Header Ads

ພະແນກກວດກາ ແລະ ຄວບຄຸມຢາເສບຕິດ ລົງເຜີຍແຜ່ຜົນຮ້າຍຂອງຢາເສບຕິດ



ໃນວັນທີ່ 10 ກໍລະກົດ 2017 ຜ່ານມານີ້ ພະແນກກວດກາ ແລະ ຄວບຄຸມຢາເສບຕິດ ໄດ້ລົງໂຄສະນາເຜີຍແຜ່ຜົນຮ້າຍຂອງຢາເສບຕິດ ໃຫ້ແກ່ປະຊາຊົນ 8 ຄອບຄົວທີ່ເຮັດວຽກຢູ່ບໍລິສັດສວນຢາງພາລາ ບ້ານ ໂພນໄພ ເມືອງຫ້ວຍຊາຍ ແຂວງບໍ່ແກ້ວ ໃຫ້ກຽດເຂົ້າຮ່ວມຂອງທ່ານ ນິ້ງຮາຍຊຸ້ຍ ຫົວໜ້າ ບໍລິສັດ ຈິງເສິນ ຈຳກັດ. ມີບັນດາພະນັກງານວິຊາການ, ສະມາຊິກຂອງຄອບຄົວ ແລະ ກຳມະກອນບໍລິສັດເຂົ້າຮ່ວມຢ່າງພ້ອມພຽງ.
 

ໃນພິທີ ທ່ານ ຮທ ວິໄຊແກ້ວ ເພັດສະດາ ຮອງພະແນກກວດກາ ແລະ ຄວບຄຸມຢາເສບຕິດ ກໍ່ໄດ້ຜ່ານເອກະສານກ່ຽວກັບຜົນຮ້າຍຂອງຢາເສບຕິດ ຢາເສບຕິດແມ່ນສານກຕຸ້ນ ຫຼື ລະງັບລະບົບປະສາດທີ່ໄດ້ມາຈາກພືດທີ່ໃຫ້ສານເສບຕິດ ຫຼື ຈາກການສັງເຄາະສານເຄມີ, ເມື່ອເສບເຂົ້າໄປແລ້ວຈະມີຜົນກະທົບຢ່າງຮຸນແຮງຕໍ່ຮ່າງກາຍ, ເຮັດໃຫ້ສຸຂະພາບອ່ອນເພຍ, ຮ່າງກາຍສຸດໂຊມ, ກິນເຂົ້າບໍ່ແຊບ, ນອນບໍ່ລັບ, ສະໝອງຖືກທຳລາຍ, ປະສາດຫຼອນປັ່ນປ່ວນ, ມັກອາລະວາດກໍ່ກວນ, ຄວາມຈຳເຊື່ອມ, ເປັນຄົນບ້າເສຍຈິດ, ທຳຮ້າຍຕົນເອງ ຫຼື ຄົນລອບຂ້າງ, ຮ້າຍແຮງໄປກວ່ານັ້ນອາດຈະເຮັດໃຫ້ຕົນເອງ ແລະ ຄົນລອບຂ້າງເຖິງແກ່ຊີວິດໄດ້, ຢາບ້າເຮັດໃຫ້ຄອບຄົວເກີດມີຄວາມວຸ້ນວາຍ, ຜິດຖຽງກັນ, ເສດຖະກິດຄອບຄົວຕົກຕ່ໍາ, ເສຍຊື່ສຽງຄອບຄົວ ແລະ ວົງຕະກຸນ, ສ້າງຄວາມວຸ້ນວາຍໃຫ້ແກ່ສັງຄົມ, ທຳລາຍຄວາມສະຫງົບສຸກ ແລະ ມ້າງເພວັດທະນະທຳອັນດີງາມຂອງຊາດ ທັງເປັນຕົ້ນເຫດຂອງການກໍ່ອາຊະຍາກຳເຊັ່ນ: ຄ້າປະເວນີ, ຂີ້ລັກງັດແງະ, ທຳຮ້າຍຮ່າງກາຍ, ປຸ້ນຈີ້, ຂາດຜູ້ສືບທອດທີ່ດີ ແລະ ກາຍເປັນອາຊະຍາກອນ. ນອກນັ້ນຢາບ້າຍັງເປັນໄພອັນຕະລາຍຕໍ່ຄວາມໝັ້ນຄົງຂອງຊາດ, ຕໍ່ປະຊາຊົນເປັນຕົ້ນແມ່ນ: ຊາວໜຸ່ມ, ເຍົາວະຊົນທີ່ເປັນອະນາຄົດຂອງຊາດ, ຜຼ້ຕິດຢາເສບຕິດບໍ່ສາມາດປະຕິບັດໜ້າທີ່ປ້ອງກັນຊາດ, ປ້ອງກັນຄວາມສະຫງົບ ແລະ ບໍ່ສາມາດເປັນກຳລັງແຮງໃນການສ້າງສາັດທະນາປະເທດຊາດ.

ທ້າຍພິທີທ່ານ ນິ້ງຮາຍຊຸ້ຍ ຫົວໜ້າ ບໍລິສັດ ຈິງເສິນ ກໍ່ຍັງໄດ້ມອບເຄື່ອງອຸປະກອນການຮຽນໃຫ້ແກ່ລູກຫຼານຂອງຄອບຄົວທີ່ເຮັດວຽກຢູ່ບໍລິສັດສວນຢາງພາລາເພື່ອເອົາໄປນຳໃຊ້ໃນການສືກສາຮໍ່າຮຽນໃຫ້ໄດ້ຮັບຄວາມຮູ້ ຄວາມສາມາດເພີ່ມຂຶ້ນໄປເລື້ອຍໆ.

ທີ່ມາ: ຂ່າວປກສ ແຂວງບໍ່ແກ້ວ
------------------------------------------
ໂທລະໂຄ່ງ ໃຫ້ຫຼາຍກວ່າຄຳວ່າໂຄສະນາ
LINE ID: @tholakhong | Twitter ID: @tholakhong
tholakhong@gmail.com | www.tholakhong.com



No comments

Powered by Blogger.