Header Ads

ເປີດອານຸສອນສະຖານປະຫວັດສາດລາວ- ຫວຽດນາມ ຢູ່ແຂວງເຊິນລາ


ທ້າຍ​ອາທິດ​ທີ່​ຜ່ານ​ມານີ້, ບັນດາ​ຜູ້​ນໍາ​ສອງ​ຝ່າຍ​ລາວ-ຫວຽດນາມ ໄດ້ຈັດພິທີເປີດອານຸ ສອນສະຖານ ປະຫວັດສາດການປະຕິວັດ ລາວ-ຫວຽດນາມ ທີ່ບ້ານລາວໂຄ ຕາແສງພຽງຂວາຍ ເມືອງອຽນເຈົາ ແຂວງເຊິນລາ ສສ ຫວຽດນາມ ໂດຍ​ໃຫ້ກຽດເຂົ້າຮ່ວມ ຂອງ ທ່ານ ນາງ ປານີ ຢາທໍ່ຕູ້ ກຳມະການກົມການເມືອງສູນກາງພັກ ປະທານ ສະພາແຫ່ງຊາດລາວ, ທ່ານ ນາງ ຫງວຽນ ທິກີມເງິນ ກຳມະການກົມການເມືອງສູນກາງພັກ ປະທານ ສະພາແຫ່ງຊາດ ຫວຽດນາມ, ມີບັນດາສະຫາຍເລຂາ-ຮອງເລຂາ, ເຈົ້າແຂວງ-ຮອງເຈົ້າແຂວງ, ປະທານ ສະພາປະຊາຊົນຈາກ 16 ແຂວງ ຂອງ ສປປ ລາວ ແລະ 10 ແຂວງ ຂອງ ຫວຽດນາມ ທີ່ມີຊາຍແດນ ຕິດກັບ ສປປ ລາວ ພ້ອມຜູ້ຕາງໜ້າ ຈາກບັນ ດາກະຊວງ, ຂະແໜງການ ຈາກທ້ອງຖິ່ນ ແລະ ສູນກາງ ທັງສອງປະເທດ ແລະ ປະຊາຊົນບັນດາເຜົ່າ ເຂົ້າຮ່ວມເປັນຈຳນວນຫລວງຫລາຍ.

ອານຸສອນສະຖານ ປະຫວັດສາດການປະຕິວັດ​ແຫ່ງ​ນີ້ ​ເປັນເຂດຮ່ອງຮອຍປະຫວັດສາດ ການປະຕິວັດລາວ-ຫວຽດນາມ ຢູ່ແຂວງເຊີນລາ  ເປັນສະຖານທີ່ ເຄື່ອນໄຫວການປະຕິວັດ ຂອງ ທ່ານ ໄກສອນ ພົມວິຫານ ໃນການສ້າງຖານທີ່ໝັ້ນ ກຳລັງຕະລຸມບອນ ລາວເໜືອ, ສ້າງຕັ້ງກອງກຳລັງ ອິດສະຫລະ ​ເຊິ່ງເປັນຕົ້ນກຳເນີດ ຂອງກອງທັບປະຊາຊົນລາວ ໃນປັດຈຸບັນ ແລະ ເພື່ອເປັນການ ລະນຶກເຖິງຄຸນງາມຄວາມດີ ຂອງທ່ານ ຈາງລາວໂຄ ຕໍ່ການປະຕິວັດລາວ-ຫວຽດ ນາມ. ນອກນີ້ ຍັງເປັນບ່ອນເກັບຮັກສາໄວ້ ຄຸນຄ່າທາງປະຫວັດສາດ, ຄວາມຜູກພັນ ​ເຊິ່ງແລກມາດ້ວຍ ເລືອດເນື້ອ ຂອງຄວາມສຳພັນ ສູ້ຮົບລາວ-ຫວຽດນາມ ​ໂດຍ​ສະ​ເພາະແມ່ນແຂວງ ເຊີນລາ ກັບບັນດາ ແຂວງພາກເໜືອຂອງລາວ ໃນການຕໍ່ສູ້ຕ້ານພວກຈັກກະພັດ ລ່າເມືອງຂຶ້ນແບບເກົ່າ ​ເພື່ອປົກປັກຮັກສາ ປະເທດຊາດ ​ແລະ ຍັງເປັນບ່ອນສຶກສາອົບຮົມ ນ້ຳໃຈຮັກຊາດ, ຄວາມສຳພັນແບບ ພິເສດລາວ-ຫວຽດນາມ. ​ເມື່ອ​ຕົ້ນ​ປີ 2012, ພັກ, ລັດຖະບານ ແລະ ສະພາສອງປະເທດລາວ-ຫວຽດ ນາມ ໄດ້ຈັດພິທີຮັບເປັນອານຸສອນສະຖານ ປະຫວັດສາດລະດັບປະເທດ ແລະ ເປີດພິທີວາງສີລາລືກ ໃນການກໍ່ສ້າງ ເຂດຮ່ອງຮອຍປະຫວັດສາດ ການປະຕິວັດລາວ-ຫວຽດນາມ ໃນເນື້ອທີ່ 50 ເຮັກຕາ ປະກອບມີ: ຮ່ອງຮອຍເກົ່າ ​ເຊິ່ງເປັນບ່ອນເຮືອນຂອງ ຄອບຄົວພໍ່ເຖົ້າ ຈາງລາວໂຄ ແລະ ບ່ອນຢູ່ຂອງກອງ ຕະລຸມບອນລາວເໜືອ ໃນໄລຍະປີ 1948-1951.

