Header Ads

ແຂວງບໍ່ແກ້ວຈູດທໍາລາຍຢາເສບຕິດຫລາຍພັນກິໂລ


ວັນທີ 26 ມີຖຸນາ ຂອງທຸກໆປີ ເຊິ່ງເປັນວັນສາກົນຕ້ານຢາເສບຕິດປີນິ້ແມ່ນ ຄົບຮອບ 30 ປີ. ປະຊາຊົນຊາວໂລກຖືເອົາວັນດັ່ງກ່າວ ເປັນວັນຕ້ານຢາເສບຕິດໃນທົ່ວໂລກເວົ້າລວມ, ເວົ້າສະເພາະ ຢູ່ແຂວງ ບໍ່ແກ້ວ ໄດ້ຈັດພິທີສະເຫຼີມສະຫຼອງວັນຕ້ານຢາເສບຕິດຢ່າງເປັນທາງການ ຢູ່ບັນດາເມືອງທົ່ວແຂວງ ໂດຍສະເພາະຢູ່ສະຖານທີເດີນກີລາແຂວງ ບໍ່ແກ້ວ ໄດ້ຈັດພິທີ ຈູດທໍາລາຍຢາເສບຕິດ ທີ່ຢືດມາໄດ້ ທີ່ຜ່ານການຕັດສິນຂອງສານ ໂດຍການເຂົ້າຮ່ວມ ຂອງ ບັນດາຄະນະປະຈໍາພັກແຂວງ, ກໍາມະການພັກແຂວງ ຫົວໜ້າ-ຮອງຫົວໜ້າພະແນກການ, ພະນັກງານວິຊາການ ທະຫານ-ຕໍາຫຼວດ, ອົງການຈັດຕັ້ງສາກົນ ແລະ ປະຊາຊົນບັນດາເຜົ່າ ເຂົ້າຮ່ວມ.


ທ່ານ ພັອ ລໍາໄພ ຍົດປະໄພ ກໍາມະການພັກແຂວງ ຫົວໜ້າກອງບັນຊາການ ປກສ ແຂວງ ບໍ່ແກ້ວ, ໄດ້ມີຄໍາເຫັນວ່າ: ຢາເສບຕິດທີ່ນໍາມາຈູດທໍາລາຍ ທີ່ມີເຈົ້າກໍາ ແລະ ບໍ່ມີເຈົ້າກໍາ ໂດຍຜ່ານການຕັດສິນຂອງສານແລ້ວ ສົກປີ 2016-2017: ມີ ຢາບ້າຈໍານວນ 428.000 ເມັດ, ມີນໍາໜັກ 42 ກິໂລກລາມ, ເຮໂຮອິນ 20 ແທ່ງ ມີນໍາໜັກ 7,719 ກິໂລກລາມ, ຢາໄອ້ 02 ຖົງ ມີນໍາໜັກ 9,5 ກລາມ, ຝຸ່ນແປ້ງ 20 ເປົາ ມີນໍາໜັກ 500 ກິໂລກລາມ, ຄະດີທີ່ເກີດຂຶ້ນຍ້ອນຢາເສບຕິດມີທັງໝົດ ມີ 83 ລາຍ, ມີຜູ້ຖືກຫາຕັດສິນລົງໂທດ 95 ຄົນ, ຍິງ 07 ຄົນ, ໃນນັ້ນມີຄົນຕ່າງປະເທດ 08 ຄົນ, ບັນຫາຢາເສບຕິດ ເປັນບັນຫາໜຶ່ງ ທີ່ທຸກຄົນ ໃນໂລກໄດ້ພ້ອມກັນສະກັດກັ້ນ ແລະ ຫາທຸກວິທີທາງບໍ່ໃຫ້ຢາເສບຕິດ ແຜ່ລາມອອກສູ່ສັງຄົມ ກໍ່ຄືມວນມະນຸດ ໃນປະຈຸບັນບັນຫາຢາເສບຕິດ ເປັນບັນຫາໜຶ່ງທີ່ຊາວໂລກ ກໍ່ຄືສັງຄົມມີຄວາມສັບສົນວຸ້ນວາຍ ເຮັດໃຫ້ປະເທດຊາດຕ່າງໆ ໃນໂລກ ລວມທັງ ສປປ ລາວ ເວົ້າລວມ, ສະເພາະພາຍໃນແຂວງ ບໍ່ແກ້ວ, ກໍາລັງພົບພໍ້ກັບ ບັນຫາສິ່ງເສບຕິດເຂົ້າມາຄອບງໍາ ເກີດມີຜູ້ຊື້ ຜູ້ຂາຍ, ຜູ້ຊົມໃຊ້ເສບຢາ, ຕິດຢາເສບຕິດ ແລະ ໄດ້ແຜ່ຂະຫຍາຍກ້ວາງອອກໄປສູ່ພື້ນຖານປະຊາຊົນບັນດາເຜົ່າ ເຂດຫ່າງໄກສອກຫຼີກ ເຊິ່ງມັນກໍ່ໃຫ້ເກີດ ມີຜົນກະທົບໄປ ໃຫ້ຄອບຄົວ ແລະ ສັງຄົມໃນປະຈຸບັນ ຈາກນັ້ນມັນຍັງພາໃຫ້ເກີດຄວາມເສຍຫາຍໃນຫຼາຍດ້ານເຊັ່ນ:



