Header Ads

ລາວ-ສ.ເກົາຫລີ ຫາລືຂະຫຍາຍໂອກາດທຸລະກິດ ຜ່ານສື່ເອເລັກໂຕຣນິກ



ສປປ ລາວ-ສ.​ເກົາຫລີ ​ສືບ​ຕໍ່​​ເພີ່ມ​ທະວີ​ການຮ່ວມ​ມື ​ໃນ​ຍຸກ​ໂລກາ​ພິວັດທີ່​ພວມ​ປະ​ເຊີນໜ້າ​ກັບ​ສິ່ງ​ທ້າ​ທາຍ ​ໃນ​ອະນາຄົດ​ດ້ວຍ​ວິທີ​ສ້າງ​ໂອກາດ ​ແລະ ​ຂະຫຍາຍ​ທຸລະ​ກິດ ​ໃນ​ຮູບ​ແບບ​ການ​ຄ້າ​ຜ່ານ​ສື່ເອເລັກໂຕຣນິກ ຂະນະ​ທີ່ ສ.​ເກົາຫລີ​ຍັງ​ແມ່ນ ​ຄູ່​ຮ່ວມ​ມື​ສໍາຄັນ​ທີ່​ສຸດ ​ແລະ ​ເປັນ​ປະ​ເທດ​ທີ່​ມີການລົງທຶນອັນ​ດັບ​ທີ 4 ​​ຈາກ​ການຈັດ​ອັນ​ດັບ​ຂອງ​ຜູ້​ລົງທຶນ​ຕ່າງປະ​ເທດ​ໃນ ສປປ ລາວ.

​ໂດຍ​ເຫັນ​ໄດ້​ຄວາມ​ສໍາຄັນ​ດັ່ງກ່າວ​ນັ້ນ ກະຊວງແຜນການ ແລະ ການລົງທຶນ ຮ່ວມມື ກັບ ສະພາການຄ້າ ແລະ ອຸດສາຫະກຳ ແຫ່ງຊາດລາວ  ແລະ ສູນອາຊຽນ-ເກົາຫລີ ຈັດກອງປະຊຸມ ສ້າງຂີດຄວາມສາມາດ ກ່ຽວກັບໂອກາດ ຂະຫຍາຍທຸລະກິດ ໃນຮູບແບບ E-commerce ຫລື ການດຳເນີນທຸລະກິດ ຜ່ານສື່ເອເລັກໂຕຣນິກ ຂຶ້ນ ໃນວັນທີ 5 ກໍລະກົດ 2017 ທີ່ນະຄອນຫລວງວຽງຈັນ ໂດຍການເປັນປະທານ ຂອງ ທ່ານ ຄຳລຽນ ພົນເສນາ ຮອງລັດຖະມົນຕີ ກະຊວງແຜນການ ແລະ ການລົງທຶນ, ທ່ານ KIM YOUNG-SUN ເລຂາທິການໃຫຍ່ສູນອາຊຽນ-ເກົາຫລີ ແລະ ທ່ານ YUN KANG-HYEON ເອກອັກຄະລັດຖະທູດ ວິສາມັນ ແຫ່ງສາທາລະນະລັດ ເກົາຫລີ ປະຈຳ ສປປ ລາວ ພ້ອມດ້ວຍນັກທຸລະກິດລາວ ແລະ ເກົາຫລີເຂົ້າຮ່ວມ.

