Header Ads

ສຳເລັດການຂະຫຍາຍເສັ້ນທາງເລກທີ 16 W ແຂວງຈໍາປາສັກ

  
ແຂວງຈຳປາສັກໄດ້ສຳເລັດການຂະຫຍາຍເສ້ນທາງ 16 W ພ້ອມເປີດນຳໃຊ້ນັບແຕ່ວັນທີ 7 ກໍລະກົດ 2017 ພາຍຫຼັງລົງມືກໍ່ສ້າງມາ 5 ປີເຕັມ ໃນຄວາມຍາວ 40 ກວ່າກິໂລແມັດ.

ພິທີເປີດການນໍາໃຊ້ໂຄງການກໍ່ສ້າງ ແລະ ຂະຫຍາຍເສັ້ນທາງເລກທີ 16 W ແຕ່ຂົວຂ້າມນ້ຳຂອງລາວ-ຍີ່ປຸ່ນ-ບ້ານຄັນແຍງຫາຊາຍແດນວັງເຕົ່າ ເມືອງໂພນທອງແຂວງຈຳປາສັກ ໄດ້ຈັດຂຶ້ນຢູ່ເຂດບ້ານວັງເຕົ່າ ເມືອງໂພນທອງ ແຂວງຈໍາປາສັກ ໂດຍມີ ທ່ານ ສອນໄຊ ສີພັນດອນ ຮອງນາຍົກລັດຖະມົນຕີ ທ່ານ ສົມສະໜິດ ບຸດຕິວົງ ຮອງເຈົ້າແຂວງຈໍາປາສັກ ພ້ອມດ້ວຍບັນດາທ່ານຮອງລັດຖະມົນຕີກະຊວງທີ່ກ່ຽວຂ້ອງ,ການນຳຈາກບັນດາແຂວງ ແລະ ຈັງຫວັດໃກ້ຄຽງແຫ່ງຣາຊະອານາຈັກໄທ, ຄະນະບໍລິຫານກຸ່ມບໍລິສັດດວງດີກໍ່ສ້າງຂົວ-ທາງຈໍາກັດຜູ້ດຽວ ແລະ ແຂກຖືກເຊີນທັງສູນກາງ ແລະ ທ້ອງຖິ່ນເຂົ້າຮ່ວມ. 

ທ່ານ ອຸດອນ ແກ້ວດວງດີ ຜູ້ອໍານວຍການກຸ່ມບໍລິສັດດວງດີກໍ່ສ້າງຂົວ-ທາງຈໍາກັດຜູ້ດຽວ ໄດ້ກ່າວວ່າ: ເສັ້ນທາງເລກທີ 16 W ເປັນເສັ້ນທາງໜຶ່ງທີ່ມີຄວມສໍາຄັນເພື່ອອໍານວຍຄວາມໃຫ້ແກ່ການຄົມມະນາຄົມ-ຂົນສົ່ງ ກໍ່ຄືການໄປມາຫາສູ່ຂອງປະຊາຊົນ ການຄ້າ ການລົງທຶນ ແລະ ການບໍລິການດ້ານການທ່ອງທ່ຽວຂອງແຂວງຈໍາປາສັກ ທັງເປັນເສັ້ນທາງເຊື່ອມຕໍ່ທີ່ສໍາຄັນຂອງບັນດາແຂວງພາກໃຕ້-ປະເທດເພື່ອນບ້ານ ແລະ ອະນຸພາກພື້ນ ເຊິ່ງເສັ້ນທາງດັ່ງກ່າວມີຄວາມຍາວ 42,2 ກິໂລແມັດ ຂະຫຍາຍໜ້າທາງເດີມຈາກ 2 ຊ່ອງທາງ ເປັນ 4 ຊ່ອງທາງຈະລາຈອນ ໜ້າທາງກວ້າງ 16 ແມັດ ແລະ ຂົວ 4 ແຫ່ງ ປູດ້ວຍຢາງອັດສະຟານ ໄລຍະການກໍ່ສ້າງ 3 ປີ ແຕ່ຍ້ອນມີການປັບປຸງເຕັກນິກການກໍ່ສ້າງເພີ່ມມາເປັນ 5 ປີຈຶ່ງສໍາເລັດ ການກໍ່ສ້າງໄດ້ດຳເນີນແຕ່ປີ 2012 ໂດຍມີການບຸກເບີກເສັ້ນທາງທັງຟາກດ້ວຍການຖົມດິນ ທໍ່ລອດທາງ ລົງຫີນອັດແໜ້ນ ປູຢາງອັດສະຟານ ແລະ ກໍ່ສ້າງເພີ່ມອີກ 4 ແຫ່ງ ໜ້າທາງປູດ້ວຍຢາງຂົ້ວອັດສະຟານ,ໜ້າຂົວກວ້າງ 9 ແມັດ ຍາວທັງໝົດ 250 ແມັດ ປັດຈຸບັນແມ່ນສໍາເລັດ 100% ແລະ ໄດ້ທົດລອງນໍາໃຊ້ ແລະ ເກັບເງິນຄ່າຜ່ານທາງໃນທ້າຍປີ 2016 ເປັນການລົງທຶນກ່ອນຂອງບໍລິສັດ 100% ໃນຮູບແບບ BOT ມີໄລຍະສຳປະທານ 45 ປີ ລວມທັງປີກໍ່ສ້າງ. 


