Header Ads

ບຸນເຂົ້າພັນສາ ແມ່ນຫຍັງ? ປີນີ້ເຂົ້າພັນສາແມ່ນວັນອາທິດ ວັນທີ 9/7/2017


ປີນີ້ ວັນອາສານຫະບູຊາ ແມ່ນ ວັນເສົາ ທີ 8 ກໍລະກົດ 2017 ກົງກັບວັນ ຂຶ້ນ 15 ຄຳເດືອນ 8 ພສ 2560. ແລະ ວັນເຂົ້າພັນສາແມ່ນ ວັນແຮມ 1 ຄ່ຳ ເດືອນ 8 ພສ 2560 , ກົງກັບ ວັນອາທິດທີ່ 9 ກໍລະກົດ 2017.
ເພື່ອໃຫ້ຄົນລຸ່ນໃໝ່ໃຫຍ່ລຸ່ນ ແລະ ລູກຫຼານພາຍຊ້ອນໄດ້ຮູ້ເລື່ອງລາວ ຂອງວັນເຂົ້າພັນສາຈະເລົ່າໃຫ້ຟັງແບບກະທັດຫັດເລີຍວ່າ ວັນເຂົ້າພັນສາແມ່ນແນວໃດ?

ຄືດັ່ງທີ່ຮູ້ກັນ, ພໍຮອດລະດູຝົນ ເປັນລະດູການ ຜະລິດກະສິກຳ ໂດຍສະເພາະເພາະແມ່ນການປູກພືດຕ່າງໆ, ບັນດາຊາວໄຮ່ຊາວນາ ຕ່າງກໍ່ພາກັນທຳການປຸກຝັງ.  ດັ່ງນັ້ນ, ການທ່ອງທ່ຽວໄປ-ມາຂອງພະສົງ ບໍ່ວ່າຈະເປັນການໄປເທດສະໜາ ສັ່ງສອນປະຊາຊົນ ຫຼືໄປທຳກິດຂອງສົງ ໃນເມື່ອກ່ອນ ແມ່ນຕ້ອງໄດ້ຍ່າງ ໄປຕາມສະຖານທີ່ຕ່າງໆ ກໍໄດ້ຢຽບຖືກເຄື່ອງປູກຂອງຝັງຂອງປະຊາຊົນ ຈົນຖືກຕຳໜິສົ່ງຂ່າວ ແລະເລື່ອງດັ່ງກ່າວກໍຖືກໄປຂາບທູນພະພຸດທະເຈົ້າ (ພຸດທະການຕອນຕົ້ນ ພະສົງຍັງບໍ່ໄດ້ເຂົ້າພັນສາ).

ເພື່ອແກ້ໄຂບັນຫານີ້ ພະພຸດທະເຈົ້າ ກໍເລີຍຊົງກຳນົດໃຫ້ພະພິກຂຸສົງ ໄດ້ມີການ ຢຸດຕິ ການເດີນທາງ ເມື່ອເຂົ້າລະດູຝົນ ໃຫ້ພະສົງຢູ່ກັບທີ່ ຕັ້ງແຕ່ແຮມ 1 ຄ່ຳເດືອນ 8 ຈົນເຖິງຂຶ້ນ 15 ຄ່ຳເດືອນ 11 ໃຫ້ຢູ່ເປັນທີ່ເປັນບ່ອນ ບໍ່ໃຫ້ທ່ອງທ່ຽວໄປມາ ໂດຍສະເພາະແມ່ນຫ້າມໄປນອນແຮມຄືນທີ່ອື່ນ. ຖ້າໃຜຕ້ອງການຢາກຟັງເທດກໍໃຫ້ ມາຫາພະສົງຢູ່ວັດ ມາເຮັດບຸນຢູ່ວັດ ນັ້ນເອີ້ນກວ່າ ການເຂົ້າພັນສາ. ນອກນີ້, ການເດີນທາງໃນລະດູຝົນ ກໍ່ບໍ່ສະດວກ ເພາະເສັນທາງໄປມາລຳບາກ ແລະ ອາດເປັນອັນຕະລາຍ.


ໂອກາດອັນດີຂອງພະພິກຂຸສົງ ເມື່ອພະພິກຂຸສົງຢູ່ປະຈຳວັດກໍຈະໄດ້ ອົບຮົມສັ່ງສອນພະສົງທີ່ບວດໃໝ່ແດ່ ແລະພະສົງອົງບວດໃໝ່ກໍຈະໄດ້ຕັ້ງໜ້າ ສຶກສາຮ່ຳຮຽນຫຼັກທຳ ຄຳສອນ ທຸກມື້ຢ່າງຕໍ່ເນື່ອງແລະໄດ້ຮັບຜົນດີ.

