Header Ads

ປະທານປະເທດ ຕ້ອນຮັບການເຂົ້າຢ້ຽມຂໍ່ານັບ ຂອງ ປະທານສະພາແຫ່ງຊາດ ຣາຊະອານາຈັກ ກໍາປູເຈຍ



ໃນ​ວັນ​ທີ 21 ມິຖຸນາ 2017 ທີ່ ​ທໍານຽບປະທານ​ປະ​ເທດ (ຫໍ​ຄໍາ) ທ່ານ ບຸນ​ຍັງ ວໍລະ​ຈິດ ປະທານ​ປະ​ເທດ​ ແຫ່ງ ສາທາລະນະ​ລັດ ປະຊາທິປະ​ໄຕ ປະຊາຊົນ​ລາວ ​ໄດ້​ຕ້ອນຮັບ​ການ​ເຂົ້າ​ຢ້ຽມ​ຂໍ່ານັບ​ຂອງ​ສົມ​ເດັດ ອັກຄະມະຫາ​ ໂປ​ເຢຍ ຈັກກຣີ ​ເຮັງຊໍາຣິນ ປະທານ​ສະພາ​ແຫ່ງຊາດ ​ແຫ່ງ ຣາຊະ​ອານາ ຈັກ​ ກໍາປູ​ເຈຍ ​ໃນ​ໂອກາດ​ທີ່​ເດີນທາງ​ມາ​ຢ້ຽມຢາມ ສປປ ລາວ ​ແຕ່​ວັນ​ທີ 21-23 ມິຖຸນາ​ ນີ້.



​ໃນ​ໂອກາດດັ່ງກ່າວ, ທ່ານ ບຸນ​ຍັງ ວໍລະ​ຈິດ ​ໄດ້​ສະ​ແດງ​ຄວາມ​​ຊົມເຊີຍ, ຍິນ​ດີຕ້ອນຮັບ ​ແລະ ຕີ​ລາຄາ​ສູງຕໍ່ ສົມເດັດ ອັກຄະມະຫາ ໂປເຢຍ ຈັກກຣີ ເຮັງຊຳຣິນ ພ້ອ​ມຄະນະ, ທີ່​ໄດ້​ເດີນທາງ​ມາ​ຢ້ຽມຢ້ຽມ ​ແລະ ​ເຮັດ​ວຽກ ຢູ່ ສປປ ລາວ ຢ່າງ​ເປັນ​ທາງ​ການ​ໃນ​ຄັ້ງ​ນີ້, ເຊິ່ງເປັນການປະກອບສ່ວນສຳຄັນ ເຂົ້າໃນການ​ເສີມ​ຂະຫຍາຍ ສາຍພົວພັນມິດຕະພາບ ແລະ ການຮ່ວມມື ຂອງ​ສອງ​ປະ​ເທດ ສປປ ລາວ ​ແລະ ຣາຊະ​ອານາຈັກ ກໍາປູ​ເຈຍ ກໍ​ຄື ສອງ​ສະພາ​ ລາວ-ກໍາ​ປູ​ເຈຍ ​ໃນ​ໄລຍະ​ຜ່ານ​ມາ​ ​ໂດຍ​ໄດ້​ຮັບ​ການ​ເສີມ​ຂະຫຍາຍ​ຢ່າງ​ຕັ້ງໜ້າ​ ເຫັນ​ໄດ້​ມີ​ການ​ແລກປ່ຽນ​ ການ​ຢ້ຽມຢາມ​ຂອງ​ການ​ນໍາ​ຂັ້ນ​ສູງ​ນໍາ​ກັນ ​ເປັນ​ປົກກະຕິ ​ແລະ ມີ​ການ​ແລກປ່ຽນ​ບົດຮຽນ ​ລະຫວ່າງ​ ຄະນະ​ຜູ້​ແທນ​ຂັ້ນ​ສູງ ບັນດາ​ກໍາ​ມະ​ທິການ, ຄະນະ​ເລຂາທິການ​ຂອງ​ສອງ​ສະພາ, ​ໂດຍ​ລວມ​ແລ້ວ ການ​ພົວພັນ ​ແລະ ການ​ຮ່ວມ​ມື​ ລະຫວ່າງ​ສອງ​ສະພາ​ແຫ່ງ​ຊາດ​ ນັບມື້​ແຕກ​ດອກ​ອອກ​ຜົນ​ຍິ່ງໆຂຶ້ນ. ​​ໃນ​ນັ້ນ, ກໍ​ຍັງ​ມີ​ບາງ​ບັນຫາ​ທີ່​ສອງ​ສະພາ​ຕ້ອງ​ຊຸກຍູ້ ​ ໃຫ້​ມີ​ການ​ແກ້​ໄຂ​ໃຫ້​ສໍາ​ເລັດ​ເຊັ່ນ: ບາງ​ຈຸດ, ບາງ​ບໍລິ​ເວນ​ຊາຍ​ແດນ​ລະຫວ່າງ​ ສອງ​ປະ​ເທດ​ທີ່​ຍັງ​ຄົງ​ຄ້າງ ທັງ​ນີ້​ ກໍ​ເພື່ອ​ສ້າງ​ຊາຍ​​ແດນ ຂອງ​ສອງ​ປະ​ເທດ​ເຮົາ​ໃຫ້​ເປັນ​ຊາຍ​ແດນ​ ແຫ່ງສັນຕິພາບ ​ແລະ ການ​ຮ່ວມ​ມື​ເພື່ອ​ການ​ພັດທະນາ​ ໄປມາຫາ ສູ່​ກັນ​ຢ່າງ​ສະດວກ​ສະບາ​ຍ.



