Header Ads

ແຂວງຫົວພັນ ອະນຸມັດບໍລິສັດເອກະຊົນເຂົ້າພັດທະນາຕາດສະເຫລີຍ

ແຂວງຫົວພັນ ໄດ້ຕົກລົງອະນຸຍາດໃຫ້ວິສາຫະກິດ ແອກົ້ງ ພັດທະນາຕາດສະເຫຼີ້ຍ ສ່ວນບຸກຄົນ ເປັນຜູ້ສຳປະທານ ພັດທະນາ ສະຖານທີ່ທ່ອງທ່ຽວຕາດສະເຫຼີຍ ເມືອງຊໍາເຫນືອ ເພື່ອຍູ້ແຮງຂະແຫນງທ່ອງທ່ຽວແຂວງຫົວພັນໃຫ້ເຕີບໂຕຫລາຍຂຶ້ນກວ່າເກົ່າ.

                            
ການພັດທະນາແບ່ງອອກເປັນສອງໄລຍະໃນການກໍ່ສ້າງຄື: ໄລະຍະທີ່ໜຶ່ງເລີ່ມແຕ່ປີ 2017-2019 ໃຫ້ສຳເລັດ 7 ກິດຈະກໍາ ປະກອບມີ: ປັບປຸງບ່ອນຈອດລົດ ແລະ ສ້າງຮົ້ວອ້ອມເຂດບໍລິການ, ປັບປຸງທາງຍ່າງເຂົ້າຫາຕາດ, ສ້າງທາງຍ່າງ ແລະ ຈຸດພັກເຊົາຕາມແລວທາງຂຶ້ນໄປຫາຍອດຕາດ, ສ້າງກັນເຈື່ອນຕາມແຄມນໍ້າ, ປັບປຸງຮ້ານອາຫານ,ໜອງປາ, ປັບປຸງຂົວຊົມວິວຕາດ ແລະ ຈຸດພັກຜ່ອນນອນຊົມວິວ, ສ້າງຂົວຂ້າມໄປຫາດອນກາງທີ່ເປັນບ່ອນນັ່ງພັກຜ່ອນ. 

ສ່ວນໄລຍະທີສອງ ເລີ່ມແຕ່ປີ 2019-2021 ໃຫ້ສຳເລັດ 2 ໂຄງການຄື: ສ້າງຣີສອດພັກແຮມແບບຊົງລາວຕິດພັນກັບທຳມະຊາດຂອງຊາດລາວຈຳນວນ 6 ຫຼັງ ແລະ ສ້າງຕູບລຽບແຄມນໍ້າໃຫ້ໄດ້ 8 ຫຼັງ. ພ້ອມນີ້ຍັງມີລະບົບການປ້ອງກັນ, ຄວາມປອດໄພ ການບໍາລຸງຮັກສາ ແລະ ສຶກສາຜົນກະທົບດ້າສິ່ງແວດລ້ອມ ແລະ ອຶ່ນໆ.

ໂຄງການນີ້ ເປັນການລົງທຶນຂອງນັກລົງທຶນພາຍໃນ 100% ມີເນື້ອທີ່ສຳປະທານທັງໝົດ 11 ເຮັກຕາເຄິ່ງ  ໃນນີ້ໄດ້ແບ່ງເປັນ 4 ເຂດຄື: ເຂດອະນຸລັກ, ເຂດສະຫງວນ, ເຂດບໍລິການ ແລະ ເຂດສຳລັບການລົງທຶນຂອງພາກເອກະຊົນ. ມີມູນຄ່າການສຳປະທານ ທັງໝົດ 3 ຕື້ 200 ລ້ານກີບ ແລະ ທຶນຈົດທະບຽນ 1 ຕື້ກີບ ມີອາຍຸສຳປະທານ 20 ປີ. 

ພິທີລົງນາມ ມີຂຶ້ນໃນທ້າຍອາທິດຜ່ານມາ ຕາງໜ້າແຂວງຫົວພັນ ມີ ທ່ານ ຄອນທອງ ມະນີວອນ ຮອງຫົວໜ້າພະແນກແຜນການ ແລະ ການລົງທຶນ, ທ່ານ ພູວັນ ເພັດມີໄຊ ຮອງຫົວໜ້າພະແນກຖະແຫຼງຂ່າວ ວັດທະນະທຳ ແລະ ທ່ອງທ່ຽວແຂວງ, ທ່ານ ອານົງລັກ ແສງສຸລິຍາ ຮອງເຈົ້າເມືອງໆຊຳເໜືອ ແລະ ທ່ານ ແອກົ້ງ ວົງພະຈັນ ຜູ້ອຳນວຍການບໍລິສັດແອກົ້ງ ໂດຍຊ້ອງໜ້າການນຳແຂວງພາກສ່ວນກ່ຽວຂ້ອງຂັ້ນແຂວງ, ເມືອງຊຳເໜືອ ພ້ອມດ້ວຍແຂກຖຶກເຊີນເປັນສັກຂິພິຍານນຳ.

------------------------------------------
ໂທລະໂຄ່ງ ໃຫ້ຫຼາຍກວ່າຄຳວ່າໂຄສະນາ
LINE ID: @tholakhong | Twitter ID: @tholakhong
tholakhong@gmail.com | www.tholakhong.com



ກົດພາບອ່ານລາຍລະອຽດ

No comments

Powered by Blogger.