Header Ads

ສູນທອນພົດຂອງ ພະນາທ່ານ ບຸນ​ຍັງ ວໍ​ລະ​ຈິດ​ເລ​ຂາ​ທິ​ການ​ໃຫຍ່ຄະ​ນະ​ບໍ​ລິ​ຫານ​ງານ​ສູນ​ກາງ​ພັກ, ປະ​ທານ​ປະ​ເທດແຫ່ງ ສ​ປ​ປ ລາວ ກ່າວໃນ​ພິ​ທີໂຮມ​ຊຸມ​ນຸມ​ໃຫຍ່ ສະ​ເຫຼີມ​ສະຫຼອງ ​2 ວັນ​ປະ​ຫວັດ​ສາດ ລາວ-ຫວຽດ​ນາມ


ສູນທອນພົດຂອງ​ສະ​ຫາຍ ບຸນ​ຍັງ ວໍ​ລະ​ຈິດ​ເລ​ຂາ​ທິ​ການ​ໃຫຍ່ຄະ​ນະ​ບໍ​ລິ​ຫານ​ງານ​ສູນ​ກາງ​ພັກ, ປະ​ທານ​ປະ​ເທດແຫ່ງ ສ​ປ​ປ ລາວ ກ່າວໃນ​ພິ​ທີໂຮມ​ຊຸມ​ນຸມ​ໃຫຍ່ ສະ​ເຫຼີມ​ສະຫຼອງ ​2 ວັນ​ປະ​ຫວັດ​ສາດ ລາວ-ຫວຽດ​ນາມ(ວັນ​ເຊັນ​ສົນ​ທິ​ສັນ​ຍາ​ມິດ​ຕະ​ພາບ ແລະ ກາ​ນ​ຮ່ວມ​ມື ຄົບ​ຮອບ 40ປີ ແລະ ວັນ​ສ້າງ​ຕັ້ງ​ສາຍ​ພົວ​ພັນ​ການ​ທູດ ຄົບ​ຮອບ 55 ປີ)(ນະ​ຄອນຫຼວງວຽງ​ຈັນ, ວັນ​ທີ 18ກໍ​ລະ​ກົດ 2017)

         ຮຽນ: ບັນ​ດາ​ສະ​ຫາຍ​ການ​ນຳ ພັກ ແລະ ລັດ ລາວ​ທີ່​ນັບ​ຖື!

ຮຽນ: ສະ​ຫາຍ ນາງ ຕ່ອງທິຝອງ, ກຳມະການກົມການເມືອງສູນກາງພັກ, ຮອງປະທານຜູ້​ປະ​ຈໍາການສະພາແຫ່ງຊາດສສ ​ຫວຽດ​ນາມ ພ້ອມ​ດ້ວຍ​ຄະ​ນະ​ທີ່​ນັບ​ຖື!

ບັນ​ດາ​ສະ​ຫາຍ​ ແລະ ເພື່ອນ​ມິດ ທີ່​ຮັກ​ແພງ!

ຊາວ​ນະ​ຄອນຫຼວງວຽງ​ຈັນ ແລະ ພີ່​ນ້ອງ​ຮ່ວມ​ຊາດ ທີ່​ຮັກ​ແພງ​ທັງຫຼາຍ.

ມື້​ນີ້ ເປັນມື້​ທີ່​ມີ​ຄວາມ​ໝາຍ​ສຳ​ຄັນຍິ່ງ ທາງ​ດ້ານ​ປະ​ຫວັດ​ສາດ ຂອງ​ສອງ​ຊາດ​ລາວ-ຫວຽດ​ນາມ ທີ່​ພວກ​ເຮົາ​ໄດ້​ພ້ອມ​ກັນ​ຈັດ​ພິ​ທີ​ໂຮມ​ຊຸມ​ນຸມ​ໃຫຍ່​ຂຶ້ນ ຢູ່​ນະ​ຄອນຫຼວງວຽງ​ຈັນ ເພື່ອ​ສະ​ເຫຼີມ​ສະຫຼອງ​ສອງວັນ​ປະ​ຫວັດ​ສາດ​ລາວ-ຫວຽດ​ນາມ ຄື: ​ວັນ​ເຊັນ​ສົນ​ທິ​ສັນ​ຍາ​ມິດ​ຕະ​ພາບ ແລະ ການ​ຮ່ວມ​ມື ຄົບ​ຮອບ 40 ປີ ແລະ ວັນ​ສ້າງ​ຕັ້ງ​ສາຍ​ພົວ​ພັນ​ການ​ທູດ ຄົບ​ຮອບ 55 ປີ.

ພາຍ​ໃຕ້​ບັນ​ຍາ​ກາດ​ແຫ່ງຄວາມ​ປິ​ຕິ​ຊົມ​ຊື່ນ ອັນສຸດຊຶ້ງ​ນີ້, ພັກ​-ລັດຫວຽດ​ນາມ ໄດ້​ສົ່ງ​ຄະ​ນະ​ຜູ້​ແທນ​ຂັ້ນ​ສູງ​ຂອງ​ຕົນ ນຳ​ໂດຍ​ສະ​ຫາຍ ນາງ ຕ່ອງຖີຝອງ, ກຳມະການກົມການເມືອງ, ຮອງປະທານສະພາ ແຫ່ງສ.ສ.ຫວຽດນາມ ມາ​ຮ່ວມ​ສະ​ເຫຼີມ​ສະຫຼອງ​​ວັນ​ສຳ​ຄັນທີ່​ມີ​ຄວາມ​ໝາຍ​ປະ​ຫວັດ​ສາດ​ດັ່ງ​ກ່າວ​ກັບ​ພັກ, ລັດ ແລະ ປະ​ຊາ​ຊົນ​ລາວ​ບັນ​ດາ​ເຜົ່າ. ອັນ​ນີ້​ເປັນ​ການ​ຢັ້ງ​ຢືນ​​ຢ່າງ​ໜັກ​ແໜ້ນ​ອີກ​ເທື່ອ​ໜຶ່ງເຖິງ​ຄວາມ​ຜູກ​ພັນ​ອັນ​ໝັ້ນ​ໜຽວ ດ້ວຍ​ໄມ​ຕີ​ຈິດ​ມິດ​ຕະ​ພາບ​ອັນ​ຍິ່ງ​ໃຫຍ່, ຄວາມສາມັກຄີແບບພິເສດ ແລະ ການ​ຮ່ວມ​ມື​ຮອບ​ດ້ານ ລະ​ຫວ່າງ​ສອງ​ພັກ, ສອງ​ລັດ ແລະ ປະ​ຊາ​ຊົນ​ສອງ​ຊາດ​ລາວ-ຫວຽດ​ນາມ, ຫວຽດ​ນາມ-ລາວ ທີ່​ເປັນ​ມູນ​ເຊື້ອອັນດີງາມ​ຕະຫຼອດ​ມາ. ພວ​ກເຮົາຂໍ​ສະ​ແດງ​ຄວາມ​ຂ່ຳ​ນັບ​ຊົມ​ເຊີຍ​ ແລະ ຄວາມ​ຂອບ​ອົກ​ຂອບ​ໃຈ​ຢ່າງ​ຈິງ​ໃຈ ຕໍ່​​ຄະ​ນະ​ຜູ້​ແທນຂັ້ນສູງຂອງພັກ-ລັດ ແຫ່ງ ສ.ສ.ຫວຽດນາມອ້າຍນ້ອງທີ່​ໄດ້​ນຳ​ເອົາ​ອາ​ລົມ​ຈິດ ມິດ​ຕະ​ພາບ​ອັນ​ຜ່ອງ​ໃສ ແລະ ຄວາມ​ສະ​ໜິດ​ສະ​ໜົມ​ຮັກ​ແພງ​ຖານ​ອ້າຍ​ນ້ອງ ຂອງ​ພັກ, ລັດ ແລະ ປະ​ຊາ​ຊົນ​ຫວຽດ​ນາມ​ ທຸກ​ຖ້ວນ​ໜ້າ ມາ​ສູ່​ພັກ-ລັດ ແລະ ປະ​ຊາ​ຊົນ​ລາວ​ບັນ​ດາ​ເຜົ່າ​ຢ່າງ​ສຸດ​ອົກ​ສຸດ​ໃຈ!

