Header Ads

ແຂວງຫລວງພະບາງມີສູນປິ່ນປົວ ແລະ ຮັກສາສຸຂະພາບຕາ ດ້ວຍມູນຄ່າກໍ່ສ້າງທັງຫມົດ 1,440.000.000 ກີບ.



ຫວ່າງບໍ່ດົນມານີ້ທີ່ໂຮງໝໍແຂວງຫຼວງພະບາງ ໄດ້ຈັດພິທີມອບ-ຮັບ ຕຶກປິ່ນປົວ ແລະ ຮັກສາສຸຂະພາບຕາ ຢ່າງເປັນທາງການພາຍຫຼັງໄດ້ກໍ່ສ້າງສໍາເລັດແລ້ວ ໂດຍການເຂົ້າຮ່ວມເປັນສັກຂີພິຍານຂອງທ່ານ ວົງສະຫວັນ ເທບພະຈັນ ຮອງເຈົ້າແຂວງຫລວງພະບາງ,ທ່ານ ດຣ ເນົາ ບຸດຕາ ຫົວຫນ້າຫ້ອງການກະຊວງສາທາລະນະສຸກ,ມີທ່ານ ດຣ ອໍາພອນ ພະລາມມີໄຊ ຫົວຫນ້າພະແນກສາທາລະນະສຸກ ແຂວງຫລວງພະບາງ,ຕາງໜ້າຈາກມູນລະນິທິ ເຟຣດໂຮໂລ ປະຈໍາ ລາວ ແລະ ພະນັກງານແພດຂະແຫນງຕາເຂົ້າຮ່ວມ.




ໂຄງການກໍ່ສ້າງຕຶກປິ່ນປົວ ແລະ ຮັກສາສຸຂະພາບຕາ ທີ່ໂຮງຫມໍແຂວງຫລວງພະບາງ ຊຶ່ງແມ່ນໂຄງການໜຶ່ງທີ່ພະແນກສາທາລະນະສຸກ ແຂວງຫລວງພະບາງ, ພ້ອມດ້ວຍມູນນິທິ ເຟຣດໂຮໂລ ປະຈໍາ ສປປ ລາວ ເປັນເຈົ້າຂອງໂຄງການ ແລະ ບໍລິສັດພອນໄຊກໍ່ສ້າງເຄຫະສະຖານ ເປັນຜູ້ຮັບເຫມົາກໍ່ສ້າງ.


ເຊິ່ງເລີ່ມລົງມືກໍ່ສ້າງວັນທີ 5 ມັງກອນ 2017 ແລະ ສໍາເລັດການກໍ່ສ້າງ ວັນທີ 30 ມີຖຸນາ 2017 ໃຊ້ເວລາ 6 ເດືອນ, ເປັນອາຄານ 2 ຊັ້ນ, ໂຄງສ້າງຂອງອາຄານແມ່ນເຮັດດ້ວຍເບຕົງເສີມເຫລັກ, ພຶ້ນເທເບຕົງປູດ້ວຍກະໂລ່,ຝາແມ່ນກໍ່ດ້ວຍດິນຈີ່ໂບກທັງສອງດ້ານ,ວົງກົບ,ບານປະຕູ,ປ່ອງຢ້ຽມ ເປັນໄມ້ເນື້ອແຂງທັງຫມົດ,ເພດານດ້ານໃນແມ່ນແຜ່ນຍິບຊໍາ, ເພດານຮອບນອກໂຄງໄມ້ຕີດ້ວຍໄມ້ສັກ, ຫລັງຄາໃຊ້ໂຄງເຫລັກມຸງດ້ວຍຊີແພັກ,ມີຕົວອາຄານທັງໝົດຂະຫນາດກວ້າງ 12 ແມັດ, ຍາວ 20 ແມັດ, ຊັ້ນລຸ່ມມີ 7 ຫ້ອງ, ຊັ້ນເທິງມີ 7 ຫ້ອງ, ມີຫ້ອງຜ່າຕັດ, ຫ້ອງກວດຕາ, ຫ້ອງປະຊຸມ, ຫ້ອງນອນສໍາລັບຄົນເຈັບ, ຫ້ອງທ່ານຫມໍ, ຫ້ອງແພດຍາມ ແລະ ຫ້ອງພະຍາບານ, ມູນຄ່າທັງຫມົດ 1,440.000.000 ກີບ.

ຂ່າວ: ເພັດສາຄອນ ສິມມະວົງ/ຂປລ

------------------------------------------
ໂທລະໂຄ່ງ ໃຫ້ຫຼາຍກວ່າຄຳວ່າໂຄສະນາ
LINE ID: @tholakhong | Twitter ID: @tholakhong
tholakhong@gmail.com | www.tholakhong.com
ກົດພາບອ່ານລາຍລະອຽດ

ກົດພາບອ່ານລາຍລະອຽດ

No comments

Powered by Blogger.