ໃນນີ້ມີຈຸດເກັບເງິນທີ່ທັນສະໄໝ 2 ຈຸດ ພ້ອມນີ້ຍັງໄດ້ຮັບອະນຸຍາດພັດທະນາເຂດເສດຖະກິດພິເສດ ແລະ ເຂດເສດຖະກິດສະເພາະແຂວງຈໍາປາສັກ (ວັງເຕົ່າ-ໂພນທອງ) ເນື້ອທີ່ 253 ເຮັກຕາ ເຮັກຕາ ເຊິ່ງປະກອບມີຮ້ານຄ້າປອດພາສີ ສູນການຄ້າ ຕະຫຼາດຊາຍແດນ ອະສັງຫາລິມະຊັບ ສະຖາບັນການເງິນ ການທ່ອງທ່ຽວ ໂຮງແຮມ ສູນບໍລິການສາງພັກສິນຄ້າ ເຂດການຜະລິດເພື່ອສົ່ງອອກ ແລະ ລະບົບພື້ນຖານໂຄງລ່າງສໍາຄັນອື່ນໆ ເຊິ່ງຈະໃຊ້ທຶນພັດທະນາ 250 ລ້ານໂດລາສະຫະລັດ ໂດຍມີອາຍຸການສໍາປະທານ 99 ປີ. 

ທ່ານ ສົມສະໜິດ ບຸດຕິວົງ ຮອງເຈົ້າແຂວງຈໍາປາສັກ ໃນນາມອຳນາດການປົກຄອງທ້ອງຖິ່ນໄດ້ໃຫ້ກຽດກ່າວເປີດການນຳໃຊ້ທາງຄັ້ງນີ້ວ່າ:  ເສັ້ນທາງດັ່ງກ່າວສຸດທີ່ມີຄວາມໝາຍ ເພາະເປັນເສັ້ນທາງຍຸດທະສາດທີ່ສຳຄັນລະດັບຊາດ ແລະ ພາກພື້ນ ເພື່ອອຳນວຍຄວາມສະດວກສະບາຍໃນການໄປມາຫາສູ່ ແລະ ຂົນສົ່ງສິນຄ້າເຂົ້າອອກປະເທດ ແລະ ດຶງດູູດເອົານັກທ່ອງທ່ຽວໃຫ້ເຂົ້າມາທ່ອງທ່ຽວແຂວງຈຳປາສັກພວກເຮົາໃຫ້ນັບມື້ນັບຫຼາຍຂຶ້ນ ເຊິ່ງມັນຮຽກຮ້ອງໃຫ້ພໍ່ແມ່ປະຊາຊົນກໍ່ຄືບໍລິສັດຈະຕ້ອງໄດ້ຮ່ວມກັນເປັນເຈົ້າການປົກປັກຮັກສາເສັ້ນທາງດັ່ງກ່າວ ເພື່ອນຳໃຊ້ໃຫ້ໄດ້ຍາວນານທີ່ສຸດ




------------------------------------------
ໂທລະໂຄ່ງ ໃຫ້ຫຼາຍກວ່າຄຳວ່າໂຄສະນາ
LINE ID: @tholakhong | Twitter ID: @tholakhong
tholakhong@gmail.com | www.tholakhong.com





No comments

Powered by Blogger.