Header Ads

ທ່ານ ບຸນທອງ ຈິດມະນີ ຮຽກຮ້ອງໃຫ້ອົງຄະນະກວດກາສູນກາງ ແລະ ອົງການກວດກາລັດຖະບານເພີ່ມທະວີວຽກງານຕິດຕາມ ສະກັດກັ້ນຕ້ານການສໍ້ລາດບັງຫຼວງ



ໃນວັນທີ 21 ກໍລະກົດ 2017 ຜ່ານມານີ້ ທ່ານບຸນທອງ ຈິດມະນີ ກຳມະການກົມການເມືອງສູນກາງພັກ, ເລຂາທິການສູນກາງພັກ, ຮອງນາຍົກລັດຖະມົນຕີ, ເລຂາຄະນະພັກ ປະທານຄະນະກວດກາສູນກາງພັກ, ປະທານອົງການກວດກາລັດຖະບານ, ຫົວຫນ້າອົງການຕ້ານການສໍ້ລາດບັງຫຼວງຂັ້ນສູນກາງ ໄດ້ມີຄຳເຫັນຕໍ່ການດໍາເນີນຊີວິດການເມືອງປັບປຸງປົວແປງພັກ ຂອງອົງຄະນະພັກຄະນະກວດກາສູນກາງພັກ, ປະທານອົງການກວດກາລັດຖະບານດັ່ງນີ້

1. ໃຫ້ຄະນະພັກ, ສະມາຊິກພັກ ສືບຕໍ່ເພີ່ມທະວີວຽກງານສຶກສາອົບຮົມການ ເມືອງ-ແນວຄິດ ໃຫ້ແກ່ສະມາຊິກພັກ, ພະນັກງານ-ລັດຖະກອນ ທີ່ຢູ່ໃນຄວາມຮັບຜິດຊອບຂອງຕົນ ກໍາແໜ້ນມະຕິກອງປະຊຸມໃຫຍ່ ຄັ້ງທີ X ຂອງພັກ, ບັນດາມະຕິ, ຄໍາສັ່ງຂອງພັກ, ກົດໝາຍ ແລະ ລະບຽບການຂອງລັດ ໃຫ້ເລິກ ເຊິ່ງ ຕິດພັນກັບການແກ້ໄຂພະຍາດອາດຍາສິດ, ແນວຄິດເອກະຊົນ, ຮັກສາເດີມ, ຈົ່ງຈຽມ, ເອື່ອຍອີງ, ລໍຖ້າຄໍາສັ່ງ, ຂີ້ຄານມັກງ່າຍ, ປຽບທຽບຊັ່ງຊາ ແລະ ອື່ນໆ.

2. ສືບຕໍ່ນໍາພາຄົ້ນຄວ້າສ້າງກົນໄກລະບອບ ລະບຽບການ ກ່ຽວກັບວຽກງານກວດກາ ຕາມທີ່ໄດ້ກໍາ ນົດໄວ້ໃນມະຕິກອງປະຊຸມໃຫຍ່ ຄັ້ງທີ X ຂອງພັກ, ມະຕິຄະນະບໍລິຫານສູນກາງພັກ ເລກທີ 022/ ຄບສພ, ມະຕິກອງປະຊຸມວຽກງານກວດກາທົ່ວປະເທດ ຄັ້ງທີ III ແລະ ມະຕິກອງປະຊຸມໃຫຍ່ ຄັ້ງທີ III ຂອງອົງຄະນະພັກຄະນະກວດກາສູນກາງພັກ-ອົງການກວດກາລັດຖະບານ.

3. ເພີ່ມທະວີວຽກງານຕິດຕາມ ກວດກາພັກ, ກວດກາລັດ, ສະກັດກັ້ນຕ້ານການສໍ້ລາດບັ້ງຫຼວງ, ການຄົ້ນຄວ້າແກ້ໄຂຄໍາຮ້ອງ-ຄໍາສະເໜີຂອງພົນລະເມືອງ ທີ່ມີຕໍ່ການຈັດຕັ້ງພັກ, ອົງການບໍລິຫານລັດ, ສະມາຊິກພັກ ແລະ ພະນັກງານ.

4. ສືບຕໍ່ພົວພັນຮ່ວມມືແລກປ່ຽນບົດຮຽນ ກັບບັນດາປະເທດເພື່ອນມິດ, ພາກພື້ນ ແລະ ອົງການ ຈັດຕັ້ງສາກົນ ກ່ຽວກັບວຽກງານກວດກາ, ສະກັດກັ້ນຕ້ານການສໍ້ລາດບັ້ງຫຼວງ.

5. ສືບຕໍ່ປັບປຸງກົງຈັກການຈັດຕັ້ງ, ການບໍາລຸງກໍ່ສ້າງພະນັກງານ ຍົກລະດັບວິຊາສະເພາະດ້ານ ຕ່າງໆ ຫັນລົງຮາກຖານເພື່ອທົດສອບໃນວຽກງານຕົວຈິງ; ຂຶ້ນແຜນກໍານົດ, ຈັດຕໍາແໜ່ງງານ, ຄຸ້ມຄອງ, ປ້ອງກັນ, ຈັດວາງຊັບຊ້ອນ ແລະ ປະຕິບັດນະໂຍບາຍດ້ານຕ່າງໆຕໍ່ພະນັກງານ ຕາມນະໂຍບາຍຂອງ ພັກ, ລະບຽບການຂອງລັດ ວາງອອກ.

6. ເພີ່ມທະວີວຽກງານກໍ່ສ້າງພັກ ໃຫ້ເຂັ້ມແຂງ ທັງ 4 ດ້ານຄື: ດ້ານການເມືອງ, ແນວຄິດ, ການ ຈັດຕັ້ງ ແລະ ແບບແຜນວິທີນໍາພາ; ກໍ່ສ້າງໜ່ວຍພັກເຂັ້ມແຂງຮູ້ນໍາພາຮອບດ້ານ ໃຫ້ໄດ້ຕາມຄາດໝາຍທີ່ໄດ້ກໍາໄວ້ໃນມະຕິກອງປະຊຸມໃຫຍ່ ຄັ້ງທີ III ຂອງອົງຄະນະພັກ.

7. ປັບປຸງແບບແຜນນໍາພາ ແລະ ວີທີເຮັດວຽກ ຂອງຄະນະພັກ, ຄະນະໜ່ວຍພັກ ຕາມຫຼັກການ ຂອງພັກ; ຢຶດໝັ້ນຫຼັກການລວມສູນປະຊາທິປະໄຕ ນໍາພາເປັນໝູ່ຄະນະ, ແບ່ງງານໃຫ້ບຸກຄົນຮັບຜິດ ຊອບ, ປະຕິບັດລະບອບປະຊຸມ, ການລາຍງານສ່ອງແສງ, ຖອດຖອນບົດຮຽນໃຫ້ເປັນປົກກະຕິ; ແກ້ໄຂ ແບບແຜນວິທີເຮັດວຽກ ທີ່ຊັກຊ້າແກ່ຍາວ.

ຂ່າວຈາກ: ຄະນະກວດກາສູນກາງພັກ-ອົງການກວດກາລັດຖະບານ
------------------------------------------
ໂທລະໂຄ່ງ ໃຫ້ຫຼາຍກວ່າຄຳວ່າໂຄສະນາ
LINE ID: @tholakhong | Twitter ID: @tholakhong
tholakhong@gmail.com | www.tholakhong.com



ກົດພາບອ່ານລາຍລະອຽດ

No comments

Powered by Blogger.