Header Ads

ກະຊວງ ຜທ ສຳເລັດບັ້ນດຳເນີນ ຊີວິດການເມືອງປົວແປງ ພາຍໃນພັກ



ກະຊວງແຜນການ ແລະ ການລົງທຶນ (ຜທ) ສຳເລັດບັ້ນດຳເນີນຊີວິດການເມືອງ ປົວແປງພັກ ໃນວັນທີ 28 ມິຖຸນາ 2017 ພາຍຫລັງ ໄດ້ດຳເນີນມາເປັນເວລາ 15 ວັນ (ແຕ່ວັນທີ 14-28 ມິຖຸນາ 2017) ເຊິ່ງພະນັກງານ​ການ​ນໍາ ທັງ​ໝົດ 200 ສະຫາຍ ​ໄດ້​ເຊື່ອມຊຶມ, ຮັບ​ຮູ້ ​ແລະ ​ເຂົ້າ​ໃຈເອກະສານເດັດດ່ຽວ ປັບປຸງປົວແປງພັກໃຫ້ປອດໃສ, ເຂັ້ມແຂງ, ໜັກແໜ້ນ ແລະ ສະຫລຸບຕີລາຄາ ການຊີ້ນຳ-ນຳພາຂອງຄະນະ ບໍລິຫານງານ ພັກກະຊວງ ຜທ ໃນການຈັດຕັ້ງຜັນຂະຫຍາຍ ມະຕິກອງປະຊຸມໃຫຍ່ ຄັ້ງທີ X ຂອງພັກ ແລະ ມະຕິກອງປະຊຸມໃຫຍ່ ຄັ້ງທີ III  ຂອງອົງຄະນະພັກກະຊວງ ຜທ ແລະ ການສຳຫລວດກວດກາ ທັງໃນຄະນະພັກ, ຄະນະນໍາຕະຫລອດຮອດ ສະມາຊິກພັກ.

ການປິດ​ບັນບັ້ນ ດຳເນີນຊີວິດການເມືອງ ປົວແປງພັກຄັ້ງ​ນີ້​ ໂດຍ​ໃຫ້ກຽດ​ເປັນ​ປະທານ​ ຂອງ ສະຫາຍ ຈັນສີ ໂພສີຄຳ ກຳມະການ​ກົມການ​ເມືອງ​ ສູນ​ກາງ​ພັກ, ​ເລຂາທິການ​ສູນ​ກາງ​ພັກ, ຫົວໜ້າ​ຄະນະ​ຈັດຕັ້ງສູນ​ກາງ​ພັກ, ຮອງ​ຫົວໜ້າ​ຄະນະ​ຮັບຜິດຊອບ ​ດຳ​ເນີນ​ຊີວິດ​ການ​ເມືອງ​ ປັບປຸງ​ປົວ​ແປງ​ທົ່ວ​ພັກ ພ້ອມດ້ວຍສະມາຊິກພັກກະຊວງ ເຂົ້າຮ່ວມ.

