Header Ads

ກະຊວງສຶກສາທິການ ແລະ ກິລາ ຍັງບໍ່ເປີດເຜີຍຕົວເລກ ຈໍານວນນັກສຶກສາເຂົ້າຮຽນຢູ່ ມຊ



ກະຊວງ​ສຶກສາ​ທິການ ​ແລະ ກິລາ ​ຍັງ​ບໍ່​ມີ​ການ​ເປີດ​ເຜີຍ​ຕົວ​ເລກ ​ຮັບ​ເອົາ​ນັກຮຽນ-ນັກ​ສຶກສາ​ເຂົ້າ​ຮຽນ ​ຢູ່​ມະຫາວິທະຍາ​ໄລ​ແຫ່ງ​ຊາດ​ແຫ່ງ​ຕ່າງໆ​ ທົ່ວ​ປະ​ເທດ​ສໍາລັບ​ສົກ​ປີ 2017-2018 ​ເຖິງ​ແມ່ນ​ວ່າມະຫາວິທະຍາ​ໄລ​ແຫ່ງ​ຕ່າງໆ​ ໄດ້ແຈ້ງການສອບເສັງເຂົ້າຮຽນທີ່ ມຊ ສົກສຶກສາ 2017-2018 ທີ່​ຈະ​ມີ​ຂຶ້ນ​ໃນວັນທີ 25 ກໍລະກົດ 2017 ນີ້ ຂະນະ​ທີ່ ສົກ​ປີ 2015-2016 ຜ່ານ​ມາ​ນີ້ ພາກ​ລັດ​ໄດ້​ຮັບ​ເອົາ​ຕົວ​ເລກ​ ນັກຮຽນ-ນັກ​ສຶກສາ​ເຂົ້າ​ຮຽນ​ຢູ່ ມຊ ປະມານ 5.000 ກວ່າຄົນ​ເທົ່າ​ນັ້ນ.

​ເຈົ້າ​ໜ້າ​ທີ່ ​ແລະ ຄູ​ອາຈານຢູ່​ມະຫາວິທະຍາ​ໄລ​ແຫ່ງ​ຊາດ​ ໄດ້​ເປີດ​ເຜີຍ​​ໃນ​ວັນ​ທີ 7 ກໍລະກົດ 2017 ນີ້​ວ່າ: ປັດຈຸ​ບັນ​ນີ້ ມະຫາວິທະຍາ​ໄລ​ແຫ່ງ​ຕ່າງໆ​ ທົ່ວ​ປະ​ເທດ​ຍັງ​ບໍ່​ຮັບ​ຮູ້​ກ່ຽວ​ກັບ​ ຕົວ​ເລກ​ຮັບ​ເອົາ​ນັກຮຽນ​ເຂົ້າ​ ໃນ​ສະ​ຖາ​ບັນ​ຂອງ​ພວກ​ຕົນ​ເອງ​ເທື່ອ​ ​ເນື່ອງ​ຈາກ​ວ່າ​ກະຊວງ​ສຶກສາ​ທິການ ​ແລະ ກິລາ​ ຍັງ​ປຶກສາ​ຫາລື ​ແລະ ພິຈາລະນາຄວາມ​ເປັນ​ໄດ້​ແຕ່​ລະ​ດ້ານ​ຢູ່.

ຫລ້າ​ສຸດ ມະຫາວິທະຍາ​ແຫ່ງ​ຊາດ​ ໄດ້​ມີ​ແຈ້ງການສອບເສັງເຂົ້າຮຽນທີ່ ມຊ ສົກສຶກສາ 2017-2018 ດັ່ງ​ນີ້ວັນທີ 28 ມິຖຸນາ 2017 ເລີ່ມຂາຍຄໍາຮ້ອງສະໝັກສອບເສັງ, ວັນທີ 19 ກໍລະກົດ 2017 ຈະ​ໄດ້​ປິດຮັບຄໍາຮ້ອງລົງທະບຽນ ສະໝັກສອບເສັງ ​ແລະ ວັນທີ 25 ກໍລະກົດ 2017 ຈະ​ເປັນ​ວັນສອບເສັງຢ່າງ​ເປັນ​ທາງ​ການ. 

​ແນວ​ໃດ​ກໍດີ ສໍາລັບ​ສົກ​ຮຽນ​ປີ 2016-2017 ນີ້ ມີນັກ​ຮຽນມັດ​ທະ​​ຍົມ​ຕອນ​ປາຍ ຫລື ມ 7 ທົ່ວ​ປະ​ເທດ​ເຂົ້າ​ຮ່ວມ​ສອບ​ເສັງ​ຈົບ​ຊັ້ນ​ປະມານ 60.000 ກວ່າ​ຄົນ. 

