Header Ads

ຍີ່ປຸ່ນມອບທຶນ 6 ແສນກວ່າໂດລາ ພັດທະນາ ການສຶກສາຢູ່ລາວ


ລັດຖະບານຍີ່ປຸ່ນ ແລະ ປະຊາຊົນ​ຍີ່ປຸ່ນ​ ໃຫ້ທຶນຈຳນວນ 680.300 ໂດ​ລາ​ສະຫະລັດ ​ເພື່ອປັບປຸງສະພາບ​ແວດ​ລ້ອມ​ ຂອງ​ໂຮງຮຽນ​ມັດທະຍົມ​ສົມບູນ ຢູ່​ບັນດາ​ແຂວງ​ພາກ​ກາງ ແລະ ພາກ​ໃຕ້​ຂອງ ​ສປປ ລາວ ລວມທັງ ໂຄງການ​ພັດທະນາ ​ຊັບ​ພະຍາກອນ​ມະນຸດ​ ລະດັບ​ປະລິນຍາ​ໂທ ແລະ ປະລິນຍາ​ເອກ ​ໃຫ້ບັນດາ​ພະນັກ​ງານ​ ຂະແໜງການ​ຂອງ​ພາກລັດ ຜ່ານ​ໂຄງການອົງການ​ຮ່ວມ​ມື​ ສາກົນ​ຍີ່ປຸ່ນ (JICA).

ພິທີ​ເຊັນ​ສັນຍາ​ຮັບ​ ເອົາການ​ຊ່ວຍ​ເຫລືອ​ຄັ້ງ​ນີ້ ຈັດ​ຂຶ້ນ​ອາທິດ​ຜ່ານ​ມາ​ນີ້ ທີ່​ກົມ​ຮ່ວມ​ມືສາກົນ ກະຊວງ​ແຜນການ ແລະ ການ​ລົງທຶນ, ຮ່ວມ​ລົງ​ນາມ​ໂດຍ ທ່ານ ນາງ ສີ​ສົມບູນ ອຸ​ນາ​ວົງ ຫົວໜ້າກົມຮ່ວມ​ມື​ສາກົນ ແລະ ທ່ານ Yoshiharu YONEYAMA ຫົວໜ້າ​ອົງການ​ໄຈ​ກາ ປະຈຳ​ລາວ ມີພະນັກງານ-ວິຊາ​ການ ​ກ່ຽວຂ້ອງສອງ​ຝ່າຍ​ເຂົ້າ​ຮ່ວມ.

ການຈັດຕັ້ງ​ປະຕິບັດ ໂຄງການ​ປັບປຸງ​ ສະພາບ​ແວດລ້ອມ ​ຂອງ​ໂຮງຮຽນ​ມັດທະຍົມ ຈະ​ເລີ່ມ​ຈັດ​ຕັ້ງ​ປະຕິບັດ ແຕ່​ເດືອນ​ມິຖຸນາ 2017 ເຖິງເດືອນ​ກັນຍາ 2022 ມີ​ເປົ້າ​ໝາຍສຳຄັນ ເພື່ອ​ປັບປຸງ​ບັນດາ​ ສະພາບ​ແວດ​ລ້ອມ​ໃນ​ໂຮງຮຽນ ​ໃຫ້ມີ​ຄວາມ​ສວຍ​ງາມ ສ້າງ​ບັນ​ຍາກາດ​ອັນ​ດີ ແລະ ດຶງ​ດູດ​ນ້ອງ​ນັກຮຽນ​ ໃຫ້​ມີ​ຄວາມ​ກະ​ຕື​ລື​ລົ້ນ​ ເຂົ້າໃນ​ການ​ຄົ້ນຄວ້າ​ທັງ​ໃນ ແລະ ນອກ​ຫ້ອງ​ຮຽນ ແນໃສ່​ເພີ່ມ​ຂີດຄວາມ​ສາມາດ ໃຫ້​ບັນດາ​ໂຮງຮຽນ​ ມັດທະຍົມ​ສົມບູນ ໂດຍ​ສະເພາະແມ່ນ​ ໂຮງຮຽນ​ເຂດ​ຫ່າງໄກ​ສອກຫລີກ ໄດ້​ຮັບ​ການ​ປັບປຸງ​ດີຂຶ້ນ ທຽບ​ເທົ່າ​ກັບ​ໂຮງຮຽນ​ ໃນ​ຕົວເມືອງ​ເທື່ອ​ລະ​ກ້າວ ແລະ ສຳລັບໂຄງການ​ພັດທະນາ​ ຊັບ​ພະຍາກອນ​ມະນຸດ ລະດັບ​ປະລິນຍາໂທ-ເອກ ແນໃສ່​ຍົກ​ລະດັບພະນັກງານ​ພາກ​ລັດ ​ໃນ​ຂະແໜງການ​ຕ່າງໆ ໃຫ້​ມີ​ຄວາມ​ຮູ້-ຄວາມ​ສາມາດ ​ດ້ານ​ວິຊາ​ການ​ທີ່ແນ່ນອນ ໂດຍ​ການ​ໃຫ້​ທຶນ​ທັງ​ລະດັບ ​ປະລິນຍາ​ໂທ-ເອກ ແມ່ນ​ຈະໃຫ້​ປີ​ລະ 20 ທຶນ ເລີ່ມ​ແຕ່​ປີ 2017-2023 ລວມ 2 ໂຄງການໄຈ​ກາ​ຊ່ວຍເຫລືອ​ ທັງ​ໝົດ ມູນ​ຄ່າ 3.232.000 ໂດ​ລາ ຫລື ປະມານ 25 ຕື້​ກວ່າ​ກີບ.
 
------------------------------------------
ໂທລະໂຄ່ງ ໃຫ້ຫຼາຍກວ່າຄຳວ່າໂຄສະນາ
LINE ID: @tholakhong | Twitter ID: @tholakhong
tholakhong@gmail.com | www.tholakhong.com


No comments

Powered by Blogger.