ຢາເສບຕິດກໍ່ໃຫ້ເກີດຜົນສະທ້ອນຕໍ່ມັນສະໝອງ ຮ່າງກາຍ ແລະ ບຸກຄົນອ້ອມຂ້າງ ຂອງຜູ້ຊົມໃຊ້, ໄວໝຸ່ມໃນສັງຄົມຕິດຢາເສບຕິດ ຊຶ່ງມັນສົ່ງຜົນສະທ້ອນເຖິງກຽດສັກສີ, ຊື່ສຽງ ແລະ ວົງຕະກູນ, ຢາເສບຕິດພາໃຫ້ສູນເສຍທາງດ້ານເສດຖະກິດ, ເງິນຄໍາ, ຊັບສິນ, ເສຍເວລາ, ເສຍແຮງງານ ແລະ ຂາດກໍາລັງແຮງງານ, ຊຶ່ງເປັນການກົດນວງທ່ວງດຶງໃນການຂະຫຍາຍຕົວທາງດ້ານເສດຖະກິດ ພາຍໃນຄອບຄົວກໍ່ຄືລາຍຮັບຂອງປະເທດຊາດ, ຢາເສບຕິດພາໃຫ້ສັງຄົມ, ຜູ້ຄ້າຂາຍ ແລະ ຜູ້ຕິດຢາເສບຕິດມີພຶດຕິກໍາ ແລະ ການກະທໍາທີ່ບໍ່ດີເຮັດໃຫ້ເກີດຄວາມວຸ້ນວາຍໃນສັງຄົມ ພາໃຫ້ເກີດມີການກໍ່ອາດສະຍາກໍາ ກໍ່ການອາລະວາດ, ປຸ້ນຈີ້, ເກີດມີການຂີ້ລັກງັດແງະ, ຂີ້ຄານບໍ່ຢາກອອກແຮງງານ ພາໃຫ້ເຊື່ອມເສຍວັດທະນາທໍາອັນດີງາມຂອງພວກເຮົາ ຍິ່ງໄປກວ່ານັ້ນ ການຄ້າຂາຍຢາເສບຕິດ ແມ່ນເປັນການທໍາລາຍ ເດັກເຍົາວະຊົນ, ຊາວໜຸ່ມຜູ້ເປັນລູກແພງຫຼານປະເສີດຂອງພວກເຮົາ, ທັງເປັນການທໍາລາຍຜູ້ທີ່ຈະສືບທອດ ນໍາພາ ແບກຫາບໂຊກຊະຕາກໍາ ຂອງປະເທດຊາດໃນອານາຄົດນໍາອີກ.

ຂ່າວ: ຮຕ ນາຊູ
------------------------------------------
ໂທລະໂຄ່ງ ໃຫ້ຫຼາຍກວ່າຄຳວ່າໂຄສະນາ
LINE ID: @tholakhong | Twitter ID: @tholakhong
tholakhong@gmail.com | www.tholakhong.com



No comments

Powered by Blogger.