ສະຫາຍ ສຸພັນ ແກ້ວມີໄຊ ລັດຖະມົນຕີ ກະຊວງແຜນການ ແລະ ການລົງທຶນ ໄດ້ກ່າວວ່າ: ຜ່ານການດຳເນີນ ຊີວິດການເມືອງ ປົວແປງພັກ ຂອງອົງຄະນະພັກກະຊວງ ຜທ ດຳເນີນໄປດ້ວຍ ບັນຍາກາດຟົດຟື້ນ, ມີຄວາມເປັນເອກ ກະພາບສູງ ແລະ ສາມາດບັນລຸຕາມຈຸດປະສົງ ແລະ ເປົ້າໝາຍທີ່ວາງໄວ້ ເຊິ່ງເປັນໝາກຜົນລວມແຫ່ງ ຄວາມສາມັກຄີ ເປັນເອກະພາບ ຂອງບັນດາຄະນະພັກ, ຄະນະນຳກະຊວງ, ບັນດາໜ່ວຍພັກ, ສະມາຊິກພັກທຸກສະຫາຍ  ທີ່ໄດ້ເສີມຂະ ຫຍາຍ ລະບອບປະຊາທິປະໄຕ ຢ່າງກ້ວາງຂວາງ ແລະ ມີນໍ້າໃຈຮັບຜິດຊອບສູງ ຕໍ່ໜ້າທີ່ວຽກງານຂອງ ບັນດາສະຫາຍ ສະມາຊິກພັກ ໄດ້ພ້ອມກັນ ປະຕິບັດໜ້າທີ່ອັນໝັກໜ່ວງ ຫລາຍຢ່າງເຊັ່ນ: ການຈັດຕັ້ງຜັນຂະຫຍາຍ  ມະຕິກອງປະຊຸມໃຫຍ່ ຄັ້ງທີ X ຂອງພັກ ແລະ ມະຕິກອງປະຊຸມໃຫຍ່ ຄັ້ງທີ III ຂອງອົງຄະນະພັກ ກະຊວງ ຜທ ໃຫ້ເປັນແຜນງານ, ແຜນການ, ໂຄງການອັນລະອຽດ ຫັນເຂົ້າສູ່ວຽກງານຕົວຈິງ ຂອງແຕ່ລະພັກ ແລະ ສືບຕໍ່ຊີ້ນຳ-ນຳພາ ສະມາຊິກພັກ-ພະນັກງານທັງໝົດ ສູ້ຊົນຈັດຕັ້ງປະຕິບັດ ທິດທາງແຜນການລວມ ໃນຕໍ່ໜ້າໃຫ້ເກີດ ໝາກຜົນຕົວຈິງ ເຮັດໃຫ້ວຽກງານ ຂອງຂະແໜງ ຜທ ມີການຫັນປ່ຽນດີກວ່າເກົ່າ ປະກອບສ່ວນເຂົ້າ ໃນພາລະກິດປົກປັກຮັກສາ ແລະ ສ້າງສາພັດທະນາປະເທດຊາດ ໃຫ້ຮັ່ງມີເຂັ້ມແຂງ, ປະຊາຊົນມີຄວາມຜາສຸກ, ສັງຄົມມີຄວາມ ສີວິໄລຍຸຕິທຳ ແລະ ພ້ອມກັນ ເສີມຂະຫຍາຍມູນເຊື້ອ ທີ່ເປັນຜົນງານອັນຍິ່ງໃຫຍ່ ຂອງອົງຄະນະພັກ ກະຊວງ ຜທ ໃຫ້ເຕີບໃຫຍ່ຂະຫຍາຍ ຕົວຂຶ້ນໄປເລື້ອຍໆ ຢ່າງບໍ່ຢຸດຢັ້ງ.

ໃນໂອກາດນີ້ ສະຫາຍ ຈັນສີ ໂພສີຄຳ ຍັງໄດ້ສະແດງຄວາມຊົມເຊີຍ ຕໍ່ການຊີ້ນຳ-ນຳພາ ຂອງອົງຄະນະພັກ ກະຊວງ ຜທ ທີ່ໄດ້ຊີ້ນຳ-ນຳພາຄະນະພັກ ແລະ ສະມາຊິກພັກ ທຸກສະຫາຍ ໃນການປະຕິບັດໜ້າທີ່ການເມືອງ ແລະ ຍາດໄດ້ຜົນສຳເລັດ ໃນຫລາຍດ້ານ ຂະນະດຽວກັນ ສະຫາຍ ຍັງໃຫ້ທິດຊີ້ນຳວຽກງານ ໃນແຕ່ລະດ້ານໃຫ້ແກ່ ຄະນະພັກ ລົງເລີກ​ແຕ່​ລະ​ບັນຫາ ​ຮອບດ້ານ​ໜັກ​ແໜ້ນ ເພື່ອໄປຄົ້ນຄວ້າ ແລະ ຈັດຕັ້ງຜັນຂະຫຍາຍ ໃຫ້ເກີດດອກອອກຜົນ ຍິ່ງໆຂຶ້ນ.

ຂ່າວ:ກິດຕາ; ພາບ:ຄຳ/ຂປລ
------------------------------------------
ໂທລະໂຄ່ງ ໃຫ້ຫຼາຍກວ່າຄຳວ່າໂຄສະນາ
LINE ID: @tholakhong | Twitter ID: @tholakhong
tholakhong@gmail.com | www.tholakhong.com


No comments

Powered by Blogger.