Header Ads

ຄະນະຜູ້ແທນ ສປປ ລາວ ສຳເລັດເຂົ້າຮ່ວມກອງ ປະຊຸມເວທີການເມືອງ ລະດັບສູງກ່ຽວກັບການ ພັດທະນາແບບຍືນຍົງ


ໃນ​ວັນ​ທີ 17-19 ກໍລະກົດ 2017 ທີ່ສໍານັກງານໃຫຍ່ ອົງການສະຫະປະຊາຊາດ​, ຄະນະຜູ້ແທນ ແຫ່ງ ສປປ ລາວ ນຳໂດຍທ່ານ ທອງຜ່ານ ສະຫວັນເພັດ ຮອງລັດ​ຖະ​ມົນ​ຕີ ​ກະ​ຊວງ​ການ​ຕ່າງ​ປະ​ເທດ, ໄດ້ນໍາພາຄະນະ ທີ່ປະກອບດ້ວຍທ່ານ ຮອງປະທານກໍາມາທິການເສດຖະກິດ, ເຕັກໂນໂລຊີ ແລະ ສິ່ງແວດລ້ອມ, ສະພາແຫ່ງຊາດ, ຄະນະກົມ ຈາກກະຊວງການຕ່າງປະເທດ ແລະ ກະຊວງແຜນການ ແລະ ການລົງທຶນ ເຂົ້າຮ່ວມກອງປະຊຸມລະດັບລັດຖະມົນຕີ ເວທີການເມືອງລະດັບສູງ ກ່ຽວກັບການພັດທະນາແບບຍືນຍົງ ປະຈໍາປີ 2017 ພາຍໃຕ້ຫົວຂໍ້ “ການລຶບລ້າງຄວາມ ທຸກຍາກ ແລະ ສົ່ງເສີມຄວາມ ຈະເລີນຮູ່ງເຮືອງ ໃນສະພາບທີ່ໂລກກໍາລັງມີການປ່ຽນແປງ”, ເຊິ່ງໃນປີນີ້ ມີ 43 ປະເທດ ຂຶ້ນສະເໜີບົດລາຍງານແຫ່ງຊາດແບບສະໝັກໃຈ  ກ່ຽວກັບຄວາມຄືບໜ້າ ໃນການຈັດຕັ້ງປະຕິບັດ ເປົ້າໝາຍການ ພັດທະນາແບບຍືນຍົງ (ປພຍ). ໃນກອງປະຊຸມຄັ້ງນີ້, ນອກຈາກກອງປະຊຸມພາກອະພິປາຍທົ່ວໄປແລ້ວ ຍັງມີກອງປະຊຸມປິ່ນອ້ອມ ຈຳນວນຫລາຍ ຈັດໂດຍປະເທດ ສະມາຊິກ ແລະ ໜ່ວຍງານທີ່ກ່ຽວ ຂ້ອງຕ່າງໆ.

