Header Ads

ສູນກາງສະຫະພັນແມ່ຍິງລາວ ກຽມສະຫລອງຄົບຮອບ 62 ປີ



ສູນກາງສະຫະພັນແມ່ຍິງລາວ ຮ່ວມກັບ ທະນາຄານແຫ່ງ ສປປ ລາວ ແລະ ກຸ່ມທະນາຄານ ກຽມຈັດງານໂຮມຊຸມນຸມ ສະເຫລີມສະຫລອງ 62 ປີແຫ່ງການສ້າງຕັ້ງ ສະຫະພັນ ແມ່ຍິງລາວ ເພື່ອຫວນຄືນມູນເຊື້ອ ແລະ ຜົນສຳເລັດຕ່າງໆ ຂອງແມ່ຍິງລາວ ເຊິ່ງຈະຈັດຂຶ້ນໃນວັນ 15 ກໍລະກົດ 2017 ນີ້ ທີ່ສະໂມສອນສະຖາບັນການທະນາຄານ (ຫລັກ 9 ດົງໂດກ).

ງານ​ດັ່ງກ່າວ​ຈະມີຫລາຍກິດຈະກຳເຊັ່ນ: ການວາງສະແດງເຄື່ອງ ຫັດຖະກຳ, ອາຫານພື້ນເມືອງ ລາວ ແລະ ການເດີນແບບ ເຄື່ອງນຸ່ງຖື ຂອງແມ່ຍິງລາວ ແລະ ອື່ນໆອີກຫລາກຫລາຍ.

ທ່ານ ນາງ ບັນດິດ ປະທຸມວັນ ຮອງປະທານ ສູນກາງສະຫະພັນແມ່ຍິງລາວ ໄດ້ກ່າວ ໃນງານຖະ ແຫລງຂ່າວ ໃນວັນທີ່ 7 ກໍລະກົດວ່າ: ການສະເຫລີມສະຫລອງ 62 ປີ ແຫ່ງການສ້າງຕັ້ງ ສະຫະພັນແມ່ຍິງລາວ ໃນປີນີ້ ແມ່ນມີເນື້ອໃນຄວາມໝາຍເລີກເຊິ່ງ ທາງດ້ານຊີວິດການເມືອງ ກໍຄື ຂະບວນການພັດທະນາ ແມ່ຍິງ ໃນທົ່ວປະເທດ ເຊິ່ງຄະນະບໍລິຫານງານ ສູນກາງສະຫະ ພັນແມ່ຍິງລາວ ໄດ້ແຈ້ງໃຫ້ສະຫະພັນແມ່ຍິງທຸກຂັ້ນ ກະກຽມການຈັດຕັ້ງ ສະເຫລີມສະຫລອງ ວັນສ້າງຕັ້ງອົງການຈັດຕັ້ງ ສະຫະພັນແມ່ຍິງລາວ ໃຫ້ມີເນື້ອໃນຄວາມໝາຍເລີກເຊິ່ງ ແລະ ມີບັນຍາການຟົດຟື້ນ ຕິດພັນກັບ ການສະຫລຸບຕີລາຄາ ການເຄື່ອນໄຫວພັດທະນາແມ່ຍິງ ແຕ່ລະຂັ້ນ ແລະ ແຕ່ລະຂົງເຂດວຽກງານ, ພ້ອມທັງ ສຸມໃສ່ສຶກສາອົບຮົມສະມາຊິກ, ແມ່ຍິງບັນດາເຜົ່າ ກ່ຽວກັບຜົນງານ, ມູນເຊື້ອ ແລະ ຄຸນລັກສະນະທີ່ເປັນມູນເຊື້ອ ຂອງແມ່ຍິງລາວບັນດາເຜົ່າ ເພື່ອປຸກລະດົມເຕົ້າໂຮມ ເຂົາເຈົ້າເຂົ້າຮ່ວມ ພາລະກິດປົກປັກຮັກສາ ແລະ ສ້າງສາພັດທະນາ ປະເທດຊາດ, ພ້ອມທັງ ໃຫ້ຄະນະສະຫະພັນແມ່ຍິງລາວ ຈົ່ງພ້ອມກັນຈັດສຳມະນາ ພາຍໃຕ້ຫົວຂໍ້: ການຖາມ-ຕອບ ຄວາມຮູ້ທາງດ້ານກົດໝາຍ, ການຮັກສາສຸຂະພາບ, ການແຂ່ງຂັນກິລາ, ສີລະປະວັນນະຄະດີ, ຈັດງານວາງສະແດງຮູບພາບ, ຜົນການເຄື່ອນໄຫວ ວຽກງານທີ່ພົ້ນເດັ່ນຕ່າງໆ  ຂອງສະຫະພັນແມ່ຍິງທ້ອງຖິ່ນ, ກົມກອງ ທັງໝົດນັ້ນ ເພື່ອເຮັດໃຫ້ແມ່ຍິງ ມີຄວາມ ເຂົ້າໃຈຕໍ່ມູນເຊື້ອ, ບົດບາດ, ໜ້າທີ່ຂອງຕົນ ແລະ ເສີມຂະຫຍາຍ ມູນເຊື້ອດັ່ງກ່າວ ເຂົ້າໃນການດຳລົງຊີວິດ ໃນເງື່ອນໄຂໃໝ່ ທັງເປັນການໂຄສະນາເຜີຍແຜ່ ໃຫ້ສັງຄົມໄດ້ຮັບຮູ້ຕື່ມ ຕໍ່ການພັດທະນາ ແລະ ການປົກປ້ອງສິດຜົນປະໂຫຍດ ຂອງແມ່ຍິງ ແລະ ສົ່ງເສີມຄວາມສະເໝີພາບຍິງ-ຊາຍ ໃນສັງຄົມ ແລະ ຄອບຄົວ.