ທ່ານ ນາງ ປານີ ຢາທໍ່ຕູ້ ກ່າວບາງຕອນວ່າ: ການເປີດອະນຸສອນສະຖານ​ແຫ່ງ​ນີ້ ມີຄວາມ ໝາຍສຳຄັນ ໃນປະຫວັດສາດ ແຫ່ງການຮ່ວມສຳພັນ ສູ້ຮົບລາວ-ຫວຽດນາມ ​ເຊິ່ງຈະເປັນການ ປະກອບ ສ່ວນອັນສຳຄັນ ເຂົ້າໃນການເພີ່ມພູນຄູນສ້າງ ສາຍພົວພັນມິດຕະພາບ, ຄວາມສາມັກຄີພິເສດ ແລະ ການຮ່ວມມືຮອບດ້ານລາວ-ຫວຽດນາມ, ກາຍເປັນບ່ອນສຶກສາອົບຮົມປະຊາຊົນສອງຊາດ ໂດຍສະເພາະ ແມ່ນຄົນຮຸ່ນໜຸ່ມ ໄດ້ຮຽນຮູ້ເຖິງປະຫວັດສາດ ໃນການຮ່ວມສຳພັນສູ້ຮົບ ທີ່ອົງອາດກ້າຫານ, ບັນດາວິລະກຳ ​ແລະ ຄຸນງາມຄວາມດີ ໃນການເສຍສະຫລະ ອັນໃຫຍ່ຫລວງ ຂອງນັກຕໍ່ສູ້ລຸ້ນກໍ່ຕັ້ງການປະຕິວັດ ຂອງ ສອງຊາດລາວ-ຫວຽດນາມ ທີ່ໄດ້ອຸທິດເລືອດເນື້ອ, ສະຕິປັນຍາ ຜ່ານຜ່າຄວາມທົດສອບຫຍູ້ງຍາກ ນາໆປະການ ເພື່ອກອບກູ້ເອົາເອກະລາດແຫ່ງຊາດ ແລະ ອິດສະຫລະພາບ ມາໃຫ້ທຸກ​ຄົນໃນທຸກມື້ນີ້.

ໂອກາດ​ດຽວກັນ, ທ່ານ ນາງ ຫງວຽນ ທິກີມເງິນ ໄດ້ສະແດງຄວາມຂອບໃຈ ແລະ ຕີລາຄາສູງ ຕໍ່ ປະຊາຊົນ ບ້ານລາວໂຄ ກໍຄືປະຊາຊົນບັນດາເຜົ່າ ແຂວງ ເຊີນລາ ພ້ອມກັບປະຊາຊົນ ໃນທົ່ວປະເທດ ທີ່ ໄປຕາມຄຳຮຽກຮ້ອງຂອງປະທານໂຮ່ຈິມິນ, ໄປນຳພັກ, ໄປນຳການປະຕິວັດ ປະກອບສ່ວນເຂົ້າ ໃນການ ປົດປ່ອຍປະເທດຊາດ, ປະກອບສ່ວນເຂົ້າ ໃນການສ້າງ ສາຍພົວພັນແບບພິເສດ ລະຫວ່າງສອງຊາດ ຫວຽດນາມ-ລາວ. ພັກ, ລັດຖະບານ ແລະ ປະຊາຊົນຫວຽດນາມ ຢືນຢັນວ່າ ຈະພ້ອມກັບພັກ, ລັດຖະບານ ແລະ ປະຊາຊົນລາວ ບັນດາເຜົ່າເຮັດສຸດຄວາມສາມາດຂອງຕົນ ເຂົ້າໃນການເສີມຂະຫຍາຍ, ເພີ່ມພູນຄູນສ້າງ ຄວາມສຳພັນ ທີ່ເປັນມູນເຊື້ອ, ຄວາມສາມັກຄີ ແບບພິເສດ ແລະ ການຮ່ວມມືຮອບດ້ານ ຫວຽດນາມ-ລາວ ໃຫ້ແຕກດອກອອກຜົນຍິ່ງໆຂຶ້ນ.

ພາບແລະຂ່າວ: ຂປລ
------------------------------------------
ໂທລະໂຄ່ງ ໃຫ້ຫຼາຍກວ່າຄຳວ່າໂຄສະນາ
LINE ID: @tholakhong | Twitter ID: @tholakhong
tholakhong@gmail.com | www.tholakhong.com


No comments

Powered by Blogger.