Header Ads

ລັດຖະບານເນັ້ນໃສ່ 9 ບັນຫາສໍາຄັນ ແລະ ຮັບຮອງເອົາຮ່າງກົດໝາຍ 5 ສະບັບ


ກອງ​ປະຊຸມ​ລັດຖະບານ​ ສະ​ໄໝສາມັນປະ​ຈໍາ​ເດືອນກໍລະກົດ 2017 ​ໄດ້ຈັດ​ຂຶ້ນໃນ​ວັນ​ທີ 24 ​ແລະ ປິດ​ລົງ​ໃນ​ວັນ​ທີ 25 ​ກໍລະກົດ 2017 ຢູ່ສໍານັກ​ງານ​ນາຍົກລັດຖະມົນຕີ, ​ພາຍ​ໃຕ້​ການ​ເປັນ​ປະທານ​ຂອງ​ ທ່ານ ທອງ​ລຸນ ສີ​ສຸ​ລິດ ນາຍົກລັດຖະມົນຕີ, ມີບັນດາທ່ານຮອງນາຍົກລັດຖະມົນຕີ ແລະ ສະມາຊິກລັດ ຖະບານ ​ພ້ອມ​ດ້ວຍ​ແຂກ​ຖືກ​ເຊີນ ເຂົ້າຮ່ວມຢ່າງ​ພ້ອມພຽງ.


​ກ່ອນເຂົ້າວາລະດໍາເນີນກອງປະຊຸມ ບັນດາສະມາຊິກລັດຖະບານ ​​ໄດ້ຮັບຟັງການລາຍງານສະພາບການທີ່ພົ້ນເດັ່ນ ຢູ່ພາຍໃນ ແລະ ຕ່າງປະເທດ ຈາກກະຊວງທີ່ກ່ຽວຂ້ອງ. ສໍາລັບ​ກອງ​ປະຊຸມ​ລັດຖະບານ​ສະ​ ໄໝສາມັນຄັ້ງນີ້ ບັນດາ​ສະມາຊິກ​ລັດຖະບານ​ ໄດ້​ພ້ອ​ມກັນ​ສຸມ​ໃສ່​ປະກອບ​ຄໍາ​ຄິດ​ຄໍາ​ເຫັນ​ ຢ່າງ​ກົງ​ໄປ​ກົງ​ມາ, ມີ​ຄວາມ​ຮັບຜິດຊອບ​ສູງ ແລະ ຮັບຮອງເອົາດ້ານຫຼັກການ ບັນດາຮ່າງກົດໝາຍ ຈຳນວນ 5 ສະບັບ ຄື: ຮ່າງກົດໝາຍວ່າດ້ວຍ ການຈັດຊື້ຂອງລັດ; ຮ່າງກົດໝາຍວ່າດ້ວຍ ການຄຸ້ມຄອງໜີ້ສິນສາທາລະນະ; ຮ່າງກົດ ໝາຍວ່າດ້ວຍ ການກວດກາລັດ ສະບັບປັບປຸງ; ຮ່າງກົດໝາຍວ່າດ້ວຍ ຊັບສິນທາງປັນຍາ ສະບັບປັບປຸງ; ຮ່າງກົດໝາຍວ່າດ້ວຍ ແຮ່ທາດ ສະບັບປັບປຸງ. ສຳລັບຮ່າງກົດໝາຍວ່າດ້ວຍ ການປະກັນສັງຄົມ ສະບັບປັບ ປຸງ ກອງປະຊຸມໄດ້ຕົກລົງຊີ້ນໍາ ໃຫ້ພາກສ່ວນທີ່ກ່ຽວຂ້ອງ ສືບຕໍ່ຄົ້ນຄວ້າ ແລະ ປັບປຸງຕາມຄຳເຫັນ ຂອງສະມາຊິກລັດຖະບານ ແລ້ວຈຶ່ງນຳມາຜ່ານກອງປະຊຸມລັດຖະບານ ໃນຄັ້ງຕໍ່ໄປ ກ່ອນທີ່ຈະສະເໜີຫາສະພາແຫ່ງຊາດ ພິຈາລະນາຮັບຮອງ.

