Header Ads

​ແຂວງ​ຫລວງ​ພະ​ບາງເປັນເຈົ້າພາບຈັດ​ກອງ​ປະຊຸມ​ວິຊາ​ການ​ລາວ​-​ໄທ ວ່າ​ດ້ວຍ​ການ​ຈ້າງ​ງານ



ວັນ​ທີ 10-12 ກໍລະກົດ 2017 ຜ່ານມານີ້, ທີ່​ແຂວງ​ຫລວງ​ພະ​ບາງ ສປປ ລາວ ເປັນເຈົ້າພາບຈັດ​ກອງ​ປະຊຸມ​ວິຊາ​ການ​ລາວ​-​ໄທ ວ່າ​ດ້ວຍ​ການ​ຈ້າງ​ງານ ເພື່ອ​ປຶກສາຫາລື ແລະ ລາຍງານ ຄວາມຄືບໜ້າ ວຽກງານຈັດ​ສົ່ງ​ແຮງ​ງານ​ລາວ​ ໄປ​ເຮັດ​ວຽກ​ຢູ່​ປະ​ເທດ​ໄທ ​ແລະ ບັນດາ​ບໍລິສັດ​ຈັດ​ຫາ​ງານທີ່​ໄດ້​ຮັບ​ອະນຸຍາດ​ໃຫ້​ຈັດ​ສົ່ງຢູ່​ເບື້ອງ​ລາວ ຂະນະທີ່ ສອງຝ່າຍພວມເລັ່ງກວດກາ ແລະ ລະດົມໃຫ້ບັນດາແຮງ ງານຜິດກົດໝາຍຈໍານວນໜຶ່ງເຂົ້າສູ່ລະບົບແຮງງານທີ່ຖືກຕ້ອງ ເພື່ອຫລີກລ້ຽງການຕົວະຕົ້ມ ແລະ ບັນຫາຄ້າຂາຍມະນຸດ.

ກອງປະຊຸມຄັ້ງນີ້ ມີ ທ່ານ ນາງ ອານຸສອນ ຄຳ​ສິງ​ສະຫວັດ, ຮັກສາ​ການ​ຫົວໜ້າ​ສີມື​ແຮງ​ງານ ​ແລະ ຈັດ​ຫາ​ງານ, ກະຊວງ​ແຮງ​ງານ ​ແລະ ສະຫວັດດີ​ການ​ສັງຄົມ ​ແຫ່ງ ສປປ ລາວ, ທ່ານ ວາຣານົນ ປີ​ຕີ​ວັນ, ຫົວໜ້າ​ກົມ​ການຈັດ​ງານ ກະຊວງ​ແຮງ​ງານ ​ແຫ່ງຣາຊະ​ອານາຈັກ​ໄທ, ພ້ອມ​ດ້ວຍ​ພະນັກງານ ວິຊາ​ການ ​ຈາກ​ພາກສ່ວນ​ກ່ຽວຂ້ອງ​ເຂົ້າຮ່ວມ.

ໃນ​ໂອກາດ​ດັ່ງກ່າວ, ທ່ານ ນາງ ອານຸສອນ ຄຳ​ສິງ​ສະຫວັດ ​ໄດ້​ກ່າວ​ວ່າ: ຝ່າຍ​ລາວ​ມີ​ຄວາມ​ເພິ່ງ​ພໍ​ໃຈ​ ຕໍ່​ການ​ໃຫ້​ຄວາມ​ຮ່ວມ​ມື ​ແລະ ການ​ສະໜັບສະໜູນ​ຂອງ​ຝ່າຍ​ໄທ ເພື່ອເຮັດ​ໃຫ້​ແຮງ​ງານ​ລາວ​ສາມາດ​ເຂົ້າ​ເຮັດ​ວຽກ​ຢູ່​ປະ​ເທດ​ໄທ ຖືກຕ້ອງຕາມກົດໝາຍ ພ້ອມນີ້ ຕາມ​ບົດບັນທຶກຄວາມເຂົ້າໃຈ ສອງຝ່າຍ  ​ໄດ້​ສ້າງ​ກົນ​ໄກ, ມາດ​ຕະການ​ທີ່​ເໝາະ​ສົມ ​ໃນ​ການ​ປົກ​ປ້ອງ ​ແລະ ຄຸ້ມ​ຄອງ​ແຮງ​ງານ​ຕ່າງ​ດ້າວ ​ທີ່​ເຮັດ​ວຽກ​ຢູ່​ປະ​ເທດ​ໄທ​ແບບ​ບໍ່​ຖືກຕ້ອງ​ຕາມ​ກົດໝາຍ ຄາດວ່າ​ຈະ​ປະຕິບັດ​ໃນ​ເວລາ​ອັນ​​ໃກ້​ນີ້.

ທ່ານ ວາຣານົນ ປີ​ຕີ​ວັນ ກໍ​ໄດ້​ກ່າວ​​ວ່າ: ຝ່າຍ​ໄທ​ມີ​ຄວາມ​ຍິນ​ດີ​ ໃຫ້​ຄວາມ​ຮ່ວມ​ມື ​ແລະ ໃຫ້ການ​ສະໜັບສະໜູນ ​ໃຫ້​ແຮງ​ງານ​ລາວ ​ໄດ້​ເຂົ້າ​ເຮັດ​ວຽກ​ຢູ່​ປະ​ເທດ​ໄທ ​ຕາມ​ບົດບັນທຶກຄວາມເຂົ້າໃຈສອງຝ່າຍ ສຳລັບ​ແຮງ​ງານ​ລາ​ວ ທີ່​ໄດ້​ຂຶ້ນ​ທະບຽນ​ແຮງ​ງານ​ຕ່າງ​ດ້າວ (ບັດ​ສີ​ຊົມພູ) ຕາມ​ມະຕິ​ຄະນະ​ລັດຖະບານ​ຄັ້ງ​ວັນ​ທີ 23 ກຸມພາ 2016 ສະນັ້ນ ຝ່າຍ​ໄທ​ມີ​ຄວາມ​ພ້ອມ​ທີ່​ຈະ​ໃຫ້ການ​ສະໜັບສະໜູນ ​ແລະ ​ໃຫ້​ຄວາມ​ສະດວກ​ ໃນ​ການ​ປັບ​ສະຖານະ​ພາບ ​ເຊິ່ງຈະ​ຕ້ອງ​ດຳ​ເນີນ​ການຈັດ​ຕັ້ງ​ປະຕິບັດ ​ໃຫ້​ສຳ​ເລັດ​ໃນ​ວັນ​ທີ 31 ມີນາ 2018 ນີ້.


ທີ່ມາ: ຂປລ
------------------------------------------
ໂທລະໂຄ່ງ ໃຫ້ຫຼາຍກວ່າຄຳວ່າໂຄສະນາ
LINE ID: @tholakhong | Twitter ID: @tholakhong
tholakhong@gmail.com | www.tholakhong.com


No comments

Powered by Blogger.