Header Ads

ສະຫລອງວັນປະຊາກອນໂລກ ຄົບຮອບ 30 ປີ



ຂປລ  ລາຍງານໃນວັນທີ 11 ກໍລະກົດ 2017 ນີ້, ກະຊວງ​ແຜນການ ​ແລະ ການ​ລົງທຶນ ຮ່ວມ​ກັບ ກະຊວງ​ສາທາລະນະ​ສຸກ ​ແລະ ອົງການສະຫະ​ປະຊາ​ຊາດ ​ກອງ​ທຶນສຳລັບ​ປະຊາກອນ (UNFPA) ​ໄດ້ຈັດ​ພິທີ ​ສະ​ເຫລີ​ມສະຫລອງ​ ວັນ​ປະຊາກອນ​ໂລກຄົບຮອບ 30 ປີ ປະຈຳ​ປີ 2017 ​ພາຍ​ໃຕ້​ຫົວ​ຂໍ້ “ການວາງ​ແຜນ​ຄອບຄົວ​ໃນ​ໄວ​ໜຸ່ມ ​ແມ່ນ​ການ​ສ້າງ​ຄວາມ​ເຂັ້ມ​ແຂງ​ໃຫ້​ແກ່​ປະຊາຊົນ ​ເພື່ອ​ການ​ພັດທະນາ​ປະ​ເທດ​ຊາດ” ​ໂດຍ​ມີ​ທ່ານ ຄຳ​ລຽນ ພົນ​ເສນາ ຮອງ​ລັດຖະມົນຕີ​ ກະຊວງ​ແຜນການ ​ແລະ ການ​ລົງ​ທຶນ, ບັນດາ​ຫົວໜ້າ​ກົມ, ຮອງ​ກົມ, ຜູ້ຕາງໜ້າ​ຈາກ​ກະຊວງ, ອົງການ ພ້ອມ​ດ້ວຍ​ພາກສ່ວນ​ກ່ຽວຂ້ອງ ​ເຂົ້າ​ຮ່ວມ.

​ ທ່ານ ຄຳ​ລຽນ ພົນ​ເສນາ ໄດ້ກ່າວ​ວ່າ: ວັນປະຊາກອນໂລກ ແມ່ນໄດ້ຈັດຕັ້ງ ສະເຫລີມສະຫລອງ ໃນວັນທີ 11 ກໍລະກົດ ຂອງທຸກໆປີ ຢູ່ຫລາຍກວ່າ 90 ປະເທດ ໃນທົ່ວໂລກ ນັບ​ຕັ້ງ​ແຕ່​ມີ​ການ​ສະ​ເຫລີ​ມສະຫລອງ ​ຄັ້ງ​ທຳ​ອິດ​ໃນ​ວັນທີ 11 ກໍ​ລະ​ກົດ 1987 ​ເຊິ່ງຖື​ວ່າ​ເປັນ​ມື້​ທີ່​ປະຊາກອນ​ໂລກ ມີ​ຈຳນວນ 5 ຕື້​ຄົນ​ພໍດີ ​ແລະ ຖ້າ​ທຽບ​ໃສ່​ປັດຈຸບັນ ​ເຫັນ​ວ່າ ຈຳນວນ​ປະຊາກອນ​ໂລກ ​ໄດ້​ເພີ່ມ​ຂຶ້ນ​ເຖິງ 7,6 ຕື້​ຄົນ. ການສະເຫລີມສະຫລອງ ວັນປະຊາກອນໂລກ ​ໃນ​ປີນີ້, ແມ່ນສຸມໃສ່ບັນຫາປະຊາກອນ ເຊິ່ງຫົວຂໍ້ ຂອງການສະເຫລີມສະຫລອງ ວັນປະຊາກອນໂລກ ໃນປີ 2017 ນີ້, ເນັ້ນໃສ່ການເພີ່ມຄວາມຮັບຮູ້ກ່ຽວ​ກັບ ການວາງ​ແຜນ​ຄອບຄົວ​ໃນ​ໄວ​ໜຸ່ມ ​ແລະ ​ການ​ສ້າງ​ຄວາມ​ເຂັ້ມ​ແຂງ​ ໃຫ້​ແກ່​ປະຊາຊົນ ​ເພື່ອ​ການ​ພັດທະນາ​ປະ​ເທດ​ຊາດ.   

ທ່ານ ຄຳ​ລຽນ ພົນ​ເສນາ ​ໃຫ້​ຮູ້​ອີກ​ວ່າ: ກະຊວງ​ແຜນການ ​ແລະ ການ​ລົງທຶນ ​ໄດ້​​ເຊື່ອມ​ສານ​ເອົາ​​ເປົ້າ​ໝາຍ​ການ​ພັດທະນາ​ແບບ​ຍືນ​ຍົງ SDGs ຂອງສາກົນ ທີ່ອົງການສະຫະປະຊາຊາດ ວາງອອກ ເພື່ອຮັບປະກັນ ການມີສຸຂະພາບທີ່ດີ ແລະ ສົ່ງເສີມຊີວິດການເປັນຢູ່ທີ່ດີ ຂອງທຸກຄົນ, ທຸກເກນອາຍຸ ເຊິ່ງໄດ້ມີການເຊື່ອມສານ ເອົາຕົວຊີ້ວັດຂອງເປົ້າໝາຍ SDG3 ມາສ້າງເປັນຕົວ ຊີ້ວັດແຫ່ງຊາດ ໃນການຈັດຕັ້ງປະຕິບັດ ແຜນພັດທະນາເສດ ຖະກິດ-ສັງຄົມ ແຫ່ງຊາດ 5 ປີ ຄັ້ງທີ່ VIII (2016-2020). ຢ່າງໃດກໍ່ຕາມ, ສປປ ລາວ ແມ່ນໜຶ່ງໃນ 69 ປະເທດ ທີ່ຈັດຢູ່ ໃນກຸ່ມປະເທດ ທີ່ກຳລັງພັດທະນາ ທີ່ພວມປະເຊີນກັບບັນຫາໄວໜຸ່ມ ທີ່ບໍ່ສາມາດປ້ອງ ກັນການ ຖືພາໄດ້ດີ ເນື່ອງຈາກການຂາດຂໍ້ມູນຂ່າວສານ ແລະ ຂໍ້ມູນຂ່າວສານ ບໍ່ມີຄວາມຫລາກຫລາຍ ເຊິ່ງບໍ່ສາມາດ ເຂົ້າເຖິງກຸ່ມຄົນຊົນເຜົ່າ ແລະ ຊຸມຊົນ ຢູ່ເຂດຫ່າງໄກຊອກຫລີກໄດ້ ແລະ ອື່ນໆ.

ພາບ: ເກດສະໜາ
------------------------------------------
ໂທລະໂຄ່ງ ໃຫ້ຫຼາຍກວ່າຄຳວ່າໂຄສະນາ
LINE ID: @tholakhong | Twitter ID: @tholakhong
tholakhong@gmail.com | www.tholakhong.com


No comments

Powered by Blogger.