Header Ads

ສະພາແຫ່ງຊາດແຈ້ງຊັບສິນ ແລະ ລາຍຮັບ ຂອງ ພະນັກງານ-ລັດຖະກອນ



ໃນ​ວັນ​ທີ 21 ກໍລະກົດ 2017 ຜ່ານມານີ້, ທີ່​ຄະ​ນະ​​ໂຄສະນາ​ສູນ​ກາງ​ພັກ ​ໄດ້​ຈັດ​ກອງ​ປະຊຸມ​ການ​ແຈ້ງ​ຊັບ​ສິນ ​ແລະ ລາຍ​ຮັບຂອງ​ພະນັກງານ-ລັດຖະກອນຮອບ​ສອງ ພາຍ​ໃນ​ສະພາ​ແຫ່ງ​ຊາດ, ​ໂດຍ​ການ​ເປັນ​ປະທານ ​ຂອງ​ທ່ານ ສົມ​ພູ ດວງ​ສະຫວັນ ປະທານ​ກຳມາ​ທິການ​ວັດທະນະທຳ-ສັງ​ຄົມ ທັງ​ເປັນ​ຫົວໜ້າ​ຊີ້​ນຳ​ລວມ ມີ​ຫົວໜ້າ​ຫ້ອງການ​ອົງການ​ກວດກາ​ລັດຖະບານ ​ແລະ ພະນັກງານ​-ລັດຖະກອນ ​ເຂົ້າ​ຮ່ວມ.

ກອງ​ປະຊຸມ​ດັ່ງກ່າວ, ຈັດ​ຂຶ້ນ​ເພື່ອ​ເປັນ​ການ​ຜັນ​ຂະຫຍາຍ ​ແລະ ປະຕິບັດ​ດຳລັດ​ຂອງ​ນາຍົກລັດຖະ ມົນຕີ ​ແລະ ບົດ​​ແນະນຳຂ​ອງອົງການ​ກວດກາ​ລັດຖະບານ ກ່ຽວ​ກັບ​ການ​ແຈ້ງ​ຊັບ​ສິນ ​ແລະ ລາຍ​ຮັບ ຂອງ​ພະນັກງານ​ພາຍ​ໃນ​ສະພາ​ແຫ່ງ​ຊາດ ​ໃຫ້​ມີ​ຄວາມ​ເປັນ​ເອກະ​ພາບ, ມີ​ຄວາມ​ໂປ່ງ​ໃສ ​ແນໃສ່​ສະກັດ​ກັ້ນ ແລະ ຕ້ານ​ການ​ສໍ້​ລາດ​ບັງ​ຫລວງ ໃນ​ກົງຈັກ​ການຈັດ​ຕັ້ງ​ຂອງ​ພັກ-ລັດ, ພ້ອມ​ທັງ​ເປັນ​ບ່ອນ​ອີງ​ໃຫ້​ແກ່​ພະນັກ ງານ-ລັດຖະກອນ ​ໃນ​ການ​ແຈ້ງ​ຊັບ​ສິນ ​ແລະ ລາຍ​ຮັບ​ຂອງ​ຕົນ.

