Header Ads

ຫວຽດນາມ ລົງທຶນຢູ່ອັດຕະປື 1,3 ຕື້ໂດລາ






ທ່ານ ສຸລິວົງ ອະໄພວົງ ຫົວໜ້າພະແນກພົວພັນການຕ່າງປະເທດ ແຂວງອັດຕະປື ໄດ້ໃຫ້ ຄຳສຳພາດຕໍ່ສື່ມວນຊົນ ໃນລະຫວ່າງວັນທີ 18 ກໍລະກົສ 2017 ນີ້ວ່າ: ໃນຊຸມປີ ຜ່ານມາ ມີນັກລົງທຶນຈາກ ສສ ຫວຽດນາມ ທັງພາກລັດ ແລະ ເອກະຊົນ ມາລົງທຶນດຳເນີນກິດຈະການທັງໝົດ 19 ບໍລິສັດ, ມີມູນຄ່າການລົງທຶນ 1,3 ຕື້ໂດລາສະຫະລັດ ​ເຊິ່ງໂຄງ ການສ່ວນໃຫຍ່ ແມ່ນເລັ່ງໃສ່ການປູກ, ການລ້ຽງ, ໂຮງງານອຸດສາຫະກຳປຸງແຕ່ງຢາງພາລາ, ໂຮງງານນ້ຳຕານອ້ອຍ, ໂຄງການສຳຫຼວດແຮ່ທາດ ແລະ ໂຄງການກໍ່ສ້າງ ເຂື່ອນໄຟຟ້ານ້ຳຕົກ.




ທ່ານ ສຸລິວົງ ອະໄພວົງ ກ່າວ​ຕື່ມ​ວ່າ: ຫວຽດນາມ​ອ້າຍ​ນ້ອງ ຍັງ​ໄດ້​ໃຫ້ການຊ່ວຍເຂົ້າສານ, ອາຫານແຫ້ງ, ເຄື່ອງນຸ່ງຮົ່ມ ແລະ ເຄື່ອອຸປະກອນການເເພດ, ອຸປະກອນການຮຽນຂອງເດັກ, ຄອມພິວເຕີ ແລະ ອື່ນໆ ຄິດເປັນມູນຄ່າປະມານ 1,7 ຕື້ດົງ, ບັນດາແຂວງໄດ້ໃຫ້ທຶນນັກສຶກສາໄປຮຽນທີ່ ສສ ຫວຽດນາມ ໃນປີຜ່ານມາຈຳນວນ 155 ທຶນ, ຊ່ວຍເຫລືອຝຶກອົບຮົມ ດ້ານເຕັກນິກກະສິກຳ, ການເເພດ ແລະ ການທ່ອງທ່ຽວເປັນປົກກະຕິ, ຊ່ວຍທຶນສ້າງພື້ນຖານໂຄງລ່າງມູນຄ່າ 13,5 ຕື້ດົງ, ຊ່ວຍສ້າງທາງແຕ່ຫລັກໝາຍ 790 ຮອດດ່ານພູເກືອ ມູນຄ່າ 2,3 ລ້ານ​ໂດ​ລາ​ສະຫະລັດ, ຊ່ວຍປະຕິສັງຂອນວັດທາດ ມູນຄ່າ 2,5 ລ້ານ​ໂດ​ລາ​ສະຫະລັດ ແລະ ອື່ນໆ ອີກຈໍານວນບໍ່ໜ້ອຍ. ໃນແຕ່ລະປີຫວຽດນາມ ມາຊ່ວຍກວດພະຍາດ ແລະ ຈ່າຍຢາບໍ່ໄດ້ເສຍຄ່າ ໃຫ້ປະຊາຊົນແຂວງອັດຕະປື​ ​ເຊິ່ງມີປະຊາຊົນເຂົ້າຮັບ ບໍລິການປະມານ 4.000 ກວ່າຄົນ.
          
ໂດຍອີງຕາມມູນເຊື້ອ ຄວາມສາມັກຄີແບບພິດເສດ ພະແນກ ພົວພັນຕ່າງປະເທດແຂວງ ກໍໄດ້ ເປັນໃຈກາງ ປະສານງານໃຫ້ແກ່ຄະນະນຳ ເພື່ອເປັນການຮ່ວມມືກັບບັນ ດາແຂວງພາກ ກາງພາກໃຕ້ ສສ ຫວຽດນາມ ປັດຈຸບັນໄດ້ມີແຂວງ ເພື່ອນມິດຍຸດທະສາດເຖິງ 10 ແຂວງ, 2 ນະຄອນ, 2 ແມ່ທັບ ໄດ້ ຮ່ວມກັນຊອກຄົ້ນ, ເກັບກູ້ ແລະ ຈັດສົ່ງ ອັດທິທະຫານ ອາສາສະໝັກຫວຽດນາມ ທີ່ເສຍສະຫລະຊີວິດ ໃນ ປາງສົງຄາມໄດ້ທັງໝົດ 12 ກໍລະນີ.

ທີ່ມາ: ຂປລ
------------------------------------------
ໂທລະໂຄ່ງ ໃຫ້ຫຼາຍກວ່າຄຳວ່າໂຄສະນາ
LINE ID: @tholakhong | Twitter ID: @tholakhong
tholakhong@gmail.com | www.tholakhong.com


No comments

Powered by Blogger.