         ບັນ​ດາ​ສະ​ຫາຍ ແລະ ເພື່ອນ​ມິດ ທີ່​ຮັກ​ແພງ!

        ​ສອງ​ຊາດ​ລາວ-ຫວຽດ​ນາມ ໄດ້​ມີ​ການ​ພົວ​ພັນ​ຖານ​ບ້ານ​ໃກ້​ເຮືອນ​ຄຽງ​ທີ່​ດີ​ນຳ​ກັນ ມາ​ແຕ່​ບູ​ຮານ​ນະ​ການ, ປະ​ຊາ​ຊົນ​ສອງ​ຊາດ ໄດ້​ດຳ​ລົງຊີ​ວິດ​ ແລະ ທໍາ​ມາ​ຫາ​ກິນ ບົນ​ຜືນ​ແຜ່ນ​ດິນ​ທີ່​ມີ​ສາຍ​ພູຫຼວງຍາວຢຽດ ແລະ ແມ່​ນ້ຳຫຼາຍສາຍ​ຕິດ​ຈອດ​ກັນແຕ່​ເໜືອ​ເຖິງ​ໃຕ້, ໄດ້​ມີ​ຄວາມ​ສາ​ມັກ​ຄີ​ ຊ່ວຍເຫຼືອເກື້ອກູນກັນເໝືອນ​ດັ່ງ​ອ້າຍນ້ອງຮ່ວມ​ອຸ​ທອນ​, ໃນ​ຍາມ​ທຸກກໍ່​ຮ່ວມ​ທຸກ ແລະ ຍາມ​ສຸກ​ກໍ່ຮ່ວມ​ສຸກນຳກັນຕະຫລອດມາ,ທັງໄດ້ຜ່ານການ​​ທົດ​ສອບ​ໃນ​ຂະ​ບວນ​ການ​ວິ​ວັດແຫ່ງການ​ຕໍ່​ສູ້ ຕ້ານພວກ​ລ່າ​ເມືອງ​ຂຶ້ນ​ຕ່າງ​ດ້າວ​ອັນ​ຍື​ດ​ເຍື້ອ​ຍາວ​ນານ ແລະ ສຸດ​ແສນ​ລະ​ອິດ​ລະ​ອ້ຽວ​ຂ້ຽວ​ຂາດ​ ເຊິ່ງສອງ​ຊາດ​ລາວ-ຫວຽດ​ນາມ ໄດ້​ອີງຫຼັງ​ໃສ່​ກັນ, ຊ່ວຍ​ເຫຼືອ​ກັນ​ຖານ​ສະ​ຫາຍ​ອ້າຍ​ນ້ອງ ບົນ​ຈິດ​ໃຈ​ສາ​ກົນ​ອັນ​ຜຸດ​ຜ່ອງ ແລະ ໝົດ​ຈິດ​ໝົດ​ໃຈ; ໄດ້​ມີ​ຄວາມ​ຮັກ​ແພງ​ເຊື່ອ​ໝັ້ນ​ເຊິ່ງ​ກັນ ແລະ ກັນ ອັນ​ເລິກ​ເຊິ່ງ, ຍອມ​ເສຍ​ສະຫຼະ​ເພື່ອ​ກັນ ແລະ ຮ່ວມ​ເປັນ​ຮ່ວມ​ຕາຍ​ນຳ​ກັນ. ອັນ​ນັ້ນ ແມ່ນ​ບໍ່​ເກີດ​ຂອງ​ການ​ພົວ​ພັນ ສາ​ມັກ​ຄີ​ພິ​ເສດ ທີ່​ກາຍ​ເປັນ​ປັດ​ໃຈ​ຕັດ​ສິນ​ຜົນ​ສຳ​ເລັດ ແລະ ໄຊ​ຊະ​ນະ​ຂອງ​ການ​ປະ​ຕິ​ວັດ ຢູ່​ສອງ​ປະ​ເທດ​ຂອງ​ພວ​ກ​ເຮົາ, ເຊິ່ງ​ເປັນ​ຕົວ​ແບບ ທີ່​ຫາ​ໄດ້​ຍາກ ໃນ​ການ​ພົວ​ພັນ​ລະ​ຫວ່າງ​ຊາດ​ຢູ່​ໃນ​ໂລກ, ເປັນສາຍພົວພັນທີ່ຍິ່ງໃຫຍ່, ເລິກເຊິ່ງ, ດູດດື່ມ ແລະ ເປັນມໍລະດົກລ້ຳຄ່າ ຂອງທັງສອງຊາດ ລາວ-ຫວຽດນາມ.

         ເມື່ອ​ທົບ​ທວນ​ຄືນ​ປະ​ຫວັດ​ສາດ​ແຫ່ງ​ການ​ພົວ​ພັນ​ອັນ​ຍາວ​ນານ ດັ່ງ​ກ່າວ​ນັ້ນ ພັກ-ລັດ ແລະ ປະ​ຊາ​ຊົນ​ສອງ​ຊາດ​ພວ​ກ​ເຮົາ ຍິ່ງ​ຈົດ​ຈຳ​ລຳ​ລຶກ ແລະ ຮູ້​ບຸນ​ຄຸນຢ່າງສຸດຊຶ້ງຕໍ່ ປະ​ທານ​ໂຮ​ຈີ່​ມິນ​ ຜູ້​ຍິ່ງ​ໃຫຍ່, ປະ​ທານ​ໄກ​ສອນ ພົມ​ວິ​ຫານ ແລະ ປະ​ທານ ສຸ​ພານຸ​ວົງ ທີ່​ແສນ​ເຄົາ​ລົບ​ຮັກ ຊຶ່ງ​ເປັນ​ຜູ້​ໃຫ້​ກຳ​ເນີດ ແລະ ໄດ້​ເປັນ​ແບບ​ຢ່າງ​ອັນ​ຈະ​ແຈ້ງ ແຫ່ງ​ການ​ຖະ​ນຸ​ຖະ​ໜອມ, ເພີ່ມ​ພູນ​ຄູນ​ສ້າງ​ມິດ​ຕະ​ພາບ​ອັນ​ຍິ່ງ​ໃຫຍ່ ແລະ ຄວາມ​ສາ​ມັກ​ຄີ​ພິ​ເສດ ລະ​ຫວ່າງ​ສອງ​ຊາດ​ລາວ ແລະ ຫວຽດ​ນາມ ຂອງ​ພວກ​ເຮົາ ຢ່າງ​ສະ​ເໝີ​ຕົ້ນ​ສະ​ເໝີ​ປາຍ.

