Header Ads

ກະຊວງ ກະສິກຳ ປ່າໄມ້ ວາງເປົ້າປ່ອຍປາສັດນ້ຳ-ສັດປ່າ ຄືນສູ່ທຳມະຊາດ 5 ລ້ານໂຕ

ທ່ານ ອຸດົມ ສີປະເສີດ ຮັກສາການຫົວໜ້າກົມຄຸ້ມຄອງຊັບພະຍາກອນປ່າໄມ້ ກະຊວງກະສິກຳ ແລະ ປ່າໄມ້ ໄດ້ຖະແຫຼງກ່ຽວກັບການກຽມພ້ອມເນື່ອງໃນໂອກາດສະເຫຼີມສະຫຼອງວັນປ່ອຍປາ, ອະນຸລັກສັດນໍ້າ ແລະ ສັດປ່າ ແຫ່ງຊາດ ຄົບຮອບ 20 ປີ ວັນທີ 13 ກໍລະກົດ 2017 ທີ່ຈະມາເຖິງນີ້ ວ່າ:  ເນື່ອງໃນໂອກາດສະເຫຼີມສະຫຼອງວັນປ່ອຍປາ, ອະນຸລັກສັດນໍ້າ ແລະ ສັດປ່າ ແຫ່ງຊາດ ຄົບຮອບ 20 ປີ ວັນທີ 13 ກໍລະກົດ 2017 ທີ່ໃກ້ຈະມາເຖິງນີ້, ພັກ-ລັດຖະບານ ເຫັນໄດ້ເຖິງຄວາມສຳຄັນໃນວຽກງານການອະນຸລັກປົກປັກຮັກສາ ສັດນໍ້າ ແລະ ສັດປ່າ ເພາະໃນອານາຄົດຂອງລູກຫຼານອາດຈະບໍ່ມີໃຫ້ຊົມໃຊ້ ຫຼື ອາດຈະບໍ່ມີໃຫ້ຮູ້ເຫັນ ຖ້າຫາກບໍ່ເອົາໃຈໃສ່ປົກປັກຮັກສາອະນຸລັກໄວ້.

ດັ່ງນັ້ນ, ຈຶ່ງຢາກຮຽກຮ້ອງໃຫ້ພະນັກງານ, ທະຫານ, ຕຳຫຼວດ ແລະ ປະຊາຊົນ ບັນດາເຜົ່າໃນຂອບເຂດທົ່ວປະເທດ ກຽມພ້ອມເປັນສ່ວນໜຶ່ງໃນການເຂົ້າມາມີສ່ວນຮ່ວມ ແລະ ເປັນເຈົ້າການໃນການສ້າງຂະບວນການໃນການປົກປັກຮັກສາຊັບພະຍາກອນທຳມະຊາດ, ສັດນໍ້າ ແລະ ສັດປ່າທີ່ຫາຍາກ ແລະ ໃກ້ຈະສູນພັນນີ້ໄວ້; ຈົ່ງໃຫ້ຄວາມຮ່ວມມື ໃນການສະກັດກັ້ນ ການທຳລາຍຊັບພະຍາກອນປ່າໄມ້ ທີ່ເປັນຖິ່ນທີ່ຢູ່ອາໄສຂອງສັດປ່າ, ການລັກລອບຄ້າຂາຍສັດນ້ຳ ແລະ ສັດປ່າທີ່ຫາຍາກ ແລະ ໃກ້ຈະສູນພັນ ລວມທັງເຄື່ອງປ່າຂອງດົງທີ່ຜິດກົດໝາຍທຸກຄົນຕ້ອງຢຸດກິນ, ຢຸດລ່າ, ຢຸດຫາ ແລະ ຢຸດຂາຍ ສັດນ້ຳ-ສັດປ່າທີ່ຫວງຫ້າມ ເພື່ອຮັບປະກັນໃຫ້ຊັບພະຍາກອນທຳມະຊາດ ອັນມີຄຸນຄ່າ ໃຫ້ຢູ່ຄຽງຄູ່ກັບປະຊາຊົນລາວ ແລະ ລູກຫຼານຕະຫຼອດໄປ. 
ໃນປີຜ່ານມາ, ໃນຂອບເຂດທົ່ວປະເທດສາມາດປ່ອຍປາ ຄືນສູ່ທຳມະຊາດ ໄດ້ທັງໝົດ ຈຳນວນ 4 ລ້ານກວ່າໂຕ ;  ສະເພາະປີ 2017 ນີ້ຈະສູ້ຊົນຊຸກຍູ້ຂະບວນການປ່ອຍປາຄືນສູ່ທໍາມະຊາດໃນລະດັບເມືອງ ເພີ່ມຂຶ້ນໃຫ້ໄດ້ 5 ລ້ານໂຕ ໃນຂອບເຂດທົ່ວປະເທດ ເພື່ອເປັນການສົ່ງເສີມການຂະຫຍາຍພັນສັດນ້ຳ ແລະ ສັດປ່າ ໃຫ້ມີຄວາມອຸດົມສົມບູນຢູ່ແຕ່ລະທ້ອງຖິ່ນ ໃຫ້ມີການສ້າງຂະບວນການປ່ອຍປາ, ປ່ອຍສັດນໍ້າ ແລະ ສັດປ່າ  ຄືນສູ່ທຳມະຊາດ ເຊັ່ນ: ປ່ອຍສັດປ່າປະເພດຕ່າງໆກັບຄືນສູ່ປ່າທຳມະຊາດ, ປ່ອຍປາລົງຕາມແມ່ນໍ້າລໍາເຊ, ຫ້ວຍຮ່ອງຄອງບຶງ ແລະ ປ່ອຍຕາມສະລ້ຽງປາຂອງບຸກຄົນ ຫຼື ສ່ວນລວມ; ທັງນີ້ກໍ່ເພາະວ່າປ່າໄມ້, ສັດນໍ້າ ແລະ ສັດປ່ານັ້ນຈະກາຍເປັນເປົ້າໝາຍໃຫ້ຄົນທົ່ວໂລກມາທ່ຽວຊົມໃນອະນາຄົດ ແລະ ເປັນມໍລະດົກຕົກທອດຮອດລູກ-ຫຼານ ຕະຫຼອດໄປ ດັ່ງຄຳຂວັນທີ່ວ່າ: "ສັດນໍ້າມີຄ່າ ປ່າໄມ້ມີຄຸນ", ທ່ານ ອຸດົມ ສີປະເສີດ ກ່າວ.



------------------------------------------
ໂທລະໂຄ່ງ ໃຫ້ຫຼາຍກວ່າຄຳວ່າໂຄສະນາ
LINE ID: @tholakhong | Twitter ID: @tholakhong
tholakhong@gmail.com | www.tholakhong.com


No comments

Powered by Blogger.