​ສໍາລັບບົດລາຍງານຄວາມຄືບໜ້າ ຂອງການກໍ່ສ້າງທາງລົດໄຟ ແຕ່ຊາຍແດນລາວ-ຈີນ ຫານະຄອນຫຼວງວຽງຈັນ ນັ້ນ, ມີຄວາມຍາວທັງໝົດ 417 ກິໂລແມັດ, ແລວທາງລົດໄຟໄດ້ຜ່ານ 5 ແຂວງ ຄື:​ ຫຼວງນໍ້າທາ, ອຸດົມໄຊ, ຫຼວງພະບາງ, ວຽງຈັນ ແລະ ນະຄອນຫຼວງວຽງຈັນ. ໃນນີ້, ປະກອບມີ 32 ສະຖານີ, ກໍ່ສ້າງຂົວໃໝ່ 167 ແຫ່ງ, ເຈາະອຸໂມງ 75 ແຫ່ງ. ອັດຕາສ່ວນ ຂົວ ແລະ ອຸໂມງ ເທົ່າກັບ 62%. ເສັ້ນທາງລົດໄຟຜ່ານເຂດພູດອຍກວມເອົາ 80%, ສ່ວນທີ່ເຫຼືອແມ່ນພູພຽງ ແລະ ທົ່ງພຽງ. ໂຄງການດັ່ງກ່າວມີແຜນກໍ່ສ້າງສໍາເລັດ 5 ປີ, ເລີ່ມແຕ່ວັນທີ 1/12/2016-31/12/2021 ແລະ ຈະເປີດນຳໃຊ້ຢ່າງເປັນທາງການ ໃນຕົ້ນປີ 2022. ຕໍ່ບັນຫາດັ່ງກ່າວ ກອງປະຊຸມ ໄດ້ຊີ້ນໍາໃຫ້ຂະແໜງການທີ່ກ່ຽວຂ້ອງ ເອົາໃຈໃສ່ຄຸ້ມຄອງຢ່າງເປັນເຈົ້າການ ພ້ອມທັງ ໂຄສະນາຜົນສໍາເລັດການກໍ່ສ້າງ ແລະ ໃຫ້ປະຊາຊົນມີສ່ວນຮ່ວມ ໃນການກໍ່ສ້າງທາງລົດໄຟ ເພື່ອແກ້ໄຂຄວາມທຸກຍາກ. ສໍາຄັນແມ່ນຄຸ້ມຄອງກວດກາ ການນໍາເຂົ້າວັດຖຸອຸປະກອນ, ພາຫະນະ, ນໍ້າມັນເຊື້ອໄຟ ລວມທັງ ເອົາໃຈໃສ່ການສ້າງຊັບພະຍາກອນມະນຸດ. ສໍາລັບຄວາມຄືບໜ້າ ໂຄງການກໍ່ສ້າງທາງລົດໄຟ ລາວ-ໄທ ໄລຍະທີ 2 ແຕ່ສະຖານີທ່ານາແລ້ງ ຫາບ້ານຄຳສະຫວາດ (ສະຖານີວຽງຈັນ) ຄວາມຍາວ 7,5 ກິໂລແມັດ (ມູນຄ່າ 994 ກວ່າລ້ານບາດ), ກອງປະຊຸມ ໄດ້ຊີ້ນໍາໃຫ້ສືບຕໍ່ດໍາເນີນຈັດຕັ້ງປະຕິບັດ ໃຫ້ສໍາເລັດຕາມແຜນການ.

ໃນຕອນທ້າຍຂອງກອງປະຊຸມ, ທ່ານນາຍົກລັດຖະມົນຕີ ຍັງໄດ້ແຈ້ງສະພາບການປະຕິບັດວຽກງານຈຸດສຸມທີ່ສໍາຄັນຂອງລັດຖະບານ ໂດຍສັງເຂບ ໃນ 01 ເດືອນຜ່ານມາ ເຊິ່ງເຫັນວ່າ ລັດຖະບານ ສາມາດປະຕິບັດຫຼາຍວຽກງານທີ່ພົ້ນເດັ່ນ. ພ້ອມດຽວກັນນີ້, ທ່ານນາຍົກລັດຖະມົນຕີ ກໍ່ໄດ້ຊີ້ນໍາ ແລະ ເນັ້ນໜັກ ໃຫ້ບັນດາສະມາຊິກລັດຖະບານ ແລະ ທຸກພາກສ່ວນທີ່ກ່ຽວຂ້ອງ ເອົາໃຈໃສ່ຈັດຕັ້ງປະຕິບັດບັນດາວຽກງານຈຸດສຸມສໍາຄັນໃນເດືອນສິງຫາ 2017 ນີ້ ເປັນຕົ້ນ:

1. ສືບຕໍ່ເພີ່ມທະວີຄວາມເອົາໃຈໃສ່ ຕໍ່ວຽກງານຮັກສາຄວາມສະຫງົບ, ຄວາມເປັນລະບຽບຮຽບຮ້ອຍ ແລະ ສະຖຽນລະພາບທາງດ້ານການເມືອງ ໃຫ້ໝັ້ນທ່ຽງ. ເອົາໃຈໃສ່ແກ້ໄຂປະກົດການຫຍໍ້ທໍ້ທາງສັງ ຄົມ ເປັນຕົ້ນ ແມ່ນໜໍ່ແໜງຂອງອາສະຍາກຳ, ບັນຫາຢາເສບຕິດ, ການຂີ້ລັກງັດແງະ, ການມົ້ວສຸມຂີ່ລົດກວນເມືອງ, ອັກຄີໄພ ແລະ ບັນຫາອື່ນໆ ການເຄື່ອນໄຫວ ທີ່ບໍ່ສອດຄ່ອງກັບກົດໝາຍ ແລະ ລະບຽບການ.

2. ສືບຕໍ່ຕິດຕາມຢ່າງໃກ້ຊິດ ສະພາບການພາກພື້ນ ແລະ ສາກົນ ໂດຍມີການວິເຄາະວິໄຈຢ່າງລະ ອຽດ, ເລິກເຊິ່ງ ກ່ຽວກັບ​ຄວາມ​ສ່ຽງ ​ແລະ ທ່າ​ອ່ຽງຜົນ​ກະທົບ ຕໍ່​ປະ​ເທດ​ເຮົາ. ພ້ອມນີ້, ກໍ່ສືບຕໍ່ການເຄື່ອນ ໄຫວວຽກງານຕ່າງປະເທດ ຢ່າງເປັນເຈົ້າການ.

3. ຮິບຮ້ອນປັບປຸງ​ບັນດາ​ຮ່າງກົດໝາຍ​ ທີ່ລັດຖະບານໄດ້ຮັບຮອງດ້ານຫຼັກການ ​ໃນ​ກອງ​ປະຊຸມ​ລັດຖະບານໃນຄັ້ງນີ້ ເພື່ອໃຫ້ສາມາດ​ນໍາ​​ສະ​ເໜີ​ຕໍ່ສະພາ​ແຫ່ງ​ຊາດ ໃຫ້ທັນຕາມກໍານົດເວລາ.

