Header Ads

ນະຄອນຫລວງຊີ້ແຈງໄຟໄໝ້ຕະຫລາດຊັ່ງຈ່ຽງ ແຕ່ຍັງບໍ່ຮູ້ສາເຫດ ແລະ ມູນຄ່າເສຍຫາຍ




ອີງຕາມການລາຍງານຂອງ ສໍານັກຂ່າວສານປະເທດລສວ ວ່າ : ຜູ້ພັດທະນາສູນການຄ້າສາກົນຊັ່ງຈ່ຽງຍັງບໍ່ຮູ້ມູນຄ່າເສຍຫາຍທັງໝົດຈາກເຫດການໄຟໄໝ້ຕະຫລາດໃນວັນທີ 14 ກໍລະກົດຜ່ານມາ ຂະນະທີ່ ນະຄອນຫລວງວຽງຈັນເປີດເຜີຍວ່າພ້ອມຈະເຮັດວຽກຮ່ວມກັນໜ່ວຍງານກ່ຽວຂ້ອງ ແລະ ຜູ້ພັດທະນາສູນການຄ້າດັ່ງກ່າວຢ່າງໃກ້ຊິດເພື່ອຊອກຫາຊ່ອງທາງແກ້ໄຂສິ່ງທີ່ເກີດຂຶ້ນ.



ຫລ້າສຸດໃນວັນທີ 18 ກໍລະກົດ 2017 ທີ່ ນະຄອນຫລວງວຽງຈັນ ໄດ້ມີການຖະແຫລງຂ່າວກ່ຽວກັບເຫດການໄຟໃໝ້ຕະຫລາດຊັ່ງຈ່ຽງ ໂດຍ ທ່ານ ພູວົງ ວົງຄໍາຊາວ ຫົວໜ້າຫ້ອງວ່າການປົກຄອງນະຄອນຫລວງວຽງຈັນ ແລະ ທ່ານ ພັທ ຈັນທອມ ຫົວໜ້າຫ້ອງການຕໍາຫລວດ ປກສ ນະຄອນຫລວງໄດ້ລາຍງານວ່າ: ໃນເວລາ 17:35 ໂມງ ຂອງວັນທີ 14 ກໍລະກົດ 2017 ນີ້ ໄດ້ເກີດເຫດໄຟໄໝ້ຕະຫລາດຊັ່ງຈ່ຽງຢ່າງກະທັນຫັນ, ເມື່ອເຈົ້າໜ້າທີ່ໄດ້ຮັບຊາບຂ່າວແລ້ວ ໄດ້ຮີບຮ້ອນສັ່ງໃຫ້ ພະນັກງານວິຊາສະເພາະລົງຕິດຕາມແກ້ໄຂເຫດຢ່າງຮີບດ່ວນ, ການມອດໄຟໃນຄັ້ງນີ້ເຈົ້າໜ້າທີ່ສະເພາະກິດນະຄອນຫລວງວຽງຈັນ ໄດ້ໃຊ້ລົດ ຈໍານວນ 16 ຄັນ ໃຊ້ເລວາ 3 ຊົວໂມງ ຈຶ່ງສາມາດຄວບຄຸມໄຟໄດ້.



ສູນການຄ້າສາກົນ ຊັ່ງຈຽງແມ່ນໄດ້ຮັບການລົງທຶນຈາກ ນັກລົງທຶນ ສປ ຈີນ ເຮັດສັນຍາເຊົ່າເນື້ອທີ່ດິນ ທັງໜົດ 17 ເຮັກຕາ ກັບ ກະຊວງປ້ອງກັນປະເທດ ເປັນເວລາ 50 ປີ ໂດຍໄດ້ຮັບອະນຸຍາດຈາກກະຊວງແຜນການ ແລະ ການລົງທຶນ ໃນປີ 2006 ແລະ ໄດ້ດໍາເນີນທຸລະກິດຈາກກະຊວງອຸດສາຫະກໍາ ແລະ ການຄ້າ ໃນປີ 2009 ເນື້ອທີ່ສູນການຄ້າທີ່ຖືກໄຟໄໜ້ 15.600 ຕາເມັດ ມີຫ້ອງຂາຍເຄື່ອງ 430 ຫ້ອງ ລວມທັງຂອງຄົນລາວ ແລະ ຈີນ. 



