Header Ads

ຫວຽດນາມ ເຂົ້າມາລົງທຶນຢູ່ອັດຕະປີ ຫຼາຍກວ່າ 1,3 ຕື້ໂດລາ

ທ່ານ ສຸລິຈັນ ພອນແກ້ວ ກຳມະການພັກແຂວງ ຫົວໜ້າພະແນກແຜນການ ແລະການລົງທຶນ ສະມາຊິກສະພາປະຊາຊົນແຂວງ ໄດ້ລາຍງານຕໍ່ສື່ມວນຊົນ ໃນວັນທີ 11 ກໍລະກົດ 2017 ຜ່ານມານີ້ວ່າ: ເລີ່ມແຕ່ປີ 2001-2016 ການລົງທຶນຢູ່ໃນແຂວງ ອັດຕະປື ລວມທັງພາຍໃນ ແລະຕ່າງປະເທດມີທັງໝົດ 60 ໂຄງການ ລວມມູນຄ່າ 2.276 ລ້ານ ໂດລາ.

ໃນນີ້ຂະແໜງພະລັງງານໄຟຟ້າກວມເອົາ 67,4%, ຂະແໜງກະສິກໍາ 23,9%, ຂະແໜງບໍ່ແຮ່ 8,4% ແລະຂະແໜງບໍລິການອື່ນໆກວມເອົາ 0,07%. 

ໃນນີ້ການລົງທຶນຈາກ ສສ ຫວຽດນາມ ກວມເອົາ 58%, ນັບແຕ່ປີ 2001-2016 ໃນນີ້ ສສ ຫວຽດນາມ ໄດ້ລົງທຶນຢູ່ຢູ່ແຂວງ ອັດຕະປື ລວມມີ 19 ໂຄງການ(ຂະແໜງກະສິກໍາມີ 12 ໂຄງການ, ຂະແໜງບໍ່ແຮ່ 4 ໂຄງການ, ຂະແໜງພະລັງງານ 3 ໂຄງການ) ລວມມູນຄ່າປະມານ 1,3 ຕື້ໂດລາ . ໃນປີ 2017  ນັກລົງຈາກ ສສ ຫວຽດນາມ ຍັງໃຫ້ຄວາມສົນໃຈຈະສືບຕໍ່ມາລົງທຶນຢູ່ໃນແຂວງ ອັດຕະປື ຕື່ມອີກ.

ສະພາບນັກລົງທຶນຂອງບໍລິສັດ ສສ ຫວຽດນາມ ມາຮອດປັດຈຸບັນເຫັນວ່າມີການຂະຫຍາຍກິດຈະກຳດີຂຶ້ນ ເປັນຕົ້ນແມ່ນ ບໍລິສັດ ຮວ່າງແອ໋ງ ຢາລາຍ,ບໍລິສັດ TTC ໂຮງງານນໍ້າຕານນອກຈາກປູກຢາງພາລາ ແລະບາງບ່ອນທີ່ບໍ່ມີຄວາມເໝາະສົມກໍ່ໄດ້ຫັນມາທຳການຜະລິດປູກໄມ້ໃຫ້ໝາກ ເຊັ່ນ: ໝາກມັງກອນ, ຫັນມາປູກຫຍ້າລ້ຽງສັດເພີ່ມຕື່ມ ແລະບໍລິສັດຍັງມີຄວາມສົນໃຈຢາກໃຫ້ທາງພາກລັດ ແຂວງ ອັດຕະປື ສະໜັບສະໜູນປະຊາຊົນຂະຫຍາຍເນື້ອທີ່ປູກອ້ອຍເພີ່ມຕື່ມ ເພື່ອນຳສະໜອງເຂົ້າໂຮງງານນ້ຳຕານໃຫ້ຫຼາຍຂຶ້ນພ້ອມນີ້ ກໍ່ຍັງມີກິດຈະກຳອື່ນໆອີກ.

ນອກຈາກການຊ່ວຍເຫຼື່ອໃນການພັດທະນາດ້ານສັງຄົມທ້ອງຖິ່ນເເລ້ວ ທາງບໍລິສັດ ຮວ່າງແອ໋ງ ຢາລາຍ ກໍ່ໄດ້ລົງທຶນກ່ອນ ເປັນຕົ້ນ ແມ່ນໂຄງການກໍ່ສ້າງສະໝາມບິນສາກົນ ອັດຕະປື ເຊິ່ງເປັນພື້ນຖານໂຄງລ່າງອັນສຳຄັນຕໍ່ການພັດທະນເສດຖະກິດ-ສັງຄົມຂອງແຂວງ ອັດຕະປື ເຖິງແມ່ນວ່າ ເບື້ອງຕົ້ນຈະບໍ່ໄດ້ນຳໃຊ້ເທົ່າທີ່ຄວນ ແຕ່ເຊື່ອໝັ້ນວ່າ ອີງໃສ່ການພັດທະນາ, ອີງໃສ່ການໄປມາຂອງນັກທ່ອງທ່ຽວ, ນັກທຸລະກິດມີຈຳນວນເພີ່ມຂຶ້ນ ໃນອານາຄົດອັນໃກ້ໆນີ້ຈະຕ້ອງໄດ້ມີການຊົມໃຊ້ຢ່າງແນ່ນອນ.

ທ່ານ ໄດ້ກ່າວຕື່ມອີກວ່າ ເນື່ອງໃນສະເຫຼີມສະຫຼອງວັນປະຫວັດສາດ ວັນສຳຄັນຂອງຊາດ ລາວ-ຫວຽດນາມ ຄື: ວັນເຊັນສົນທິສັນຍາມິດຕະພາບ ແລະການຮ່ວມມື ຄົບຮອບ 40 ປີ ແລະ ວັນສ້າງຕັ້ງສາຍພົວພັນການທູດ ຄົບຮອບ 55 ປີ 2017 ນີ້  ແມ່ນການພົວພັນອັນຜ່ອງໃສ, ສະເໝີຕົ້ນສະເໝີປາຍ, ເປັນສັນຍາລັກແຫ່ງຄວາມມຸ່ງມາດປາຖະໜາຂອງປະຊາຊົນທັງສອງຊາດ ເພື່ອສືບຕໍ່ເສີມຂະຫຍາຍໃຫ້ຈະເລີນງອກງາມຂຶ້ນຢ່າງບໍ່ຢຸດຢັ້ງ ພິເສດແຂວງ ອັດຕະປືກຳລັງຂຸ້ນຂ້ຽວໃນການກະກຽມສະເຫຼີມສະຫຼອງສອງວັນປະຫວັດສາດນັ້ນ ຖືເອົາໂອກາດນີ້ ອວຍພອນໃຫ້ແກ່ການນຳພັກ-ລັດສອງປະເທດ ປະຊາຊົນທັງສອງຊາດ ໄດ້ຮັກສາສາຍພົວພັນມິດຕະພາບ, ຄວາມສາມັກຄີແບບພິເສດ ແລະການຮ່ວມມືແບບຮອບດ້ານນີ້ ຈົ່ງພ້ອມກັນອອກແຮງເສີມສ້າງຖະໜອມຫອມຮັກສາຍພົວພັນມິດຕະພາບໃຫ້ຍືນຍົງຄົງຕົວຕະຫຼອດຊົ່ວຟ້າກາລະນານ.

------------------------------------------
ໂທລະໂຄ່ງ ໃຫ້ຫຼາຍກວ່າຄຳວ່າໂຄສະນາ
LINE ID: @tholakhong | Twitter ID: @tholakhong
tholakhong@gmail.com | www.tholakhong.com



No comments

Powered by Blogger.