Header Ads

ນາຍົກລັດຖະມົນຕີປ່ອຍປາ 1 ແສນກວ່າໂຕຄືນສູ່ ທໍາມະຊາດ



ວັນ​ທີ 13 ກໍລະກົດ 2017 ຢູ່​ທ່າ​ເຮືອ​ຫລັກ 4 ​ເມືອງ​ສີ​ສັດຕະ​ນາກ ນະຄອນຫລວງ​ວຽງ​ຈັນ, ທ່ານ ທອງ​ລຸນ ສີ​ສຸ​ລິດ ນາຍົກລັດຖະມົນຕີ​ແຫ່ງ ສປປ ລາວ ​ພ້ອມ​ດ້ວຍ​ຄະນະ​ໄດ້​ເຂົ້າ​ຮ່ວມ​ພິທີ​ປອ່ຍປາ​ ລົງ​ສູ່​ທໍາ​ມະ​ຊາດ 1 ​ແສນ​ກວ່າ​ໂຕ ​ເນື່ອງ​ໃນໂອກາດວັນປ່ອຍປາ​​ ​ແລະ ອະນຸລັກ​ສັດ​ນ້ຳ-ສັດປ່າ​ແຫ່ງ​ຊາດ ປະຈຳ​ປີ 2017 ພ້ອມນີ້ກໍມີ​ລັດຖະມົນຕີ, ຮອງ​ລັດຖະມົນຕີ ​ແລະ ຮອງ​ເຈົ້າ​ຄອງ​ນະຄອນຫລວງ, ຕາງໜ້າອົງການ​ຈັດ​ຕັ້ງ​ສາກົນ​ປະ​ຈໍາ​ລາວ ແລະ ພະນັກງານ​ທີ່​ກ່ຽວຂ້ອງ​ເຂົ້າ​ຮ່ວມ.

ທ່ານ ທອງ​ພັດ ວົງ​ມະນີ ຮອງ​ລັດຖະມົນຕີ​ກະຊວງ​ກະສິກໍາ ​ແລະ ປ່າ​ໄມ້​ໄດ້​ກ່າວ​ວ່າ: ການ​ປ່ອຍ​ປາ​ລົງ​ສູາທໍາ​ມະ​ຊາດ​ຄັ້ງ​ນີ້   ລວມ​ມີ ລູກ​ປາ​ຈຳ​ນວນ​ປະ​ມານ 1 ແສນກວ່າໂຕ ​ປະກອບ​ມີ ປາ​ປາກ, ປາ​ເອິນ, ປາ​ແກງ ແລະ ນົກ​ຈຳ​ນວນ​ໜື່ງ. ຜ່ານ​ການ​ເຄື່ອນ​ໄຫວ​ວຽກ​ງານ ​ອະ​ນຸ​ລັກ​ສັດ​ນ້ຳ ແລະ ສັດ​ປ່າ ໂດຍ​ສະ​ເພາະ​ແມ່ນ​ ໃນ​ໄລຍະ​ມໍ່ໆ​ມານີ້ ​ເຫັນ​ວ່າ​ການ​ປ່ອຍ​ປານັບ​ມື້​ເພີ່ມ​ຂຶ້ນ ໃນນັ້ນ ປີ 2015 ພວກ​ເຮົາ​ໄດ້​ປ່ອຍ​ລູກ​ປາ​ທັງ​ໝົດ​ປະ​ມານ 35 ລ້ານ ໂຕ, ປີ 2016 ປ່ອຍ ໄດ້​ປະ​ມານ 40 ລ້ານ​ໂຕ ແລະ ປີ 2017 ນີ້ ຕາມ​ແຜນ​ການ​ແມ່ນປ່ອຍ​ລູກ​ປາ ໃຫ້​ໄດ້​ຫລາຍ​ກ່​ວາ 40 ລ້ານ​ໂຕ ໄປ​ຄຽງ​ຄູ່​ກັນ​ນັ້ນ ການ​ປ່ອຍ​ສັດ​ປ່າ ເຊັນ: ນົກ, ສັດ​ເລືອ​ຄານ ແລະ ສັດ​ປະ​ເພດ​ອື່ນໆ ກໍ​ມີ​ຈຳ​ນວນ​ເພີ່ມ​ຂື້ນ.

