Header Ads

ຈານແຫຍ່ ຕອນ: ການຂຽນຂ່າວຂອງໜັງສືພິມບ້ານເຮົາມີພິທີການຫຼາຍໂພດ! ບໍ່ທັນສະພາບການ!



ໂດຍ: ວິ​ເສດ ສະ​ແຫວ​ງສຶກສາ

ມື້ນີ້ ຈານ​ແຫຍ່​ຫາບ​ຫລາຍ​ບັນຫາ​ມາ​ໂສ​ກັບ​ທ່ານ​ຜູ້​ອ່ານ​ທີ່​ເຄີຍ​ແຮກສ່ຽວ​ກັບ​ຄໍ​ລຳ​ນີ້​ມາ​ເຫິງ​ນານ​ແລ້ວ. ບາງ​ບັນຫາ​ຈານ​ແຫຍ່​ເຄີຍ​ຂຽນ​ມາ​ແລ້ວ​ຈົນ​ມຶກ​ເກືອບ​ແຫ້ງ, ຈຳນວນ​ໜຶ່ງ​ອ່ານ​ພົບ​ໃນ​ບົດ​ໜັງສືພິມ, ​ໄດ້​ຍິນ​ຈາກ​ສະພາ​ບາ​ຢອງ, ​ໃນ​ງານ​ພົບ​ປະກັນ​ກັບ​ບັນດາ​ເພື່ອນ​ຮ່ວມ​ຄອງ​ປາກກາ​ດຽວ​ກັນ.

ສຳລັບ​ບົດ​ນີ້ ຂໍ​ກ້ຽວໆ​ວຽນ​ກັບ​ສິ່ງ​ທີ່​ເຫັນ ​ແລະ ​ເປັນ​ໄປ​ຜ່ານ​ສື່​ມວນ​ຊົນ​ເຮົາ​ນີ້​ລະ ​ເຊັ່ນ​ຄຳ​ເຫັນ​ທີ່​ວ່າ: ຂ່າວ ​ແລະ ບົດ​ຄວາມ​ໃນ​ໜ້າ​ໜັງສືພິມ​ນັ້ນຄວນ​ຫລຸດ​ພະຍາດ​ພິທີການ​ທີ່​ເກາະ​ຫ້ອຍ​ມາ​ເຫິງ ​ເຊັ່ນ​ຂ່າວ-ບົດ​ທີ່​ມັກ​ຖື​ເອົາ​ຖານະ​ຕຳ​ແໜ່​ງຂອງ​ບຸກຄົນ​ໃນ​ຂ່າວ​ເປັນ​ສຳຄັນ, ຖື​ເບົາ​ເນື້ອ​ໃນ​ເຫດການ​ທີ່​ໂດດ​ເດັ່ນ. ຂ່າວ-ບົດ​ປະ​ເພດ​ນີ້​ມັກ​ຈະ​ຈັດ​ລຽງ​ກັນ​ຕາມ​ລຳດັບ​ປານ​ນັກຮຽນ​ປະຖົມ​ເຂົ້າ​ແຖວ​ເຄົາລົບ​ທຸງຊາດ ​ເລີ່​ມຈາກ​ຂ່າວ​ຜູ້​ສຳຄັນ​ກວ່າ​ໝູ່​ຕໍ່​ໃສ່​ຜູ້​ທີ່​ຫລຸດ​ລັ່ນ​ລົງ​ມາ. ຂ່າວ​ແບບ​ນີ້​ໜ້າ​ເບື່ອ, ໜັງສືພິມ​ແຕ່​ລະສະ​ບັບຮັບ​ຮູ້​ເລື່ອງ​ນີ້​ຢູ່​ເຕັມ​ເອິກ​ແຕ່​ປ່ຽນ​ຍາກ.

ຫລາຍ​ຄົນ​ວ່າ​ໜັງສືພິມ​ວຽງ​ຈັນທາ​ມ​ເຮັດ​ໄດ້​ດີ, ສາມາດ​ຜ່າ​ວົງ​ລ້ອມ​ຄອງ​ເດີມ​ໄດ້ ​ແຕ່​ກໍ​ມີ​ຫາງ​ສຽງ​ວ່າ ​ໄດ້​ກໍ​ເພາະ​ເປັນ​ໜັງສືພິມ​ພາສາ​ຕ່າງປະ​ເທດ, ຖ້າ​ເປັນ​ສະບັບ​ພາສາ​ລາວ​ລອງ​ເບິ່ງດູ, ຄັນ​ຊິ​ບໍ່​ຜະ​ເຊີນ​ຂອງ​ແຂງ​ໂລດ. ​ເລື່ອງ​ນີ້​ຂໍ​ໃຫ້​ເບິ່ງ​ນຳ​ກັນ​ຕື່ມ​ວ່າ ຄວນ​ແກ້​ຢູ່​ຂອດ​ໃດ​ກ່ອນ. ​