ນັບແຕ່ມື້ເກີດເຫດ ນະຄອນຫລວງວຽງຈັນ ໄດ້ສົ່ງກໍາລັງເຈົ້າໜ້າທີ່ທະຫານ, ປກສ, ເມືອງ ສີໂຄດຕະບອງ ແລະ ປກສ ກຸ່ມບ້ານ ເພື່ອສົມທົບກັບກະຊວງປ້ອງກັນປະເທດ ແລະ ປ້ອງກັນຄວາມສະຫງົບ ເຂົ້າໄປຄວບ ຄຸມ ແລະ ຮັກສາຄວາມມອດໄຟ ທົ່ວພື້ນທີ່ບໍລິເວນສູນການຄ້າດັ່ງກ່າວບໍ່ໃຫ້ລຸກລາມໄປເຂດອື່ນໄດ້.
ສາເຫດ ແລະ ມູນຄ່າເສຍຫາຍ ເຈົ້າໜ້າທີ່ພວມກໍາລັງເກັບກໍາຂໍ້ມູນ ເອົາລາຍລະ ອຽດແລ້ວຈະຖະແຫລງໃຫ້ຊາບຕື່ມພາຍຫລັງ.



ເຫດການໄຟໄໜ້ໃນຄັ້ງນີ້ ນະຄອນຫລວງ ກໍຄືລັດຖະບານ ແມ່ນບໍ່ໄດ້ນີ້ງ ນອນໃຈ ພວມພະຍາຍາມຊອກທຸກວິທີທາງເພື່ອຊ່ວຍເຫລືອ ຜູ້ໄດ້ຮັບ ຜົນກະທົບຈົນ ສຸດຄວາມສາມາດ ປະຈຸບັນນີ້ ລັດຖະບານໄດ້ມອບໃຫ້ ກະຊວງ ປກສ ສົມທົບ ກັບກະຊວງປ້ອງກັນປະເທດ ແລະ ນະຄອນຫລວງວຽງຈັນ ຮີບຮ້ອນດໍາ ເນີນສືບສວນ-ສອບສວນ ຫາຕົ້ນປາຍສາເຫດທີ່ແທ້ຈິ່ງ ທີ່ພາໃຫ້ເກີດອັກຄີໄພໃນຄັ້ງນີ້ ລວມທັງ ຊອກຫາພາກສ່ວນ ແລະ ຜູ້ທີ່ກ່ຽວຂ້ອງຮັບຜິດຊອບທັງທາງກົງ ແລະ ທາງອ້ອມ ປັດຈຸບັນ ພວກເຮົາໄດ້ຕັ້ງສູນຢູ່ກັບທີ່ ເພື່ອດໍາເນີນການສືບສວນ-ສອບສວນ ແລະ ຮັບແຈ້ງຈາກຊາວຄ້າຂາຍ ທັງພາຍໃນ ແລະ ຕ່າງປະເທດ ທີ່ໄດ້ຮັບຜົນ ກະທົບຈາກໄຟໄໜ້ໃນຄັ້ງນີ້ ສະນັ້ນ ຂໍໃຫ້ຜູ້ທີ່ຖືກຜົນກະທົບ ທັງໜົດເຂົ້າໄປແຈ້ງ ຜົນເສຍຫາຍທັງໜົດ ຂອງຕົນ ຕໍ່ເຈົ້າໜ້າທີ່ໃນໂມງລັດຖະການ. 




ແນວໃດກໍຕາມ ຜູ້ພັດທະນາຕະຫລາດຊັ່ງຈ່ຽງໄດ້ຖະແຫລງຂ່າວເຊັ່ນກັນໃນວັນທີ 17 ກໍລະກົດ 2017 ຜ່ານມານີ້ວ່າຕົນເອງຍັງບໍ່ຮູ້ສາເຫດໄຟໄໝ້ ແລະ ຍັງບໍ່ສາມາດປະເມີນໄດ້ມູນຄ່າເສຍຫາຍເພາະຍັງລໍຖ້າເກັບກໍາຂໍ້ມູນຈາກພໍ່ຄ້າແມ່ຄ້າທັງພາຍໃນ ແລະ ຕ່າງປະເທດມາແຈ້ງເຈດຈໍານົງຊັບສິນ ແລະ ເຄື່ອງຂອງທີ່ເສຍຫລາຍເປັນລາຍບຸກກ່ອນ.


ທີ່ມາ: ຂປລ 
------------------------------------------
ໂທລະໂຄ່ງ ໃຫ້ຫຼາຍກວ່າຄຳວ່າໂຄສະນາ
LINE ID: @tholakhong | Twitter ID: @tholakhong
tholakhong@gmail.com | www.tholakhong.com


No comments

Powered by Blogger.