ທ່ານ ຄຳລຽນ ພົນເສນາ ໄດ້ກ່າວວ່າ: ການຂະຫຍາຍທຸລະກິດ ໃນຮູບແບບ ການດຳເນີນທຸລະກິດ ຜ່ານສື່ເອເລັກໂຕຣນິກ  (ການຊື້-ຂາຍອອນລາຍ) ແມ່ນວຽກ​ງານໜຶ່ງ ທີ່ລັດຖະບານໄດ້ສົ່ງເສີມ ແລະ ເຫັນວ່າມີໂອກາດ ທີ່ຈະຂະຫຍາຍທຸລະກິດໄດ້ໄວ ເນື່ອງຈາກວ່າ ປັດຈຸບັນ ວິສາຫະກິດພາຍໃນລາວນັ້ນ ຫລາຍກວ່າ 90% ແມ່ນວິສາຫະກິດ ຂະໜາດກາງ ແລະ ຂະໜາດນ້ອຍ ເມື່ອມີການຄ້າຂາຍແບບ  E-commerce ​ເກີດ​ຂຶ້ນ​ຈະເຮັດໃຫ້ເກີດມີການ ແຂ່ງຂັນຫລາຍຂຶ້ນ ຈາກການ ເປີດເສລີທາງການຄ້າ ແລະ ການບໍລິການ. ການແຂ່ງຂັນດັ່ງກ່າວນີ້ ຈະເຮັດໃຫ້ວິສາຫະກິດ ມີການພັດທະນາ ເພື່ອສາມາດແຂ່ງຂັນ ກັບບັນດາປະເທດ ໃນພາກພື້ນ ແລະ ສາກົນ ແນວໃດກໍດີ ການເຮັດທຸລະກິດ ໃນຮູບແບບ E-commerce ນີ້ຍັງຖືເປັນບັນຫາໃໝ່ ແລະ ຍັງມີຄວາມທ້າທ້າຍ ຫລາຍສຳລັບຄົນລາວ ເປັນຕົ້ນແມ່ນ  ປະຊາຊົນສ່ວນໃຫຍ່ ຍັງບໍ່ມີຄວາມເຂົ້າໃຈ ໃນການເຮັດການຊື້-ຂາຍອອລາຍ E-commerce ຢ່າງເປັນລະບົບ ອີກຢ່າງໜຶ່ງການເຂົ້າເຖິງ ລະບົບອິນເຕີເນັດ ແມ່ນຍັງ ບໍ່ທົ່ວເຖິງ, ຍັງຂາດຄວາມຮູ້ທັກສະ ທາງດ້ານພາສາອັງກິດ ເຮັດໃຫ້ການ ການຊື້-ຂາຍ ອອນລາຍ ຍັງມີຄວາມຫຍຸງຍາກ ປັດຈຸບັນການຊື້-ຂາຍຜ່ານທາງ Facebook, Line ແລະ Instagram ກໍາລັງ ເປັນທີ່ແຜ່ຫລາຍ ໂດຍສະເພາະ ແມ່ນໄວໜຸ່ມລາວ ເຊິ່ງການຊື້-ຂາຍໃນລັກສະນະນີ້ ແມ່ນບໍ່ເປັນ ໄປຕາມລະບົບ E-commerce ແລະ ມີຄວາມສ່ຽງສູງ. ກອງປະຊຸມຄັ້ງນີ້ ຜູ້ເຂົ້າຮ່ວມໄດ້ຮັບຟັງ ຫລາຍບັນຫາສຳຄັນເຊັ່ນ: ກາລະໂອກາດ ໃນການຂະຫຍາຍທຸລະກິດໃນຮູບແບບ E-commerce ຢູ່ ສປປ ລາວ, ຮັບຟັງຍຸດທະສາດ ການພັດທະນາ E-commerce ຂອງປະເທດເກົາຫລີ, ບັນດານະໂຍບາຍ ແລະ ໂອກາດ ໃນການດຳເນີນທຸລະກິດ ໃນຮູບແບບ E-commerce ໃນຂະແໜງອຸດສາຫະກຳຂອງລາວ, ການເລີ່ມຕົ້ນ ໃນການ ສ້າງຕັ້ງທຸລະກິດ ສຳລັບວິສາຫະກິດ ຂະໜາດກາງ ແລະ ຂະໜາດນ້ອຍ ແລະ ຫົວຂໍ້ອື່ນໆ.

ຕາມ​ຂໍ້​ມູນ​ທັງ​ສອງ​ຝ່າຍ ​ໄດ້​ມີ​ການ​ເປີດ​ເຜີຍ​ວ່າ: ​ປັດຈຸບັນ​ນີ້ ການ​ລົງທຶນຂອງ ສ.​ເກົາຫລີ​ໃນ ສປປ ລາວ ​ມີ​ມູນ​ຄ່າ​ທັງ​ໝົດ 800 ລ້ານ​ໂດ​ລາ​ສະຫະລັດກັບ 250 ກວ່າ​ໂຄງການ ​ແລະ ຈັດ​ອັນ​ທີ 4 ຂອງ​ການ​ລົງທຶນຕ່າງປະ​ເທດ ຂະນະ​ທີ່​ການ​ຄ້າ​ສອງ​ສົ້ນ​ລະຫວ່າງ ສປປ ລາວ ​ແລະ ສ.​ເກົາຫລີ​ມີ​ປະມານ 200 ລ້ານ​ໂດ​ລາ​ສະຫະລັດ ​ໃນ​ນັ້ນ ສປປ ລາວ​ ສົ່ງ​ອອກ​ສິນຄ້າ​ບັນລຸ​ 22 ລ້ານ​ກວ່າ​ໂດ​ລາ​ສະຫະລັດ ທີ່​ກ່ຽວຂ້ອງ​ກັບ​ສິນຄ້າ​ປະ​ເພດ​ກາ​ເຟ, ​ແຮ່​ທາດ ​ແລະ​ ອື່ນໆ, ສ່ວນ ສ.​ເກົາຫລີ​ສົ່ງ​ອອກ ສປປ ລາວ ບັນລຸ​ 170 ລ້ານ​ກວ່າ​ໂລ​ດາສະຫະລັດປະກອບ​ມີ: ​ເຄື່ອ​ງເອ​ເລັກ​ໂຕຣ​ນິກ, ລົດ, ອາ​ໄຫລ່, ວັດ​ສະ​ດຸ​ກໍ່ສ້າງ ​ແລະ ອື່ນໆ.

ຂ່າວ:ກິດຕາ; ພາບ:ຄຳ/ຂປລ
------------------------------------------
ໂທລະໂຄ່ງ ໃຫ້ຫຼາຍກວ່າຄຳວ່າໂຄສະນາ
LINE ID: @tholakhong | Twitter ID: @tholakhong
tholakhong@gmail.com | www.tholakhong.com


No comments

Powered by Blogger.