ນອກຈາກກິດຈະການທີ່ກ່າວມາແລ້ວນັ້ນ ໃນຕອນເຊົ້າວັນທີ 19 ກໍລະກົດ ຄະນະນຳສູນກາງ ສະຫະພັນແມ່ຍິງລາວ ແລະ ພ້ອມດ້ວຍສະມາຊິກ ຍັງຈະເດີນທາງໄປວາງກະຕ່າດອກໄມ້ ອະນຸສອນສະຖານ ປະທານໄກສອນ ພົມວິຫານ, ປະທານສຸພານຸວົງ ເພາະເປັນໄລຍະກ້າວ ເຂົ້າສູ່ກາງສະໄໝ ໃນການຈັດຕັ້ງຜັນຂະຫຍາຍ ມະຕິກອງ ປະຊຸມໃຫຍ່ ຜູ້ແທນແມ່ຍິງລາວ ທົ່ວປະເທດ ຄັ້ງທີ VIII ແຜນງານ 34 ໂຄງການ ຕິດພັນກັບແຜນງານ ແຫ່ງຊາດ ເພື່ອຄວາມສະເໝີພາບຍິງ-ຊາຍ, ແຜນດຳເນີນງານແຫ່ງຊາດວຽກງານແມ່ ແລະ ເດັກທີ່ນອນຢູ່ ໃນວິໄສທັດ, ຍຸດທະສາດການປະຕິບັດຄຳຂວັນ, ຂໍ້ແຂງຂັນ ແລະ ການບັນລຸເປົ້າໝາຍ ການພັດທະນາແບບຍືນຍົງ

ຂ່າວ:ກິດຕາ; ພາບ:ເກດສະໜາ/ຂປລ
------------------------------------------
ໂທລະໂຄ່ງ ໃຫ້ຫຼາຍກວ່າຄຳວ່າໂຄສະນາ
LINE ID: @tholakhong | Twitter ID: @tholakhong
tholakhong@gmail.com | www.tholakhong.com


No comments

Powered by Blogger.