Header Ads

ກາຕາ ນາບຂູ່ຈະຖອນອອກຈາກ ສະພາຮ່ວມມືເຂດອ່າວ

ວິທະຍຸ VOV5 ຂອງຫວຽດນາມລາຍງານວ່າ: ວັນທີ 10 ກໍລະກົດ, ສຳນັກຂ່າວສານ MENA ໃຫ້ຂ່າວວ່າ, ກາຕາ ນາບຂູ່ຈະຖອນອອກຈາກສະພາຮ່ວມມືເຂດອ່າວ (GCC) ຈາກກໍລະນີທີ່ຊະອຸດີ ອາຣາເບຍ  ພ້ອມພັນທະມິດໃນອ່າວເປີເຊຍ ຢຸດຕິການພົວພັນທາງການທູດ ແລະ ປິດລ້ອມກາຕາ.

ທ່ານລັດຖະມົນຕີການຕ່າງປະເທດກາຕາ Sheikh Mohammed bin Abdulrahman Al Thani ໄດ້ສົ່ງຈົດໝາຍເຖິງທ່ານເລຂາທິການໃຫຍ່ຂອງ GCC Abdul Latif Bin Rashid Al Zayani, ໃນນັ້ນໄດ້ຍົກບັນດາເງື່ອນໄຂຂອງກາຕາ, ຖ້າຫາກບໍ່ໄດ້ຮັບການຕອບສະໜອງ ປະເທດນີ້ຈະຖອກອອກຈາກ GCC. 

ທ່ານລັດຖະມົນຕີ Al Thani ໃຫ້ຄຳໝັ້ນສັນຍາວ່າ, ກາຕາ ປະຕິບັດຕາມບັນດາກົດໝາຍ ແລະ ບັນດາສົນທິສັນຍາສາກົນ, ພິເສດແມ່ນກ່ຽວຂ້ອງເຖິງບັ້ນຮົບຕ້ານການກໍ່ການຮ້າຍ ແລະ ອຸປະຖຳການກໍ່ການຮ້າຍ, ພ້ອມທັງເນັ້ນໜັກວ່າ, ກາຕາ ຈະບໍ່ປະນິປານອມບັນຫາອະທິປະໄຕຂອງປະເທດຕົນ. 

ທ່ານຖະແຫຼງວ່າ ກາຕາ ຈະອອກແຈ້ງການທີ່ມີກຳນົດເວລາ 3 ວັນໃຫ້ບັນດາປະເທດເຂດອ່າວເພື່ອຍົກເລີກຄຳສັ່ງປິດລ້ອມສຳລັບກາຕາ ແລະ ຊົດເຊີຍຄວາມເສຍຫາຍດ້ານການເມືອງ ແລະ ເສດຖະກິດ. ຖ້າຫາກໝົດກຳນົດເວລາ, ກາຕາ ຈະອອກຖະແຫຼງການຖອນອອກຈາກ GCC ຢ່າງເປັນທາງການ.

------------------------------------------
ໂທລະໂຄ່ງ ໃຫ້ຫຼາຍກວ່າຄຳວ່າໂຄສະນາ
LINE ID: @tholakhong | Twitter ID: @tholakhong
tholakhong@gmail.com | www.tholakhong.com



No comments

Powered by Blogger.