Header Ads

ມູນຄ່າສິນຄ້າລາວສົ່ງອອກໄປຈີນບັນລຸ 1,35 ຕື້ ໂດລາສະຫະລັດ


ຕາມການເປີດເຜີຍຂອງ ກະຊວງອຸດສາຫະກໍາ ແລະ ການຄ້າລາວວ່າ: ການຮ່ວມມືໃນຂະແໜງການຄ້າ ແລະ ການລົງທຶນລະຫວ່າງ ສປປ ລາວ-ສປ ຈີນ ຍັງສືບຕໍ່ຮັກສາການຂະຫຍາຍຕົວຢ່າງຕໍ່ເນື່ອງໂດຍຢັ້ງຢືນຈາການຈັດອັນດັບຂອງຜູ້ລົງທຶນຕ່າງປະເທດໃນ ສປປ ລາວ ພົບວ່າ ສປ ຈີນເປັນອັນດັບທີ 1 ຂະນະທີ່ ການຄ້າສອງຝ່າຍລາວ-ຈີນໃນປີ 2016 ບັນລຸ 2,34 ຕື້ໂດລາສະຫະລັດ ໃນນັ້ນມູນຄ່າສິນຄ້າລາວສົ່ງອອກໄປຈີນ 1,35 ຕື້ໂດລາສະຫະລັດ.

ຍ້ອນຜົນການຮ່ວມມືສອງຝ່າຍນັ້ນ, ຄະນະກໍາມາທິການຮ່ວມມືລາວ-ຈີນໄດ້ຈັດກອງປະຊຸມສະຫຼຸບຕີລາຄາການຈັດຕັ້ງປະຕິບັດວຽກງານການຮ່ວມດ້ານເສດຖະກິດ-ເຕັກນິກໃນວັນທີ 6 ກໍລະກົດ 2017 ຢູ່ນະຄອນຫຼວງວຽງຈັນເພື່ອປຶກສາຫາລື ແລະ ສະເໜີທິດທາງແຜນການໃນຕໍ່ໜ້າ ໂດຍການເປັນປະທານຂອງທ່ານ ນາງ ເຂັມມະນີ ພົນເສນາ ລັດຖະມົນຕີກະຊວງອຸດສາຫະກໍາ ແລະ ການຄ້າ, ປະທານຄະນະກໍາມາທິການຮ່ວມມືລາວ-ຈີນ ມີພາກສ່ວນກ່ຽວຂ້ອງຕ່າງໆທັງສູນກາງ ແລະ ທ້ອງຖິ່ນເຂົ້າຮ່ວມ.

ການຈັດກອງປະຊຸມໃນຄັ້ງນີ້ ບັນດາຜູ້ເຂົ້າຮ່ວມຈະໄດ້ປະກອບຄໍາຄິດຄໍາເຫັນຫຼາຍບັນຫາເຂົ້າໃນການຄຸ້ມຄອງໂຄງການຊ່ວຍເຫຼືອ, ໂຄງການລົງທຶນ-ການຄ້າ ພ້ອມທັງຮັບຟັງການສະເໜີບັນດາໂຄງການຍຸດທະສາດຮ່ວມມືລາວ-ຈີນແຕ່ນີ້ຮອດ 2020 ພ້ອມກັນນັ້ນຍັງໄດ້ຮັບຮູ້, ເຂົ້າໃຈຕໍ່ກັບພາລະບົດບາດຂອງຄະນະກໍາມາທິການຮ່ວມມືລາວ-ຈີນ ໃຫ້ເລິກເຊິ່ງກ່ວາເກົ່າ ທັງກໍາໄດ້ລັກສະນະຈຸດພິເສດ, ຂັ້ນຕອນ, ໂຄງການຊ່ວຍເຫຼືອຈາກ ສປ ຈີນ ໃຫ້ດີຂຶ້ນກວ່າເກົ່າເພື່ອແນໃສ່ປະກອບສ່ວນເສີມຂະຫຍາຍການຮ່ວມມືພົວພັນດ້ານເສດຖະກິດ-ການຄ້າ ແລະ ເຕັກນິກຂອງລາວ-ຈີນ ໃຫ້ເຕີບໃຫຍ່ຂະຫຍາຍຕົວ ແລະ ມີປະສິດທິຜົນນັບມື້ນັບສູງຂຶ້ນ.

ທ້າຍປີ 2016 ມີໂຄງການລົງທຶນໃນກິດຈະການຕ່າງໆຢູ່ ສປປ ລາວ ຈໍານວນ 765 ໂຄງການ, ມີມູນຄ່າການລົງທຶນທັງໝົດປະມານ 7 ຕື້ກວ່າໂດລາສະຫະລັດ, ເຂົ້າໃນ 14 ຂະແໜງການຫຼັກເປັນຕົ້ນແມ່ນຂະແໜງບໍ່ແຮ່, ຂະແໜງພະລັງງານໄຟຟ້າ, ຂະແໜງກະສິກໍາ, ບໍລິການ ແລະ ຂະແໜງການອື່ນໆ ໃນນີ້ ບໍລວມໂຄງການທາງລົດໄຟລາວ-ຈີນ ເຊິ່ງໄດ້ເຮັດໃຫ້ ສປ ຈີນ ເປັນຜູ້ລົງທຶນຕ່າງປະເທດອັນດັບໜື່ງຂອງ ສປປ ລາວ ໃນປີ 2016 ການຄ້າສອງຝ່າຍລາວ-ຈີນບັນລຸ 2,34 ຕື້ໂດລາສະຫະລັດ, ມູນຄ່າສິນຄ້າລາວສົ່ງອອກໄປຈີນ 1,35 ຕື້ໂດລາສະຫະລັດ, ສິນຄ້າຈີນເຂົ້າມາລາວ 990 ລ້ານໂດລາສະຫະລັດ, ອັດຕາເພີ່ມຂຶ້ນການສົ່ງອອກ-ນໍາເຂົ້າຜະລິດຕະພັນດ້ານກະສິກໍາເພີ່ມຂຶ້ນ 40%ໃນນັ້ນ ການສົ່ງອອກເຂົ້າສານໄປຈີນເພີ່ມຂຶ້ນ 19,4%, ເຊິ່ງເຮັດໃຫ້ ສປ ຈີນຍັງຄົງເປັນຄູ່ຮ່ວມການຄ້າໃຫຍ່ອັນດັບ 2 ຂອງ ສປປ ລາວ.

ທີ່ມາ: ຂ່າວສານປະເທດລາວ
------------------------------------------
ໂທລະໂຄ່ງ ໃຫ້ຫຼາຍກວ່າຄຳວ່າໂຄສະນາ
LINE ID: @tholakhong | Twitter ID: @tholakhong
tholakhong@gmail.com | www.tholakhong.com


No comments

Powered by Blogger.