ໃນສົກຮຽນ 2015-2016 ນີ້ມີນັກຮຽນມາຈາກບັນດາແຂວງ ໃນຂອບເຂດທົ່ວປະເທດ ລວມທັງໃນນະຄອນຫຼວງວຽງຈັນ ໄດ້ເຂົ້າຮ່ວມສອບເສັງຊີງໂຄຕາ ຫລື ຕົວ​ເລກເພື່ອເຂົ້າຮຽນທີ່ ມະຫາວິທະຍາ ໄລແຫ່ງຊາດ (ມຊ) ເກືອບ 20 ພັນຄົນ ຂະນະທີ່ ຮັບເອົາມີພຽງ 5 ພັນຄົນເທົ່ານັ້ນ ສ່ວນເຫຼືອແມ່ນໃຫ້ໄປຮຽນວິຊາຊີບ.
            
ສົກຮຽນຜ່ານ​ມານີ້
, ໂດຍອີງໃສ່ສະຖິຕິນັກຮຽນທີ ຈົບ ມ7 ໃນທົ່ວປະເທດ ມີ 50 ພັນຄົນ. ສະເພາະນະຄອນຫຼວງວຽງຈັນ ມີ 9 ພັນກວ່າຄົນ. ສະນັ້ນ ຈາກສະຖິຕິດັ່ງກ່າວ ຈຶ່ງສາມາດ ເວົ້າໄດ້ວ່ານັກສຶກສາ ມີອັດຕາ ເພີ່ມຂຶ້ນກວ່າປີຜ່ານມາ ເນື່ອງຈາກສົກຮຽນນີ້, ມີນັກຮຽນເຂົ້າມາສອບເສັງເຖິງ 17-18 ພັນຄົນ ແລະ ສູນສອບເສັງແມ່ນແບ່ງອອກເປັນ 18 ຈຸດສອບເສັງ. ໃນນັ້ນ, ວິທະຍາເຂດດົງໂດກ ແມ່ນມີ 12 ຈຸດ ແລະ ທັງ 12 ຈຸດ ນັ້ນໄດ້ແຕ່ງຕັ້ງຄະນະ ກຳມະການຮັບຜິດຊອບ ໂດຍໄດ້ກຳນົດໃນການບໍລິຫານຄຸ້ມຄອງ ການສອບເສັງ ແລະ ອີກ 6 ຈຸດສອບເສັງແມ່ນຢູ່ໂສກປ່າຫຼວງຄື: 1. ຄະນະນິຕິສາດ ແລະ ລັດຖະສາດ (ດອນນົກຂຸ້ມ), 2. ວິທະຍາໄລເຕັກນິກຊັບພະວິຊາ, 3. ຄະນະວິສະວະກຳສາດ, ແລະ ອີກ 3 ຈຸດສອບເສັງແມ່ນຢູ່ ໂຮງຮຽນ ມັດທະຍົມສົມບູນວຽງຈັນ, ໂຮງຮຽນມິດຕະພາບລາວ-ຫວຽດນາມ (ຫຼັກ 5), ມັດທະຍົມປາຍ ມິດຕະພາບວຽງຈັນໂຮ່ຈີ່ມິນ, ສ່ວນຫ້ອງສອບເສັງ ແມ່ນບັນຈຸຫ້ອງລະ 20 ຄົນ ຫຼື ບາງຫ້ອງ 30 ຄົນ, ໃນການກະກຽມ ແລະ ຫົວບົດສອບເສັງ ແມ່ນໄດ້ປະຕິບັດຕາມທິດຊີ້ນຳ ຂອງກະຊວງສຶກສາທິການ ແລະ ກິລາ ໃນດ້ານມາຕະຖານຂໍ້ສອບ, ເນື້ອໃນການຈັດການ ແມ່ນໄດ້ປະຕິບັດເປັນ ເອກະພາບໃນທົ່ວປະເທດ. ທັງນີ້ ກໍເພື່ອເປັນການຮັບປະກັນ ໃນຄວາມໂປ່ງໃສ ບໍ່ໃຫ້ມີການຮົ່ວໄຫລ ທາງຄະນະຮັບຜິດຊອບ ໄດ້ຖອດຖອນບົດຮຽນ ໃຫ້ກັບບັນດາກຳມະການ, ກົດລະບຽບ, ຜູ້ຍາມຫ້ອງເສັງ, ນັກຮຽນທີ່ເຂົ້າສອບເສັງ ຕ້ອງປະຕິບັດກົດລະບຽບຢ່າງເຂັ້ມງວດ.

ພາບ ແລະ ຂ່າວ: ຂປລ  
------------------------------------------
ໂທລະໂຄ່ງ ໃຫ້ຫຼາຍກວ່າຄຳວ່າໂຄສະນາ
LINE ID: @tholakhong | Twitter ID: @tholakhong
tholakhong@gmail.com | www.tholakhong.com


No comments

Powered by Blogger.