         ພັກກອມມູນິດອິນດູຈີນ ໄດ້ສ້າງຕັ້ງຂຶ້ນໃນ​ປີ 1930 ໄດ້ເປັນກົກເຄົ້າເຫງົ້າກໍດຽວກັນຂອງສອງພັກ:​​ພັກ​ກອມ​ມູ​ນິດ​ຫວຽດ​ນາມ ແລະ ພັກ​ປະ​ຊາ​ຊົນ​ປະ​ຕິ​ວັດ​ລາວ​.​ການກຳເນີດເກີດຂຶ້ນ ແລະ ພາຍໃຕ້ການນຳພາຂອງພັກກອມມູນິດອິນດູຈີນ ​ໄດ້​ເຮັດ​ໃຫ້​ການ​ຕໍ່​ສູ້​ຂອງ​ປະ​ຊາ​ຊົນ 3 ຊາດ​ອິນ​ດູ​ຈີນ ເວົ້າລວມ, ຂອງປະຊາຊົນຫວຽດນາມ, ປະຊາຊົນລາວ ເວົ້າສະເພາະ ກ້າວ​ສູ່​ໄລ​ຍະ​ໃໝ່ ດ້ວຍ​ຄຸນ​ນະ​ພາບ​ໃໝ່,ທັງເປັນປັດໃຈຊີ້ຂາດ ຂອງ​ການ​ຮ່ວມ​ສຳ​ພັນ​ສູ້​ຮົບ ແລະ ຕໍ່​ໄຊ​ຊະ​ນະ ແຫ່ງ​ການ​ຕໍ່​ສູ້ ຂອງ​ປະ​ຊາ​ຊົນ​ສອ​ງ​ຊາດ​ນຳໄປເຖິງການເຮັດສຳເລັດການປະຕິວັດເດືອນສິງຫາ ຢູ່ຫວຽດນາມ ແລະ ການປະກາດເອກະລາດ ຢູ່ລາວ ໃນເດືອນຕຸລາ ປີ 1945. ເມື່ອພວກລ່າເມືອງຂຶ້ນຝຣັ່ງ ກັບມາຮຸກຮານອີກຄັ້ງ ອີງ​ຕາມ​ການ​ສະ​ເໜີ​ຂອງ​ລັດ​ຖະ​ບານ​ລາວ​ເອ​ກະ​ລາດ, ລັດ​ຖະ​ບານ​ສາ​ທາ​ລະ​ນະ​ລັດ ປະ​ຊາ​ທິ​ປະ​ໄຕ​ຫວຽດ​ນາມ ​ໄດ້​ຕົກ​ລົງ​ສົ່ງ​ພະ​ນັກ​ງານ-ນັກ​ຮົບ​ອາ​ສາ​ສະ​ໝັກ​ຫວຽດ​ນາມ ມາ​ຊ່ວຍ​ເຫຼືອການ​ປະ​ຕິ​ວັດ​ລາວ ແລະ ມີ​ການ​ສ້າງ​ຕັ້ງ​ກອງ​ທະ​ຫານ​ປະ​ສົມ ລາວ-ຫວຽດ​ນາມ​ຂຶ້ນ​ຢູ່​ລາວ ໃນ​ເດືອນ ຕຸລາ ປີ 1945. ຈາກນັ້ນ ທະ​ຫານ​ຫວຽດ​ນາມ ໄດ້​ປະ​ສານ​ສົມ​ທົບ​ກັບ​ທະ​ຫານ ແລະ ປະ​ຊາ​ຊົນ​ລາວ​ສູ້​ຮົບ​ແຕ່ເໜືອຮອດ​ໃຕ້ ຕີ​ສັດ​ຕູ​ຜູ້​ຮຸກ​ຮານ ແລະ ຍາດ​ເອົາ​ໄຊ​ຊະ​ນະ​ມາໄດ້​ຢ່າງ​ຕໍ່​ເນື່ອງຢູ່ສອງປະເທດ, ​ອັນ​ພົ້ນ​ເດັ່ນ ແລະ ເປັນ​ບາດ​ລ້ຽວ​ປະ​ຫວັດ​ສາດ ນັ້ນ​ແມ່ນ​ໄຊ​ຊະ​ນະ​ດຽນ​ບຽນ​ຟູທີ່ຂຶ້ນຊື່ລືຊາ ທີ່​ຈຳ​ໃຫ້​ພວກ​ລ່າ​ເມືອງ​ຂຶ້ນແບບເກົ່າ ຕ້ອງຍອມ​ເຊັນ​ສັນ​ຍາ​ເຊີ​ແນວ ປີ 1954 ກ່ຽວ​ກັບ​ອິນ​ດູ​ຈີນ, ໂດຍຮັບຮູ້ຄວາມ​ເປັນ​ເອ​ກະ​ລາດ ແລະອະ​ທິ​ປະ​ໄຕ​ຂອງ​ສາມປະເທດອິນ​ດູ​ຈີນ​.

         ການ​ຮ່ວມ​ສຳ​ພັນ​ສູ້​ຮົບ, ຊ່ວຍ​ເຫຼືອ​ເຊິ່ງ​ກັນ ແລະ ກັນດັ່ງ​ກ່າວ​ນັ້ນ ໄດ້​ເຮັດ​ໃຫ້​ການ​ຕໍ່​ສູ້​ປະ​ຕິ​ວັດ ຂອງ​ປະ​ຊາ​ຊົນ​ລາວ​ເຕີບ​ໃຫຍ່​ມີ​ໄຊ ແລະ ຂະ​ຫຍາຍ​ຕົວ​ກວ້າງອອກ, ຊຶ່ງ​ໄດ້​ເປັນ​ເງື່ອນ​ໄຂ​ໃຫ້​ແກ່​ການ​ສ້າງ​ຕັ້ງ​ພັກ​ປະ​ຊາ​ຊົນ​ລາວ​ຂຶ້ນ ໃນ​ວັນ​ທີ 22 ມີ​ນາ 1955. ເຫດ​ການ​ປະ​ຫວັດ​ສາດ​ດັ່ງ​ກ່າວ ເປັນຂີດໝາຍໃໝ່ ແລະ ເປັນປັດໃຈຕັດສິນໂດຍກົງ ​ເຮັດ​ໃຫ້​ການ​ປະ​ຕິ​ວັດ ຢູ່​ປະ​ເທດລາວ​ເຮົາ​ກ້າວ​ຂຶ້ນ​ສູ່​ຄຸນ​ນະ​ພາບ​ໃໝ່ ແລະ ມີ​ກຳ​ລັງ​ແຮງ​ຊະ​ນະ​ເລີດ​ ແລະ ຍາດໄຊຊະນະເໜືອສັດຕູຜູ້ຮຸກຮານ ແລະ ພວກລູກແລ້ງຕີນມື ຂອງພວກເຂົາ.