ກິດຈະກຳທີ່ ປະຕິບັດກັນ ໃນວັນເຂົ້າພັນສາ ກໍ່ຈະມີການທຳບຸນໃສ່ບາດ (ຕັກບາດ) ໃນຕອນເຊົ້າ ຕາມວັດຢູ່ທົ່ວປະເທດ. ມີການ ຖວາຍສັງຄະທານ ອັນປະກອບດ້ວຍ ເຄື່ອງໃຊ້ຂອງສອຍ ທີ່ຈຳເປັນ ສຳລັບ ພະພິຂຸສຳມະເນນ, ພິເສດ ເພິ່ນຍັງມີການຖວາຍ ທຽນພັນສາ ເຊິ່ງໃນເມື່ອກ່ອນ ທີ່ບໍ່ທັນມີ ດອກໄຟນັ້ນ ທາງພະສົງ ກໍ່ຈະໃຊ້ທຽນໃຫຍ່ ພັນສາ ທີ່ທາງຍາດໂຍມ ມາະຖວາຍນັ້ນ ເພື່ອໄຕ້ໃຫ້ແສງສະຫວ່າງ. ເວົ້າເລື່ອງ ທຽນເຂົ້າພັນສາແລ້ວ, ກໍ່ເປັນທີ່ໜ້າເສຍດາຍ ທີ່ພິທີ ການຫຼໍ່ທຽນເຂົ້າພັນສາ ເລີ່ມຈາງຫາຍ ໄປຈາກບ້ານເຮົາ, ເພາະຄວາມສະດວກ ຂອງການຊື້ທຽນສຳເລັດຮູບຈາກໂຮງງານ ເລີຍເຮັດໃຫ້ປະເພນີ ການຫຼໍ່ທຽນເຂົ້າພັນສາເກືອບວ່າ ບໍ່ໄດ້ມີການຈັດເລີຍ. ອັນນີ້, ກໍ່ເປັນອີກອັນໜື່ງທີ່ຊາວລາວເຮົາຄວນຮັກສາ ແລະ ຊ່ວຍກັນຟື້ນປະເພນີ້ອັນດີງາມນີ້ໄວ້.

ສຳລັບ ບຸກຄົນທົ່ວໄປແລ້ວ ການປະຕິບັດທີ່ເຄີຍເຮັດກັນຜ່ານມານັ້ນ ຈະຖືເອົາໄລຍະວັນເຂົ້າພັນສາຕັດຈາກກິເລດ, ກາມະລົມ ແລະ ສິ່ງມືນເມົາຕ່າງໆ. ເພາະວ່າ ຫຼາຍຄົນແມ່ນມີການ ກິນເຫຼົ້າກິນເບຍ ຫຼື ມີເລື່ອງລາວຕ່າງໆ ໃນຊີວິດ, ການໄດ້ພັກຜ່ອນຮ່າງກາຍ ຈິງກິເລດ ກາມະລົມ ແລະ ສິງມືນເມົາ ເຫຼົ້າເບຍ ຕະຫຼອດ 3 ເດືອນ ເຂົ້າພັນສາ ນັ້ນ ກໍ່ຈະເຮັດໃຫ້ ມີສຸຂະພາບແຂງແຮງ. ແຕ່ເວົ້າແນວນີ້ ຫຼາຍຄົນ ພັດຂີ້ດື້ ພໍວິດພັນສາ ກໍ່ພາກັນ ສະຫຼອງ ເມົາຢ່າງໜັກ ອັນນີ້ກໍ່ຖືວ່າ ບໍ່ເປັນປະໂຫຍດ. ໃນຄວາມຈິງແລ້ວ, ການປະຕິບັດຕົນໃນການບໍລິໂພກສິ່ງມືນເມົາ ໃຫ້ພໍເໝາະ ແລະ ໃນປະລິມານທີ່ດີຕໍ່ສຸຂະພາບ ນັ້ນເປັນສິ່ງສຳຄັນ. ດັ່ງຄຳເວົ້າທີວ່າ ''ກິນໜ້ອຍເປັນຢາ ກິນຫຼາຍໃຫ້ໂທດ'' ທີ່ຄົນບູຮານເຄີຍກ່າວນັ້ນແລ້ວ.