ໃນ​ຍຸກ​ສັງຄົມ​ອອນ​ລາຍ, ຍຸກ​ຂໍ້​ມູນ​ຂ່າວສານ​ບໍ່​ມີ​ຊາຍ​ແດນ​ນີ້ ຖ້າ​ໜັງສືພິມ​ບໍ່​ຮູ້​ປັບ​ຕົວ​ກໍ​ອາດ​ຈະ​ມີ​ຄ່າ​ສໍ່າ​ກັບ​ເຈ້ຍ​ລ້າໆ ​ເຊັ່ນ​ດຽວ​ກັບ​ສື່​ເອ​ເລັກ​ໂຕຣນິກອື່ນໆ. ​ເລື່ອງ​ໜັງສືພິມ​ວຽງ​ຈັນທາ​ມທີ່​ສັງຄົມ​ເຮົາ​ຍອມ​ຍົກ​ໂປ້​ໃຫ້ (ສຳລັບ​ຜູ້​ອ່ານ​ພາສາ​ອັງກິດ​ເປັນ) ນັ້ນ, ຈານ​ແຫຍ່​ສະ​ເໜີ​ໃຫ້​ປັບປຸງ​ບາງ​ຄໍ​ລຳ (ຖ້າ​ບໍ່​ເຫລືອ​ບ່າ​ກວ່າ​ແຮງ) ຄື​ຄໍ​ລຳ “ຈົດໝາຍ​ເຖິງ​ຄະນະ ບ.ກ” (Letter to the editors) ​ເພາະ​ຈານ​ແຫຍ່​ເຫັນ​ວ່າ​ບົດ​ນີ້​ລ້ວນ​ແຕ່​ມີ​ເນື້ອ​ໃນ​ດີ, ມີ​ຄວາມ​ຈິງ​ໃຈ ​ແລະ ​ແນວ​ຄິດ​ສ້າງສັນ​ຈາກ​ເຈົ້າຂອງ​ຈົດໝາຍ ​ແຕ່​ສິ່ງ​ທີ່​ຂາດ​ໄປ​ກໍ​ຄື​ຊື່​ຂອງ​ເຈົ້າຂອງ​ບົດ, ບໍ່​ຮູ້​ວ່າ​ແມ່ນ​ໃຜ​ຂຽນ ​ເພາະ​ໜັງສືພິມ​ບໍ່​ຍອມ​ບອກ​ຊື່, ບໍ່​ຮູ້​ວ່າ​ມັນ​ເປັນຄວາມ​ລັບ​ແນວ​ໃດ​ກະ​ດັກ​ກະດໍ້, ຍາມ​ໃດ​ກໍ​ບອກ​ວ່າ “ຈາກ​ຄົນ​ວຽງ​ຈັນ-Vientiane Resident) ຫລື​ບໍ່​ກໍ​ວ່າ “ຈາກ​ຜູ້​ຕິດຕາມອ່ານ​ວຽງ​ຈັນທາ​ມ”. ຢູ່​ປະ​ເທດ​ໃກ້​ຄຽງ ​ເຂົາ​ບອກ​ແຈ້ງ​ໂລດ​ວ່າ​ໜັງສື​ຈາກ​ໃຜ ດີ​ບໍ່​ດີບ​ອກຮອດ​ບ່ອນຢູ່ ​ເພື່ອ​ໃຫ້​ຜູ້​ສົນ​ໃຈ​ບັນຫາ​ໄດ້​ຕິດ​ຕໍ່​ພົວພັນ​ລາຍ​ລະອຽດ​ຕື່ມ. ຂໍ​ບອກ​ຄວາມ​ຈິງ​ວ່າ ການ​ບໍ່​ໃສ່​ຊື່​ເຈົ້າຂອງ​ຈົດໝາຍ​ທີ່​ສົ່ງ​ເຖິງ​ຄະນະ ບ.ກ ນັ້ນ ​ເຮັດ​ໃຫ້​ຄວາມ​ໜ້າ​ເຊື່ອ​ຖື​ຂອງ​ຜູ້​ອ່ານ​ຫລຸດ​ລົງ​ເຄິ່ງໜຶ່ງ, ສຳລັບ​ຈານ​ແຫຍ່​ແລ້ວ ຫລຸດ​ລົງ 80% ສຳລັບ​ຄໍ​ລຳ​ນີ້.