         ​ພະ​ນັກ​ງານ, ນັກ​ຮົບ ແລະ ປະ​ຊາ​ຊົນ​ລາວ​ບັນ​ດາ​ເຜົ່າ​ຈໍາ​ນວນຫຼວງຫຼາຍ ລ້ວນ​ແຕ່​ໄດ້​​ເປັນ​ສັກ​ຂີພະ​ຍານ ຂອງ​ເຫດ​ການ​ປະ​ຫວັດ​ສາດ ອັນ​ສຳ​ຄັນ​ແຫ່ງ​ການ​ຮ່ວມ​ສຳ​ພັນ​ສູ້​ຮົບ ລະ​ຫວ່າງ​ລາວ-ຫວຽດ​ນາມ ເຊິ່ງເຕັມໄປດ້ວຍຄວາມ​ທໍ​ລະ​ຫົດ​ອົດ​ທົນ​, ອາດ​ຫານ​ຊານ​ໄຊ​ ແລະ ຍາດໄດ້ໄຊຊະນະ​ຍິ່ງ​ໃຫຍ່​ທີ່​ສຸດໃນປະຫວັດສາດຂອງພວກເຮົາ. ພະ​ນັກ​ງານ - ນັກ​ຮົບ​ອາ​ສາ​ສະ​ໝັກ​ຫວຽດ​ນາມ ໄດ້​ຄຽງ​ບ່າ​ຄຽງ​ໄຫຼ່ ກັ​ບ​ພະ​ນັກ​ງານ, ນັກ​ຮົບ​ກອງ​ທັບ​ປົດ​ປ່ອຍ​ປະ​ຊາ​ຊົນ​ລາວ ແລະ ປະ​ຊາ​ຊົນ​ລາວ​ບັນ​ດາ​ເຜົ່າ ດຳ​ເນີນ​ການ​ຕໍ່​ສູ້ຢ່າງເດັດດ່ຽວ  ໜຽວ​ແໜ້ນ ບົນ​ຈິດ​ໃຈ​ຮ່ວມ​ທຸກ​ຮ່ວມ​ສຸກ, ຮ່ວມ​ເປັນ​ຮ່ວມ​ຕາຍ​ນຳ​ກັນ; ໄດ້​ເປີດ​ບັ້ນ​ຮົບ ທັງ​ນ້ອຍ​ທັງ​ໃຫຍ່ ບໍ່​ຈັກ​ວ່າ​ທໍ່​ໃດ​ເທື່ອ ເພື່ອ​ທັບ​ມ້າງ​ກົນ​ອຸ​ບາຍ ແລະ ​ຍຸດ​ທະ​ສາດ ຂອງ​ພວກ​ຈັກ​ກະ​ພັດ ແລະ ລູກ​ແຫຼ່ງ​ຕີນ​ມື​ຂອງພວກເຂົາ. ໃນ​ນັ້ນ, ມີ​ຫຼາຍ​ບັ້ນ​ຮົບ ສະ​ພາບ​ການ​ຂັບຂັນ​ທີ່​ສຸດ, ເບິ່ງ​ຄື​ວ່າ​ກຳ​ລັງ​ຂອງ​ພວກ​ເຮົາ​ກຳ​ລັງ​ຈະຖືກ​ດັບ​ສູນ, ແຕ່​ດ້ວຍ​ມາ​ນະ​ຈິດ ແລະ ອຸ​ດົມ​ການ​ປະ​ຕິ​ວັດ​ອັນ​ເດັດ​ດ່ຽວ, ດ້ວຍ​ພະ​ລັງ​ຂອງ​ຄວາມ​ສາ​ມັກ​ຄີ ຮ່ວມ​ສຳ​ພັນ​ສູ້​ຮົບ​ຢ່າງ​ໜຽວ​ແໜ້ນ ເຕັມໄປດ້ວຍຄວາມເສຍສະຫຼະ ພວກ​ເຮົາ​ກໍ​ສາ​ມາດ​ຜ່ານ​ຜ່າ​ອຸ​ປະ​ສັກ ໄດ້ຈາກບັ້ນນີ້ ໄປສູ່ບັ້ນໃໝ່ຢ່າງເນື່ອງນິດລຽນຕິດ ຈົນສ້າງ​ວິ​ລະ​ກຳ​ອັນ​ຍິ່ງ​ໃຫຍ່​ຂຶ້ນ​ດ້ວຍ​ບັ້ນ​ຮົບ​ໂຮ​ຈີ່​ມິນ ອັນ​ເປັນ​ປະ​ຫວັດ​ການ​ໃນ​ລະ​ດູ​ບານ​ໃໝ່, ສາ​ມາດປົດ​ປ່ອຍ​ພາກ​ໃຕ້​ຫວຽດ​ນາມ ແລະ ທ້ອນ​ໂຮມ​ປະ​ເທດ​ຫວຽດ​ນາມ ເປັນ​ອັນ​ໜຶ່ງ​ອັນ​ດຽວ​ກັນ​ໃນ​ປີ 1975. ​ຢູ່​ປະ​ເທດ​ລາວ​ພວກ​ເຮົາ ດ້ວຍການ​ລຸກ​ຮື​ຂຶ້ນ​ ໂດຍ​ໃຊ້ສາມ​ບາດ​ຄ້ອນ​ຍຸດ​ທະ​ສາດ. ​ໄດ້ ກ້າວໄປສູ່ ການຢຶດອຳນາດ ທົ່ວປະເທດ ແບບ “ບົວບໍ່ຊ້ຳນ້ຳບໍ່ຂຸ່ນ ແຕ່ຈັບປາໄດ້ທັງໝົດ” ແລະ ສະ​ຖາ​ປະ​ນາ ສາ​ທາ​ລະ​ນະ​ລັດ​ປະ​ຊາ​ທິ​ປະ​ໄຕ​ປະ​ຊາ​ຊົນ​ລາວຂຶ້ນ​ຢ່າງ​ສະ​ຫງ່າ​ຜ່າ​ເຜີຍ ໃນ​ວັນ​ທີ 2 ທັນ​ວາ 1975.

         ບັນ​ດາ​ສະ​ຫາຍ ແລະ ເພື່ອນ​ມິດ​ ທີ່​ຮັກ​ແພງ​ທັງຫຼາຍ!

        ເຖິງວ່າພວກເຮົາບໍ່ສາມາດຈົດຈຳ​ໄດ້​​ວ່າ ມີພູ​ຈັກ​ໜ່ວຍພູ​ ແລະ ມີຫ້ວຍ​ນ້ຳ​ລຳ​ເຊ​ຈັກ​ສາຍ, ມີ​​ດົງ​ໃຫຍ່ ແລະ ໂຄກກວ້າງຈຳນວນເທົ່າໃດ, ມີ​ທໍ່​ໃດ​ຄ້າຍ ແລະ ປ້ອມ​ປາ​ການ ຂອງ​ສັດ​ຕູ ທີ່​ພະ​ນັກ​ງານ-ນັກ​ຮົບ​ວິ​ລະ​ຊົນ ຂອງ​ສອງ​ຊາດ​ພວກ​ເຮົາ ໄດ້​ເດີນຜ່ານ​ຜ່າດ້ວຍຄວາມຍາກລຳບາກແລະ ຕີສັດຕູໃຫ້ແຕກ​ສະ​ລາຍ​ໄປ.

         ແຕ່ສິ່ງທີ່ບໍ່ມີນັກປະຕິວັດສອງຊາດໃດ​ລືມ​ໄດ້​ວ່າ ໃນ​ການ​ຮ່ວມ​ສຳ​ພັນ​ສູ້​ຮົບ​ແຕ່​ລະ​ຄັ້ງ ພະ​ນັກ​ງານ ແລະ ນັກ​ຮົບ​ປະ​ຕິ​ວັດ​ລາວ ແລະ ຫວຽດ​ນາມ ໄດ້​ຮ່ວມ​ຂຸມ​ຄອງ​ດຽວ​ກັນ, ​ເຂົ້າ​ເມັດ​ຫັກ-ຜັກ​ໃບ​ດຽວ​ກໍ​ໄດ້​ແບ່ງ​ປັນ​ກັນ​ກິນ, ໄດ້​ປ້ອງ​ກັນ ແລະ ຊ່ວຍ​ເຫຼືອ​ກັນ ໂດຍ​ບໍ່ຄິດເຖິງຊີ​ວິດຂອງຕົນເອງ, ໄດ້​ໃຫ້​ກຳ​ລັງ​ໃຈ​​ແກ່ກັນ ແລະ ຍອມ​ເສຍ​ສະຫຼະ​ເລືອດ​ເນື້ອ ເຫື່ອ​ໄຄ​ໃຫ້​ກັນ ເພື່ອ​ເປົ້າ​ໝາຍ​ໄຊ​ຊະ​ນະ​ຮ່ວມ​ກັນ. ປະ​ຊາ​ຊົນ​ລາວ​ບັນ​ດາ​ເຜົ່າ​ບໍ່​ມີ​ວັນ​ລືມ​ວ່າ ບົນຜືນ​ແຜ່ນ​ດິນ​ອັນ​ເອ​ກະ​ລັກ​ບູ​ຊາ ຂອງ​ລາວ ລ້ວນ​ແຕ່​ມີ​ຢາດ​ເຫື່ອ ແລະ ຢາດ​ເລືອດ​ແຫ່ງ​ການ​ເສຍ​ສະຫຼະ ຂອງ​ພະ​ນັກ​ງານ​-ນັກ​ຮົບ​ອາ​ສາ​ສະ​ໝັກ​ຫວຽດ​ນາມ ເຈືອ​ຈານ​ກັບ​ຢາດ​ເຫື່ອ ແລະ ຢາດ​ເລື່ອດ​ຂອງ​ພະ​ນັກ​ງານ-ນັກ​ຮົບ​ລາວ.

         ພາບ​ຂອງ​ຜູ້​ເປັນ​ພໍ່​ແມ່​ຊາວ​ຫວຽດ​ນາມ-​ຊາວ​ລາວ ທີ່​ໄດ້​ສັ່ງ​ລາ-ອວຍ​ໄຊ​ໃຫ້​ພອນ​ແກ່​ລູກ​ຮັກ​ຂອງ​ຕົນ ກ່ອນອອກ​ສູ່​ແນວ​ໜ້າ; ພາບ​ອັນ​ສະ​ຫງ່າ​ງາມ ຂອງ​ພະ​ນັກ​ງານ-ນັກ​ຮົບ​ອາ​ສາ​ສະ​ໝັກ​ຫວຽດ​ນາມ ແລະ ທະ​ຫານ​ລາວ ທີ່​ຄຽງ​ບ່າ​ຄຽງ​ໄຫຼ່​ກັນ​ເດີນ​ອອກ​ສູ່​ສະ​ໜາມ​ຮົບ​ຢ່າງ​ພິ​ລາດ​ອາດ​ຫານ ແລະ ພ້ອມ​ກັນ​ມ່ວນ​ຊື່ນ​ຕໍ່​ໄຊ​ຊະ​ນະ​ທີ່​ຍາດ​ມາ​ໄດ້ ຍັງຈຳ​ຕິດ​ຕາ ແລະ ​ຝັງ​ເລິກ​ຢູ່​ໃນ​ຄວາມ​ຊົງ​ຈຳ ຂອງ​ປະ​ຊາ​ຊົນ​ສອງ​ຊາດ​ພວກ​ເຮົາ ໂດຍ​ບໍ່​ມີ​ວັນ​ຈາງ​ຫາຍ​ໄປ.

