Header Ads

ຮອງປະທານປະເທດ ຕ້ອນຮັບທູດໂອຕຣິດ ແລະ ແຟງລັງ ເຂົ້າຢ້ຽມອຳລາ








ໃນ​ວັນ​ທີ 21 ກໍລະກົດ 2017ຜ່ານມານີ້ ທີ່ທໍານຽບປະທານ​ປະ​ເທດ (ຫໍ​ຄໍາ) ທ່ານ ພັນ​ຄໍາ ວິພາ​ວັນ ຮອງ​ປະທານ​ປະ​ເທດ ແຫ່ງ ສາທາລະນະ​ລັດ ປະຊາທິປະ​ໄຕ ປະຊາຊົນ​ລາວ ​ໄດ້​ໃຫ້ກຽດຕ້ອນ​ຮັບ ​ການ​ເຂົ້າ​ຢ້ຽມອໍາ​ລາ​ ຂອງ​ທ່ານ ​ເອນ​ນູ ​ໂດ​ເຟນິກ (Enno Drofenok) ​ເອກ​ອັກຄະ​ຣາຊະ​ທູດວິສາມັນ ​ຜູ້​ມີ​ອຳ ນາດ​ເຕັມ ​ແຫ່ງ ປະ​ເທດ ​ໂອ​ຕຣິດ ປະຈຳ​ ສປປ ລາວ ​ແລະ ທ່ານ ອິກາ ​ເປ​ກາ ​ເອັນ​ເຕ​ໂຣ ສີ​ມີ​ລາ ເອກ​ອັກຄະລັດຖະທູດ ​ແຫ່ງ ສາທາລະນະ​ລັດ ​ແຟງ​ລັງ ປະ​ຈໍ​າ ສປປ ລາວ. ​ໃນ​​ໂອກາດ ​ສຳ​ເລັດໜ້າທີ່​ການ​ທູດ ຢູ່ ສປປ ລາວ.

​ໃນ​ໂອກາດ​ດັ່ງກ່າວ, ທ່ານ ພັນ​ຄໍາ ວິພາ​ວັນ​ ​ໄດ້​ສະ​ແດງຄວາມ​ຍິນ​ດີ​ຕ້ອນຮັບ ​ແລະ ຊົມ​ເຊີຍ​ຕໍ່​ຜົນສຳ​ເລັດ​ ຂອງ​ການ​ປະຕິບັດ​ ໜ້າ​ທີ່​ການ​ທູດ ຢູ່ ສປປ ລາວ ​ຂອງ ທ່ານທູດ ທັງ 2 ປະ​ເທດ ​ເຊິ່ງ​ເປັນ​ການ​ປະກອບສ່ວນ​ສຳຄັນ​ ເຂົ້າ​ໃນ​ການ​ເສີມ​ຂະຫຍາຍ​ ສາຍ​ພົວພັນ​ມິດຕະພາບ ​ແລະ ການ​ຮ່ວມ​ມື ລະ ຫວ່າງ ສປປ ລາວ-​ໂອ​ຕຣິດ ​ແລະ ​​ແຟງ​ລັງ ​ໃຫ້​ມີ​ບາດກ້າວ ​ຂະຫຍາຍຕົວ​ຂຶ້ນ​ໄປ​ເລື້ອຍໆ.​ ໂດຍ​ສະ​ເພາະ​ ການ​ຊ່ວຍ​ເຫລືອ​ລາວ ​ໃນ​ບາງ​ດ້ານ. ພ້ອມ​ນີ້, ທ່ານ​ຮອງ​ປະທານ​ປະ​ເທດ ຍັງ​ໄດ້​ອວຍພອນ​ໃຫ້​ທ່ານ​ທູດ ທັງ 2 ຈົ່ງ​ກັບ​ຄືນ​ປະ​ເທດ​ ດ້ວຍ​ຄວາມ​ສະຫວັດດີ​ພາບ ​ແລະ ປະສົບ​ຜົນ​ສຳ​ເລັດ​ ໃນ​ພາລະກິດ​ໃໝ່​ຂອງ​ຕົນ.

​​ໃນໂອກາດ​ດຽວ​ກັນ, ທ່ານທູດ ກໍ​ໄດ້​ສະ​ແດງ​ ຄວາມ​​ຂອບ​ອົກ​ຂອບໃຈ​ ມາ​ຍັງ ​ທ່ານຮອງປະທານ​ປະ​ເທດ ທີ່​ໄດ້​ສະຫລະ​ເວລາ​ອັນ​ມີ​ຄຸນຄ່າ ​ໃຫ້ການ​​ຕ້ອນຮັບ ອັນ​ອົບ​ອຸ່ນ​ໃນ​ຄັ້ງ​ນີ້​, ພ້ອມ​ທັງ​ຖື​ໂອກາດ​ນີ້ ສະ​ແດງ​ຄວາມ​ຂອບ​ໃຈ​ຢ່າງ​ຈິງ​ໃຈ ​ມາ​ຍັງ​ບັນດາການ​ນຳ​ ພັກ-ລັດ​ ຂອງ​ລາວ ຕະຫລອດ​ຮອດ​ ປະຊາຊົນ​ລາວ​ບັນດາ​ເຜົ່າ​ ທີ່​ໄດ້​ໃຫ້ການ​ຮ່ວມ​ມື​ ເປັນ​ຢ່າງ​ດີ ​ແລະ ອຳນວຍ​ຄວາມ​ສະດວກ​ທຸກ​ຢ່າງ​ ​ຕະຫລອດ​ໄລຍະ ​ການ​ປະຕິບັດ​ໜ້າ​ທີ່​ຂອງ​ຕົນ ຈົນ​ໄດ້​ຮັບ​ຜົນສຳ​ເລັດ​ ຢ່າງ​ໜ້າ​ເພິ່ງພໍ​ໃຈ.

ຂ່າວ: ຂັນ​ໄຊ, ພາບ: ອ່າຍຄໍາ/ຂປລ


------------------------------------------
ໂທລະໂຄ່ງ ໃຫ້ຫຼາຍກວ່າຄຳວ່າໂຄສະນາ
LINE ID: @tholakhong | Twitter ID: @tholakhong
tholakhong@gmail.com | www.tholakhong.com



ກົດພາບອ່ານລາຍລະອຽດ

No comments

Powered by Blogger.