​ໃນ​ໂອ​ກາດດັ່ງກ່າວ, ທ່ານ ສົມ​ພູ ດວງ​ສະ​ຫວັນ ​ໄດ້​ກ່າວ​ວ່າ: ​ໃນ​ໄລຍະ​ຜ່ານ​ມາ​ໄດ້​ມີ​ການຈັດ​ຕັ້ງການ​ແຈ້ງ​ຊັບ​ສິນ ​ແລະ ລາຍ​ຮັບຂອງ​ພະນັກງານ-ລັດຖະກອນ ຮອບ​ທີ 1 ​ໃນປີ 2014, ພ້ອມທັງ​ໄດ້​ປະ ຕິບັດ​ດຳລັດ ​ເລກທີ 159 ຂອງ​ນາຍົກລັດຖະມົນຕີ ວ່າ​ດ້ວຍການ​ແຈ້ງ​ຊັບ​ສິນ; ບົດ​ແນະນຳ​ເລກທີ 46 ຂອງ​ອົງການ​ກວດກາ​ລັດຖະບານ; ຕາມ​ການ​ຕົກລົງ​ຂອງ​ຄະນະ​ພັກ​ສະພາ​ແຫ່ງ​ຊາດ ​ແລະ ​ແຜນການ​ຂອງ​ຄະນະ​ກວດກາ​ພັກ​ສະ​ພາ​ແຫ່ງ​ຊາດ ​ເພື່ອ​ເຮັດ​ໃຫ້​ສະມາຊິກ​ພັກ, ພະນັກງານ-ລັດຖະ ກອນ ພາຍ​ໃນ​ສະພາ​ແຫ່ງ​ຊາດ ມີ​ຄວາມ​ຮູ້ ​ແລະ ຄວາມ​ເຂົ້າ​ໃຈ ຕໍ່​ແນວທາງ​ນະ​ໂຍບາຍ​ຂອງ​ພັກ, ກົດໝາຍ​ຂອງ​ລັດ​ ຢ່າງ​ເລິກ​ເຊິ່ງ, ໂດຍ​ສະ​ເພາະ ​ແມ່ນ​ນະ​ໂຍບາຍ​ການ​ແຈ້ງ​ຊັບ​ສິນ-ລາຍ​ຮັບ ​ແລະ ກົດໝາຍ​ວ່າ​ດ້ວຍ​ການ​ຕ້ານ​ການ​ສໍ້​ລາດ​ບັງ​ຫລວງ.

ພ້ອມ​ນີ້​, ທ່ານ​ຍັງ​ໃຫ້​ຮູ້​ຕື່ມ​​ວ່າ: ​ໂດຍ​ຕາມ​ທິດ​ນຳ​ລວມຂອງ​ພັກ ຕໍ່​ກັບ​ການ​ແກ້​ໄຂ​ບັນຫາ​ປະ​ກົດ​ການ ຫຍໍ້​ທໍ້​ຕ່າງໆ​ທີ່​ເກີດ​ຂຶ້ນ​ນັ້ນ, ກ່ອນ​ອື່ນໝົດ ຕ້ອງ​ເອົາ​​ໃຈ​ໃສ່​ສຶກສາ​ອົບ​ຮົມ​ທັດສະນະ​ແນວ​ຄິດ, ຄວາມ​ຮັບ​ຮູ້ ​ແລະ ຄວາມ​ເຂົ້າ​ໃຈ​ ຕໍ່​ຜົນ​ຮ້າຍ​ຂອງ​ການ​ສໍ້​ລາດ​ບັງ​ຫລວງ, ຕ້ອງ​ມີ​ຄວາມ​ເປັນ​ເອກະ​ພາບ​ສູງ​ແຕ່​ເທິງ​ລົງ​ລຸ່ມ ​ເລີ່​ມຈາກ​ພະນັກງານ​ນຳພາ-ຄຸ້ມ​ຄອງ​ແຕ່ລະ​ຂັ້ນ ​ແລະ ຕ້ອງ​ສຸມ​​ໃສ່​ແກ້​ໄຂ​ການ​ເສື່​ອມ​ເສຍ ດ້ານ​ຄຸນ​ທາດ​ການ​ເມືອງ, ຄຸນສົມບັດ​ສິນ​ທຳ​ປະຕິບັດ, ​ແກ້​ໄຂ​ແນວ​ຄິດ​ຄອງ​ເດີມ, ອັດຕະວິ​ໄສ, ​ເຫັນ​ແກ່​ຍາດ​ພີ່ນ້ອງ, ຈຸ້ມ​ເຈື້ອ​ເຊື້ອສາຍ, ພັກ​ພວກ ການ​ສວຍ​ໃຊ້​ໜ້າ​ທີ່​ຕຳ​ແໜ່​ງ​ ເພື່ອ​ຫາ​ຜົນ​ປະ​ໂຫຍ​ດສ່ວນ​ຕົວ ​ແລະ ອື່ນໆ.

ຂ່າວ ສົມ​ຫວັງ ພາບ​ສະຫວາດ/ຂປລ
------------------------------------------
ໂທລະໂຄ່ງ ໃຫ້ຫຼາຍກວ່າຄຳວ່າໂຄສະນາ
LINE ID: @tholakhong | Twitter ID: @tholakhong
tholakhong@gmail.com | www.tholakhong.com


ກົດພາບອ່ານລາຍລະອຽດ

No comments

Powered by Blogger.