         ພັກ-ລັດ ແລະ ​ປະ​ຊາ​ຊົນ​ລາວ​ບັນ​ດາ​ເຜົ່າ ມີ​ຄວາມ​ພາກ​ພູມ​ໃຈ ແລະ ​ເອກ​ອ້າງທະ​ນົງ​ໃຈ​ເປັນ​ຢ່າງ​ຍິ່ງ​ທີ່​ເຫັນ​ວ່າ ຕະຫຼອດ​ໄລ​ຍະຫຼາຍ​ສິບ​ປີ​ແຫ່ງ​ການ​ສຳ​ພັນ​ສູ້​ຮົບ ແລະ ສູ້​ຮົບ​ມີ​ໄຊ​ລະ​ຫວ່າງ​ສອງ​ປະ​ເທດ​ນັ້ນ ພວກ​ເຮົາ​ໄດ້​ປະ​ກອບ​ສ່ວນຈົນ​ສຸດ​ຄວາມ​ສາ​ມາດ​ຂອງ​ຕົນ ເຂົ້າ​ໃນ​ການ​ຕໍ່​ສູ້​ມີ​ໄຊ​ຂອງ​ປະ​ຊາ​ຊົນ​ຫວຽດ​ນາມ​ອ້າຍ​ນ້ອງ. ການທີ່ມີ “ເສັ້ນ​ທາງ​ໂຮ່​ຈີ​ມິນ”ອັນ​ລື​ຊື່​ໄດ້ກະຈາຍໄປທົ່ວພື້ນປ່າ, ສາຍພູ, ສາຍນ້ຳ ເປັນຫລາຍພັນຫລາຍໝື່ນກິໂລແມ໋ດຜ່ານ​ດິນ​ແດນ​ລາວ, ທີ່​ໄດ້​ສ້າງ​ເງື່ອນ​ໄຂ​ສະ​ດວກຫຼາຍ​ປະ​ການ​ເພື່ອໃຫ້ເປັນທາງເຄື່ອນ​ທັບ, ເປັນ​ບ່ອນ​ເຕົ້າ​ໂຮມ​ກຳ​ລັງ ແລະ ຂົນສົ່ງອາ​ວຸດ​ຍຸດ​ໂທ​ປະ​ກອນ ປົດ​ປ່ອຍ​ພາກ​ໃຕ້​ຫວຽດ​ນາມ.

 “ເສັ້ນ​ທາງ​ໂຮ່​ຈີ​ມິນ”ທີ່ໄດ້ກາຍເປັນນະວະນິຍາຍໄປແລ້ວນັ້ນ ໄດ້ເຄີຍເປັນສະໜາມຮົບທີ່ດຸເດືອດເໜືອພັນລະນາ ຈາກຫ່າລະເບີດອັນໜັກໜ່ວງທີ່ສຸດໃນປະຫວັດສາດມວນມະນຸດ, ປະຊາຊົນລາວບັນດາເຜົ່າ, ທະຫານລາວ, ທະຫານຫວຽດນາມ ບໍ່ຈັກວ່າເທົ່າໃດ ຕ້ອງເສຍສະລະຊີວິດ ເລືອດເນື້ອ ເພື່ອປົກປັກເສັ້ນທາງລຳລຽງ, ເຄື່ອນທັບ,  ທີ່ເປັນເໝືອນສາຍເລືອດໃຫຍ່ ເພື່ອເປົ້າໝາຍຢູ່ແນວໜ້າ; ເສັ້ນທາງໂຮ່ຈີມິນ ຜ່ານດິນແດນລາວ ໄດ້ກາຍເປັນເສັ້ນທາງຜູກແໜ້ນ ຄວາມສາມັກຄີຮ່ວມຮົບລະຫວ່າງທະ​ຫານລາວ, ທະຫານ​ຫວຽດ​ນາມ ແລະ ປະ​ຊາ​ຊົນ​ລາວ​ບັນ​ດາ​ເຜົ່າ​ບົນ​ຈິດ​ໃຈ​ສາ​ກົນອັນຜ່ອງໃສ,  ຖານ​ສະ​ຫາຍ​ອ້າຍ​ນ້ອງ;ຢາດ​ເຫື່ອ ແລະ ນ້ຳ​ຕາ, ຊີ​ວິດ​ ແລະເລືອດຂອງ​ເຂົາ​ເຈົ້າ​ໄດ້​ເຈືອ​ຈານ​ເຂົ້າ​ກັນ ອຸ​ທິດ​ໃຫ້​ແກ່​ໄຊ​ຊະ​ນະ​ ຂອງ​ການ​ປະ​ຕິ​ວັດ​ປົດ​ປ່ອຍ ແລະ ທ້ອນ​ໂຮມ​ປະ​ເທດ​ຊາດ​ ຂອງລາວ ແລະ ຫວຽດນາມ.

         ພັກ-ລັດ ແລະ ປະ​ຊາ​ຊົນ​ລາວ ຮູ້​ສຶກ​ເອກ​ອ້າງ​ທະ​ນົງ​ໃຈ ແລະ ຖື​ການ​ປະ​ກອບ​ສ່ວນ​ດັ່ງ​ກ່າວ​ນັ້ນ ເປັນ​ການ​ປະ​ຕິ​ບັດ​ຕາມ​ຄຳ​ກອນ​ອະ​ມະ​ຕະຍິ່ງຫວນຄືນຮູບພາບອາດີດທີ່ຝັງເລິກໃນຄວາມຊົງຈຳເຫລົ່ານັ້ນ ຍິ່ງຊາບຊຶ້ງເຖິງຄຳສອນ ຂອງ​ປະ​ທານ ໂຮ່​ຈີ່​ມິນ​ທີ່​ວ່າ:

“ສອງ​ຊາດ​ລາວ-ຫວຽດ​ ໄດ້​ຝັງ​ຄວາມ​ຮັກ​ຢູ່​ໃນ​ໃຈຮົ່ງ​ຮ່າ ທັງ​ແມ່​ຂອງ-ບໍ່​ເລິກ​ປຸນ​ປານ​ໄດ້​”.   ບັນ​ດາ​ສະ​ຫາຍ  ແລະ ເພື່ອນ​ມິດ​ທີ່​ຮັກ​ແພງ!