ໃນໂອກາດນີ້, ທ່ານຮອງລັດ​ຖະ​ມົນ​ຕີ ກະຊວງການຕ່າງປະເທດ ​ໄດ້ຂຶ້ນກ່າວປາໄສ ໃນກອງປະຊຸມພາກອະພິປາຍທົ່ວໄປ ໂດຍໄດ້ຢ້ຳຄືນຄວາມໝາຍໝັ້ນຂອງ ສປປ ລາວ ໃນການບັນລຸເປົ້າໝາຍ ການພັດທະນາແບບຍືນຍົງ ພ້ອມທັງໄດ້ຊີ້ໃຫ້ເຫັນຄວາມຄືບໜ້າ ໃນຫລາຍດ້ານທີ່ສຳຄັນ ໂດຍສະເພາະການເຊື່ອມສານ ເຂົ້າໃນແຜນພັດທະນາເສດຖະກິດ-ສັງຄົມ ແຫ່ງຊາດ 5 ປີ ຄັ້ງທີ 8, ການຮັບ ຮອງເອົາເປົ້າໝາຍ ການພັດທະນາແບບຍືນຍົງແຫ່ງຊາດ ທີ 18, ຊີວິດທີ່ປອດໄພຈາກລະເບີດບໍ່ທັນແຕກ ເພື່ອແນໃສ່ຫລຸດຜ່ອນຜົນກະທົບ ຂອງລະເບີດບໍ່ທັນແຕກ ແລະ ສ້າງເງື່ອນໄຂສໍາລັບ ການພັດທະນາ ແລະ ຍົກລະດັບຊີວິດການເປັນຢູ່ຂອງປະຊາຊົນ, ການແຕ່ງຕັ້ງຄະນະຊີ້ນໍາລະດັບຊາດ ເພື່ອການຈັດ ຕັ້ງປະຕິບັດເປົ້າໝາຍການພັດທະນາແບບຍືນຍົງ, ການກຳນົດຄາດ ໝາຍແຫ່ງຊາດ ແລະ ຮ່າງແຜນດຳເນີນງານ ສຳລັບການຈັດຕັ້ງປະຕິບັດ ປພຍ. ນອກຈາກນັ້ນ, ທ່ານ ທອງຜ່ານ ສະຫວັນເພັດ ຍັງໄດ້ເນັ້ນເຖິງຄວາມສຳຄັນ ຂອງການຮັດແໜ້ນການເປັນ ຄູ່ຮ່ວມທີ່ ກວມລວມ ເພື່ອບັນລຸເປົ້າໝາຍ ການພັດທະນາປະເທດ ກໍຄື ວາລະ 2030 ເພື່ອການພັດທະນາແບບຍືນຍົງ ພ້ອມທັງໄດ້ປະກາດວ່າ ສປປ ລາວ ໄດ້ລົງທະບຽນ ເພື່ອສະເໜີບົດລາຍງານແຫ່ງຊາດ ແບບສະໝັກໃຈໃນປີ  2018.

ນອກຈາກນັ້ນ, ທ່ານຮອງລັດຖະມົນຕີ ຍັງໄດ້ພົບປະສອງຝ່າຍ ກັບທ່ານລັດຖະມົນຕີກະຊວງສິ່ງແວດລ້ອມ ຂອງປະເທດລຸກຊໍາບວກ ຕາມການສະເໜີ ເພື່ອປຶກສາຫາລືກ່ຽວກັບການ ຮ່ວມມື ສອງຝ່າຍ ທີ່ພົວພັນກັບການຈັດຕັ້ງປະຕິບັດສັນຍາປາຣີ ວ່າດ້ວຍການປ່ຽນແປງຂອງດິນຟ້າອາກາດ. ຄະນະຜູ້ແທນຕິດຕາມ ຍັງໄດ້ເຂົ້າຮ່ວມກອງປະຊຸມ ປິ່ນອ້ອມທີ່ສຳຄັນຈຳນວນໜຶ່ງ ເຊັ່ນ: ກອງປະ ຊຸມຂອງລັດ ຖະສະພາສາກົນ, ກອງປະຊຸມຈຸດປະສານງານແຫ່ງຊາດ ຂອງກຸ່ມປະເທດດ້ອຍພັດທະນາ, ກອງປະຊຸມຂອງສູນພັດທະນາພາກພື້ນ ຂອງອົງການ ສປຊ ກ່ຽວກັບການເຊື່ອມຈອດລະຫວ່າງ ຕົວເມືອງ ແລະຊົນນະບົດ ແລະ ອື່ນໆ.

ກອງປະຊຸມເວທີການເມືອງລະດັບສູງ ໃນປີນີ້ ໄດ້ດຳເນີນໄປດ້ວຍຜົນສຳເລັດເປັນຢ່າງດີ ດ້ວຍການຮັບຮອງເອົາ ຖະແຫລງການລັດຖະມົນຕີ ທີ່ໄດ້ຢໍ້າຄືນຄຳໝາຍ​ໝັ້ນຂອງວົງຄະນາຍາດສາກົນ ໃນການບັນລຸວາລະ 2030 ເພື່ອການພັດທະນາແບບຍືນຍົງ ສຳລັບຫມົດທຸກຄົນໃນທົ່ວໂລກ.

ທີ່ມາ: ຂປລ
------------------------------------------
ໂທລະໂຄ່ງ ໃຫ້ຫຼາຍກວ່າຄຳວ່າໂຄສະນາ
LINE ID: @tholakhong | Twitter ID: @tholakhong
tholakhong@gmail.com | www.tholakhong.com


ກົດພາບອ່ານລາຍລະອຽດ

No comments

Powered by Blogger.