Header Ads

ລັດຖະມົນຕີ ຕປທ ຕ້ອນຮັບ ທູດກຳປູເຈຍຄົນໃໝ່



ວັນທີ 3 ກໍລະກົດ 2017 ນີ້ ທີ່ກະຊວງການຕ່າງປະເທດ, ທ່ານ ສະເຫລີມໄຊ ກົມມະສິດ, ລັດຖະມົນຕີກະຊວງການຕ່າງປະເທດ ແຫ່ງ ສປປ ລາວ ໄດ້ຕ້ອນຮັບການເຂົ້າຢ້ຽມຂໍ່ານັບຂອງ ທ່ານ ເຈງ ມານິດ (Cheng Manith), ເອກອັກຄະຣາຊະທູດ ແຫ່ງ ຣາຊະອານາຈັກ ກຳປູເຈຍ ປະຈໍາ ສປປ ລາວ ຄົນໃໝ່  ກ່ອນ​ໜ້າ​ນີ້ ທ່ານ ເອກອັກຄະຣາຊະທູດກໍໄດ້ເຂົ້າຍື່ນສານຕາຕັ້ງຕໍ່ ທ່ານ ບຸນຍັງ ວໍລະຈິດ, ປະທານປະເທດ ແຫ່ງ ສປປ ລາວ ໃນວັນທີ 4 ພຶດສະພາ 2017 ຜ່ານມາ.

ໃນໂອກາດດັ່ງກ່າວ, ທ່ານ ສະເຫລີມໄຊ ກົມມະສິດ ໄດ້ສະແດງຄວາມຍິນດີຕ້ອນຮັບ ​ແລະ ຊົມ​ເຊີຍ ຕໍ່ ທ່ານ ເອກອັກຄະຣາຊະທູດ ທີ່ໄດ້ຮັບການແຕ່ງຕັ້ງ ໃຫ້ມາປະຕິບັດໜ້າທີ່ວຽກງານການທູດ ຢູ່ ສປປ ລາວ, ພ້ອມທັງສະແດງຄວາມເຊື່ອໝັ້ນວ່າ ທ່ານທູດຈະສືບຕໍ່ເຄື່ອນໄຫວຊຸກຍູ້ສົ່ງເສີມການພົວພັນຮ່ວມມື ລະຫວ່າງ ສອງປະເທດ ແລະ ປະຊາຊົນສອງຊາດ ໃຫ້ນັບມື້ນັບຈະເລີນງອກງາມຍິ່ງໆຂຶ້ນ ເພື່ອນຳເອົາຜົນປະໂຫຍດຕົວຈິງມາສູ່ປະຊາຊົນສອງຊາດ ລາວ-ກຳປູເຈຍ.
ໂອກາດດຽວກັນ, ທ່ານເອກອັກຄະຣາຊະທູດກຳປູຄົນໃໝ່ ກໍໄດ້ສະແດງຄວາມຂອບໃຈທີ່ທ່ານລັດຖະມົນຕີ ໃຫ້ກຽດຕ້ອນຮັບ ແລະ ໄດ້ຢໍ້າຄືນເຖິງການຈະປະກອບສ່ວນທຸກຄວາມສາມາດ ຂອງຕົນເຂົ້າໃນການປະຕິບັດວຽກງານການທູດຢູ່ ປປ ລາວ ໃຫ້ມີຜົນສຳເລັດຢ່າງຈົບງາມ ພ້ອມນັ້ນ ກໍໄດ້ສະແດງຄວາມຊົມເຊີຍ ຕໍ່ຜົນສຳເລັດຂອງ ສປປ ລາວ ໃນການເປັນປະທານອາຊຽນ ໃນປີ 2016 ຜ່ານມາ ​ແລະ ຜົນ​ສໍາ​ເລັດ​ອື່ນໆ​ທີ່​ຍາດ​ມາ​ໄດ້.

ໃນການພົບປະຄັ້ງນີ້,ສອງຝ່າຍໄດ້ສະແດງຄວາມຊົມເຊີຍ ຕໍ່ການເປີດນຳໃຊ້ດ່ານສາກົນໜອງນົກຂຽນ-ຕຣາປຽງກຣຽນຢ່າງເປັນທາງການ ໃນຕົ້ນປີ 2017 ນີ້ ແລະ ການນຳໃຊ້ໜັງສືຜ່ານແດນນຳກັນ ​ເຊິ່ງຈະມີຄວາມສຳຄັນຫລາຍ ໃນການເພີ່ມທະວີການຮ່ວມມື,ອໍານວຍຄວາມສະດວກ ໃນການໄປມາຫາສູ່ກັນ ແລະ ສົ່ງເສີມການທ່ອງທ່ຽວລະຫວ່າງ ປະຊາຊົນຂອງສອງປະເທດໃຫ້ຫລາຍຂຶ້ນ. ສອງຝ່າຍຍັງໄດ້ແລກປ່ຽນຄຳຄິດຄຳເຫັນນຳກັນກ່ຽວກັບ ວຽກງານຊາຍແດນ,ການທ່ອງທ່ຽວ, ການຈັດກອງປະຊຸມຄະນະກຳມາທິການຮ່ວມ (JC) ລາວ-ກຳປູເຈຍ, ການລົງທຶນ ໃນເຂດເສດຖະກິດສະເພາະ ສະຫວັນປາກ (Savan Park) ແລະ ການຄ້າຊາຍແດນເພື່ອຊຸກຍູ້ສົ່ງເສີມ ແລະ ສ້າງເງື່ອນໄຂ ເຮັດໃຫ້ການຄ້າຂາຍ ລະຫວ່າງສອງປະເທດ ມີມູນຄ່າເພີ່ມຂຶ້ນ, ໂດຍສະເພາະການສ້າງເສັ້ນທາງຄົມມະນາຄົມ ເປັນຕົ້ນແມ່ນ ການສ້າງຂົວເຊລຳເພົາ ເພື່ອເຊື່ອມໂຍງການຄ້າ, ການລົງທຶນ, ການອຳນວຍຄວາມສະດວກໃນການນຳເຂົ້າ ແລະ ສົ່ງອອກສິນຄ້າ.

ຂ່າວ​:ຂັນ​ໄຊ ; ພາບ:ສະຫວາດ

------------------------------------------
ໂທລະໂຄ່ງ ໃຫ້ຫຼາຍກວ່າຄຳວ່າໂຄສະນາ
LINE ID: @tholakhong | Twitter ID: @tholakhong
tholakhong@gmail.com | www.tholakhong.com


No comments

Powered by Blogger.