      ພາຍຫຼັງ​ໄດ້​ຮັບ​ການ​ປົດ​ປ່ອຍ​ຢ່າງ​ສົມ​ບູນ ໃນ​ປີ 1975, ສອງປະ​ເທດ​ລາວ ແລະ ​ຫວຽດ​ນາມ ພວກ​ເຮົາ​ໄດ້​ກ້າວ​ເຂົ້າ​ສູ່​ສັງ​ກາດ​ໃໝ່, ສັງ​ກາດ​ແຫ່ງ​ສັນ​ຕິ​ພາບ, ເອ​ກະ​ລາດ, ເອ​ກະ​ພາບ ແລະ ​ປະ​ຕິ​ບັດສິດ​ເປັນ​ເຈົ້າ​ຕົນ​ເອງ ໃນ​ການ​ປົກ​ປັກ​ຮັກ​ສາ ແລະ ສ້າງ​ສາ​ພັດ​ທະ​ນາ​ປະ​ເທດ​ຊາດ ໄປ​ສູ່​ຈຸດ​ໝາຍສັງ​ຄົມ​ນິ​ຍົມ​ທີ່​ວາງ​ໄວ້. ໃນ​ເງື່ອນ​ໄຂ ແລະ ສະ​ພາບ​ແວດ​ລ້ອມ​ໃໝ່​​ນີ້, ສາຍ​ພົວ​ພັນ​ພິ​ເສດ​ລະ​ຫວ່າງ​ສອງ​ຊາດ ຍິ່ງ​ໄດ້​ຮັບ​ການ​ເສີມ​ຂະ​ຫຍາຍ​ສູ່ລະດັບອັນໃໝ່, ເປັນສາຍ​ພົວ​ພັນ​ລະ​ຫວ່າງ​ສອງ​ລັດ ທີ່​ມີ​ເອ​ກະ​ລາດ-ມີ​ອຳ​ນາດ​ອະ​ທິ​ປະ​ໄຕ​ຢ່າງ​ເຕັມ​ສ່ວນ. ການ​ເຊັນ “ສົນ​ທິ​ສັນ​ຍາ​ມິດ​ຕະ​ພາບ ແລະ ການ​ຮ່ວມ​ມື”​ລະ​ຫວ່າງ​ສອງ​ປະ​ເທດ ​ເຊິ່ງມາ​ຮອດ​ມື້​ນີ້​ແມ່ນ​ພໍ​ດີ​ຄົບ​ຮອບ 40 ປີ ໄດ້ສືບທອດ ແລະ ເສີມຂະຫຍາຍມູນເຊື້ອສຳພັນສູ້ຮົບ, ນ້ຳໃຈສາກົນອັນຜ່ອງໃສ ຖານສະຫາຍອ້າຍນ້ອງແບບພິເສດ ແລະ ເປັນການຍົກລະດັບການພົວພັນການທູດລະຫວ່າງສອງຊາດ ທີ່ມາຮອດນີ້ພໍດີບັນຈົບຄົບຮອບ 55 ປີ, ຂຶ້ນສູ່ລະດັບ ແລະ ບາດກ້າວໃໝ່, ໄດ້​ເປັນ​ພື້ນ​ຖານ​​ອັນ​ໜັກ​ແໜ້ນໃຫ້​ແກ່​ການ​ເພີ່ມ​ທະ​ວີ​ການ​ຮ່ວມ​ມື​ຮອບ​ດ້ານ ລະ​ຫວ່າງ​ສອງ​ພັກ, ສອງ​ລັດ ແລະ ປະ​ຊາ​ຊົນ​ສອງ​ຊາດ​ລາວ-ຫວຽດ​ນາມ ໃນ​ໄລ​ຍະ​ໃໝ່.

         ສາ​ມາດ​ເວົ້າ​ໄດ້​ວ່າ 55 ປີ ແຫ່ງ​ການ​ສ້າງ​ສາຍ​ພົວ​ພັນ​ການ​ທູດ ແລະ 40 ປີ ແຫ່ງ​ການ​ເຊັນ​ສົນ​ທິ​ສັນ​ຍາ​ມິດ​ຕະ​ພາບ ແລະ ການ​ຮ່ວມ​ມື ລະ​ຫວ່າງ​ສອງ​ປະ​ເທດ​ລາວ-ຫວຽດນາມ​ແມ່ນ​ໄລ​ຍະ​ເວ​ລາແຫ່ງ​ການ​ທົດ​ສອບ​ຄວາມ​ໝັ້ນ​ແກ່ນ​ແໜ້ນ​ໜຽວ ຂອງ​ສາຍ​ພົວ​ພັນ​ລະ​ຫວ່າງ​ສອງ​ປະ​ເທດ​ພວກ​ເຮົາ. ເຖິງ​ແມ່ນ​ວ່າ ສະ​ພາບ​ແວດ​ລ້ອມຂ​ອງ​ໂລກ ກໍ​ຄື​ສາ​ກົນ​ໄດ້​ຜັນ​ແປ​ໄປ​ຢ່າງ​ໄວ​ວາ​ສັບ​ສົນ ທີ່​ມີ​ທັງ​ກາ​ລະ​ໂອ​ກາດ ແລະ ສິ່ງ​ທ້າ​ທາຍ​ນາ​ໆ​ປະ​ການ​ກໍ່​ຕາມ, ແຕ່ ພັກ​-ລັດ ແລະ ປະ​ຊາ​ຊົນ​ລາວບັນ​ດາ​ເຜົ່າ​ກໍ່​ໄດ້​ເອົາ​ໃຈ​ໃສ່ເພີ່ມ​ທະ​ວີ​ສ້າງ​ໃຫ້​ການ​ພົວ​ພັນຮ່ວມ​ມື​ຂອງ​ສອງ​ຊາດ ຍິ່ງເພີ່ມ​ພູນ​ຄູນ​ສ້າງ​ໃຫ້​ອຸ​ດົມ​ສົມ​ບູນ ແລະ ໄດ້​ຮັບ​ການ​ປັບ​ປຸງ​ຍົກ​ລະ​ດັບ​ ​​ທັງ​ທາງ​ດ້ານ​ປະ​ລິ​ມານ ແລະ ​ຄຸນ​ນະ​ພາບ​ໃຫ້​ສູງ​ຂຶ້ນ​ເລື້ອຍໆ. ເນື້ອ​ໃນ​ຂອງການ​ຮ່ວມ​ມື​ນັບ​ມື້​​ນັບ​ເຂົ້າ​ສູ່​ລວງ​ເລິກ​ແທດ​ຕົວ​ຈິງ; ກົນ​ໄກ​ ແລະ ​ວິ​ທີ​ການ​ຕ່າງໆ​​ແມ່ນ​ນັບ​ມື້​​ຄ່ອງ​ຕົວ​ຍິ່ງ​ຂຶ້ນ; ການ​ພົວ​ພັນ​ຮ່ວມ​ມື​ລະ​ຫວ່າງ​ທ້ອງ​ຖິ່ນ, ຂະ​ແໜງ​ການ​ມີ​ປະ​ສິດ​ທິ​ຜົນຫຼາຍ​ຂຶ້ນ ແລະ ຂົງ​ເຂດ​ຕ່າງໆ​ນັບ​ມື້​ເປີດ​ກວ້າງ​ອອກ ເຊິ່ງ​ນຳ​ເອົາ​ຜົນ​ປະ​ໂຫຍດ​ຕົວ​ຈິງ​ມາ​ສູ່​ປະ​ຊາ​ຊົນ​ສອງ​ຊາດ​ພວກ​ເຮົາ. ອັນ​ນີ້​ແມ່ນສະ​ແດງ​ອອກ​ໃຫ້​ເຫັນ​ລັກ​ສະ​ນະ​ພິ​ເສດ ຂອງ​ການ​ພົວ​ພັນ​ຮ່ວມ​ມື​ລາວ-ຫວຽດ​ນາມ ທີ່​ໄດ້​ກາຍ​ເປັນ​ປັດ​ໄຈ ຊ່ວຍ​ໜູນ​ທີ່​ສຳ​ຄັນ​ໃຫ້​ແກ່ ການ​ພັດ​ທະ​ນາ​​ປະ​ເທດ​​ຊາດ​ຂອງ​ພວກ​ເຮົາ.

         ບັນ​ດາ​ສະ​ຫາຍ ແລະ ເພື່ອນ​ມິດ ທີ່​ຮັກ​ແພງທັງຫຼາຍ!

      ​ມູນ​ເຊື້ອ​ອັນ​ດີ​ງາມ​ແຫ່ງ​ການ​ພົວ​ພັນ​ສາ​ມັກ​ຄີ​ພິ​ເສດ ແລະ ​ການ​ຮ່ວມ​ມື​ຢ່າງ​ຮອບ​ດ້ານ ດ້ວຍ​ໄມ​ຕີ​ຈິດ​ອັນ​ບໍ​ລິ​ສຸດ​ຜຸດ​ພ່ອງນັ້ນ ໄດ້​ເຮັດ​ໃຫ້​ປະ​ຊາ​ຊົນ​ສອງ​ຊາດ​ພວກ​ເຮົາ ມີ​ຄວາມ​ເຊື່ອ​ໝັ້ນຢ່າງ ​ໜັກ​ແໜ້ນ ຕໍ່​ບາດ​ກ້າວ​ຂະ​ຫຍາຍ​ຕົວ ກໍ​ຄື​ອາ​ນາ​ຄົດ​ອັນ​ສະ​ຫວ່າງ​ສະ​ໄຫວໃນ​ການ​ນຳ​ພາ​ສອງ​ປະ​ເທດ​ພວກ​ເຮົາ​ກ້າວ​ຂຶ້ນ, ເປັນ​ເສັ້ນ​ທາງກ້າວ​ສູ່​ຄວາມ​ວັດ​ທະ​ນະ​ຖາ​ວອນ ຕາມ​ຈຸດໝາຍ​ສັງ​ຄົມ​ນິ​ຍົມ.

