Header Ads

ເມືອງຊຽງຮ່ອນ ແຂວງໄຊຍະບູລີ ສະຫລອງວັນສ້າງຕັ້ງແມ່ຍິງລາວ ຄົບຮອບ 62 ປີ



ເພື່ອເປັນການຫວນຄືນມູນເຊື້ອການກໍາເນີດເຕີບໃຫ່ຍຂະຫຍາຍຕົວ ແລະ ຜົນງານການເຄື່ອນໄຫວຂອງອົງການຈັດຕັ້ງສະຫະພັນແມ່ຍິງລາວກໍຄື: ແມ່ຍິງບັນດາເຜົ່າທີ່ໄດ້ອຸທິດຕົນເພື່ອພາລະກິດຕໍ່ສູ້ປົກປ່ອຍຊາດ ປົກປັກຮັກສາ ແລະ ສ້າງສາພັດທະນາປະເທດຊາດກໍຄືພາລະກິດພັດທະນາແມ່ຍິງຕະຫລອດຮອດໄລຍະ 62 ປີ ທີ່ຜ່ານມາ ດັ່ງນັ້ນສະຫະພັນແມ່ຍິງເມືອງຊຽງຮ່ອນແຂວງໄຊຍະບູລີ ຈຶ່ງໄດ້ຈັດພິທີປາຖະກະຖາຫວນຄືນມູນເຊື້ອວັນສ້າງຕັ້ງສະຫະພັນແມ່ຍິງລາວຄົບຮອບ 62 ປີ ວັນທີ່ 20 ກໍລະກົດ 1955 ຫາ 20 ກໍລະກົດ 2017 ພິທີໄດ້ຂື້ນໃນ ວັນທີ 19 ກໍລະກົດ 2017 ນີ້ ຢູ່ທີ່ສະໂມສອນຂອງເມືອງຊຽງຮ່ອນ ໂດຍເປັນກຽດປາຖະກະຖາຂອງ ທ່ານ ອິນຕາ ນີ້ມນວນ ຮອງເລຂາພັກເມືອງ ປະທານແນວລາວສ້າງຊາດເມືອງຊຽງຮ່ອນ, ມີປະທານສະຫະພັນແມ່ຍິງເມືອງ, ຫົວໜ້າຫ້ອງການອ້ອມຂ້າງເມືອງ, ຄະນະບໍລິຫານງານສະຫະພັນແມ່ຍິງ, ແຂກຖືກເຊີນຕະຫລອດຮອດສະມາຊິກແມ່ຍິງເຂົ້າຮ່ວມ 200 ກວ່າ ທ່ານ



     ໃນພິທີ ທ່ານ ອິນຕາ ນີ້ມນວນ ຮອງເລຂາພັກເມືອງ ປະທານແນວລາວສ້າງຊາດເມືອງ ໄດ້ປາຖະກະຖາມູນເຊື້ອຂອງວັນສ້າງຕັ້ງແມ່ຍິງລາວຄົບຮອບ 62ປີ ພາຍໄຕ້ການຊີ້ນໍານໍາພາຂອງພັກ ແລະ ໄດ້ຮັບຜົນສະທ້ອນຈາກຂະບວນການຕໍ່ສູ້ປະຕິວັດຂອງແມ່ຍິງໃນໂລກທີ່ເລັ່ງທວງໃຫ້ປະຕິບັດສິດເສລີພາບຄວາມສະເໝີພາບລະຫວ່າງຍິງຊາຍທາງດ້ານການເມືອງ, ເສດຖະກິດ, ວັດທະນະທໍາ-ສັງຄົມ ອົງການຈັດຕັ້ງແມ່ຍິງຂັ້ນຮາກຖານຈຶ່ງໄດ້ເກີດຂື້ນໂດຍເລີ່ມຈາກການຈັດຕັ້ງໜ່ວຍແມ່ຍິງນັກຮົບຢູ່ຊົນນະບົດ, ໜ່ວຍຍຸວັນນາລີຢູ່ຕາມຕົວເມືອງ, ການຈັດຕັ້ງດັ່ງກ່າວເຄື່ອນໄຫວ ແລະ ເຕີບໃຫ່ຍຂະຫຍາຍຕົວນັບມື້ນັບກວ້າງຂວາງຮອດວັນທີ່ 20 ກໍລະກົດ1955 ຈື່ງໄດ້ກໍານົດເປັນວັນສ້າງຕັ້ງແມ່ຍິງລາວຢ່າງເປັນທາງການ



    ໃນພິທີຍັງໄດ້ມີກິດຈະກໍາການຍ່າງໂຊຊຸດເຄື່ອງແບບຂອງແມ່ຍິງສໍານັກງານຫ້ອງການກົມກອງ ແລະ ຊຸດເຜົ່າຕ່າງໆທີ່ຢູ່ພາຍໃນເມືອງຊຽງຮ່ອນ ທັງນີ້ກໍເພື່ອເປັນການປະກອບສ່ວນສ້າງຂະບວນການໃຫ້ແກ່ການສະເຫຼີມສະຫລອງວັນສ້າງຕັ້ງແມ່ຍິງລາວ, ທັງເປັນການອານຸລັກຮັກສາໄວ້ຮີດຄອງປະເພນີອັນດີງາມກໍຄືການນຸ່ງຖືຂອງເອື້ອຍນ້ອງແມ່ຍິງບັນດາເຜົ່າໃຫ້ໄດ້ຮັບການສົ່ງເສີມ, ຮັກສາໄວ້ ແລະ ຂະຫຍາຍຕົວຕະຫລອດໄປ. ພິທີໄດ້ດໍາເນີນເປັນເວລາ 1 ຕອນ ດ້ວຍບັນຍາການຟົດຟື້ນມ່ວນຊື່ນ.ຂ່າວ:ນັກຂ່າວເມືອງຊຽງ

ລາຍງານໂດຍ: ນັກຂ່າວເມືອງຊຽງຮ່ອນ




------------------------------------------
ໂທລະໂຄ່ງ ໃຫ້ຫຼາຍກວ່າຄຳວ່າໂຄສະນາ
LINE ID: @tholakhong | Twitter ID: @tholakhong
tholakhong@gmail.com | www.tholakhong.com


No comments

Powered by Blogger.