Header Ads

ແຂວງວຽງຈັນປະກາດຢຸດຕິການປູກກ້ວຍຢ່າງຖາວອນ


ອໍານາດການປົກຄອງແຂວງ​ວຽງຈັນ ໄດ້​ປະກາດ​ຢ່າງເປັນທາງການວ່າ ຕ້ອງຢຸດຕິດ ແລະ ບໍ່ອະນຸຍາດໃຫ້ນັກ​ລົງທຶນເຂົ້າ ມາປູກກ້ວຍຫອມຢ່າງຖາວອນ ພາຍໃນທ້າຍເດືອນກັນຍາ 2017 ນີ້ ຂະນະທີ່ ໄລຍະຜ່ານມານັ້ນ ມີນັກລົງທຶນຈີນ ໄດ້ເຂົ້າມາປູກ​ກ້ວຍ​ຫອມ​ຢູ່ເມືອງ​ຫີນ​ເຫີບ, ເມືອງ​ວັງ​ວຽງ ​ແລະ ​ເມືອງ​ເຟືອງແຂວງວຽງຈັນ ​ໃນ​ເນື້ອ​ທີ່​ກວ່າ 400 ​ເຮັກຕາ ຕ້ອງໃຫ້ຮີບຮ້ອນເກັບກ່ຽວຜົນຜະລິດ ຂອງຕົນໃຫ້ສໍາເລັດໂດຍໄວ ແລະ ສືບຕໍ່ໃຫ້ຢຸດ.

ພະແນກການກະສິກໍາ ແລະ ປ່າໄມ້ໄດ້ລາຍງານວ່າ: ປັດຈຸບັນມີເນື້ອທີ່ປູກກ້ວຍປະມານ 400 ກວ່າເຮັກຕາ ທີ່ໄດ້ຮັບອະນຸຍາດໃຫ້ປູກໃນເມື່ອກ່ອນ ໃນ​ກໍລະນີ​ຍັງ​ບໍ່ທັນໝົດອາຍຸ​ສຳ​ປະທານ​ທີ່​ດິນ ກໍ​ຕ້ອງ​ໃຫ້​ຫັນ​ໄປ​ປູກ​ພືດ​ເປັນ​ສິນຄ້າ ​ອື່ນໆທົດ​ແທນ ຖ້າ​ນັກ​ລົງທຶນ​ບໍ່ປະຕິບັດ​ຕາມ ຈະ​ມີ​ມາດ​ຕະການ​ທີ່​ເຂັ້ມ​ງວດ ໂດຍອີງໃສ່ລະບຽບກົດໝາຍທີ່ກ່ຽວຂ້ອງ ກັບການ​ແກ້​ໄຂ​ບັນຫາ​ນຳ​ໃຊ້​ສານ​ເຄມີ​ແບບ​ຊະຊາຍ ທຳລາຍ​ສິ່ງ​ແວດ​ລ້ອມ ​ແລະ ສຸຂະພາບ​ຂອງ​ປະຊາຊົນ.

ທ່ານ ພູ​ວົງ ບຸນ​ຊູ ຫົວໜ້າພະ​ແນ​ກກະສິກຳ ​ແລະ ປ່າ​ໄມ້ ​ແຂວງ​ວຽງຈັນ ​ເປີດ​ເຜີຍ​ວ່າ: ການ​ປູກ​ກ້ວຍ​ຢູ່​ 3 ​ເມືອງພາຍ​ໃນແຂວງ​ວຽງຈັນ ​ໄດ້​ເລີ່​ມມາ​ແຕ່​ປີ 2013, ລວມມີ 7 ຫົວໜ່ວຍ ​ມີ​ເນື້ອ​ທີ່​ທັງໝົດ 412 ​ເຮັກຕາ, ​ໃນ​ນັ້ນ ​ໄດ້​ມີ​ການ​ສຳ​ປະທານ​ດິນ​ປະຊາຊົນ 319 ​ເຮັກຕາ ​ແລະ ດິນ​ລັດ 103 ​ເຮັກຕາ ​ແຕ່​ໄດ້​ຮັບ​ການ​ອະນຸມັດ​ທີ່​ຖືກຕ້ອງ 6 ຫົວໜ່ວຍ. ​ໃນ​ໄລຍະ​ຜ່ານ​ມາ ​ໄດ້​ຮັບ​ການ​ຄຸ້ມ​ຄອງ ​ແລະ ຕິດຕາມ ກວດກາເປັນ​ຢ່າງ​ດີ ຈາກ​ພາກສ່ວນ​ກ່ຽວຂ້ອງ ທັງ​ເມືອງ ​ແລະ ​ແຂວງ, ພ້ອມ​ທັງ​ມີ​ການ​ແນະນຳ ຫ້າມນຳ​ໃຊ້​ສານ​ເຄມີ, ຝຸ່ນ ​ແລະ ຢາ​ປາບ​ສັດຕູ​ພືດ​ເດັດຂາດ ​ເພື່ອ​ບໍ່​ໃຫ້​ມີ​ຜົນ​ກະທົບ​ຕໍ່ກັບ​ສະພາບ​ແວດ​ລ້ອມ ​ແລະ ສັງຄົມ.