         ພັກ-ລັດ ແລະ ປະ​ຊາ​ຊົນ​ລາວ​ບັນ​ດາ​ເຜົ່າ ມີ​ຄວາມ​ຊື່ນ​ຊົມ ຍິນ​ດີ​ຕໍ່​ຜົນ​ສຳ​ເລັດ​ໃນຫຼາຍ​ດ້ານ ທີ່​ພັກ-ລັດ ແລະ ປະ​ຊາ​ຊົນ​ຫວຽດ​ນາມ​ອ້າຍ​ນ້ອງ​​ບັນ​ລຸ​ໄດ້​ໃນຊຸມ​ປີ​ທີ່​ຜ່ານ​ມາ, ພິ​ເສດ​ແມ່ນ​ໃນ​ໄລ​ຍະ 30 ປີ​ແຫ່ງ​ການ​ປ່ຽນ​ແປງ​ໃໝ່, ຊຶ່ງ​ໄດ້​ສ້າງ​ພື້ນ​ຖານ ແລະ ຖ່ວງ​ທ່າ​ໃໝ່ ໃຫ້​ແກ່​ການ​ພັດ​ທະ​ນາ​ປະ​ເທດ​ຊາດ ໄປ​ຕາມ​ທິດ​ຫັນ​ເປັນ​ອຸດ​ສາ​ຫະ​ກຳ-ຫັນ​ເປັນ​ທັນ​ສະ​ໄໝ ສູ່​ຈຸດ​ໝາຍ​ສັງ​ຄົມ​ນິ​ຍົມ​ຢ່າງ​ໜັກ​ແໜ້ນ. ຜົນ​ສຳ​ເລັດ​ດັ່ງ​ກ່າວ​ນັ້ນ ໄດ້​ເປັນ​ບົດ​ຮຽນ​ອັນ​ມີ​ຄ່າ​ແກ່​ການ​ນຳ​ພາ​ຂອງ​ພັກ ແລະ ການ​ຄຸ້ມ​ຄອງ​ຂອງ​ລັດ​ພວກ​ເຮົາ. ພ້ອມ​ດຽວ​ກັນ​ນັ້ນ, ກໍ່​ເປັນ​ສິ່ງ​ຊຸກ​ຍູ້​ປຸກ​ລະ​ດົມ​ໃຈ​ອັນ​ແຂງ​ແຮງ​ໃຫ້​ແກ່​ປະ​ຊາ​ຊົນ​ລາວ ໃນ​ພາ​ລະ​ກິດ​ປົກ​ປັກ​ຮັກ​ສາ ແລະ ສ້າງ​ສາ​ພັດ​ທະ​ນາ​ປະ​ເທດ​ຊາດ​ຂອງ​ຕົນ.

         ພວກ​ຂ້າ​ພະ​ເຈົ້າ​ເຊື່ອ​ໝັ້ນ​ຢ່າງ​ໜັກ​ແໜ້ນ​ວ່າ ​ພາຍ​ໃຕ້​ການ​ນຳ​ພາ​ອັນປີ​ຊາ​ສາ​ມາດ ແລະ ສະຫຼາດ​ສ່ອງ​ໃສ ຂອງ​ພັກ​ກອມ​ມູ​ນິດ​ຫວຽດ​ນາມ, ພັກ​ທີ່​ສືບ​ທອດ​ແນວ​ຄິດ ແລະ ພາ​ລະ​ກິດ​ອັນ​ຍິ່ງ​ໃຫຍ່ ຂອງ​ປະ​ທານ ໂຮ່​ຈີ​ມິນ ຈະ​ເຮັດ​ໃຫ້​ຈຸດ​ໝາຍ​​ເຮັດ​ໃຫ້​ປະ​ຊາ​ຊົນ​ຮັ່ງ​ມີ​ຜາ​ສຸກ, ປະ​ເທດ​ຊາດ​ເຂັ້ມ​ແຂງປະ​ຊາ​ທິ​ປະ​ໄຕ, ຍຸ​ຕິ​ທຳ ແລະ ສີ​ວິ​ໄລ ບົນ​ດິນ​ແດນ​ຂອງ​ປະ​ເທດ​ຫວຽດ​ນາມ ວິ​ລະ​ຊົນ​ນັ້ນ ຈະ​ປະ​ກົດ​ຜົນ​ເປັນ​ຈີງ​ຢ່າງ​ແນ່ນອນ.

         ພວກ​ຂ້າ​ພະ​ເຈົ້າ​ເວ​ລາ​ໃດ ກໍ​ຢຶດ​ໝັ້ນ ​ການເສີມ​ຂະ​ຫຍາຍມູນ​ເຊື້ອ​ແຫ່ງ​ການ​ພົວ​ພັນ​ແບບ​ພິ​ເສດ ແລະ ​ການ​ຮ່ວມ​ມື​ຮອບ​ດ້ານ ໃຫ້​ຍືນ​ຍົງ​ຄົງ​ຕົວ​ໄປຈົນເທົ່າກາ​ລະ​ນານດັ່ງຄຳກອນອັນລືຊື່ ຂອງ​ປະ​ທານ ​ໄກ​ສອນ ພົມ​ວິ​ຫານ​ ໄດ້ຂຽນໄວ້ວ່າ: ​

“ຕາບ​ໃດ​ແມ່​ນ້ຳ​ຂອງ​ບໍ່​ເຫືອດ​ແຫ້ງ ເຂີນ​ຂາດ​ແປນ​ຊາຍສາຍ​ພູຫຼວງ​ແສນ​ສູງ ບໍ່​ຕ່ຳ​ລົງ​ເປັນ​ຄັງ​ຫຍ້າຮົງ​ຮາ​ວັງ​ເວີນກວ້າງ​ບໍ່​ແປນ​ດິນ​ກະ​ທ້າງ​ໄຕ່ສອງ​ສາຍ​ໃຈ​ລາວ-ຫວຽດ​ນາມ ພີ່​ນ້ອງ ບໍ່​ໄກ​ຂ້າງ​ຫ່າງ​ກັນ​ນັ້ນ​ແລ້ວ”.

      ພັກ-ລັດ ພວກ​ຂ້າ​ພະ​ເຈົ້າ ຈະ​ພະ​ຍາ​ຍາມ​ເຮັດ​ສຸດ​ຄວາມ​ສາ​ມາດ​ຂອງ​ຕົນ ແລະ ຈະ​ເຊີດ​ຊູ​ຄວາມ​ເປັນ​ເຈົ້າ​ການ​ຮັບ​ຜິດ​ຊອບ​ໃຫ້​ສູງ​ຂຶ້ນ ໃນ​ການ​ປະ​ຕິ​ບັດ​ບັນ​ດາ​ສົນ​ທິ​ສັນ​ຍາ, ສັນ​ຍາ ແລະ ຂໍ້​ຕົກ​ລົງ​ຕ່າງໆ ລະ​ຫວ່າງ​ສອງ​ພັກ-ສອງ​ລັດ​ພວກ​ເຮົາ; ພິ​ເສດ​ແມ່ນ​ການ​ເພີ່ມ​ທະ​ວີ​ການ​ພົວ​ພັນ​ທາງ​ດ້ານ​ການ​ເມືອງ ແລະ ການ​ແລກ​ປ່ຽນ​ຖອດ​ຖອນ​ບົດ​ຮຽນ​ດ້ານ​ແນວ​ຄິດ​ທິດ​ສະ​ດີ ແລະ ພຶດ​ຕິ​ກຳ;ດ້ານ​ການ​ກໍ່​ສ້າງ​ບຳ​ລຸງ​ຍົກ​ລະ​ດັບ​ພະ​ນັກ​ງານ; ການຮ່ວມມືປະສານງານໃນການພົວພັນສາກົນ ແລະ ການປະສານສົມທົບດ້ານ​ປ້ອງ​ກັນ​ຊາດ-ປ້ອງ​ກັນ​ຄວາມ​ສະ​ຫງົບ​. ພ້ອມ​ດຽວ​ກັນ​ນັ້ນ, ກໍ​ຈະ​ເພີ່ມ​ຄວາມ​ພະ​ຍາ​ຍາມ​ໃນ​ການ​ຈັດ​ຕັ້ງ​ປະ​ຕິ​ບັດ​ຍຸດ​ທະ​ສາດ ການ​ຮ່ວມ​ມື​ດ້ານ​ເສດ​ຖະ​ກິດ, ວັດ​ທະ​ນະ​ທຳ, ວິ​ທະ​ຍາ​ສາດ​ເຕັກ​ໂນ​ໂລ​ຢີ ແລະ ອື່ນໆ ເພື່ອ​ນຳ​ເອົາ​ຜົນ​ປະ​ໂຫຍດ​ຕົວ​ຈິງ ມາ​ສູ່​ປະ​ຊາ​ຊົນ​ສອງ​ຊາດ​ໃຫ້​ໄດ້ຫຼາຍ​ຂຶ້ນ​ເລື້ອຍໆ.