ຂໍໃຫ້ທຸກທ່ານຈົ່ງມີຄວາມຜາສຸກ ແລະ ມ່ວນຊື່ນ ໃນວັນເຂົ້າພັນສາ

ຄິດດີ, ທຳດີ ແລະ ແບ່ງປັນຄວາມສຸກ, ຊ່ວຍເຫຼືອຄົນທີ່ດ້ອຍໂອກາດໃນສັງຄົມ ຍ່ອມ ເປັນຜົນບຸນອັນມະຫາສານ.

ກາຣຂາດພັນສາທີ່ບໍ່ຕ້ອງອາບັຕ

ເມື່ອມີເຫດເກີດຂຶ້ນ ບໍ່ສາມາດຈະຈຳພັນສາໃນທີ່ນັ້ນໆ ໄດ້ ພຣະພຸທທະເຈົ້າ ຊົງອະນຸຍາດໃຫ້ບໍ່ຕ້ອງອາບັຕ ດັ່ງນີ້
໑. ຖືກສັຕວ໌ຮ້າຍຣົບກວນ ຖືກໂຈຣປຸ້ນ ກຸຕິ ວິຫາຣຖືກໄຟໄໝ້ ຫຼື ນຳ້ຖ້ວມ
໒. ຊາວບ້ານຖືກໂຈຣປຸ້ນ ອົບພະຍົບໜີໄປ ຊົງອະນຸຍາດໃຫ້ໄປນຳເຂົາໄດ້ ຫຼື ຊາວບ້ານແຕກກັນເປັນສອງຝ່າຍ
໓. ຂາດແຄນອາຫາຣ ຫຼື ຢາຮັກສາໂຣຄ ຫຼື ຂາດຜູ້ບຳລຸງ ໄດ້ຮັບຄວາມລຳບາກ ຊົງອະນຸຍາດໃຫ້ໄປໄດ້
໔. ມີຜູ້ຄົນເອົາຊັພຍ໌ມາລໍ້ ຊົງອະນຸຍາດໃຫ້ໄປ ໃຫ້ພົ້ນໄດ້
໕. ພິກຂຸສົງຄ໌ຫຼື ພິກຂຸນີສົງຄ໌ ແຕກແຍກກັນ ຫຼື ມີຜູ້ພະຍາຍາມຍຸແຍ່ ເຮັດໃຫ້ແຕກແຍກກັນ ຫຼື ເຮັດໃຫ້ແຕກແຍກກັນແລ້ວ ຊົງອະນຸຍາດໃຫ້ໄປເພື່ອຫາທາງລະງັບໄດ້.



ນອກນັ້ນ ພຣະພຸທທະອົງຄ໌ຍັງອະນຸຍາດກາຣຈຳພັນສາໃນບາງແຫ່ງບາງບ່ອນ ຊົງຜ່ອນຜັນໃຫ້ຈຳພັນສາໄດ້ຄື
໑. ໃນຄອກສັຕວ໌ (ຢູ່ໃນທີ່ຂອງນາຍໂຄບາລ)
໒. ເມື່ອຄອກສັຕວ໌ຍ້າຍໄປ ຊົງອະນຸຍາດໃຫ້ຍ້າຍຕາມໄປໄດ້
໓. ໃນໝູ່ກວຽນ
໔. ໃນເຮືອ
ແລະຊົງຫ້າມຈຳພັນສາໃນທີ່ບໍ່ຄວນຈຳ ເຊັ່ນ
໑. ໃນໂກນໄມ້ ເຫງົ້າໄມ້
໒. ເທິງຕົ້ນໄມ້ ກິ່ງກ້ານງ່າໄມ້
໓. ຢູ່ກາງແຈ້ງ
໔. ບໍ່ມີເສນາສະນະ (ຄືບ່ອນນອນບ່ອນນັ່ງ)
໕. ໃນໂລງຜີ
໖. ໃນກົດ ຫຼື ເຕັ້ນ
໗. ໃນຕຸ່ມ ໃນບໍນຳ້

ພຣະວິນັຍປິດົກ ມະຫາວັຄ ເຫຼັ້ມ ໔
ພາບແລະເນື້ອຫາໂດຍ : กรุงศรีรัตนาคนหุต ลาว ล้านช้าง ลาวล (พระหลักคำสุรรณบริศรีคณาจายร์)

ຮິບໂຮມໂດຍ: ຮັກລາວ ໂທລະໂຄ່ງ

------------------------------------------
ໂທລະໂຄ່ງ ໃຫ້ຫຼາຍກວ່າຄຳວ່າໂຄສະນາ
LINE ID: @tholakhong | Twitter ID: @tholakhong
tholakhong@gmail.com | www.tholakhong.com







Powered by Blogger.