່ວນອັນສໍາຄັນ ເຂົ້າໃນການຈັດຕັ້ງປະຕິບັດ ແຜນພັດທະນາ ເສດຖະກິດ-ສັງຄົມ 5 ປີ ຄັ້ງທີ 8 (2016-2020) ຂອງ ສປປ ລາວ ເພື່ອໃຫ້ຫລຸດພົ້ນອອກຈາກ ປະເທດດ້ອຍພັດທະນາ ໃນປີ 2020. ໃນຂະນະດຽວກັນ, ຝ່າຍອາເຊັກໄບຊານ ກໍໄດ້ສະແດງຄວາມຍິນດີ ຈະສືບຕໍ່ຊຸກຍູ້ໃຫ້ມີການຮ່ວມມືກັນ ໃນດ້ານເສດຖະກິດ ໃຫ້ຫລາຍຂຶ້ນ ແລະ ຈະສືບຕໍ່ໃຫ້ທຶນ ການສຶກສາແກ່ ສປປ ລາວ, ພ້ອມທັງໄດ້ສະເໜີ ໃຫ້ມີການສົ່ງເສີມ ສາຍພົວພັນຮ່ວມມື ລະຫວ່າງ ສະພາຂອງສອງປະເທດ ໄປຄຽງຄູ່ກັບການສ້າງຕັ້ງ ກຸ່ມມິດຕະພາບ ປະຈຳລັດຖະສະພາຂອງກັນ ແລະ ກັນ. ໃນໂອກາດດັ່ງກ່າວ, ລັດຖະມົນຕີ ຕ່າງປະເທດສອງຝ່າຍ ໄດ້ເຊັນສັນຍາຍົກເວັ້ນ ວີຊາການທູດ ລະຫວ່າງ ສອງປະເທດນຳກັນ, ເຊິ່ງຈະມີຜົນບັງຄັບໃຊ້ ໄດ້ພາຍຫລັງ 30 ວັນ ທີ່ສອງຝ່າຍໄດ້ແຈ້ງ ໃຫ້ກັນຊາບ.

ໃນໂອກາດຢ້ຽມຢາມທາງການ ໃນຄັ້ງນີ້, ທ່ານ ສະເຫລີມໄຊ ກົມມະສິດ ພ້ອມດ້ວຍຄະນະ ກໍໄດ້ເຂົ້າຢ້ຽມຂ່ຳນັບ ບັນດາການນຳຂັ້ນສູງ ຂອງອາແຊັກໄບຊານ ຄື: ທ່ານ ອິນຮາມ ອາລີເຢບ (Ilham Aliyev), ປະທານາທິບໍດີ ແຫ່ງ ສ ອາແຊັກໄບຊານ, ທ່ານ ອັອກໄຕ ອາຊາດົບ (Ogtay Asadov), ປະທານສະພາແຫ່ງຊາດ ແລະ ທ່ານ ອາຕູ ຣາຊີຊາເດ (Artur Rasizade), ນາຍົກລັດຖະມົນຕີ ແຫ່ງ ສ ອາແຊັກໄບຊານ. ໃນໂອກາດດັ່ງກ່າວ, ທ່ານ ສະເຫລີມໄຊ ກົມມະສິດ ໄດ້ສະແດງຄວາມຂອບໃຈຕໍ່ ບັນດາການ ນຳຂັ້ນສູງຂອງອາແຊກໄບຊານ ທີ່ໄດ້ໃຫ້ກຽດ ຕ້ອນຮັບຢ່າງອົບອຸ່ນ ພ້ອມທັງໄດ້ນຳເອົາ ຄວາມຢື້ຢາມຖາມຂ່າວ ຈາກການນຳຂັ້ນສູງແຫ່ງ ສປປ ລາວ ໄປເຖິງຄູ່ຮ່ວມຕຳແໜ່ງແຫ່ງ ອາແຊັກໄບຊານ. ນອກຈາກນີ້, ຄະນະຍັງໄດ້ເດີນທາງໄປຢ້ຽມຊົມ ພື້ນຖານການຜະລິດຕ່າງໆ ຢູ່ນະຄອນຫລວງບາກູ, ເປັນຕົ້ນ ແມ່ນໂຮງງານກັ່ນນ້ຳມັນ ແລະ ອື່ນໆ.

ໃນຕອນທ້າຍ ຂອງການຢ້ຽມຢາມ, ທ່ານລັດຖະມົນຕີ ສະເຫລີມໄຊ ກົມມະສິດ ໄດ້ເຊື້ອເຊີນຄູ່ຮ່ວມຕຳແໜ່ງ ດຳເນີນການຢ້ຽມຢາມ ສປປ ລາວ ຢ່າງເປັນທາງການ ໃນໂອກາດ ແລະ ເວລາທີ່ເຫັນວ່າສະດວກເໝາະສົມ, ເຊິ່ງລັດຖະມົນຕີຕ່າງປະເທດ ອາແຊັກໄບຊານ ໄດ້ຕອບຮັບດ້ວຍຄວາມຍິນດີ.

ທີ່ມາ: ຂປລ

------------------------------------------
ໂທລະໂຄ່ງ ໃຫ້ຫຼາຍກວ່າຄຳວ່າໂຄສະນາ
LINE ID: @tholakhong | Twitter ID: @tholakhong
tholakhong@gmail.com | www.tholakhong.com


No comments

Powered by Blogger.