4. ສືບຕໍ່ຄຸ້ມຄອງ ແລະ ຮັກສາສະຖຽນລະພາບ ທາງດ້ານເສດຖະກິດມະຫາພາກ, ຄຸ້ມຄອງອັດຕາເງິນເຟີ້, ອັດຕາແລກປ່ຽນ ໃຫ້ຢູ່ໃນເກນປົກກະຕິ; ຕິດຕາມ ແລະ ຄຸ້ມຄອງການເຄື່ອນໄຫວ ຂອງທະນາຄານທຸລະກິດ ແລະ ບັນດາສະຖາບັນການເງິນ ໃຫ້ດຳເນີນການຢ່າງຖືກຕ້ອງ ຕາມກົດໝາຍ ແລະ ລະບຽບການ; ຕິດຕາມຢ່າງໃກ້ສິດ ແລະ ຄົ້ນຄວ້າທິດທາງແກ້ໄຂ ຢ່າງຮອບຄອບ ແລະ ທັນການ ຕໍ່ການເຄື່ອນໄຫວລະດົມທຶນ ທີ່ບໍ່ຖືກລະບຽບ; ເອົາໃຈໃສ່ຄົ້ນຄວ້າອັດຕາດອກເບ້ຍເງິນກູ້ ແລະ ກົນໄກການສະໜອງທຶນ ​ເພື່ອຊຸກຍູ້ສົ່ງ​ເສີມ​ການ​ຜະລິດພາຍໃນ ໂດຍສະເພາະ ໃນການສ້າງເງື່ອນໄຂທີ່ພາກທຸລະກິດພາຍໃນ ໃຫ້ສາມາດເຂົ້າເຖິງແຫຼ່ງທຶນ; ຄຸ້ມຄອງລາຄາສິນຄ້າຕາມທ້ອງຕະຫຼາດ ໂດຍສະເພາະ ສິນຄ້າອຸປະໂພກ ແລະ ບໍລິໂພກ ທີ່ກະທົບຕໍ່ພື້ນຖານການດຳລົງຊີວິດຂອງປະຊາຊົນ ເປັນຕົ້ນແມ່ນ: ເຂົ້າ, ຊີ້ນ, ປາ ແລະ ອື່ນໆ; ສືບຕໍ່ປັບປຸງລັດວິສາຫະກິດທີ່ມີບັນຫາ ໃຫ້ສາມາດເຄື່ອນໄຫວຢ່າງມີປະສິດທິຜົນໂດຍໄວ; ສົ່ງເສີມການລົງທຶນຂອງຕ່າງປະເທດ ເພື່ອເປັນມາດຕະການໜຶ່ງ ໃນການກະຕຸ້ນ​ເສດຖະກິດ. ລັດຖະບານ ໄດ້ມອບໃຫ້ຄະນະ (ທີມງານເສດຖະກິດ) ລົງເລິກຄົ້ນຄວ້າບັນຫາດັ່ງກ່າວ ແລະ ລາຍງານຕໍ່ກອງປະຊຸມສະເພາະ ໃນຕົ້ນເດືອນສິງຫາ ທີ່ຈະມາເຖິງນີ້.

5. ໃຫ້ບັນດາຂະແໜງການ ທັງສູນກາງ ແລະ ທ້ອງຖິ່ນ ເອົາໃຈໃສ່ຕິດຕາມ, ກວດກາ ການ​ບໍລິການ​ປະຕູ​ດຽວ ຂອງຂະແໜງການຕົນຮັບຜິດຊອບ ຖ້າພົບເຫັນອຸປະສັກສິ່ງກີດຂວາງ ແລະ ຖວງດຶງ ບໍ່ວ່າຈະເປັນກົນໄກ ຫຼື ບຸກຄົນ ກໍ່ໃຫ້ຮີບແກ້ໄຂໄວ ເພື່ອຊຸກຍູ້ການລົງທຶນ ທັງພາຍໃນ ແລະ ຕ່າງປະເທດ. ພ້ອມນີ້, ກໍ່ໃຫ້ສືບຕໍ່ຮັບຟັງຄໍາຄິດຄໍາເຫັນຂອງປະຊາຊົນ ທີ່ສ່ອງແສງຜ່ານສາຍດ່ວນ ແລະ ຄວນມີກ່ອງປ່ອນຄວາມເຫັນ ຕໍ່ການບໍລິການປະຕູດຽວ ເພື່ອເປັນຂໍ້ມູນໃຫ້ການປະເມີນຜົນການໃຫ້ບໍລິການຮັບໃຊ້ສັງຄົມ ຂອງພາກສ່ວນຕົນ.

6. ໃຫ້​ເອົາ​ໃຈ​ໃສ່ເພີ່ມທະວີການແກ້ໄຂພາຫະນະນຳເຂົ້າບໍ່ຖືກຕ້ອງ ຕາມແຈ້ງການແນະນໍາເພີ່ມຕຶ່ມ ຂອງກະຊວງການເງິນ; ​ໃຫ້ເຂັ້ມງວດການຄຸ້ມຄອງ, ກວດກາສິນຄ້າຂອງບັນດາຮ້ານຄ້າປອດພາສີ ​ແລະ ສະກັດກັ້ນ ການລັກລອບສິນຄ້າໜີພາສີໃນດ່ານ ​ແລະ ນອກ; ​ ສືບ​ຕໍ່ຕິດຕັ້ງເຄື່ອງບັນທຶກການຂາຍສິນຄ້າ ແລະ ບໍລິການ ຂອງຂະແໜງສ່ວຍສາອາກອນ ໃຫ້​ສໍາ​ເລັດ​ໄວ. ພ້ອມ​ດຽວ​ກັນ, ກໍ່ໃຫ້​ເອົາ​ໃຈ​ໃສ່ລົງກວດກາການຄຸ້ມຄອງ ແລະ ນໍາໃຊ້ໃບເກັບເງິນຢູ່ບັນດາວິສາຫະກິດ ຈຳນວນ 30 ຫົວໜ່ວຍ ທີ່ຂຶ້ນກັບການຄຸ້ມຄອງຂອງສູນກາງ.