 ​ເ​ລື່ອງຕໍ່​ໄປ​ນີ້​ຢາກ​ຂໍ​ໃຫ້​ວົງ​ການ​ສື່​ຂອງ​ພວກ​ເຮົາ​ພິຈາລະນາ​ຫລຸດຜ່ອນ​ພາບ ​“ຕຳ​ຈອກ” ​ໃນ​ງານ​ລ້ຽງ​ສຳຄັນ​ຕ່າງໆ ລວມງານ​ລ້ຽງ​ທັງ​ວັນຊາດ​ຂອງ​ຕ່າງປະ​ເທດ, ຂໍ​ໃຫ້​ເອົາ​ຮູບ​ອື່ນ​ແທນ ​ເຊັ່ນ​ກິດຈະກຳ​ທີ່​ປິ່ນ​ອ້ອມ​ວັນຊາດ, ​ເຊັ່ນ​ຖ້າ​ເປັນ​ວັນຊາດ​ຂອງ​ຕ່າງປະ​ເທດ​ກໍ​ອາດ​ເອົາ​ຮູບ​ແບບ​ການ​ພົບ​ປະ​ກັບ​ຝ່າຍ​ຜູ້ນຳ (​ເປັນ​ຮູບ​ເກົ່າ​ກໍ​ຕາມ), ຮູບ​ການວາງສະ​ແດງ​ຂອງ​ສະຖານທູດ​ດັ່ງກ່າວ. ຖ້າ​ຍາມ​ໃດ​ມີ​ແຕ່​ສະ​ເໜີ​ຮູບ​ຕຳ​ຈອກ ມັນ​ອາດ​ເຮັດ​ໃຫ້​ຈິດ​ໃຕ້​ສຳນຶກ​ຂອງ​ສັງຄົມ​ເຫັນ​ວ່າການ​ຕຳ​ຈອກ​ແມ່ນ​ມີ​ກຽດ ​ແລະ ກຽດ​ໃນ​ງານ​ກໍ​ຄື​ການ​ໄດ້​ຕຳ​ຈອກກັນ, ຈອກ​ພັດ​ແມ່ນ​ຈອກ​ເຫລົ້າທີ່​ພວກ​ເຮົາ​ພະຍາຍາມ​ຈຳກັດ. ຢູ່​ປະ​ເທດ​ໃກ້​ຄຽງ, ຂ່າວ​ກ່ຽວ​ກັບ​ວັນຊາດ​ຂອງ​ຕ່າງປະ​ເທດ​ນັ້ນ ​ເຂົາ​ຈະ​ສະ​ເໜີ​ພຽງ​ສານ​ຂອງ​ທ່ານ​ທູດ​ປະ​ເທດ​ນັ້ນ, ບວກ​ກັບ​ກິດຈະກຳ​ທີ່​ຈັດ​ຂຶ້ນ (ບໍ່​ແມ່ນ​ງານ​ລ້ຽງ-ຍົກ​ຈອກ) ສຳລັບ​ວັນຊາດ ຫລື ຖ້າ​ເປັນ​ວັນຊາດ​ຄົບຮອບຕົວ​ເລກ​ມົນ ​ເຂົາ​ກໍ​ຈະ​ສະ​ເໜີ​ຮູບ​ການ​ພົວພັນ​ລະຫວ່າງ​ສອງ​ປະ​ເທດ​ໃນ​ອະດີດ.


ສຸດ​ທ້າຍ​ຂໍ​ໃຫ້​ບຸກຄົນ​ກ່ຽວຂ້ອງ​ທີ່​ມີ​ຄວາມ​ສຳຄັນ​ລະດັບ​ສາມາດ​ເປັນ​ຂ່າວ​ໄດ້ ມີ​ຄວາມ​ສະຫງວນ​ກ່ຽວ​ກັບ​ການ​ປາກົດ​ຕົວ ຫລື ຂຶ້ນ​ເວທີ​ຮັບ​ເງິນ​ບໍລິຈາກ ​ເຊັ່ນ​ຂຶ້ນ​ໄປ​ຈັບ​ປ້າຍ​ທີ່​ມີ​ເລກ​ຈຳນວນ​ເງິນ​ບໍລິຈາກ. ຈານ​ແຫຍ່​ເຫັນ​ວ່າ​ພວກ​ເຮົາ​ຟຸມ​ເຟືອຍ​ຜູ້​ໃຫຍ່​ຫລາຍ​ໂພດ. ຢູ່​ຫລາຍ​ປະ​ເທດ ​ເຂົາ​ຈັດ​ໃຫ້​ມີ​ໜ່ວຍ​ງານ​ສະ​ເພາະ​ເພື່ອ​ຮັບ​ເງິນ ຫລື ​ເຄື່ອງ​ຂອງ​ບໍລິຈາກ​ສະ​ເພາະ, ຈະ​ຫລາຍ-ໜ້ອຍ​ສໍ່າ​ໃດ​ກໍ​ແມ່ນ​ອົງການ​ນັ້ນຮັບ​ແທນ. ຜູ້ນຳ​ບ້ານ​ເຮົາ​ມີ​ວຽກ​ລົ້ນ​ແບກ​ເຫລືອ​ຫາບ​ຢູ່​ແລ້ວ.

ດັ່ງນັ້ນ ຄວນ​ຫລຸດຜ່ອນ​ເລື່ອງ​ກ໋ອກໆ​ແກ໋ກໆ​ສໍ່າ​ນີ້, ມັນ​ເປັນ​ການ​ຊິ້ນ​ເປືອງ​ເວລາ ​ແລະ ບໍ່​ຄື​ເຫລືອ​ຮ້າຍ…
ຈານ​ແຫຍ່​ວ່າ​ດອກ !.

Credited: ລາວພັດທະນາ Laophattana


------------------------------------------
ໂທລະໂຄ່ງ ໃຫ້ຫຼາຍກວ່າຄຳວ່າໂຄສະນາ
LINE ID: @tholakhong | Twitter ID: @tholakhong
tholakhong@gmail.com | www.tholakhong.com




ກົດພາບອ່ານລາຍລະອຽດ

No comments

Powered by Blogger.