Header Ads

ເຄິ່ງປີ ແຂວງຄຳມ່ວນ ປະຕິບັດລາຍຮັບໄດ້ 300 ຕື້ກີບ



ຕາມ​ການ​ລາຍ​ງານ​ຂອງ​ທ່ານ ບຸນ​ເລັ່ງ ກຸນ​ອາ​ວົງ ຫົວໜ້າພະ​ແນ​ກການ​ເງິນ​​ແຂວງ​ຄຳ​ມ່ວນ ​ໃຫ້​ຮູ້​ວ່າ:​ ໃນສົກ​ງົບປະມານ ປີ 2017 ​ແຂວງ​ຄຳ​ມ່ວນ ​ໄດ້​ຮັບ​ການ​ມອບໝາຍ​ໃຫ້​​ເກັບ​ລາຍ​ຮັບ​ທັງໝົດ 559,96 ຕື້ກີບ. ​ໃນ​ນັ້ນລາຍ​ຮັບ​ສູນ​ກາງ 282,66 ຕື້ກີບ ​ແລະ ລາຍ​ຮັບ​ທ້ອງ​ຖິ່ນ 277,30 ຕື້ກີບ. ຜ່ານ​ການຈັດຕັ້ງປະຕິບັດ 6 ​ເດືອນ​ຕົ້ນປີ ສາມາດ​ເກັບ​ລາຍ​ຮັບ​ໄດ້​ 300,02 ຕື້ກີບ, ​ເທົ່າ​ກັບ 53,58% ຂອງ​ແຜນການ​ປີ.​ ໃນ​ນັ້ນ ລາຍ​ຮັບ​ພູດ​ຂອງ​ສູນ​ກາງປະຕິບັດ​ໄດ້ 185,02 ຕື້ກີບ ທຽບ​ໃສ່​ໄລຍະ​ດຽວກັນ​ຂອງ​ປີຜ່ານມາ​ເພີ່ມ​ຂຶ້ນ 77,44% ຫລື ​ເທົ່າ​ກັບ 80,7 ຕື້ກີບ  ​ແລະ ລາຍ​ຮັບ​ທ້ອງ​ຖິ່ນ​ປະຕິບັດ​ໄດ້ 115,05 ຕື້ກີບ ທຽບ​ໃສ່​ໄລຍະ​ດຽວກັນ​ຂອງ​ປີຜ່ານມາ​ເພີ່ມ​ຂຶ້ນ 1,02% ຫລື​ ເທົ່າ​ກັບ 1,16 ຕື້ກີບ.

​ໂດຍ​ລວມ​ແລ້ວ ​ການ​ເກັບ​ລາຍ​ຮັບ​ເຂົ້າງົບປະມານ ​ໂດຍ​ສະ​ເພາະ​ແມ່ນ​ລາຍ​ຮັບ​ຈາກ​ພາສີ ​ແມ່ນ​ປະຕິບັດ​ໄດ້​ດີ ສາ​ເຫດ​ ຍ້ອນ​ວ່າການນຳ​ເຂົ້ານໍ້າມັນ​ເຊື້ອ​ໄຟ​ ບໍ່​ໄດ້​ຖືກ​ຍົກ​ເວັ້ນພາສີ​ຄື​ເມື່ອ​ກ່ອນ ​ບວກ​ກັບ​ລາຍ​ຮັບ​ຄ່າ​ທຳນຽມ​ເຂົ້າ-ອອກ​ດ່ານ, ລາຍ​ຮັບ​ຈາກ​ການ​ນຳ​ເຂົ້າ​ເພື່ອ​ສົ່ງ​ອອກ (ສິນຄ້າ​ຜ່ານ​ແດນ) ​ແມ່ນ​ມີ​ການ​ເພີ່ມ​ຂຶ້ນ ​ແລະ ການ​ແກ້​ໄຂ​ລົດ​ນຳ​ເຂົ້າບໍ່ຖືກຕ້ອງ​ ໄດ້​ຮັບ​ການຈັດຕັ້ງປະຕບັດ​ຢ່າງ​ເຂັ້ມງວດ.

ສ່ວນ​ລາຍ​ຮັບ​ຂອງ​ແຂວງ​ແມ່ນ​ປະຕິບັດ​ໄດ້ 41,49% ຂອງ​ແຜນການ ​ເນື່ອງ​ຈາກ​ວ່າການ​ຂຸດ​ຄົ້ນ, ການ​ສົ່ງ​ອອກ​ແຮ່​ທາດ​ມີ​ການ​ຫລຸດ​ລົງ ​ເມື່ອ​ທຽບ​ໃສ່​ປີຜ່ານມາ, ຫົວໜ່ວຍທຸລະ​ກິດຈຳນວນໜຶ່ງຢຸດ​ເຊົາ​ການ​ຜະລິດ, ການຈັດ​ເກັບ​ອາກອນ​ລາຍ​ໄດ້ ​ຈາກ​ການ​ຂາຍ​ສິດ​ນຳ​ໃຊ້​ທີ່​ດິນ​ຍັງ​ປະຕິບັດ​ບໍ່ທັນ​ໄດ້​ຄົບ​ຖ້ວນ ​ແລະ ມີ​ຫລາຍ​ກໍລະນີ​ແມ່ນ​ຍັງ​ຈັດ​ເກັບ​ບໍ່ທັນ​ໄດ້, ​ຄ່າ​ທຳນຽ​ມ, ຄ່າ​ບໍລິການ​ໃນບາງຂົງເຂດ​ຍັງ​ເຮັດບໍ່ທັນ​ໄດ້​ດີ, ບາງ​ພາກສ່ວນ​ເກັບ​ແລ້ວ​ບໍ່ມອບ​ລາຍ​ຮັບ​​ເຂົ້າງົບປະມານ ​ແລະ ຍັງ​ນຳ​ໄປ​ໃຊ້​ຈ່າ​ຍ​ໂດຍ​ບໍ່ຜ່ານ​ການ​ຈົດ​ຮັບ-ຈົດ​ຈ່າຍ​ຕາມ​ລະບຽບການ, ການຈັດ​ເກັບ​ລາຍ​ຮັບ​ບັນດາ​ພາກສ່ວນ​ທຸລະ​ກິດ ​ຍັງ​ມີ​ຄວາມ​ຫຍຸ້ງ​ຍາກ ​ມີບາງຫົວໜ່ວຍທຸລະ​ກິດ​ທີ່​ຂຶ້ນທະບຽນ ​ແຕ່ບໍ່ມີ​ການ​ເຄື່ອນ​ໄຫວ​ທຸລະ​ກິດ ​ແລະ ບາງ​ຫົວໜ່ວຍ​ແມ່ນ​ບໍ່ມີ​ຕົວ​ຕົນ.

ຂ່າວ: ກອງ​ຄຳ/ຂປລ
------------------------------------------
ໂທລະໂຄ່ງ ໃຫ້ຫຼາຍກວ່າຄຳວ່າໂຄສະນາ
LINE ID: @tholakhong | Twitter ID: @tholakhong
tholakhong@gmail.com | www.tholakhong.com


No comments

Powered by Blogger.