7. ເອົາໃຈໃສ່ກະກຽມກອງປະຊຸມລັດຖະບານ ຮ່ວມກັບບັນດາເຈົ້າແຂວງ ແລະ ເຈົ້າຄອງນະຄອນຫຼວງ ຈະໄດ້ຈັດຂຶ້ນໃນເດືອນກັນຍາ 2017 ເພື່ອຮັບປະກັນການກະກຽມທີ່ດີ, ມອບໃຫ້ຫ້ອງວ່າການສໍານັກງານນາຍົກລັດຖະມົນຕີ ສົມທົບກັບກະຊວງກ່ຽວຂ້ອງ ກະກຽມເນື້ອໃນໃຫ້ດີ. ບັນຫາທີ່ຈະນໍາມາປຶກສາຫາລືໃນກອງປະຊຸມ ປະກອບມີ:

- ຮ່າງແຜນພັດທະນາເສດຖະກິດ-ສັງຄົມ, ແຜນການເງິນ ແລະ ແຜນເງິນຕາ ປີ 2018, ແຜນການລົງທຶນຂອງລັດ.
- ສະພາບການແກ້ໄຂໜີ້ສິນ, ການເກັບລາຍຮັບ-ຄຸ້ມຄອງລາຍຈ່າຍ ຂອງບັນດາແຂວງ ໃນທົ່ວປະເທດ ໃນ 6 ເດືອນຕົ້ນປີ ແລະ ທິດທາງແຜນການ ໃນຕໍ່ໜ້າ.
- ສະຫຼຸບຕີລາຄາ ແລະ ຖອດຖອນບົດຮຽນ ກ່ຽວກັບການປະຕິບັດຄໍາສັ່ງ ເລກທີ 15/ນຍ, ການແກ້ໄຂບັນຫາໄມ້ ແລະ ການດັດສົມໂຮງງານປຸງແຕ່ງໄມ້.
- ສະຫຼຸບຕີລາຄາການຈັດຕັ້ງປະຕິບັດຄໍາສັ່ງ ວ່າດ້ວຍການປະຢັດລາຍຈ່າຍງົບປະມານຂອງລັດ ເລກທີ 09/ນຍ, ລົງວັນທີ 19 ພຶດສະພາ 2017.
- ການຜັນຂະຫຍາຍ ຜົນການເຄື່ອນໄຫວວຽກງານຕ່າງປະເທດ ຂອງພັກ-ລັດຖະບານ ໃນປີ 2017.
ສະຫຼຸບການເຄື່ອນໄຫວວຽກງານຂອງລັດຖະບານ 6 ເດືອນຕົ້ນປີ ແລະ ການປະຕິບັດທິດທາງແຜນການ 6 ເດືອນທ້າຍປີ 2017.

8. ຊຸກຍູ້ຂະແໜງການ ແລະ ທ້ອງຖິ່ນ ໃນຂອບເຂດທົ່ວປະເທດ ເອົາໃຈໃສ່ວຽກງານຕ້ານແລ້ງ, ຕ້ານຖ້ວມ, ກະກຽມຮອບ​ດ້ານ​ ໃຫ້ແກ່ການ​ຜະລິດ​ລະດູ​ຝົນ​; ສືບ​ຕໍ່​ຕິດຕາມເຝົ້າລະວັງ ການລະບາດຂອງສັດຕູພືດ ຢູ່ບັນດາແຂວງທີ່ມີຄວາມສ່ຽງ; ສືບ​ຕໍ່​ຈັດ​ຕັ້ງ​ເຝົ້າ​ລະວັງ ​ແລະ ປ້ອງ​ກັນ​ເຊື້ອ​ພະຍາດສັດ ​ຕາມ​ລະດູ​ການ.

