Header Ads

ພະແນກ ຊສ ແຂວງ ລົງປະຊາສຳພັນວຽກງານອອກໃບຕາດິນ ຢູ່ເມືອງບໍລິຄັນ




ເມື່ອ​ບໍ່​ດົນ​ມາ​ນີ້, ພະ​ແນກຊັບ​ພະ​ຍາ​ກອນທຳ​ມະ​ຊາດ ແລະ ສິ່ງ​ແວດ​ລ້ອມ​(ຊສ) ແຂວງບໍລິ​ຄຳ​ໄຊ, ຂະ​ແໜງ​ຄຸ້ມ​ຄອງ​ທີ່​ດິນ ​ໄດ້​ລົງ​ປະ​ຊາ​ສຳ​ພັນ​ ວຽກ​ງານ​ອອກ​ໃບ​ຕາ​ດິນ​ ໃຫ້​ແກ່ບ້ານພຽງ​ດີ, ບ້ານ​ຊົມ​ຊື່ນ, ບ້ານ​ນ້ຳ​ປາ ແລະ ບ້ານ​ສອງ​ຄອນ​ໃໝ່ ເມືອງບໍ​ລິ​ຄັນ ທັງ​ນີ້ ກໍເພື່ອ​ເຮັດ​ໃຫ້​ວຽກ​ງານ​ການ​ອອກ​ໃບ​ຕາ​ດິນ​ ໄດ້​ດຳ​ເນີນ​ໄປ​ຕາມ​ຂັ້ນ​ຕອນ, ມີ​ບົດ​ບາດ​ສຳ​ຄັນ ​ແລະ ​ໄດ້​ຮັບ​ຜົນ​ສຳ​ເລັດ​ດ້ວຍ​ດີ.

ທ່ານ ຄຳ​ພະ ແສງ​ສຸ​ລິ​ຈັນ ຮອງ​ຫົວ​ໜ້າ​ຂະ​ແໜງ​ຄຸ້ມ​ຄອງ​ທີ່​ດິນພະ​ແນກ ຊ​ສ ແຂວງ​ ໄດ້​​ໃຫ້​ຮູ້​ວ່າ: ​ການ​ປະ​ຊາ​ສຳ​ພັນ​ວຽກ​ງານ​ອອກ​ໃບ​ຕາ​ດິນ​ຄັ້ງ​ນີ້​ ເພື່ອ​ແນະ​ນຳ​ລະ​ບຽບການ, ວິ​ທີ​ການ, ຂັ້ນ​ຕອນ ແລະ ມາດ​ຕະ​ການ ​ໃນ​ການ​ຈັດ​ຕັ້ງ​ປະ​ຕິ​ບັດ​ວຽກ​ງານ​ຂຶ້ນ​ທະ​ບຽນ​ທີ່​ດິນ ແລະ ອອກ​ໃບ​ຕາ​ດິນ​ໃຫ້​ແກ່​ບຸກ​ຄົນ, ນິ​ຕິ​ບຸກ​ຄົນ, ລວມ​ໝູ່, ຊຸມ​ຊົນ ແລ​ະ ການ​ຈັດ​ຕັ້ງ​, ທັງ​ແນ​ໃສ່​ສ້າງ​ຄວາມ​ໝັ້ນ​ໃຈ​ ໃຫ້​ແກ່​ຜູ້​ຄອບ​ຄອງ ແລະ ນຳ​ໃຊ້​ທີ່​ດິນ​ໄດ້​ດຳ​ເນີນ​ໄປ​ຢ່າງ​ຖືກ​ຕ້ອງ​ ກັ​ບ​ເຕັກ​ນິກວິ​ຊາ​ການ, ຍຸ​ຕິ​ທຳ, ມີ​ຄວາມ​ສະ​ເໝີ​ພາບ ແລະ ສອດ​ຄ່ອງ​ກັບ​ລະ​ບຽບ​ກົດ​ໝາຍ ທັງ​ເປັນການປະ​ກອບ​ສ່ວນ​ ໃນ​ການ​ລົບ​ລ້າງ​ຄວາມ​ທຸກ​ຍາກ​ຂອງ​ປະ​ຊາ​ຊົນ​ບັນ​ດາ​ເຜົ່າ ແລະ ການ​ພັດ​ທະ​ນາ​ເສດ​ຖະ​ກິດ-ສັງ​ຄົມ.

ຈາກນັ້ນ​ ​ຂະ​ແໜງ​ຄຸ້ມ​ຄອງ​ທີ່​ດິນ​ແຂວງ ກໍ​ໄດ້​ສົ່ງ​ພະ​ນັກ​ງານ​ວິ​ຊາ​ການ​ວັດ​ແທກ ແລະ ການ​ເດີນ​ສຳຫລວດ ​ອອກ​ໃບ​ຕາ​ດິນ​​ລົງ​​ໄປປະ​ຈຳ​ ແລະ​ ເຮັດ​ວຽກນຳພໍ່​ແມ່​ປະ​ຊາ​ຊົນ​ຈຳ​ນວນ 4 ບ້ານ​ດັ່ງ​ກ່າວ​ ຈົນ​​ສຳ​ເລັດ ໃນ​ການ​ອອກ​ໃບ​ຕາ​ດິນ.

ຂ່າວ: ຄຳ​ຟອງ/ ຂປລ
------------------------------------------
ໂທລະໂຄ່ງ ໃຫ້ຫຼາຍກວ່າຄຳວ່າໂຄສະນາ
LINE ID: @tholakhong | Twitter ID: @tholakhong
tholakhong@gmail.com | www.tholakhong.com


No comments

Powered by Blogger.