         ໃນ​ໂອ​ກາດ​ອັນ​ສະ​ຫງ່າ​ລາ​ສີ​ ແລະ ບົນ​ເວ​ທີ​ອັນ​ຄຶກ​​ຂຶມ​ນີ້ໃນ​ນາມ​ພັກ-ລັດ ແລະ ປະ​ຊາ​ຊົນ​ລາວ​ບັນ​ດາ​ເຜົ່າ ຂ້າ​ພະ​ເຈົ້າ​ຂໍ​ສະ​ແດງ​ຄວາມ​ຂອ​ບອົກ​ຂອບ​ໃຈ ອັນ​ຈິງ​ໃຈ ແລະ ຄວາມ​ຮູ້​ບຸນ​ຄຸນ​ອັນ​ລົ້ນ​ເຫຼືອ​ຕໍ່​ ພັກ-ລັດ ແລະ ປະ​ຊາ​ຊົນ​ຫວຽດ​ນາມ​ອ້າຍ​ນ້ອງ ທີ່​ໄດ້​ໃຫ້​ການ​ຊ່ວຍ​ເຫຼືອ​ອັນ​ລ້ຳ​ຄ່າ, ທັນ​ການ ແລະ ມີ​ຜົນ​ສັກ​ສິດ​ແກ່​ພາ​ລະ​ກິດ​ຕໍ່​ສູ້​ກູ້​ຊາດ​ໃນ​ເມື່ອ​ກ່ອນ ກໍ​ຄື ແກ່​ພາ​ລະ​ກິດ​ປົກ​ປັກ​ຮັກ​ສາ ແລະ ສ້າງ​ສາ​ພັດ​ທະ​ນາ​ປະ​ເທດ​ຊາດ​​ຂອງ​ພວກ​ຂ້າ​ພະ​ເຈົ້າໃນ​ປະ​ຈຸ​ບັນ.

         ບັນ​ດາ​ສະ​ຫາຍ ແລະ ເພື່ອນ​ມິດທັງຫຼາຍ!

      ມື້​ນີ້ ພວກ​ເຮົາ​ໄດ້​ຈັດ​ຕັ້ງ​ພິ​ທີ​ໂຮມ​ຊຸມ​ນຸມ​ໃຫຍ່​ລະ​ດັບ​ຊາດ ຂຶ້ນ​ຢ່າງ​ສົມ​ກຽດ ເພື່ອ​ສະ​ເຫຼີມ​ສະຫຼອງ​ສອງເຫດການ​ປະ​ຫວັດ​ສາດ ລາວ-ຫວຽດ​ນາມ, ຫວຽດ​ນາມ-ລາວ. ນອກ​ຈາກ​ນີ້, ພວກ​ເຮົາ​ຍັງ​ຈະ​ໄດ້​ຈັດ​ຕັ້ງ​ກິດ​ຈະ​ກຳ​ອັນ​ສຳ​ຄັນ​ອື່ນໆ​ອີກ​ຈົນ​ຮອດ​ສິ້ນ​ປີ.

        ພວກ​ເຮົາ​ຈົ່ງ​ພ້ອມ​ກັນ ເຮັດ​ໃຫ້​ປີ 2017 ເປັນ​ຂີດ​ໝາຍ​ແຫ່ງ​ການ​ເພີ່ມ​ພູນ​ຄູນ​ສ້າງ ແລະ ເສີມ​ຂະ​ຫຍາຍ​ມິດຕະພາບອັນຍິ່ງໃຫຍ່, ຄວາມສາ​ມັກ​ຄີ​ພິ​ເສດ ແລະ ​ການ​ຮ່ວມ​ມື​ຮອບ​ດ້ານ​ ລະ​ຫວ່າງສອງ​ພັກ, ສອງ​ລັດ ແລະ ປະ​ຊາ​ຊົນ​ສອງ​ຊາດ​ລາວ-ຫວຽດ​ນາມ​ອ້າຍ​ນ້ອງ ໃຫ້​ຈະ​ເລີນ​ງອກ​ງາມ ແລະ ເກີດດອກ​ອອກ​ຜົນຫຼາຍ​ຂຶ້ນ​ຕື່ມ​ອີກ, ປະ​ກອບ​ສ່ວນ​ຢ່າງ​ຕັ້ງ​ໜ້າ ເຂົ້າ​ໃນ​ການ​ເສີມ​ສ້າງ​ສັນ​ຕິ​ພາບ, ມິດ​ຕະ​ພາບ, ການ​ຮ່ວມ​ມື ແລະ ການ​ເຊື່ອມ​ໂຍງ​ໃນ​ພາກ​ພື້ນ ແລະ ໃນ​ໂລກ ເພື່ອ​ຄວາມ​ສັນ​ຕິ​ສຸກ ແລະ ຄວາມ​ຈະ​ເລີນ​ວັດ​ທະ​ນາ​ຂອງ​ບັນ​ດາ​ປະ​ຊາ​ຊາດ.

         ມິດ​ຕະ​ພາບ​ອັນ​ຍິ່ງ​ໃຫຍ່, ຄວາມ​ສາ​ມັກ​ຄີ​ພິ​ເສດ ແລະ ການ​ຮ່ວມ​ມື​ຮອບ​ດ້ານ​ອັນ​ເປັນ​ມູນ​ເຊື້ອ ລະ​ຫວ່າງ​ພັກ​ປະ​ຊາ​ຊົນ​ປະ​ຕິ​ວັດ​ລາວ ກັບ​ພັກ​ກອມ​ມູ​ນິດ​ຫວຽດ​ນ​າມ,ລະ​ຫວ່າງ ​ສປ​ປ​ ລາວ ກັ​ບ ສ​ສ ຫວຽດ​ນາມ, ລະ​ຫວ່າງ​ປະ​ຊາ​ຊົນ​ລາວ​ ກັບ​ປະ​ຊາ​ຊົນ​ຫວຽດ​ນາມ​ອ້າຍ​ນ້ອງ​ໝັ້ນ​ຍືນ!

         ພາ​ລະ​ກິດ ແລະ ແນວ​ຄິດ​ຂອງ​ປະ​ທານ​ໂຮ​ຈີ່​ມິນ ຜູ້​ຍິ່ງ​ໃຫຍ່ ແລະ ຂອງປະ​ທານ​ໄກ​ສອນ​ພົມ​ວິ​ຫານ ທີ່​ແສນ​ເຄົາ​ລົບ​ຮັກ ຍືນ​ຍົງ​ຢູ່​ກັບ​ພວກ​ເຮົາ​ຕະ​ຕອດ​ໄປ.


ຂໍ​ຂອບ​ໃຈ

ແຫຼ່ງທີ່ມາ: ຂປລ
------------------------------------------
ໂທລະໂຄ່ງ ໃຫ້ຫຼາຍກວ່າຄຳວ່າໂຄສະນາ
LINE ID: @tholakhong | Twitter ID: @tholakhong
tholakhong@gmail.com | www.tholakhong.com


No comments

Powered by Blogger.