9. ຮິບຮ້ອນລົງຕິດຕາມກວດກາ ສະພາບເສັ້ນທາງທີ່ຖືກເຊາະເຈື່ອນ-ເປ່ເພ ໃນຂອບເຂດທົ່ວປະເທດ ພ້ອມທັງມີແຜນກະກຽມສ້ອມແປງ ໃຫ້ທັນການ ເພື່ອບໍ່ໃຫ້ກະທົບຕໍ່ການສັນຈອນ-ຂົນສົ່ງ. ໃຫ້ເອົາໃຈໃສ່ກວດກາການບັນທຸກສິນຄ້າຂົນສົ່ງເກີນນໍ້າໜັກ ແລະ ຈໍາກັດຊ່ອງວ່າງ ໃຫ້ເຈົ້າໜ້າທີ່ສວຍໂອກາດເກັບເງິນ ໂດຍບໍ່ຖືກຕ້ອງ ແລະ ກາຍເປັນປະກົດການຫຍໍ້ທໍ້ໃນສັງຄົມ.

​ສຸດທ້າຍ, ທ່ານນາຍົກລັດຖະມົນຕີ ໄດ້ຮຽກຮ້ອງໃຫ້ເຝົ້າລະວັງ ການລະບາດພະຍາດລະດູຝົນ ແລະ ມອບໃຫ້ກະຊວງສຶກສາທິການ ແລະ ກີລາ ສ້າງກິດຈະກໍາຕ່າງໆ ໃຫ້ນັກຮຽນ ໃນຍາມພັກຮຽນ ແລະ ເອົາໃຈໃສ່ການກະກຽມແຂ່ງຂັນມະຫາກໍາກີລາແຫ່ງຊາດ ທີ່ຈະຈັດຂຶ້ນໃນຕໍ່ໜ້ານີ້ ບົນພື້ນຖານການປະຢັດ. ສໍາລັບການກະກຽມປີທ່ອງທ່ຽວ ແມ່ນໃຫ້ລິເລີ່ມຈັດຕັ້ງປະຕິບັດບັນດາກິດຈະກໍາ ເພື່ອໃຫ້ມີບັນຍາກາດຟົດຟື້ນ ໃນເວລາເປີດປິທ່ອງທ່ຽວ. ພ້ອມດຽວກັນນີ້, ທ່ານນາຍົກລັດຖະມົນຕີ ກໍ່ຍັງໄດ້ຮຽກຮ້ອງໃຫ້ບັນດາສະມາຊິກລັດຖະບານ ສຶບຕໍ່ຊີ້ນຳ, ຕິດຕາມ, ຊຸກຍູ້ ແລະ ກວດກາການຈັດຕັ້ງປະຕິບັດ ບັນດາວຽກງານຈຸດສຸມ ພາຍໃຕ້ຄວາມຮັບຜິດຊອບຂອງຕົນ ໃຫ້ມີປະສິດທິຜົນ ພ້ອມທັງ ມີການສະຫຼຸບລາຍງານ ມາຍັງຫ້ອງວ່າການສຳນັກງານນາຍົກລັດຖະມົນຕີ ກ່ອນກອງປະຊຸມລັດຖະບານ ໃນເດືອນສິງຫາ. ພ້ອມນີ້, ພວກເຮົາຈະໄດ້ທົບທວນ ແລະ ປະເມີນການຈັດຕັ້ງປະຕິບັດ ບັນດາມະຕິ, ຄຳສັ່ງ, ແຈ້ງການ ແລະ ທິດຊີ້ນຳທີ່ສຳຄັນຕ່າງໆ ຂອງລັດຖະບານ ຕໍ່ກອງປະຊຸມໃນເດືອນສິງຫານີ້.

ເນື້ອໃນ: ຂປລ

------------------------------------------
ໂທລະໂຄ່ງ ໃຫ້ຫຼາຍກວ່າຄຳວ່າໂຄສະນາ
LINE ID: @tholakhong | Twitter ID: @tholakhong
tholakhong@gmail.com | www.tholakhong.com
ກົດພາບອ່ານລາຍລະອຽດ

ກົດພາບອ່ານລາຍລະອຽດ

No comments

Powered by Blogger.