Header Ads

ເມືອງພູຄູນ ສຳເລັດບັ້ນດຳເນີນຊີວິດການເມືອງປັບປຸງ ປົວແປງພາຍໃນພັກທົ່ວອົງຄະນະພັກ ຊຸດທີ1


ຫຼວງພະບາງ: ບັ້ນດຳເນີນຊີວິດການເມືອງ ປັບປຸງປົວແປງພັກ ທົ່ວອົງຄະນະພັກເມືອງພູຄູນ ໄດ້ສຳເລັດລົງຢ່າງສະຫງ່າງາມ ໃນວັນທີ່ 6 ກໍລະກົດນີ້ ພາຍຫຼັງດຳເນີນມາແຕ່ວັນທີ່ 29 ມິຖຸນາ ໂດຍການເປັນປະທານຂອງ ສະຫາຍ ວຽງທອງ ຫັດສະຈັນ ກຳມະການພັກແຂວງ ເລຂາຄະນະບໍລິຫານງານພັກເມືອງ, ພາຍໃຕ້ການຊີ້ນຳຂອງ ສະຫາຍ ພັນເອກ ບຸນຊູ ດວງຄຳມີ ຄະນະປະຈຳພັກແຂວງ ຫົວໜ້າການເມືອງກອງບັນຊາການທະຫານແຂວງ, ມີບັນດາສະຫາຍຄະນະບໍລິຫານງານພັກເມືອງ, ເລຂາ ຮອງເລຂາຄະນະພັກ, ໜ່ວຍພັກສຳນັກງານອົງການ ແລະ ຮາກຖານບ້ານ, ຕະຫຼອດຮອດສະມາຊິກພັກ ພະນັກງານທະຫານຕໍ່າຫຼວດ ທີ່ເປັນເປົ້າໝາຍເຂົ້າຮ່ວມ 166 ສະຫາຍ, ຍີງ 14 ສະຫາຍ, ສ່ວນຕົວຈີງມີຜູ້ເຂົ້າຮ່ວມທັງໝົດ 130 ສະຫາຍ, ຍີງ 14 ສະຫາຍ.



ສະຫາຍ ວຽງທອງ ຫັດສະຈັນ ກຳມະການພັກແຂວງ ເລຂາພັກເມືອງ ເຈົ້າເມືອງພູຄູນ ໄດ້ຂື້ນລາຍງານຜົນສໍາເລັດຂອງກອງປະຊຸມບັ້ນດຳເນີນຊີວິດການເມືອງຄັ້ງນີ້ວ່າ: ບັ້ນຊີວິດການເມືອງ ປົວແປງພັກ ຂອງອົງຄະນະພັກເມືອງພູຄູນ ດຳເນີນໄປດ້ວຍ ບັນຍາກາດຟົດຟື້ນ, ມີຄວາມເປັນເອກກະພາບສູງ ສາມາດບັນລຸຕາມຈຸດປະສົງ ແລະ ເປົ້າໝາຍທີ່ວາງໄວ້ ກອງປະຊຸມໄດ້ເຊື່ອມຊຶມ, ຮັບຮູ້ ແລະ ເຂົ້າໃຈເອກະສານເດັດດ່ຽວ ປັບປຸງປົວແປງພັກໃຫ້ປອດໃສ, ເຂັ້ມແຂງ, ໜັກແໜ້ນ ແລະ ສະຫລຸບຕີລາຄາໃນການຈັດຕັ້ງຜັນຂະຫຍາຍ ມະຕິກອງປະຊຸມໃຫຍ່ ຄັ້ງທີ X ຂອງພັກ,ມະຕິ VII ຂອງອົງຄະນະພັກແຂວງຫຼວງພະບາງ ແລະ ມະຕິກອງປະຊຸມໃຫຍ່ ຄັ້ງທີ III  ຂອງອົງຄະນະພັກເມືອງພູຄູນ ຄວາມຮັບຜິດຊອບໃນການຊີ້ນຳ-ນຳພາຂອງຄະນະບໍລິຫານງານພັກເມືອງ, ຜ່ານບົດສຳຫຼວດບຸກຄົນໃນຄະນະ ເພື່ອເປັນການເສີມຂະຫຍາຍມູນເຊື້ອ, ຜົນງານດ້ານດີ ຂອງພັກໃນໄລຍະຜ່ານມາ, ແກ້ໄຂຈຸດອ່ອນ, ຂໍ້ບົກຜ່ອງ ແລະ ສິ່ງທ້າທາຍ ທີ່ເປັນອັນຕະລາຍຕໍ່ພັກ ເຮັດໃຫ້ພັກໄດ້ມີການຫັນປ່ຽນອັນໃໝ່