ປັດຈຸບັນ ​ພາກສ່ວນ​ກ່ຽວຂ້ອງ​ໄດ້​ສືບຕໍ່ດຳ​ເນີນ ​ການກວດກາ-​ຄຸ້ມ​ຄອງ ການ​ເກັບ​ກູ້​ຜົນ​ຜະລິດກ້ວຍ​ສົ່ງ​ອອກ ເພື່ອ​ກະກຽມຢຸດ​ເຊົາ​ການ​ປູກ, ຫາກ​ຜູ້​ລົງທຶນ ​ຍັງ​ມີ​ປະສົງ​ຢາກ​ດຳ​ເນີນ​ກິດ​ຈະການຕໍ່ ​ໂດຍ​ສະ​ເພາະ ທີ່​ດິນ​ສຳ​ປະທານ ​ຍັງ​ບໍ່ທັນໝົດອາຍຸ ກໍ​ໃຫ້​ຫັນ​ໄປ​ປູກ​ພືດ​ອື່ນ ທີ່​ບໍ່ສ້າງ​ຜົນ​ກະທົບ​ຕໍ່ສິ່ງ​ແວດ​ລ້ອມ ​ແລະ ສັງຄົມ. ​ ​ຂະນະ​ດຽວກັນ ກໍຈະ​​ໃຫ້ປະສານ​ສົມທົບ ​ກັບ​ຂະ​ແໜງການກ່ຽວຂ້ອງ  ບັນຫາ​ການ​ນຳ​ໃຊ້​ສານ​ເຄມີ​ທີ່​ບໍ່ຖືກ ຕ້ອງ, ທັງ​ມີ​ມາດ​ຕະການ​ເດັດຂາດ ​ຕໍ່ການ​ນຳ​ເຂົ້າ-ຄຸ້ມ​ຄອງ​ສານ​ເຄມີ​ທີ່​ຕ້ອງ​ຫ້າມ, ຢາຂ້າ​ຫຍ້າ, ຢາ​ປາບ​ສັດຕູ​ພືດ, ຝຸ່ນ​ເຄມີ ​ແລະ ສານ​ເລັ່ງການຈະ​ເລີ​ນ​ເຕີບ​ໂຕ​ຂອງ​ພືດ ​ແລະ ສັດ ທີ່​ບໍ່ມີ​ການ​ກວດກາຢັ້ງຢືນ ຈາກ​ກະຊວງ​ກະສິກຳ ​ແລະ ປ່າ​ໄມ້, ກະຊວງ​ອຸດສາຫະກຳ ​ແລະ ການ​ຄ້າ.

ຢ່າງ​ໃດ​ກໍ​ຕາມ ຫົວໜ້າພະ​ແນ​ກກະສິກຳ ​ແລະ ປ່າ​ໄມ້ ​ແຂວງ​ວຽງຈັນ ບອກ​ຕື່ມ​ວ່າ: ວຽກງານ​ພັດ ທະນາ​ດ້ານ​ກະສິກຳ ກໍ​ຄການ​ປູກ-​ການ​ລ້ຽງ ​ໄດ້​ມີສ່ວນ​ສຳຄັນ ​ໃນ​ການສະໜອງສະບຽງອາຫານ ​ແລະ ຜະລິດ​ຕະພັນ​ກະສິກຳ​ເປັນ​ສິນຄ້າ ສ້າງ​ລາຍ​ຮັບ​ໃຫ້​ແກ່​ຊາວ​ກະສິກອນ ປະກອບສ່ວນ​ແກ້​ໄຂຄວາມທຸກ​ຍາກ​ຂອງ​ປະຊາຊົນ ​ແລະ ຂະ​ບວນການ​ສ້າງ​ບ້ານ​ພັດທະນາ, ສິ່ງ​ສຳຄັນ​ແມ່ນ​ປະກອບສ່ວນ​ສ້າງ​ມູນ​ຄ່າ​ຂອງ ຈີ​ດີ​ພີ ​ໃນ​ຂົງ​ເຂດ​ກະສິກຳ​ໃຫ້​ເພີ່ມ​ຂຶ້ນ ​ແຕ່​ມີ​ຄວາມ​ຈຳ​ເປັນ​ຕ້ອງ​ຕ້ານ ​ແລະ ສະກັດ​ກັ້ນ ການ​ຜະລິດ​ທີ່​ສົ່ງ​ຜົນ​ກະທົບ​ຕໍ່ສິ່ງ​ແວດ ​ແລະ ສັງຄົມ ​ເພື່ອ​ໃຫ້​ແຂວງ​ວຽງຈັນ​ມີ​ການ​ພັດທະນາຕາມ​ທິດ​ສີຂຽວ ​ແລະ ຍືນ​ຍົງ.

 ຂ່າວ-​ພາບ:ຣາຊະ​ວົງ        
------------------------------------------
ໂທລະໂຄ່ງ ໃຫ້ຫຼາຍກວ່າຄຳວ່າໂຄສະນາ
LINE ID: @tholakhong | Twitter ID: @tholakhong
tholakhong@gmail.com | www.tholakhong.com


No comments

Powered by Blogger.