​ພ້ອມ​ນີ້​, ທ່ານປະທານ​ປະ​ເທດ ​ແຫ່ງ ສປປ ລາວ ຍັງ​ໄດ້​ແຈ້ງ​ສະພາບ​ການ​ພັດທະນາ​ເສດຖະກິດ-ສັງ​ຄົ​ມ ຂອງ ສປປ ລາວ ​ໂດຍ​ຫຍໍ້​ໃນ​ໜຶ່ງ​ປີຜ່ານມາ ​ສປປ ລາວ ສືບ​ຕໍ່​ມີ​ສະຖຽນລະ​ພາບ​ທາງ​ດ້ານ​ການ​ເມືອງ, ​ເສດຖະກິດ ​ສືບ​ຕໍ່​ຂະຫຍາຍຕົວ​ໃນ​ລະດັບ 7,02% ຫລື​ ມີ​ມູ​ນຄ່າ 129.279 ຕື້​ກີບ, ​ໃນ​ນັ້ນ ບັນ ຍາກາດ​ການ​ລົງທຶນ ​ຈາກ​ພາກສ່ວນ​ເອກະ​ຊົນພາຍ​ໃນ ​ແລະ ຕ່າງປະ​ເທດ​ເພີ່ມ​ຂຶ້ນ 30% ​ເຊິ່ງມີ​ມູນ​ຄ່າ 3,1 ຕື້​ໂດ​ລາ​ສະຫະລັດ. ຈໍານວນ​ຄອບຄົວ​ທຸກ​ຍາກ​ຈາກ 6,59% ​ໃນ​ປີ 2015 ຫລຸດ​ລົງ​ຍັງ​ເຫລືອ 6,3% ​ໃນ​ປີ 2016.

 ໃນ​ໂອກາດ​ດຽວ​ກັນ​, ສົມເດັດ ອັກຄະມະຫາ ໂປເຢຍ ຈັກກຣີ ເຮັງ ຊຳຣິນ ກໍໄດ້ສະແດງຄວາມຂອບອົກ​ຂອບໃຈ ຕໍ່ທ່ານ ບຸນ​ຍັງ ວໍລະ​ຈິດ ທີ່ໄດ້ສະຫລະເວລາອັນມີຄ່າ ໃຫ້ການຕ້ອນຮັບອັນອົບອຸ່ນໃນຄັ້ງນີ້, ພ້ອມທັງແຈ້ງຈຸດປະສົງ ຂອງການເດີນທາງມາຢ້ຽມຢາມ ແລະ ເຮັດວຽກຢູ່ ສປປ ລາວ ໃນຄັ້ງນີ້ ໃຫ້ທ່ານ​ ປະທານ​ປະ​ເທດ ​ແຫ່ງ ສປປ ລາວ ຊາບຕື່ມອີກ.

ຂ່າວ: ຂັນ​ໄຊ, ພາບ: ອ່າຍຄໍາ/ ຂປລ

------------------------------------------
ໂທລະໂຄ່ງ ໃຫ້ຫຼາຍກວ່າຄຳວ່າໂຄສະນາ
LINE ID: @tholakhong | Twitter ID: @tholakhong
tholakhong@gmail.com | www.tholakhong.com


No comments

Powered by Blogger.