ທ່ານ ທອງ​ພັດ ວົງ​ມະນີ ຍັງ​ກ່າວ​ຕື່ມ​ອີກ​ວ່າ: ການ​ກຳ​ນົດ​ເອົາ​ວັນທີ 13 ກໍ​ລະ​ກົດ ​ເປັນ​ວັນ​ອະ​ນຸ​ລັກ​ສັດ​ນ້ຳ ແລະ ສັດ​ປ່າ ຂອງ ສ​ປ​ປ ລາວ ກໍ​ເພື່ອ ເປັນ​ການ​ຈົດ​ຈຳ​ລ້ຳ​ລຶກ​ຄຸນ​ງາມ​ຄວາມ​ດີ ແລະ ຜົນ​ງານ​ອັນ​ໃຫ່​ຍ​ຫລວງ​ ຂອງ​ປະ​ທານ ສຸ​ພາ​ນຸ​ວົງ ທີ່​ໄດ້​ອຸ​ທິດ​ໃຫ້​ແກ່​ພາ​ລະ​ກິດ​ແຫ່ງ​ການ​ຕໍ່​ສູ້​ກູ້​ຊາດ ກໍ​ຄື​ການ​ປົກ​ປັກ​ຮັກ​ສາ ແລະ ສ້າງ​ສາ​ພັດ​ທະ​ນາ​ປະ​ເທດ​ຊາດ​ຂອງ​ພວກ​ເຮົາ (ຊຶ່ງ​ວັນ​ດັ່ງ​ກ່າວແມ່ນ​ວັນ​ຄ້າຍ​ວັນ​ເກີດ​ຂອງ​ເພີ່ນ) ເປັນການປູກ​ຈິດ​ສຳ​ນຶກ​ໃຫ້​ແກ່​ອະ​ນຸ​ຊົນ, ເຍົາ​ວະ​ຊົນ​ຂອງ​ຊາດ ກໍ​ຄື​ລູກ​ຫລານ​ຜູ້​ເກີດ​ໃໝ່​ໃຫ່​ຍ​ລຸນ ໃຫ້​ມີ​ສະ​ຕິຮັກ ແລະ ຫວງ​ແຫນສັດ​ນໍ້າ-ສັດ​ປ່າ​ ແລະ ທັງ​ເປັນ​ການ​ປຸກ​ລະ​ດົມ​ທົ່ວ​ປວງ​ຊົນ ເຂົ້າ​ຮ່ວມ ​ໃນ​ການ​ຄຸ້ມ​ຄອງ, ປົກ​ປັກ​ຮັກ​ສາ, ພັດ​ທະ​ນາ ແລະ ນຳ​ໃຊ້ ສັດ​ນ້ຳ ແລະ ສັດ​ປ່າ ແນ​ໃສ່ ເຮັດ​ໃຫ້ປະ​ຊາ​ກອນ​ສັດ​ ນັບ​ມື້​ມີ​ຄວາມ​ອຸ​ດົມ​ສົມ​ບູນ ແລະ ກາຍ​ເປັນ​ທ່າ​ແຮງ​ ໃນ​ການ​ຄ້ຳ​ປະ​ກັນ​ດ້ານ​ສະ​ບຽງ​ອາ​ຫານ, ໂພ​ຊະ​ນາ​ການ ກໍ​ຄື​ການ​ປັບ​ປຸງ​ຊີ​ວິດ​ການ​ເປັນ​ຢູ່ ​ຂອງ​ປະ​ຊາ​ຊົນ​ໃຫ້​ນັບ​ມື້​ດີ​ຂຶ້ນ ທັງເປັນ​ການ​ສືບ​ສານ​ຮີດ​ຄອງ​ປະ​ເພ​ນີ​ ໃນ​ຊ່ວງ​ເຂົ້າ​ພັນ​ສາ​ໃຫ້​ມີ​ຄວາມ​ໝາຍ​ຄວາມ​ສຳ​ຄັນ​ຍີ່ງໆ​ຂຶ້ນ .

ຂ່າວ​ວັນ/ພາບ ສະຫວັດ (ຂປລ)

------------------------------------------
ໂທລະໂຄ່ງ ໃຫ້ຫຼາຍກວ່າຄຳວ່າໂຄສະນາ
LINE ID: @tholakhong | Twitter ID: @tholakhong
tholakhong@gmail.com | www.tholakhong.com


No comments

Powered by Blogger.