ຍົກສູງ ຄວາມອາດສາມາດນຳພາ ແລະ ລັກສະນະນຳໜ້າຂອງພັກ, ຍົກລະດັບໃຫ້ສະມາຊິກພັກ ຕ້ອງເຮັດແທ້ທຳຈິງ ມີນ້ຳໃຈເພື່ອຊາດເພື່ອປະຊາຊົນ, ເພື່ອເຊີດຊູນໍ້າໃຈຮັບຜິດຊອບທີ່ພົ້ນເດັ່ນຂອງບຸກຄົນ,ຂອງບັນດາສະຫາຍ ຄະນະພັກແຕ່ລະຂັ້ນເມືອງ ແນ່ໃສ່ເຮັດໃຫ້ພັກ ມີຄວາມປອດໃສ, ເຂັ້ມແຂງ ແລະ ໜັກແໜ້ນ, ສ້າງໃຫ້ສະມາຊິກພັກມີຄວາມຊື່ສັດ, ປະຢັດ, ປອດໃສ, ປະຕິບັດໜ້າທີ່ວຽກງານໃຫ້ມີຄວາມເຂັ້ມງວດ ແລະ ປະຕິບັດແບບແຜນ ການເຮັດວຽກຕາມຫຼັກການລວມສູນ ປະຊາທິປະໄຕ, ສະກັດກັ້ນພະຍາດອາດຍາສິດ ແລະ ຕ້ານການສໍ້ລາດ ບັງຫຼວງໃນຖັນແຖວສະມາຊິກພັກຢ່າງເຂັ້ມງວດຜ່ານການຕີລາຄາປະເມີນຜົນຕົວຈີງ ສາມາດຈັດປະເພດເປົ້າໝາຍຄະນະພັກ ລ້ວນແລ້ວແຕ່ເປັນປະເພດແຂງ.ວາລະປິດບັ້ນດຳເນີນຊີວິດການເມືອງ ສະຫາຍ ຄຳຂັນ ຈັນທະວີສຸກ ກຳມະການສູນກາງພັກ ເລຂາຄະນະບໍລິຫານງານພັກແຂວງ ເຈົ້າແຂວງຫຼວງພະບາງ ໄດ້ມີຄຳເຫັນເນັ້ນໜັກໃຫ້ບັນດາສະຫາຍຄະນະບໍລິຫານງານພັກເມືອງ ຕ້ອງຮີບຮ້ອນປັບປຸງແກ້ໄຂບັນຫາທີ່ຄົງຄ້າງ ອັນເປັນໄພອັນຕະລາຍໃຫ້ແກ່ການຊີ້ນຳ ນຳພາຂອງອົງຄະນະພັກເມືອງ ໂດຍສະເພາະແມ່ນຄຳເຫັນ ຕຳນິຕິຊົມຂອງໝູ່ຂະນະ ທີ່ມີຕໍ່ບັນດາສະຫາຍຄະນະພັກ ຄະນະບໍລິຫານງານພັກເມືອງ ເພື່ອໃຫ້ບັ້ນດຳເນີນຊີວິດການເມືອງ ປັບປຸງ ປົວແປງພັກໃນຊຸດນີ້ ມີຄວາມໜັກແໜ້ນ ແລະ ເຂັ້ມແຂງ, ຍົກສູງບົດບາດການນຳພາຂອງອົງຄະນະພັກ ໃຫ້ສູງຂື້ນເປັນກ້າວໆ.

ພາບ ແລະ ຂ່າວ : ວັນທຽນ ຄຳທະສິດ

------------------------------------------
ໂທລະໂຄ່ງ ໃຫ້ຫຼາຍກວ່າຄຳວ່າໂຄສະນາ
LINE ID: @tholakhong | Twitter ID: @tholakhong
tholakhong@gmail.com | www.tholakhong.com



No comments

Powered by Blogger.